Ia Duwen Omw Kak Soikala Dahme Kin Kerempwaiuk?

1-2. Ia duwen mehkot kesempwal kak wiahla mehn kerempwa ehu?

MIE pak mehkot kerempwaiukala? Karasepe, medewehla me ke wie dindiraip oh aramas emen call uhk. Ke medewehla ma aramaso anahne omw sawas ahpw ke pil ese me ni ahnsowo ke anahne tetehk omw dindiraip. Mie soangen irair tohto nan atail mour me kitail anahne pilada dahme keieu kesempwal en wia ni ahnsowo.

² Kitail koaros kin mie soahng kesempwal tohto me kitail kin wia. Oh kitail kin ese me soahng kan me keieu kesempwal kitail en wia iei soahng kan me kitail kin wiahiong Siohwa.a (Mad. 6:33) Ihme kahrehda kitail kin medemedewe mwahu dahme kak kerempwahla atail ahnsou en wia dahme keieu kesempwal nan atail mour.—Lep. Pad. 4:25; Mad. 6:22.

3. Dahme kitail pahn tehkpene me pahn sewese kitail en mwohneki mahs Siohwa?

³ Kitail sohte kin men mehkot en kerempwa atail kin mwohneki mahs Siohwa nan atail mour. Ahpw soahng tohto kak kerempwa kitail. (Luk 21:​34-36) Eri pwehn sewese kitail en pousehlahte mwohneki mahs atail papah Siohwa, kitail pahn koasoiapene (1) dahme kin kerempwa kitail, (2) ia duwen Sises eh ketin soikala soahng kan me kak kerempwahla ih, oh (3) ia duwen atail kak soikala soahng kan me kin kerempwahla kitail rahnpwukat.

DAHME KIN KEREMPWA KITAIL?

4-6. Soahng dah kan me kin kerempwahla kitail?

⁴ Kitail koaros kin mie soahng kesempwal kan nan atail mour me kitail anahne apwalihala. Karasepe, mwein kitail ahneki soumwahu de mie soahng kei me kitail anahne wia ong atail peneinei. Ei, soahng pwukat kin kesempwal oh kitail anahne kin apwalihala. Ahpw ia duwe, mepwukat kak wiahla mehn kerempwa kei? Ei met kak wiawi ma kitail doadoahngkihla atail ahnsou oh kehl laud en medemedewe soahng mepwukat.

⁵ Patehng met, tohto kitail kin koukousoan wasa kan me diren tiahk lemei, apwal en wiahda mwohni de mie soumwahu lusulus. (2 Tim. 3:1) Ni atail kin lelohng soahng pwukat, kitail kin uhdahn pwunodki laud kahrehda kitail sohla kak uhdi medemedewe.

⁶ Mwein kitail kin ese irail akan me lelohng kahpwal laud kan me uhdahn wekidala arail mour. Kitail kak wehwehki me irail pahn kin uhdahn pwunodki soahng pwukat. Aramas akan sohte wiawihda pwe ren kin pwunopwunod ahnsou reirei. Ihme kahrehda ekei kin pehm me irail solahr mourki soangen mour me re ahnlahr. Eri ekei kin song en katikala arail kapwunod kan ni arail kin raparapahki mehn kamweit kan oh soahng kaperen kan. Dahme kitail kak wia ma kitail mi nan soangen irair pwukat? Kitail pahn tehkpene dahme kitail kak sukuhlkihsang Sises me pahn sewese kitail en soikala soahng kan me kin kerempwa atail kaudok.

IA DUWEN SISES EH KETIN SOIKALA SOAHNG KAN ME KAK KEREMPWAHLA IH?

7. Dahme kakete kerempwahla Sises?

⁷ Soahng tohto kak kerempwahla Sises, me duwehte kahpwal akan me aramas tohto kin lelohng oh pil me pidada palien politik. Ni ahnsowo, aramas tohto kin semwehmwe oh soumwahu. (Mad. 14:14; Mark 14:7) Irail kin lokolongki wiewia sapahrek kan me kohsang mehn Rom kan oh iengarail mehn Suhs kan. Ni ahnsou me aramas ako kilang me Sises sapwellimanki manaman oh e kak ketin wiahda manaman akan, re men wiahkihla ih arail nanmwarki. (Sohn 6:​14, 15) Sehdan pil kasonge Sises oh nda me e kak wiahkihla ih kaunen sampah. Sises kakete tepida medewe me e pahn mwahu ma e kaunda sampah. (Mad. 4:​8, 9) Oh Sises kakete ketin song en kamengeihala sapwellime mour ni ahnsou me wahnpoaron Piter patohwanohng ih: “Maing Kaun, komw ketin kadek ong pein komwi.”—Mad. 16:​21, 22.

8. Ia duwen Sises eh ketin soikala soahng kan me kak kerempwahla ih?

⁸ Ia duwen Sises eh ketin soikala soahng kan me kak kerempwahla ih? E ketin wia met ni ahl siluh. Keieu, e ketin kahlemengih sapwellimen Siohwa elen madamadau. (Sohn 8:28; 14:9) Keriau, e kin ketin pousehlahte soupisengki wia doadoahk en kalohk oh padahk. (Mad. 9:35) Oh kesiluh, e uhdahn mwahngih dahme keieu kesempwal. (Sohn 4:34) Ni kehlail, e ketin soikala en Sehdan kasongosong kan. E pil mwahngih me Piter songosong en sewese ih, ahpw dahme Piter koasoia sohte pahrekiong kupwuren Siohwa. (Mad. 4:10; 16:23) Sises sohte ketin mweidohng dahme aramas medewe, koasoia de wia en kerempwahla ih sang eh pahn kapwaiada kupwuren Koht. Rahnpwukat, soahng kan me kak irehdi kitail sang en mwohneki mahs Siohwa ele kin weksang soahng kan me Sises ketin lelohng. Ahpw ma kitail wia soahng siluhkohte me Sises ketin wia, kitail pahn soikala dahme kin kerempwahla kitail.

IA DUWEN ATAIL KAK SOIKALA DAHME KIN KEREMPWAHLA KITAIL?

9. Ia wehwehn en “pousehlahte wehwehkihla dahme Siohwa ketin kupwurki”? (Episos 5:17)

⁹ Sukuhlki sapwellimen Siohwa elen madamadau. Atail wia met pahn sewese kitail en “pousehlahte wehwehkihla dahme Siohwa ketin kupwurki.” (Wadek Episos 5:17.) Kitail kak esehla dahme kin kaperenda Siohwa sang ni atail kin wadek sapwellime Mahsen oh doudouloale. Mehnda ma Paipel sohte mahsanih mehkot me pid duwen atail irair, kitail kak esehla dahme Siohwa ketin kupwurki kitail en wia. Ia duwen? Sang ni atail pahn onopki Paipel pwe kitail en esehla mwahu sapwellimen Siohwa elen madamadau oh kin men kapwaiada dahme kitail sukuhlki.

10. Ia duwen atail kak sukuhlki duwen sapwellimen Siohwa elen madamadau?

¹⁰ Kitail kak sukuhlki duwen sapwellimen Siohwa elen madamadau sang ni atail kin onopki Paipel oh medemedewe ia duwen Eh kin ketin sewese aramas akan ni limpoak. (Ser. 45:5) Ni atail wadek soangen ire pwukat, kitail kak pein idek rehtail soangen peidek me duwehte: ‘Dahme met padahkihong ie duwen Siohwa? Ia duwen ei kak doadoahngki met pwehn wekidala mwomwen ei kin madamadau?’ Ei mehlel, sapwellime elen madamadau kin ileilehsang atail. (Ais. 55:9) Eri e kin konehng kitail en sohpeiong ih oh peki en ketin padahkihong kitail ia duwen atail pahn kapwaiada kupwure. (Mel. 143:10) Oh kitail pil kin kapakap oh peki reh en ketin sewese kitail en wehwehkihla oh pil ahneki sapwellime elen madamadau.—1 Sohn 5:14.

11. Dahme Siohwa ketin kupwurki ong kitail?

¹¹ Ni atail kin sukuhlki sapwellimen Siohwa elen madamadau, kitail kin wehwehkihla me e ketin kupwurki kitail en soikala soahng kan me kak kerempwahla kitail pwe kitail en kak kadehdehda me kitail onopadahr ong imwin koasoandi wet. (Mad. 24:44) E sohte ketin kupwurki kitail en toutoukihla atail pwunod kan. (Mad. 6:​31, 32) Ihme kahrehda ni ahnsou me kitail kin nohn pwunodki soahng kan me pid atail roson, atail doadoahk en mwohni, imwatail, de atail peneinei, Siohwa pahn ketikihong kitail kaweid mwahu kan. E ketin kupwurki kitail en peki reh en ketikihong kitail erpit oh kehl pwe kitail en kak dadaur pahn atail kahpwal kan.—Mel. 55:22; Lep. Pad. 3:​5-7.

12. Dahme pahn sewese kitail en pousehlahte nsenamwahu mendahki soahng suwed kan kin wiewiawi nan sampah? (Madiu 5:3)

¹² En kin soupisengki atail doadoahk en papah Siohwa. Kitail koaros kin pwunodki duwen soahng suwed kan me kin wiewiawi nan sampah, ahpw kitail sohte kak kauhdi mepwukat. Eri kitail anahne pousehlahte soupisengki atail doadoahk en papah Siohwa pwehki met pahn sewese kitail en dehr nohn pwunodki duwen soahng pwukat. Ma kitail pousehlahte wia uwen atail kak en ahneki nanpwungmwahu keren rehn Siohwa, kitail pahn nsenamwahu pwehki ih met me Siohwa ketin kapikkitailda en wia. (Wadek Madiu 5:3.) Kitail kin wia met sang ni atail kin onopki sapwellime Mahsen, Paipel, oh wia uwen atail kak koaros nan atail doadoahk ong Siohwa. Atail wia met pil pahn kaperenda Siohwa pwehki kitail kin doadoahngki atail ahnsou ni loalokong.—Lep. Pad. 23:15.

13. Ia duwen atail kak “doadoahngki mwahu [atail] ahnsou”?

¹³ Nin duwen Kristian kei, kitail kin koasoanehdi teng en “doadoahngki mwahu [atail] ahnsou.” (Ep. 5:​15, 16) Kitail ese me Paipel sohte kin mahmahsanihete ia duwen atail pahn doadoahngki atail ahnsou ehuehu rahn. Ahpw e kin kangoange kitail en medemedewe mwahu mwomwen atail kin doadoahngki atail ahnsou mwohn Siohwa eh pahn ketin kasohrehla koasoandi suwed wet. Ia duwen atail kak doadoahngki mwahu atail ahnsou? Ma kitail nohn doadoahngki laud ahnsou en rongorong de kilikilang rohng suwed kan, met kak kamworuseikitailla oh kihsang atail kehl me kitail kak doadoahngki pwehn papah Siohwa. E uhdahn pahn mwahu ma kitail dehr nohn kin rong, wadek, de kilang rohng kan! Ni ahl wet, kitail pahn ahneki ahnsou laud oh kehl en wia doadoahk kan ong Siohwa. Kitail ese me e kin kesempwal en medemedewe ia duwen atail kak kalaudehla atail doadoahk en kalohk, me duwehte atail kin pwurala rehn irail kan me men rong. Kitail wehwehki me e kin kesempwal en isaneki ahnsou mwahu koaros en sewese aramas akan ren “komourla oh esehla loalokong pwung en me mehlel.”—1 Tim. 2:4.

14. Ni ahl dah me atail soupisengki papah Siohwa kin sewese kitail? (Pil kilang kilel.)

¹⁴ Ni atail kin soupisengki papah Siohwa, met pahn sewese kitail en tamataman ia kahrepen soahng suwed ar kin wiewiawi nin sampah. Kitail sohte pahn nohn pwunodki ni atail kin kilang tiahk lemei, semwehmwe de soumwahu lusulus kan pwehki kitail ese me soahng pwukat koaros kokohpdahr nan Paipel. Soahng pwukat sohte kin kerempwahla kitail pwe kitail kin koapworopworki dahme Siohwa ketin inoukihda ong ahnsou kohkohdo. Kitail kak kolokolete atail meleilei ni atail kin pousehlahte likih me Siohwa pahn ketin sewese kitail en dadaurete.—Mel. 16:8; 112:​1, 6-8.

15. Ma kitail “ahneki madamadau pwung,” dahme met pahn sewese kitail en wia? (1 Piter 4:7)

¹⁵ Dehr manokehla dahme keieu kesempwal. Aramas tohto rahnpwukat kin raparapahkihte dahme kin kaperen oh re sohte kin medewe ire mehlel me sampah wet pahn kereniong kasohrala. E sohte sapwung en ahneki peren, ahpw kitail anahne “ahneki madamadau pwung” pwehn soikala madamadau en aramas en sampah wet. (Wadek 1 Piter 4:7.) Met pahn sewese kitail en dehr nohn doadoahngkihla ahnsou laud pwehn wiahte soahng kaperen kan, ahpw kitail en wiahda pilipil loalokong kan. Soangen pilipil pwukat pahn kasalehda sapwellimen Siohwa madamadau oh pahn pil kasalehda me kitail wehwehki dahme keieu kesempwal.—2 Tim. 1:7.

16. Dahme Sises ketin tamataman mwohnte eh pwoula?

¹⁶ Sises kin ahnsou koaros ketin tamataman dahme keieu kesempwal. Pil mwohnte eh pwoula, e mwahngih me dahme keieu kesempwal iei en loalopwoatohngete Siohwa oh kapwaiada kupwure. A ih kahrepe wet me e wie loulou ni ngidingid. Weksang Sises me wie pepehd oh mwasamwasahn, sapwellime tohnpadahk ko meirla pwehki “sohla angirailki ar nsensuwed.”—Luk 22:​39-46; Sohn 19:30.

17. Dahme kahrehda aramas tohto kin doadoahngki social media ahpw ia duwen met eh kak kerempwahla kitail? (Pil kilang kilel.)

¹⁷ Duwehte sapwellimen Sises tohnpadahk kan, kitail pil kin momour ni ahnsoun kapwunod kan oh ekei pak kitail kin pwangada oh nsensuwedla. Dahme kin wiewiawi rahnpwukat kak kahrehiong kitail en pwunod laud. Aramas tohto rahnpwukat kin doadoahngki social media pwe ren manokehla arail kapwunod kan. Re kin doadoahngki pwe ren koasoiong kompoakparail kan oh arail peneinei nan sampah pwon oh ren ehukihpene rohng kan, kilel kan de pil soahng teikan. Re pil kin doadoahngki ong mehn kamweit tohto kan. Ahpw rahn koaros aramas pwukat kin doadoahngkihla ahnsou oh kehl laud pwe ren wadek oh kilang soahng kapw kan. Pwe kitail en ahneki madamadau pwung me pid social media, kitail kak pein idek rehtail: ‘Ia duwe, ei kin doadoahngki social media kin uhdahn sewese ie nan ei mour de kin kerempwahla ei pahn tamataman dahme keieu kesempwal?’

18. Dahme kahrehda kitail anahne wiahda pilipil mwahu kan me pid mehn kamweit kan?

¹⁸ E kin mwahu en ahneki ahnsoun peren oh kommoal ekei pak. Ahpw kitail pil anahne pilada ni loalokong kasdo kan oh mehn mwadong kan sohte lipilipil ma nan TV de internet. Karasepe, ni atail kin kilangla ehu kisin kasdo, pil ehu kisin kasdo pahn pwarada oh kitail pahn pil men kilang. Ekei kisin kasdo kan kin kasalehda tiahk lemei oh tiahk samin. Ih met me wiawihong emen brother nan Eisia. E tepida kilang kisin kasdo kan. Mwuri e kilang kisin kasdo teikan me pwarada. Oh pil mwuri, e tepida kilang kasdo kan me kasalehda tiahk samin. Kedekedeo, e tepida kilang kilel oh kasdo suwed kan. E mwahute pwe e ale sawas sang elder kan oh kompoakepah keren kan. Ih eri uhdihsang wia met. Karasepe, e kihsang soangen app kei nan nah cellphone oh katikala uwen ahnsou me e kin doadoahngki nan nah cellphone. Dahme wiawihong ih padahkihong kitail me e uhdahn kesempwal en wiahda pilipil mwahu kan me pid mehn kamweit kan.

19. Dahme kak wiawi ma kitail nohn nsenohki mehn kamweit kan oh ahnsoun mwemweit?

¹⁹ Kitail pil anahne wiahda pilipil loalokong kan me pid mehn kamweit kan oh ahnsoun mwemweitla soangsoangen wasa kan. Kitail koaros kin anahne ahnsoun kommoal ekei pak pwehki e kin mwahuwong kitail oh pil kin sewese kitail en kin ahnekihte roson mwahu. Ahpw ma kitail nohn kin nsenohki mepwukat, kitail sohla pahn ahneki madamadau toupahrek oh soahng pwukat kak kihsang atail ahnsou ong dahme keieu kesempwal. (Pil. 1:10) Kitail koaros anahne pein pilada dahme kitail pahn wia oh ia uwen laud en ahnsou kitail en wia soahng pwukat. Ni omw kin wiahda soangen pilipil pwukat, pein idek rehmw: ‘Ia duwe, uwen ahnsou me I doadoahngki ong mehn kamweit kan oh ahnsoun mwemweitla soangsoangen wasa kan kin kasalehda me I wiahda pilipil loalokong? I kin tehk mwahu me I kin mwohneki mahs dahme keieu kesempwal oh kaunopada ong “imwin mehkoaros”?’

20. Ia duwen atail kin paiekihda atail soikala mehn kerempwa kan?

²⁰ Kitail kin paiekihda ni atail kin soikala soahng kan me pahn kerempwahla atail papah Siohwa. (Ais. 48:17) Sang ni sapwellimen Siohwa sawas, kitail pahn kak dadaurete nan atail kahpwal kan. Kitail eri sohte pahn nohn pwunodki dahme kin wiewiawi nan sampah wet. Oh kitail pil sohte pahn nohn doadoahngkihla ahnsou laud ong mehn kamweit kan. Eri kitail en koasoanehdi teng en wia uwen atail kak en ahneki sapwellimen Siohwa madamadau, pwerisekiong wia atail doadoahk en papah Siohwa, oh tamatamante dahme kin keieu kesempwal. Ni atail wia met, kitail pahn kak mwohneki mahs Siohwa nan atail mour rahnpwukat oh pil “koledi teng mour mehlelo.”—1 Tim. 6:19.