Pousehlahte Kompoakepahnki Omw Pwoud

1. Dahme kahrehda kompoakepah mwahu kan wia kisakis ehu sang rehn Siohwa?

KOMPOAKEPAH mwahu kan iei kisakis ehu sang rehn Siohwa. (Seims 1:17) Re kin poakohng Koht oh re pil poakohng kitail. Re kin iang peren ni atail kin peren, kansenamwahwih kitail ni atail kin nsensuwed, oh kihong kitail kaweid ni ahnsou me kitail anahne. Re kin loalopwoat oh kitail kak likih irail. Soangen kompoakepah pwukat kin uhdahn “kaperenda mohngiong”!—Lep. Pad. 27:9.

2. Dahme kahrehda e kesempwal ong pwopwoud ehu en pousehlahte kakehlaka ara nanpwungmwahu? (Madiu 19:6)

² E kesempwal ong ohl emen oh eh pwoudo en uhdahn kompoakepahnki emenemen. Ira en tamataman me ira anahne nantihong kaukaule kakehlaka ara nanpwungmwahu. Ma ira sohte wia met, ira kakete tepida pehm me ira kelekelehpw, sohla peren, de pil lingeringerda. Ahpw ma ira pousehlahte nantihong karanihala emenemen, ira pahn kak ahneki nanpwungmwahu me keieu kehlail me aramas riemen kak ahneki. (Wadek Madiu 19:6.) Nan iren onop wet, kitail pahn kilang ia duwen pwopwoud kan ar kak pousehlahte kakehlaka arail nanpwungmwahu. Ahpw keieu, kitail pahn tehkpene ia duwen Kristian kiripw kan ar kak pilada arail pwoud me pahn wiahla kompoakparail me keieu mwahu erein arail mour.

IA DUWEN OMW PAHN PILADA EMEN ME PAHN WIA KOMPOAKEPAHMW EREIN OMW MOUR

3-4. Dahme pahn sewese emen en diar eh pwoud mwahu men? (Lepin Padahk 18:22)

³ Mwohn atail wiahda pilipil laud ehu, kitail anahne medewehla soahng mwahu kan oh soahng suwed kan me kakete wiawi ma kitail wiahda pilipilo. Pilipil laud kan kak wekidala atail mour ni ahl me mwahu de suwed, ihme kahrehda kitail anahne medewe mwahu mwohn atail wiahda pilipil kesempwal ehu.

⁴ Ni atail pahn pilada emen me pahn wia kompoakepatail erein atail mour—atail pwoud—kitail kin wiahda ehu pilipil me inenen kesempwal. Pwehki Siohwa me ketin wiahda koasoandien pwopwoud, kitail men ale kaweid sang reh ni atail pahn pilada emen me kitail pahn pwoudiki. E ketin kupwurki ohl emen en diar lih mwahu men, oh lih emen en diar ohl mwahu men. Siohwa kin ketin ahnsou koaros mwahngih dahme keieu mwahu ong kitail. (Wadek Lepin Padahk 18:22; Ais. 48:​17, 18) Kaweid kan me dierek nan Mahsen en Koht kak sewese Kristian men en diar emen me pahn wia eh pwoud mwahu men.

5. Dahme kahrehda e kesempwal ken pilada en pwoudiki emen me papidaislahr?

⁵ Ni ahnsou me kitail kin papidaisla, kitail kin wiahla kompoakepahn Koht. (Mel. 25:14) Ma ke men pwopwoudida, pilada emen me pil kin wia kompoakepahn Siohwa. (1 Kor. 7:39) Ni omw wia met, ke kin kasalehda omw wauneki sapwellimen Siohwa koasoandi kan oh ke pahn kilengwohng omw pwoudo nin duwen kapai ehu sang rehn Siohwa. (Lep. Pad. 19:14) Ke pil pahn soikala kahpwal kan me pahn kohsang omw pwoudikihda emen me sohte poakohng Siohwa. (2 Kor. 6:14) Mehnda ma pil sohte Sounkadehde me ke men pwoudiki, dehr wiahda sapwung ni omw medewe ken pwoudikihda emen me sohte poakohng Siohwa. E pil sohte wia elen loalokong en medewe me ma ke pahn date aramaso, e pahn kakete iangala padahk mehlel.

6-7. Soangen peidek dah kan me ken pein idek rehmw ma ke men pwopwoud?

⁶ Ei mehlel, kaidehn me papidaisla koaros kak wia ohl de lih pwopwoud mwahu ong uhk. Ma ke men pwoudiki emen, e pahn mwahu ken pein idek rehmw soangen peidek pwukat: ‘E kin kadekohng eh peneinei? E kin nsenoh oh kasalehda wahu? Ihs me e kin kompoakepahnki? Dahme e kin wia ni en meteikan ar madamadau eh weksang eh madamadau? E kin ngihtehtehki dahme e mwahuki, de e kin men rong en meteikan madamadau ma e sohte uhwong Paipel? Ia eh madamadau ong mwohni?’

⁷ Ke pil kak pein idek rehmw: ‘E kin kasalehda me e uhdahn poakohng Siohwa? E kin pwuhriong nan “mour kapw”? E pahn sewese ien kamwahwihala oh kalaudehla ei kin papah Siohwa? At mehn akadei kan me pid at papah Siohwa duwepenehte? Se pahn kak wiahla kompoakepahn emenemen me keieu keren?’ (Kol. 3:​9, 10) Ma kowe sister men, brothero me ke kin date pahn wia kompoakepahmw mwahu men oh tapwin peneinei mwahu men? (1 Kor. 11:3) Ma kowe brother men, sistero me ke kin date pahn men utung uhk oh wauneki omw pilipil kan mendahki omw soh unsek? Ke pahn anahne ahnsou pwehn sapengala soangen peidek pwukat. Eri kihong ahnsou pwehn uhdahn esehla mwahu aramas me ke men pwoudikio.

8-9. Dahme kak sewese emen me men pwopwoud en wiahda pilipil mwahu? (Pil kilang kilel.)

⁸ Erein omw date emen, ke pahn kak wiahda pilipil loalokong ma ke song en esehla mwahu soangen aramas dahmen ih. Esehda ia en meteikan madamadau ong aramaso. Ke kak idek rehn meteikan soangen irair dah me aramaso kin ahneki oh dahme eh mwomwohdisou kin esehki ih. Karasepe, aramas kin esehki ih nin duwen emen me aktikitik, kadek, oh toupahrek? Sarah, sister men nan French Guiana, me pwoudkihla brother men me adaneki Daniel, koasoia: “I idek rehn meteikan dahme re kin medewehki duwen Daniel. Karasepe, I koasoiong brother me kin mihmi reho, elder men nan eh mwomwohdiso, kompoakepaht kan, oh sister kan nan eh mwomwohdiso.” Ke pil kak idek ni kadek rehn aramaso me ke kin date ma mie mehkot me wiawi mahso de me wiewiawi met me ke pahn anahne ese. Ele e pahn kesempwal en ese duwen soahng pwukat pwehki ekei soahng kan kakete kahrehda kahpwal nan amwa pwopwoud mwuhr.

⁹ Ma mie soahng kan me ke kin peikasalki duwen aramaso de ma Kristian koahiek kan tehkada ahn aramaso irair suwed kan, dehr pohnsehsehla met. Ahpw tehk kanahieng pwe ken kak pilada ma e mwahu en pwoudiki aramaso de soh.a Met kitail pahn uhd koasoiapene dahme pwopwoud kan kak wia pwehn kakehlaka arail nanpwungmwahu.

WIAHDA AHNSOU ONG EMENEMEN

10. Dahme kahrehda e mwahu ong pwopwoud ehu en wiahda ahnsou ong emenemen?

¹⁰ Pwopwoud ehu kak wiahiong ara nanpwungmwahu oh mouren pwopwoud en kehlail ni ara kin wiahda ahnsou ong emenemen, sohte lipilipil ia uwen ara kin kedirepw. Met kin kihong ira ahnsou mwahu en koasoiapene dahme wiawi ehuehu rahn, ehukihpene ara madamadau oh pepehm kan, kasalehda ara limpoak ong emenemen, wia soahng kan me ira kin perenki.

11. Dahme kak keper ong nanpwungmwahu en pwopwoud ehu?

¹¹ Pwopwoud ehu me kin uhdahn kerenpene kin kahng dohpeseng, ahpw kin men mihmihpene. Ei mehlel, ira sohte pahn kak mihmihpene ahnsou koaros. Ahpw ma ira kin dohpeseng erein ahnsou werei, met kak keper. Karasepe, ekei kin alehdi doadoahk ehu nan ehu sahpw tohrohr, oh kin dohsang arail peneinei kan erein ahnsou werei. Mendahki ira pahn kak wiahda mwohni, ara dohsang emenemen erein ahnsou werei pahn kak kahrehda kahpwal tohto nan ara mouren pwopwoud.

12-13. (a) Dahme ekei pwopwoud kan kin wia pwehn ehupene wia soahng kan? (Pil kilang kilel.) (b) Ia uwen laud en omw pahn kesempwalki omw nanpwungmwahu rehn omw pwoud? (Menlau kilang koakono “Ia Uwen Laud en Ei Pahn Kesempwalki Ei Pwoud?”)

¹² Kilang dahme ekei pwopwoud kan wia pwehn kak kaukaule wiahda ahnsou ong emenemen. Leah, nan Guam, koasoia: “Ngehi oh ei pwoudo kin perenki wiapene soahng kan. Se sohte kin kalapw kohla wasakis ma emen sohte iang.” Roxanne, nan United States, koasoia: “Pwehki at uhdahn kedirepw, se tepida wiahda koasoandi kan mwowe pwe sen kak mihmihpene, duwehte me se kin wia ni at koasoanehdi ahnsou ong soahng kesempwal teikan.” (Pil kilang Eimwos 3:3.) Damien, nan France, koasoia: “Se tehkada me e kesempwal en esehla dahme emenemen kin perenki wia, oh mwurin ahnsou kis, se sukuhlki en pil iang perenki wia dahme meteio kin perenki.” (Mad. 7:12) Oh Katie, me pil mi nan United States, koasoia: “Ekei pak se kin pwil nait cellphone ko pwe ren dehr kerempwahla kiht.”

¹³ Dahme keieu kesempwal iei me pwopwoud kan en wiapene soahng kan ong Siohwa. Myriam, nan France, koasoia: “Se kin tepikihda ehuehu rahn wadawad en Paipel, kiht eri ehukihpene dahme se perenki oh dahme se kak kapwaiada nan at mour. I uhdahn kin perenki soangen ahnsou pwukat.” E doula koasoia: “I pil uhdahn perenki ni ahnsou me se kin ehupene kapakap oh I kin rong ia uwen ei pwoudo eh poakohng Siohwa.” Katie, me kitail koasoiapene mwoweo, koasoia: “Se kin keieu perenki at kak ehupene nan kalohk. E kin kansenamwahu en rong emenemen koasoia duwen Siohwa oh se kin pousehlahte sukuhlki soahng kapw kan sang emenemen.”—Lep. Pad. 27:17.

EHUPENE NI KAHPWAL KAN AR PWARADA

14-15. Dahme kahrehda pwopwoud ehu anahne wia uwen ara kak en powehdi kahpwal kan me kakete pwarada nan ara mouren pwopwoud? Menlau kihda ehu karasaras.

¹⁴ Nin duwen aramas soh unsek kan, pwopwoud kan pahn lelohng kahpwal kan nan arail mouren pwopwoud. Paipel mahsanih me pwopwoud kan “pahn ahneki apwal ong paliwararail.” (1 Kor. 7:28) Met dokedoke kahpwal kan me kin kalapw wiawi nan mouren pwopwoud. Ni ahnsou me kahpwal kan pahn pwarada, dahme kahrehda ira anahne wia uwen ara kak en ehupene oh powehdi kahpwalo?

¹⁵ Medewehla duwen karasaras wet. Ma ihmw kesempwal ehu de mehkot me uhdahn kesempwal ohla, aramas me imwanekio de nainekio pahn men kamwahwihala. Re pahn doadoahngkihla ahnsou oh mwohni laud pwehn kak kamwahwihala met oh re kak wiahki met erein sounpar kei. Dahme kahrehda? Pwehki re uhdahn kesempwalki ihmwo de soahng kesempwalo. Duwehte met, pwopwoud kan koaros kin uhdahn kesempwal. Mendahki pwopwoud ehu kin uhdahn kerenpene, e pahn miehte kahpwal kan. Ahpw duwehte ihmw ehu de mehkot kesempwal ehu me ohla eh kak pwurehng mwahula, pwopwoud ehu kak pwurehng kamwahwihala ara nanpwungmwahu. Ara wia met ele pahn anahne ahnsou oh doadoahk laud, ahpw Siohwa pahn ketin kupwurperenki ni ara nantihong kakehlaka ara pwopwoud oh mihmihpenete. (Mal. 2:16) Ni ara wia met, ira kin kasalehda me ira poakohng oh wauneki emenemen ahpw mehlel Siohwa, me tepin wiahda koasoandi en pwopwoud.

16. Nin duwen me 1 Korint 13:​4-8a mahsanih, dahme kak sewese pwopwoud ehu me ahneki kahpwal laud kan nan ara mouren pwopwoud? (Pil kilang kilel oh koakono “Dahme Kak Sewese Kumwa en Kakehlaka Amwa Nanpwungmwahu.”)

¹⁶ Ma kahpwal kan pwarada nan amwa mouren pwopwoud, dehr mwadang tohrohrpeseng. (1 Kor. 7:​10, 11) Ahpw pein idek rehmw, ‘I kak nantihong kamwahwihala at nanpwungmwahu?’ Tehk dahme Paipel mahsaniheki duwen en kasalehda limpoak oh pein idek rehmw ma ke kak kamwahwihala omw kin kasalehda ekei irair kan me kileldi nan 1 Korint 13:​4-8a. (Wadek.) Dehr medewe en kohkohsang emenemen, ahpw wia uwen amwa kak en pwurehng karanihala emenemen. Medemedewe duwen dahme ke kak wia pwehn kamwahwihala amwa nanpwungmwahu. Kapakapohng Siohwa pwehn ketin kaweid uhk. Ale sawas sang neitail sawaspen Paipel kan oh kisin kasdo kan, iangahki elder kan oh Kristian koahiek teikan. Ma kumwa kin koapworopworki Siohwa, sahl me keieu kehlail me wia kisehn ‘sahl silipwoato,’ kumwa sohte pahn “mwadang mweipeseng.”—Ekl. 4:12.

17. Ia duwen irail kan me men pwopwoud oh irail kan me pwopwoudier ar kak nsenamwahu?

¹⁷ Siohwa ketin kupwurki sapwellime ladu kan koaros ren nsenamwahu, iangahki irail kan me men pwopwoud oh irail kan me pwopwoudier. Eri ma kowe emen me kiripw oh men pwopwoud, pilada mwahu aramaso me ke pahn kompoakepahnki erein omw mour. Oh ma ke pwopwoudier, pousehlahte kakehlaka omw nanpwungmwahu rehn omw pwoud. Nantihong powehdi kahpwal kan me kakete pwarada nan omw mouren pwopwoud, oh koapworopworki sapwellimen Siohwa sawas. Ni omw wia mepwukat, ke pahn “pereperenki mour” rehn omw pwoud kompoako!—Ekl. 9:9.