Ñawiriqkuna yachayta munanku
¿Chiqamantapunichu Jatun Para Jallpʼata pʼampaykurqa?
Jatun Para kasqanmanta kunankamaqa, tawa waranqa watas pasan. Chayrayku kunan tiempopiqa, manaña pipis chay tiempomanta kawsachkanñachu, sutʼita willanawanchikpaq imaynachus Jatun Para kasqanmanta. Chaywanpis, juk libropi qillqasqa kachkan imaynatachus Jatun Para tukuy Jallpʼata, aswan jatun kaq urqustawan, pʼampaykusqanmanta.
Chay libroqa nin: “Jatun musphay para jichʼakorqa tawa chunka pʼunchaykunata [...]. Yakoqa manchayta wicharispa, tukuy jallpʼata pʼampaykorqa, kay pachapi aswan jatun kaj orqosnintinta. Chay orqosta pʼampaykuytawan, yakoqa qanchis metrostawan jinaraj wicharerqa chay orqos patamanta”, nispa (Génesis 7:17-20).
Ichá wakinkunaqa, mana creenkumanchu tukuy Jallpʼanchik yakuwan pʼampasqa kasqanta, chayraykutaq ninkuman Jatun Para juk cuentolla kasqanta, chayri kuraqta parlasqankuta. Chaywanpis, chiqamanta yaku tukuy Jallpʼata pʼampaykusqantapuni ninchik, imaraykuchus Jallpʼanchikqa, 71% yaku. Chayrayku, Jatun Paramanta yakusqa Jallpʼanchikpiraq kachkan. Jatuchaq chhullunkas sururpankuman chayqa, mama quchapi yakuqa wicharispa, Nueva York, Tokio suyuta ima pʼampaykunman.
Jallpʼamanta yachaq runasqa, Estados Unidos suyupi, astawan jaqayniqpi rikusqanku, jallpʼata pachak kutita yaku pʼampaykusqanta. Rikusqankutaq chaypachapi mama quchap yakusnin 600 metrostapuni uqharikusqanta, chanta 105 kilometrosta juk horallapi corresqanta ima. Wak jallpʼaspi kikillantataq rikusqankurayku, yachayniyuq runasqa, Jatun Para kasqantapuni ninku.
Chaywanpis, pikunachus Biblia, Diospa Palabran kasqanta creeqkunaqa, chiqamantapuni Jatun Para kasqanta ninku. Juk kutipi Jesusqa, Tatanman nirqa: “Nisqasniykeqa cheqapuni kanku”, nispa (Juan 17:17). Apóstol Pablotaq qillqarqa: “[Diosqa] munan tukuy runas salvasqa kanankuta, cheqa kajtataj rejsinankuta”, nispa (1 Timoteo 2:3, 4). Diospa Palabran, cuentoswan chhapusqa kanman karqa chayqa, ¿apóstol Pablo Jesuspa qhipanta puriqkunaman, chiqa kaqta yachachiyta atinmanchu karqa?
Jesusqa mana Jatun Para kasqallantachu yacharqa, manaqa tukuy Jallpʼa yakuwan pʼampasqa kasqanta yacharqa. Jesusqa, imachus kutimuyninpi, kay pachap tukukuyninpi ima rikukunanta, Noep tiemponpi imachus rikukusqanwan kikincharqa (Mateo 24:37-39). Astawanpis, apóstol Pedro qillqarqa: “Chay yakullawantaj chaypacha runasqa yakoj pʼampasqan chinkarqanku” (2 Pedro 3:6).
Noé, Jatun Para ima, juk cuentolla kanman karqa chayqa, apóstol Pedro, Jesús ima nisqankuqa, qhipa pʼunchaykunapi kawsaqkunapaqqa, qhasipaq kanman karqa. Chantapis juk cuentolla kanman karqa chayqa, nisqankuwanqa, runasta Diospa munayninta ruwanankupaq yanapanankumantaqa, jatun ñakʼariy tiempomanta salvakunankupaq, imatachus ruwanankumanta iskaychachichkankuman karqa (2 Pedro 3:1-7).
Jehová, Israel llaqtaman achkha kutispi khuyakuyninta rikuchisqanmanta parlaspa nin: “Kay imastaqa Noejpa pʼunchaynimpi jina ruwasaj. Chaypacha juraspa nerqani manaña jaykʼajpis yakoqa kay pachata pʼampananta. Ajinata kunanqa juraspa nini manaña ujtawan qampaj phiñakunayta, manañataj kʼamisunayta”, nispa. Arí, imaynatachus mana iskaychakuspa Jatun Para tukuy Jallpʼata pʼampaykusqanta ninchik, ajinallatataq mana iskaychakuspa nisunman Diosninchik khuyakuyninpi, kʼacha kayninpi ima, paypi atieneqkunata jarkʼananta (Isaías 54:9).