¿Noej tiemponpi Jatun Para karqapunichu chayri cuentollachu?

Biblia nin

Jatun Paraqa karqapuni. Chaytaqa Dios apachimorqa sajra runasta chinkachinanpaj. Chantapis Noeta kamacherqa uj jatun arcata ruwananta. Ajinamanta kʼacha runas, animalespis salvakunankupaj (Génesis 6:11-20). Chantapis Jatun Para kasqanmanta mana iskayrayanchejchu, imaraykuchus Bibliapuni chayta nin. Bibliataj “Diospa yuyaychasqan” (2 Timoteo 3:16).

• ¿Karqapunichu chayri cuentollachu?

• ¿Imaraykutaj Dios Jatun Parata apachimorqa?

• ¿Runas yacharqankuchu Jatun Para kananta?

• Noé ruwarqa chay arca, ¿imaynataj karqa?

• ¿Mashkha unaypitaj Noé arcata ruwarqa?

• Jatun Paramanta cuentos

¿Karqapunichu chayri cuentollachu?

Bibliaqa nin Noé kausakusqantapuni, Jatun Parapis kasqantapuni. Chayrayku Noej tiemponmanta Jatun Paraqa karqapuni, manataj uj cuentollachu.

• Bibliata qhelqajkunaqa Noé kausakusqanmanta mana iskayrayarqankuchu. Esdraswan Lucaswanqa, imatapis qhelqanankupaj sumajta investigaj kanku. Paykunataj Israel nación ima miraymantachus jamusqanta parlashaspa, Noemantapis parlallarqankutaj (1 Crónicas 1:4; Lucas 3:36). Chantapis Mateowan Lucaswan evangeliosninkupi, Jesús Noej tiemponpi Jatun Paramanta imatachus nisqanta qhelqarqanku (Mateo 24:37-39; Lucas 17:26, 27).

  Profeta Ezequielwan apóstol Pablowanpis, Noemanta parlaspa nerqanku sinchʼi creeyniyoj kasqanta, cheqan runataj kasqanta (Ezequiel 14:14, 20; Hebreos 11:7). Noé ni jaykʼaj kausakunmanchu karqa chayqa, Bibliata qhelqajkuna nichá paymanta ajinata parlankumanchu karqa. Chayrayku Noemanta, pay jina creeyniyoj waj qharismanta, warmismantapis mayta yachakusunman. Imajtinchus paykunaqa karqankupuni (Hebreos 12:1; Santiago 5:17).

• Bibliaqa Jatun Paramanta wakin imasta sutʼita willan. Bibliapeqa Jatun Paramanta parlaspa, mana uj cuentitopi jinachu nin “uj pacha karqa” chayri “uj pacha pasarqa” nispa. Astawanpis nin ima watachus, ima killachus, ima pʼunchaytajchus chay kasqanta (Génesis 7:11; 8:4, 13, 14). Chantapis nillantaj Noé ruwarqa chay arca ima medidasniyojchus kasqanta (Génesis 6:15). Chay imasqa sutʼita rikuchiwanchej Biblia Jatun Paramanta parlasqanqa kasqantapuni, manataj uj cuentollachu kasqanta.

¿Imaraykutaj Dios Jatun Parata apachimorqa?

Bibliaqa nin niraj Jatun Para kashajtin “runaspa sajra ruwasqasninkoqa jallpʼapi may jinapuni kasqanta” (Génesis 6:5). Chantapis nillantaj jallpʼaqa ‘cheqa Diospa ñaupaqenpi maqanakuykunawan juntʼa kashasqanta’, millachikunaman tukusqanta, runaspis khuchichakuy juchaman qokusqankuta (Génesis 6:11; Judas 6, 7).

Bibliaqa nillantaj chay imas pasasqanta, sajra ángeles cielomanta uraykamuspa kay jallpʼamanta warmiswan khuchichakusqankurayku. Chay angelesqa kay jallpʼapi wawasniyoj karqanku. Chay wawasninkutataj nefilim sutiwan rejsikorqa. Paykunaqa runasta maytapuni sufricherqanku (Génesis 6:1, 2, 4). Chayrayku Diosqa nerqa kay jallpʼamanta sajra runasta chinkachinanta, ajinamanta kʼacha runas watejmanta allinta kausakunankupaj (Génesis 6:6, 7, 17).

¿Runas yacharqankuchu Jatun Para kananta?

Arí. Diosqa Noeman nerqa imaschus pasananta. Chayrayku payta nerqa uj jatun arcata ruwananta, ajinamanta chaypi familian, animales ima salvakunankupaj (Génesis 6:13, 14; 7:1-4). Noeqa runasman willarqa sajra runas tumpamantawan chinkachisqa kanankuta. Jinapis paytaqa ni pi uyarerqachu (2 Pedro 2:5). Bibliaqa nin: “Mana kasukorqankuchu Jatun Para chayamunankama, tukuyninkutaj chinkachisqa karqanku”, nispa (Mateo 24:37-39).

Noé ruwarqa chay arca, ¿imaynataj karqa?

Chay arcaqa uj jatun chhoqo caja karqa. Largonmanqa karqa 134 metros jina, anchonmantaj 22 metros jina, sayayninmantaj 13 metros jina. Chayqa sumaj maderamanta ruwasqa karqa, ukhuntawan jawantawantaj alquitranwan llutʼarqanku. Chantapis kinsa pisosniyoj, ashkha cuartosniyojtaj karqa. Arcaj ujnin ladonpeqa uj punku karqa, pata kantunpi jinataj muyuynintinpi ventanas karqa. Chantapis techoj chaupenqa tumpa oqharisqasina karqa, ajinamanta yaku mana chay patapi tantaykukunanpaj, manaqa puraj ladoman surunanpaj (Génesis 6:14-16).

¿Mashkha unaypitaj Noé arcata ruwarqa?

Bibliaqa mana ninchu. Jinapis ashkha wataspisina ruwayta tukorqa. Noeqa kuraj kaj wawan nacekushajtin 500 watas karajniyojña karqa, Jatun Para qallarishajtintaj 600 watasniyoj kasharqa (Génesis 5:32; 7:6).a

Ichapis Diosqa Noeta arcata ruwananta nerqa wawasnin nacekusqankumanta 50 chayri 60 watasninman jina, paykuna kurajkunaña, casadosñataj kashajtinku (Génesis 6:14, 18). Ajinapuni karqa chayqa, arcataqa 40 chayri 50 wataspi jinachá tukunman karqa.