¿Imaynasmantá allin willaykunata yachachinku?
JESÚS, chiqa cristianosman kamachirqa: “Rispa, tukuy laya runasta yachachisqasniyman tukuchimuychej”, nispa; chay nisqantaq, mana ninayanchu, runasta mana munachkapta Bibliamanta yachakunankupaq tanqanankuta. Imaraykuchus paypis nirqa: “sumaj willaykunata wajchasman willanaypaj”, “llakisqastataj sonqochanaypaj”, “ñakʼarejkunataj samarichisqa kanankupaj” kachamusqa kani, nispa (Mateo 28:19, 20; Isaías 61:1, 2; Lucas 4:18, 19). Jehovamanta sutʼinchaqkunaqa, Bibliamanta allin willaykunata, kikillantataq wakkunaman riqsichichkanku. Ñawpa tiempomanta Diospa kamachin Ezequieljina, paykunapis, “tukuy millay imas ruwakusqanmanta qhaparispa” waqaqkunata maskʼachkanku (Ezequiel 9:4).
Chayrayku paykunaqa, saqra ruwaykunawan llakisqa kaqkunaman wasimanta wasi willasqankurayku, aswan riqsisqa kanku. Tukuy runasman willanankupaqtaq kallpachakunku, imaynatachus Jesús, “rerqa tukuy llajtasman, ranchosman ima, willaraspa, yachachispataj Diospa reinon evangeliomanta”, ajinata. Yachachisqasninpis, jinallatataq ruwarqanku (Lucas 8:1-3; 9:1-6; 10:1-9). Jehovamanta sutʼinchaqkunapis, imaschus runasta llakichichkasqanmanta parlariyta munaspa, atikusqanmanjina watapi achkha kutita runaspa wasinman rinku. Chaypaqtaq, Bibliamanta iskay chayri kimsa pʼitikunata ñawiripunku, astawan yachakuyta munaptinkutaq, wak pʼunchaypi kutinku. Chantá Bibliamanta publicacionesta, Bibliata ima, saqinku, munaqkunamantaq Bibliamanta mana imata mañaspalla yachachinku. Kay yachachiykunataqa, may chhika runasman, tukuy Jallpʼapi yachachichkanku.
Jehovamanta sutʼinchaqkunaqa, tantakuykunapi “Diospa reinon evangeliomanta” yachachillankutaq. Chaytataq, Tantakunapaq Wasispi sapa semana ruwanku. Juk tantakuyqa, Tukuypaq Tantakuy sutikun, chaypitaq imaynatachus Bibliamanta yachachiykuna runata yanapasqanta sutʼinchakun, chaymantataq, Torremanta Qhawaq revistapi, Bibliamanta juk yachachiyta chayri juk profeciata sutʼinchakun. Wak pʼunchaypitaq, Diosmanta Parlayta Yachanapaq tantakuyta ruwanku, chaypitaq Bibliamanta yachachiqkuna aswan wakichisqa kanankupaq yachakunku; chaymantataq Willayta Yachanapaq tantakuyta ruwanku, chaypitaq willaq lluqsispa allinta yachachinankupaq yachachinku.
Tukuypis kay tantakuykunaman riyta atinku, chaypi yachachikusqanqa runap allinninpaq, chantapis, ni pimanta qullqita mañakunchu. Biblia nin: “Purajmanta kallpachanakuspa yanaparinakunachej, munanakuypi kawsananchejpaj, allin ruwaykunata ruwananchejpajtaj. Chaypajqa Diosta yupaychana tantakuytaqa ama saqeychejchu, imaynatachus wakin saqenku, ajinata. Astawanqa kallpachanakuspa ujkuna ujkunata sonqosninchejta oqharinakuna, astawampis Señorpa jamunan pʼunchay qayllapiña kasqanta reparaspa”. Sapanchikmanta Bibliata ukhunchayqa allin, chaywanpis tantakuykunapiqa, wak allin yanapasta tarillanchiktaq, Biblia nin: “Fierroqa fierrollawantaj awsakun; runatapis runallataj aswan kʼachaman tukuchin” (Hebreos 10:24, 25; Proverbios 27:17).
Jehovamanta sutʼinchaqkuna, Bibliamanta allin willaykunata, wakjinasmanta runaman parlarillankutaq. Vecinosninkuman, flotapi chayri avionpi richkaspapis Bibliamanta parlarinku. Wakin kutitaq amigosninkuman, familiaresninkuman, llamkʼaypi samarichkaspa compañerosninkuman ima, Bibliamanta aswan unaysituta parlarinku. Jesuspis, Diosmanta tukuyniqpi willarqa, mama qucha kantupi purichkaspa, urqup kinrayninpi kachkaspa, runap wasinpi mikhuchkaspa, Galilea mama quchapi challwiriswan barcopi richkaspa, casarakuna raymipi kachkaspa ima. Chantapis, Jerusalén templopi, sinagogaspi ima, yachachillarqataq. Jesusqa, Diospa Reinonmanta tukuyniqpi willarqa. Jehovamanta sutʼinchaqkunapis, kikinta ruwanankupaq kallpachakunku (1 Pedro 2:21).
KAWSAYNINKUWAN YACHACHINKU
Bibliamanta yachachiq, yachachisqanta mana juntʼaptinqa, puraq uya kanman, yachachisqanqanpis qhasillataq. Chaytaq, achkha runasta Bibliata yachakunankumanta karunchan. Chaywanpis Bibliaqa, puraq uyata juchachan. Jesusqa, fariseos, leymanta yachachiqkuna ima, Hebreopi Qillqasqasta riqsiptinkupis, paykunaman puraq uyas kasqankuta nirqa. Ley nisqanmanjina yachachichkasqankuta nispapis, yachachisqasninman jinata nirqa: “Imatacha nisunkichej, chayta kasuspa, ruwaychej; chaywampis sajra ruwasqankutaqa ama ruwaychejchu. Paykunaqa parlallanku, manataj ruwankuchu” (Mateo 23:3). Simillamanta yachachinamantaqa, aswan allin Bibliap yachachisqanmanjina kawsay. Chayrayku, mana creyente qusayuq warmisman jinata nikurqa: Qusasqa, “warmisninkoj sumaj kawsayninta rikuspa, mana parlasqalla Señorman kutirikunkuman kawsayniykichejta [...] rikusqankurayku” (1 Pedro 3:1, 2).
Jehovamanta sutʼinchaqkuna, Bibliap yachachisqanmanjina kawsaspa, runa masinkuman aswan sumaqta yachachiyta munanku, imaraykuchus Biblia nin: “Imatachus munankichej runas qankunapaj ruwanankuta, ajinallatataj qankunapis paykunapaj ruwapuychej” (Mateo 7:12). Paykunaqa, tukuywan jinata kawsanku, mana Jehovata yupaychaqkunallawanchu, vecinosllawanchu nitaq familiaresllawanchu. Pantaq runas kasqankurayku, ichá yachachisqankuta wakin kuti mana juntʼayta atillankuchu, chaywanpis, tukuy runaspa allinninkuta maskʼanku, mana Bibliamanta yachachispallachu, manaqa tukuy ima ruwasqankupipis (Santiago 2:14-17).
[19 paginapi dibujo/foto]
Hawai
[19 paginapi dibujo/foto]
Venezuela
[19 paginapi dibujo/foto]
Yugoslavia
[20 paginapi dibujos/fotos]
Tantakunapaq Wasisqa, Bibliamanta yachakunapaqjina ruwasqa kachkanku
[21 paginapi dibujos/fotos]
Jehovamanta sutʼinchaqkuna, familiaresninkuta, wak runasta ima, yachachisqankumanjina kawsaspa, yachachinku