Creeyninchej pruebapi kajtin Jehovata sirvinallapuni

1, 2. ¿Imataj pasarqa Jesús Capernaumpi yachachishajtin?

UJ DÍA Jesusqa Capernaumpi ashkha runasman yachachisharqa. Chaypitaj paykunaman nerqa: “Manachus noqaj aychayta mikhunkichej, nitaj yawarniytapis ujyankichej chayqa, mana kausayta japʼinkichejchu”, nispa. Chantá nillarqataj: “Pichus aychayta mikhun, yawarniytataj ujyan chayqa, wiñay kausayta japʼenqa, noqataj qhepa kaj pʼunchaypi kausarichisaj”, nispa (Juan 6:53, 54). Ashkha discipulosnintaj chay nisqanta mana allinpajchu qhawarqanku. Chayrayku nerqanku: “¡Imatataj parlashanri! ¿Pitaj chayta uyarinmanri?”, nispa (Juan 6:60).

² Chay runasqa Jesuspa nisqanta uyarispa maytapuni phiñakorqanku. Chayrayku niña qhepanta rerqankuchu. ¿Chayta ni tumpata Jesuspi creesqankuraykuchu ruwarqanku? Manasina. Wakenqa Jesuspi creerqankusina. Imajtinchus chaymanta ñaupajllata Jesús uj milagrota ruwasqanta rikuspa nerqanku: “Kay runaqa kay mundoman jamunan karqa chay Profetapuni”, nispa (Juan 6:14). Jinapis creeyninku pruebaman churasqa kajtin Jesusta saqeporqanku.

3. ¿Imatá apóstoles ruwarqanku Jesuspa nisqanta uyarispa, chanta imaraykutaj? (Dibujotawan qhawariy).

³ Apostolesrí, ¿imatá ruwarqanku? ¿Jesusta saqerpallarqankutajchu? Mana. Jesús paykunata “¿qankunapis ripullankichejtajchu?” nispa tapojtin, Pedroqa kuticherqa: “Señor, ¿pimantaj ripuykumanri? Nisqasnillayki wiñay kausayman pusan. Noqaykoqa creeyku, yachaykutaj qanqa Diospa kachamusqanpuni kasqaykita”, nispa (Juan 6:68, 69). Pedrowan apostoleswanqa manasina allinta entienderqankuchu Jesús ‘aychayta mikhunkichej, yawarniytapis ujyankichej’ nispa nisqanwan imatachus niyta munasqanta. Jinapis mana Jesusta saqerparqankuchu. Imaraykuchus paykunaqa mana iskayrayarqankuchu Jesusqa “Diospa kachamusqan Cristo” kasqanmanta (Luc. 9:20, 35).

4. ¿Ima kutispitaj creeyninchej pruebaman churasqa kanman?

⁴ Noqanchejpis kay tiempopi ashkha pruebaspi rikukusunman, chay kutispitaj ichapis Jehovata sirviyta saqepuyta munasunman. Por ejemplo ichapis Diospa llajtanqa, Bibliamanta uj textota imaynatachus ñaupajta entiendesqanchejta, kunanqa uj jinamantañataj entiendesqanchejta sutʼinchanman. Chayri uj jinamantañataj predicakunanta ninman. Chantapis ichá mana entiendeyta atillasunmanchu, imaraykuchus Jehová uj sinchʼi llakiypi rikukunanchejta saqesqanta. Chayri ichapis sumaj amigonchej chay hermano sonqonchejta nanachiwasunman, chayri mayta respetanchej chay hermano ima sajratapis ruwawasunman. Chay imasmanta mayqellanpis pasawajtinchej, ¿imatá ruwasun?

5. ¿Imaraykutaj creeyninchejta sinchʼiyachinallanchejpuni tiyan? Kikinchariy (Colosenses 1:23).

⁵ Imapi rikukuspapis Jehovata mana wasanchanapajqa, paypi sinchʼita creenanchej tiyan. Maypichus terremotos kayta yachan chay lugarpi ruwasqa wasipi piensarina. Chay waseqa mana urmaykunanpaj sumaj cimientosniyoj kanan tiyan. Ajinallatataj noqanchejpis ñaupaj parrafopi parlarerqanchej chay imaspi rikukuspa sinchʼita sayanapajqa, nisunman Jehovata mana wasanchanapajqa, sinchʼi creeyniyoj kananchej tiyan. Chayrayku creeyninchejta astawan sinchʼiyachinallapuni tiyan. Ajinamanta ima kajtinpis Jehovata sirvillasunpuni (1 Cor. 15:58; Colosenses 1:23 leey).

6. ¿Imataj apostolesta yanaparqa Jesusta mana saqerparinankupaj?

⁶ ¿Imataj apostolesta yanaparqa Jesusta mana saqerparinankupaj, wajkuna saqerparejtinkupis? Paykunaqa sutʼita yacharqanku Jehová tukuy imata ruwasqanrayku payllata yupaychananku kasqanta. Mana iskayrayarqankuchu Jesusqa Diospa Wawanpuni kasqanmanta, ‘nisqasnillantaj wiñay kausayman pusasqanmanta’. Nillataj iskayrayarqankuchu Jehovaqa Jesuspa ruwashasqanwan kusisqa kashasqanmanta. Kunanqa imaschus creeyninchejta pruebaman churayta atisqanmanta siga parlanallamantapuneqa, parlarisunchej kinsa imaspi creeyninchej sinchʼi sayasqa kasqanmanta. Chaytaj yanapawasun imapi rikukuspapis Jehovata sirvinallapajpuni. Uj kaj, Jehová tukuy imata ruwarqa. Iskay kaj, Jehová Bibliata qhelqacherqa. Kinsa kaj, Jehová kay tiempopi llajtanta yanapashan. Chay imasmanta ni tumpitata iskayrayasunchu chayqa, imapi rikukuspapis Jehovata sirvillasunpuni.

JEHOVÁ TUKUY IMATA RUWARQA

7. 1) ¿Imatá Apocalipsis 4:11 yuyarichiwanchej? 2) ¿Imaynatá chayta yachay yanapawanchej ima pruebapipis kashajtinchej?

⁷ (Apocalipsis 4:11 leey). Kay versículo yuyarichiwanchej Jehová tukuy imata ruwasqanta. Chayraykutaj payllata yupaychananchej tiyan. Chantapis Jehovaj tʼukuna atiyninpi piensarejtinchejqa, astawan convencekunchej ima pruebapi rikukojtinchejpis yanapanawanchejmantapuni. Jinapis Satanasqa kay mundota llulla yachachiykunawan juntʼaykuchin. Chaytataj ruwan Dios kasqanmantapuni iskayrayachinawanchejpaj. May rejsisqa cientificosmanta wakinpis ninku kausayqa jinallamanta rikhurisqanta. Jinapis Jehová tukuy imata ruwasqanmanta, munakuwasqanchejmantapis convencesqas kasun chayqa, ima pruebapi kaspapis mana iskayrayasunchu Dios kasqanmantapuni, yanapanawanchejmantapunitaj (Heb. 11:6).

8, 9. Jehová kasqanmantapuni iskayrayayta qallarinki chay, ¿imatá ruwawaj? (Fototawan qhawariy).

⁸ Jehová kasqanmantapuni iskayrayayta qallarinki chay, ¿imatá ruwawaj? Chay rato publicacionesninchejpi maskʼay Diospuni tukuy imata ruwasqanmanta parlaj yachaqanasta. Chaypeqa creeyniykita sinchʼiyachinanpaj jina may chhika pruebasta tarinki. Por ejemplo kay folletos tiyan: ¿Es la vida obra de un Creador? Chantá El origen de la vida. Cinco cuestiones dignas de análisis. Jw.org paginapipis kallantaj “¿Pitaj ruwanman karqa?” nisqa parte. Estados Unidosmanta Jessica sutiyoj sipas hermana nin: “El origen de la vida nisqa folletota leeytawan, sutʼita repararqani ashkha imasqa Dios kasqantapuni rikuchisqanta. Chaytaqa yacharqaniña. Jinapis chay folletopi imatachus nisqanta leeytawan, niña ni tumpitata iskayrayarqanichu”, nispa. Ashkha hermanostaqa ¿Existe un Creador que se interese por nosotros? nisqa libro yanapallarqataj. Ichapis chaykunata leerqankiña, jinapis ujtawan leeriwaj.

⁹ Imaschus Dios kasqantapuni rikuchisqanta sapallaykipi astawan estudiaspaqa, mana creeynillaykitachu astawan sinchʼiyachinki, manaqa Jehovata aswan sumajta rejsinki (Rom. 1:20). Chantapis chay yachakusqaykiwanqa Dios kasqanmantapuni iskayrayanku chaykunatapis yanapayta atinki. Jehovaqa ashkha imasta ruwasqanpi sutʼita rikuchiwanchej paypuni Ruwawajninchej kasqanta.

Nebulosa: IAC/RGO/David Malin Images; pescadowan autowan: Mercedes-Benz USA; avión: Kristen Bartlett/University of Florida

JEHOVÁ BIBLIATA QHELQACHERQA

10. ¿Imaynatá Bibliata qhawanchej? (2 Timoteo 3:16, 17).

¹⁰ (2 Timoteo 3:16, 17 leey). Bibliapeqa imatachus Dios runasman niyta munawasqanchej qhelqasqa kashan. Chaypeqa runaspa tapuykunasninkuman kutichin. Chantapis willawanchej imachus Diospa munaynin kasqanta, imatatajchus ruwananchejta munasqantapis. Bibliataqa Jehovapuni qhelqacherqa. Chayrayku may jatunpaj qhawanchej. Chantapis kallpachakunchej sumajta entiendenapaj, chayman jinataj kausakunapaj.

11. ¿Imaraykutaj creenki Bibliata Diospuni qhelqachisqanta?

¹¹ ¿Imaraykutaj ninchej Bibliata Diospuni qhelqachisqanta? Ashkha imasrayku. Por ejemplo ñaupa tiempopi imaschus pasasqanmanta parlaspa maychus kajta parlan (Luc. 3:1, 2). Chantapis jallpʼamanta, cielomanta, yakumanta, waj imasmantawan imatachus nisqanqa maychus kajpuni (Job 26:7). Satanás Bibliata ashkha kutispi chinkachiyta munajtinpis, Bibliaqa ni mayqen libro jina may chhika runaspata kapun, aswan ashkha idiomasmantaj traducikun. 1.600 wataspi jina 40 runas qhelqajtinkupis, enteron Bibliaqa uj yuyaylla kashan, nitaj churanakunchu. Yuyaychaykunasnenqa may chhika runasta yanaparqa, kunankamapis ñaupa tiempopi jina yanapashallawanchejpuni (Pro. 13:20; 15:21; Mat. 7:12). Chantapis Bibliamanta ashkha profeciasqa juntʼakorqankupuni (Jos. 23:14). Chay imasrayku ninchej Bibliataqa Diospuni qhelqachisqanta.

12. Bibliata Diospuni qhelqachisqanmanta iskayrayayta qallarinchej chay, ¿imatá ruwasunman?

¹² Bibliata Diospuni qhelqachisqanmanta iskayrayayta qallarinchej chay, ¿imatá ruwasunman? Orakuna, chayman jinataj ruwana. Qhawarina imatachus Jordan sutiyoj joven hermanonchej ruwasqanta. Payqa wawitamantapacha testigo familiapi uywakorqa. Pay nin: “Mana tukuy ima niwasqankutapunichu creeykunipacha. Ñaupajtaqa cheqachus manachus kasqanta qhawaykuriytarajpuni yachani. Wakin kutisqa iskayrayanipuni. Chay kutispitaj publicacionesninchejpi investigani manaña iskayrayanaypaj”, nispa. Jehovapuni Bibliata qhelqachisqanmanta astawan convencekusun chayqa, creeyninchejta astawan sinchʼiyachisun (1 Cor. 3:12, 13).

JEHOVÁ KAY TIEMPOPI LLAJTANTA YANAPASHAN

13. ¿Imatá ruwasunman Diosqa Jehovaj testigosnillanta llajtanta jina allinpaj qhawasqanmanta iskayrayayta qallarejtinchej?

¹³ Diosqa kay tiempopi Jehovaj testigosnillanta llajtanta jina allinpaj qhawan. Chaymanta iskayrayayta qallarinchej chay, ¿imatá chay rato ruwasunman? Kay tapuykunapi piensarisunman: “¿Pikunataj kay tiempopi cheqamantapuni kallpachakushanku Bibliaj kamachiykunasninman jinapuni kausakunankupaj? ¿Ima religiontaj Bibliaj nisqanman jinapuni yachachin? ¿Pikunataj kay tiempopi Jehovaj munayninta ruwashanku?” (2 Tim. 4:3, 4; Mat. 7:20, 21).

14. ¿Imaynatá Jehovaj testigosnin Mateo 24:14 versiculopi nisqanta juntʼashanchej?

¹⁴ Diosqa munan niraj kay sajra mundota chinkachishajtin, jallpʼantinmanta tukuy runasman sumaj willaykuna willakunanta. Chayrayku kayta tapurikusunman: “¿Pikunataj chayta kay tiempopi ruwashanku?” (Mat. 24:14). Chayqa sutʼi reparay kashan, Jehovaqa llajtannejta chayta ruwashan. Arí, Jehovaj testigosnillan 240 kuraj suyuspi chayri lugarespi, Diospa Gobiernonmanta sumaj willaykunata willashanchej. Chaytataj 100 watas kurajtaña ruwashanchej. Arí, unaymantapachaña predicayta, runasman yachachiytapis ñaupajman churashanchej (Mat. 28:19, 20).

15. ¿Imaynatá Jehovaj testigosnin yanapakunchej Diospa sutin jatunchasqa kananpaj? (Mateo 6:9; Isaías 43:10).

¹⁵ (Mateo 6:9; Isaías 43:10 leey). Noqanchejqa Jehovaj sutinta apanchej, Jehovaj testigosnin sutiwan rejsisqa kaytataj may jatunpaj qhawanchej. Kay tiempopi ashkha runasqa mana yachankuchu Diospa sutin Jehová kasqanta. Jinapis noqanchejqa mayta kallpachakorqanchej, maypichus ñaupa qhelqasqaspi Diospa sutin rikhurej chay kikin lugarsituman Bibliapi churaykapunapaj. Chayrayku Mosoj Jallpʼapi Kausajkunapaj Diospa Palabran Bibliapeqa, 7.000 kutismanta astawan Diospa sutin rikhurin.

16. ¿Imaraykutaj ninchej Jehovaj testigosnin Juan 13:34, 35 versiculospi nisqanta juntʼashasqanchejta? (Fototawan qhawariy).

¹⁶ (Juan 13:34, 35 leey). Kay sajra mundopi runasqa mana uj yuyayllaman chayayta atinkuchu, chejninakunkutaj. Jinapis Diospa llajtanpeqa cheqamantapuni munanakunchej, ujchasqataj kanchej. Tukuy laya suyusmanta kanchej, waj jina culturasniyoj kanchej, nitaj kikin uywasqaschu kanchej. Jinapis kallpachakunchej tukuywan allinta kausakunapaj, purajmantataj munanakunapaj. ¿Maykʼajllapis waj congregacionta visitarerqankichu, ichapis waj suyuman viajashaspa? Ajina chayqa, repararqankichá Jehovaj kamachisnenqa mundo enteropi uj familia jinalla kasqanchejta, maytataj munanakusqanchejta. Chaypi sutʼita reparanchej Jehovaqa noqanchejnejta munayninta juntʼashasqanta. Chayta yachayqa yanapawasun ima pruebapi kashajtinchejpis manapuni Jehovamanta kacharikunapaj.

AMAPUNI JEHOVATA SAQERPANACHU

17, 18. ¿Imastaj creeyninchejta pruebaman churanman, jinapis imatá niyta atisun?

¹⁷ Qhepa pʼunchaykunapi kausakusqanchejrayku, kay sajra mundopi kausayqa mana atikullanchu (2 Tim. 3:1, 13). Ichapis wakin imaspi rikukusun, chaytaj creeyninchejta pruebaman churanqa. Por ejemplo ichá Diospa llajtanqa wakin imasta ajllanqa, chaytataj mana tukuyninta entiendeyta atillasunchu. Manachayri ichá yuyasunman uj hermano chayri uj hermana sonqonchejta nanachiwasqanchejta, chayri ima sajratapis ruwawasqanchejta. Chantapis ichá mana yachasunchu imaynatachus problemanchejta allinchanata, chayri mana entiendesunchu imaraykuchus imapis pasashasqanta.

¹⁸ Jehová tukuy imata ruwasqanmanta, Biblia Diospa Palabranpuni kasqanmanta, Jehovaj testigosnintaj paypa llajtanpuni kasqanchejmanta mana iskayrayasunchu chayqa, imapi rikukusqanchejrayku mayta sufrispapis manapuni Jehovamanta karunchakusunchu. Noqanchejpis Pedro jinallataj Jehovaman niyta atisun. Pay Jesusman nerqa: “¿Pimantaj ripuykumanri? Nisqasnillayki wiñay kausayman pusan”, nispa.