Ke Onopadahngehr Kahpwal kan Mwurin Omw Papidaisla?

1-2. Kahk dah kan me kitail kak wia pwehn kaunopadahng kahpwal kan me kakete wiawi mwurin atail papidaisla? Menlau kihda ehu karasaras.

KITAIL kin kasik en ahneki kahpwal kan nan en Sehdan sampah suwed wet. Sises mahsanihong sapwellime tohnpadahk kan: “Mehn kadipekelekel kan uhdahn pahn kin kohda.” (Mad. 18:7) Ni atail kin tamataman kaweid wet, kitail anahne kaunopadahng kahpwal kan me kakete wiawi, me iangahki kahpwal kan me kitail kakete ahneki rehn iengatail tohnkaudok kan.

² Medewehla ehu karasepe. Sapwellimen Siohwa aramas akan kin kalapw alehdi mehn kangoang kan ren kaunopadahng kahpwal kan en melimel, rerrer en sahpw de ilok laud ape (Natural Disasters). Ia duwen atail kin wia met? Keieu, kitail kin esehda soangen kahpwal kan me kakete wiawi nan atail wasa. E uhdahn kesempwal en wia met ahpw mehlel ma kitail kapw ong wasao. Mwurin atail esehda soangen kahpwal kan me kakete wiawi, kitail anahne koasoanehdi dahme kitail kak wia pwehn onopadahng ehuehu kahpwal pwukat. (Lep. Pad. 21:5) Duwehte met, kitail kak esehla kahpwal kan me kakete wiawi mwurin atail papidaisla oh kaunopada met pwe kitail en onopada ma kitail lelohng soangen kahpwal pwukat. Ma kitail wia met, kahpwal pwukat sohte pahn nohn apwal ong kitail oh sohte pahn kauwehla atail nanpwungmwahu rehn Siohwa. (Mel. 17:5) Eri kitail pahn koasoiapene kahpwal siluh me kakete wiawi oh ia duwen atail kak kaunopadahng ehuehu kahpwal pwukat.a

RIATAIL KRISTIAN MEN KANSENSUWEDIHKITAILLA

3. Kahpwal dah me kitail kakete lelohng nan mwomwohdiso?

³ Ke tamataman omw pepehm ni omw tepin iang towehda mihting ehu oh kilang limpoak me sapwellimen Siohwa aramas akan kasalehda nanpwungarail? Ia duwe, met kamehlelehiong uhk me ke diaradahr padahk mehlel? (Sohn 13:35; Kol. 3:12) Ih mwomwen en Blancab pepehmo met. Ahpw mwurin eh papidaisla, mehkot me e sohte kasik wiawi. E koasoia: “Sister men sohte kin kadekohng ie. I pil tehkada me e kin kauwe meteikan. I sohte kasik me met pahn wiawi pwe I sukuhlkier me Sounkadehdehn Siohwa kan kin nantihong en ahneki popohl oh kadek.” Ei mehlel, riomw Kristian kan kin doadoahk laud pwehn kamwahwihala arail irair en Kristian kan, ahpw sapwellimen Siohwa aramas akan sohte unsek. (Ep. 4:​23, 24; 1 Sohn 1:8) Ihme kahrehda ekei pak, emen irail kakete nda de wia mehkot me pahn kamedekeiukala. (Seims 3:8) E kansensuwed me soangen kahpwal pwukat kahredahr ekei ren uhdihsang papah Siohwa.

4. Dahme kak sewese kitail en ese dahme kitail pahn wia ma riatail Kristian men kansensuwedihkitailla? (Episos 4:32)

⁴ Dahme kak seweseiuk en ese dahme ke kak wia ma riomw Kristian men kamedekih de kansensuwedihiukala? Medemedewe mwahu duwen kaweido nan Episos 4:32 (Wadek) oh sukuhlki en kin kasalehda irair kan me kileldi nan ireo. Ma ke kin wia uwen omw kak en kasalehda kadek oh limpoak, ke pahn uhdahn soikala ahneki kahpwal tohto rehn meteikan. Wiahki omw mehn akadei en kin mwadang mahkikihong meteikan arail sapwung kan. Dahme kak seweseiuk ken wia met? Tamataman me ke kin kalapw peki rehn Siohwa en ketin mahkikihong uhk omw sapwung kan oh ke kin kalahnganki me e kin ketin mahkohng uhk ni mehlel. (Mad. 6:12) Ma ke kin medemedewehte uwen diren ahnsou me Siohwa ketin mahkohnguhkehr, e pahn mengei ong uhk ken pil mahkohng meteikan.

5. Mehnia iren Paipel me kak sewese kitail ni emen eh kansensuwedihkitailla? (Lepin Padahk 19:11) (Pil kilang kilel kan.)

⁵ Wadek Lepin Padahk 19:11. Paipel mahsanih me ni atail kin nsensuwed pahn emen, dehde mwahuc kak sewese kameleileidi atail lingeringer. Iren Paipel wet sewese Rima, me papidaiskiher erein sounpar kei. E koasoia: “Ni ei kin kilang riei Kristian kan ar mwekid ni ahl ehu me kin kamedekih de kansensuwediehla, I kin tepte tamanda Lepin Padahk 19:11. I kin medewehla duwen arail irair kan oh dahme wiawihong irail mahso, oh I kin song en medewehda dahme kakete kahrehiong irail en mwekid ni ahl wet. I pil kin song en iang irail kalohk. Met sewese ien esehla mwahu irail.” Met wia kaweid mwahu ehu ong kitail. Ke kak esehla mwahu riomw Kristian kan met. Ni omw wehwehki mwahu duwen irail, ke pahn mengeikihla mahkohng irail ma re kamedekeiukala.

6. Dahme kak sewese kitail en ahneki kompoakepah keren kan nan mwomwohdiso?

⁶ Dahme pahn seweseiuk ken ahneki nanpwungmwahu rehn riomw Kristian kan? Ni omw esehla mwahu irail, tehk mwahu me ke kin medemedewehte arail irair mwahu kan. (Pil kilang Lepin Padahk 10:12; Rom 12:10; Pil. 2:​2, 3) Tehk ia duwen met eh sewese brother men me ahpwtehn papidaisla, me adaneki Mark. Ni eh kin kalapw patehng rie Kristian kan nan mwomwohdiso, e esehla arail soh unsek kan. Dahme sewese Mark en dehr dipekelekelki arail sapwung kan? E koasoia: “I tehkada me en riei Kristian kan ar sapwung kan uhdahn tikitik ma I pahn kapahrekiong dihp suwed kan me aramas tohto kin wia nan sampah wet. Eri I pilada en dehr kin medemedewe soh unsek en riei Kristian kan. Oh I uhd kin medewehte arail irair mwahu kan.” Ma ke pil wia met, ke pahn kak ahneki kompoakepah keren kan nan mwomwohdiso.

KE TEPIDA INENGIENG SOAHNG KAN ME KE KESELAHR

7. Dahme kakete kahrehiong kitail en tepida inengieng soahng kan me kitail keselahr?

⁷ Ni omw tepin esehla padahk mehlel, ke uhdahn nsenamwahula pwe ke sohla wia kisehn en Sehdan sampah. Mwein ke pahn apwalki kamehlele me mie me pahn men pwuralahng en Sehdan sampah. Ahpw ni omw lelohng kahpwal kan, ke kakete tepida medewe oh pil men wia soahng kan me ke sohla wia ni omw tepida papah Siohwa. (Pil kilang Nempe 11:​4-6.) Karasepe, ekei Kristian kan ele kesehla arail doadoahk en mwohni me uhdahn wad ahpw kin kihsang pali laud en arail ahnsou. A ekei, mwein ni ahnsou me re tepida onop Paipel, kompoakparail keren kan keseirailla. Pil ekei ele anahne uhdihsang tiahk samin ehu me re kin perenki, me Siohwa kin ketin kalahdeki. Ia uwen eh pahn kansensuwed ma Kristian men mweidohng mehkot me e keselahr en kadohwaneweisang ih rehn Siohwa! Dahme ke kak wia met pwe ken dehr pwuralahng soahng kan me ke keselahr ni omw lelohng kahpwal kan?

8. Dahme kitail sukuhlkihsang mehn kahlemeng en Eipraam oh Sara?

⁸ Paipel audaudki mehn kahlemeng en tohnkaudok lelepek kan me kakete tepida inengieng soahng kan me re keselahr. Karasepe, Eipram oh Sara peikiong sapwellimen Siohwa kehkehlik ni ara kohkohsang kahnimw en Ur me lingan oh kehlail pwehn kousoan nan ihmw likou. (Ipru 11:​8, 9) E sansal me ekei pak ira kakete tamanda mour nsenamwahu me ira ahneki nan Ur. ‘Ma ira kin tamatamante’ de inengieng soahng kan me ira keselahr, ira pahn kakete pilada en pwuralahng Ur. Ahpw ira kin medemedewehte duwen ahnsou kohkohdo.—Ipru 11:​15, 16.

9. Ia duwen wahnpoaron Pohl eh kin kilengwohng soahng kan me e keselahr? (Pilipai 3:​7, 8, 13)

⁹ Wahnpoaron Pohl wiahda wekidekla kan nan eh mour pwehn papah Siohwa. Mwohn eh wiahla Kristian men, e kin ale kasukuhl rehn sounpadahk ndand en Kosonnedo, Kamaliel. (Wiewia 22:3) Pohl kakete wiahla kaunen pelien lamalam en mehn Suhs me uhdahn kesempwal. (Kal. 1:​13, 14) Ahpw ni eh sukuhlki duwen rongamwahwo, e kesehla mepwukat koaros. Ia duwe, eh mour nin duwen Kristian men kin ahnsou koaros mengei? Soh. Aramas kin keme, salihedi, oh mehn Suhs kan kin kailongki. (2 Kor. 11:​23-26) Ma e kin medemedewehte kahpwal pwukat oh kapahrekihpene eh mouren met oh mouren mahs, e kakete medewehda me eh mour mwohn eh wiahla Kristian men kansenamwahu sang ahnsou wet. Ahpw Pohl kin medemedewehte pwais kaselel me e ahneki en papah Krais Sises oh kasikasik keting laud me e pahn alehda ni ahnsou kohkohdo. Pohl kamehlele me en wia sapwellimen Sises tohnpadahk men uhdahn kesempwal sang soahng kan me e keselahr.—Wadek Pilipai 3:​7, 8, 13.

10. Dahme kitail en kin kaukaule medemedewe? (Mark 10:​29, 30) (Pil kilang kilel kan.)

¹⁰ Ia mehn kasukuhl ong kitail? Ma ke kin tepida medemedewe soahng kan me ke kesehla pwehn wiahla Kristian men, pil tamataman mwahu kahrepen omw kesehla mepwukat. (Ekl. 7:10) Kapahrekihpene dahme ke kesehla ong kapai kan me ke alehdi ni omw esehla padahk mehlel. Ke ahneki nanpwungmwahu keren rehn Kaun Lapalap en lahng oh sampah. (Lep. Pad. 3:32) Mie riomw Kristian tohto nan mwomwohdiso oh nan sampah pwon me uhdahn poakohng uhk. (Wadek Mark 10:​29, 30.) Oh ke pil ahneki koapworopwor kaselel ehu ong ahnsou kohkohdo! (Ais. 65:​21-23) Ma ke kin kalapw medemedewe kapai kan me kohsang omw papah Siohwa, ke sohte pahn inengieng soahng kan me ke keselahr.

11. Dahme ke sukuhlkihsang dahme wiawihong Rosemary?

¹¹ Sister men me adaneki Rosemary papidaisla ni ahnsou me e sounpar 50 samwa. Kilang dahme sewese ih en dehr inengieng dahme e keselahr. E koasoia: “Nin tapio, I kin nsensuwed erein Krismas pwehki mahso I kin perenki patehng ei peneinei kan ni rahnen Krismas. I kin perenki kisikise irail kan me I poakohng. I pil kin perenki kilang seri kan ar mi ni tuhkehn Krismaso oh kilang pohn masarail kan perenda ni ar kin ale arail kisakis kan.” Dahme sewese ih? Rosemary koasoia: “I eselahr ia duwen ei pahn patehng ei peneinei kan ekei ahnsou tohrohr likin rahnen Krismas. Ehuehu pahr, I kin lukepene ei peneinei, kihong irail kisakis, oh kawehwehda kahrepen ei poakohng emenemen irail.” Mie pil ehu kahpwal me Rosemary lelohng. E koasoia: “Ni ahnsou me I esehla padahk mehlel, kompoakepahi kan keseiehla. Ekei pak, I kin loaleidkinirailda oh kin pehm me I kelekelehpw.”d Ahpw dahme sewese ih? E tepida wiahda koasoandien kalohk rehn soangsoangen sister kan. E koasoia: “Ni ei wia met, I wiahda kompoakepahi kapw kan me I poakohng oh kesempwalki.” Dahme ke kak sukuhlkihsang reh? Mwein ke kin loaleidki mehkot me kin kaperenihiuk mwohn omw esehla padahk mehlel, ahpw tamataman me mie soahng teikan me mwahusang mepwukat me kak kahrehiong uhk ken ahneki nsenamwahu mehlel ni ahnsou wet. (Pil. 4:​8, 9) Oh tamataman me Siohwa kin ahnsou koaros ketikihong uhk laudsang dahme ke keselahr pwehn papah ih.

METEIKAN KIN KOHKOHSANG SIOHWA

12. Soangen kahpwal dah nan mwomwohdiso me kak uhdahn apwal?

¹² Ni omw wiahla Sounkadehde men, ke uhdahn nsenamwahula pwehki ke sohla wia kisehn sampah suwed wet oh met wiahla kisehn pwihn ehu me irail kelehpw kin padahngki padahk mehlel oh nantihong en wia dahme pwung. (Ais. 65:14) Ahpw ekei pak, ele ke rong me mie emen me wiahda dihp laud nan mwomwohdiso. Mwomwohdiso pil kakete kihsang emen nanpwungarail. (1 Kor. 5:13) Tehk dahme soangen irair wet wiahiong sister men me adaneki Samar. E koasoia: “Sohte pwand mwurin ei papidaisla, elder men wiahda dihp laud ehu oh mwomwohdiso kihsang ih nanpwungat. I pwuriamweikihla met pwehki I sohte kamehlele me elder men pahn wiahda dihp mwohn silangin Siohwa oh kamedekihala irail kan nan mwomwohdiso.” Ei uhdahn, kitail anahne ahnsou koaros likih me riatail Kristian kan kin poakohng Siohwa oh men lelepekohngete. (1 Kor. 13:​4, 7) Ahpw e kansensuwed me ehuehu pahr, mwomwohdiso kin kihsang ekei nanpwungarail. Oh met kak uhdahn apwal ahpw mehlel ma emen me ke karanih de emen me ke uhdahn wauneki pilada en kohkohsang Siohwa.

13. Dahme kitail kak wia met pwehn lelepekohngete Siohwa ma emen me kitail karanih kohkohsang ih?

¹³ Dahme ke kak wia met me pahn seweseiuk en lelepekohngete Siohwa ma emen me ke karanih kohkohsang ih? Pousehlahte kakehlaka omw nanpwungmwahu rehn Siohwa. (Seims 4:8) Tamataman me emenemen anahne mie pein eh nanpwungmwahu rehn Siohwa. Karasepe, mendahki kitail kin kalapw kaudokpene nin duwen peneinei ehu oh mwomwohdiso ehu, kitail pil anahne wiahda pein atail koasoandi en kapakap oh wadek Paipel.—Mel. 1:2; 62:8.

14. Dahme kitail sukuhlkihsang en wahnpoaron Piter mehn kahlemeng? (Sohn 6:​66-68)

¹⁴ Kitail pil kak sukuhlkihsang dahme wahnpoaron Piter wia ni tohnpadahk tohto ar sohla idawehn Sises. Mwein pein Piter sohte wehwehki dahme Sises ketin mahsanih ahnsowo. Ahpw tehk dahme e koasoia me kileldi nan Sohn 6:​66-68. (Wadek.) Piter sohte kin medemedewehte dahme meteikan wiewia, ahpw e kin medemedewe padahk mehlel me e alehdi sang rehn Sises. Imwilahn met, Piter sohte uhdihsang eh idawehn Sises. Duwehte rahnwet, mehnda ma meteikan sohla papah Siohwa, tamataman me sapwellimen Siohwa pwihn me padahkihong uhk me mehlel duwen Siohwa. Pousehlahte kesempwalki soahng kaselel kan me ke sukuhlkier oh lelepekohngete Siohwa! Samar, me kitail koasoiapene mwoweo koasoia, “I kin ahnsou koaros katamankihong ie me ma emen wiahda sapwung, met sohte wehwehki me koaros nan mwomwohdiso kin wia soahngohte de me dahme sapwellimen Siohwa pwihn kin padahngki sohte pwung. Oh arail wiewia sohte kin wekidala sapwellimen Siohwa irair kaselel kan.”

15. Dahme ke sukuhlkihsang dahme wiawihong Emily?

¹⁵ Tehk dahme wiawihong Emily. Wihk ehute mwurin Emily eh papidaisla, eh nohnou kohkohsang irail oh mwomwohdiso pil kihsang ih nanpwungarail. Emily koasoia: “Uhdahn I sohte medewe me met pahn kak wiawi. Met wia kahpwal keieu laud me I lelohng nan ei mour, oh I kin uhdahn loaleidki ei nohnou.” Dahme sewese Emily? E koasoia: “I sohte kin kelekelehpw. Ei pahpao oh pil meteikan nan mwomwohdiso me I kin wiahki ei peneinei kin sewese ie. Koaros mie arail kahpwal. Ihme kahrehda e kesempwal kitail en poakohng oh kangoange emenemen.” (1 Pit. 5:9) Ke sohte anahne awih lao ke ahneki kahpwal kan pwehn karanihala riomw Kristian kan nan mwomwohdiso. Ahpw song en esehla mwahu irail ahnsou wet. Eri ni omw wia met, ke sohte pehm me ke kelekelehpw sohte lipilipil dahme pahn wiawi.

16. Dahme kitail anahne tamataman? (Pil kilang kilel.)

¹⁶ Pil tamataman me Siohwa kin ketin panawih irail kan me e kin ketin poakohng. (Ipru 12:6) E ketin kupwurki koaros me mwomwohdiso kihsang nanpwungarail ren pwurodo reh. (2 Pit. 3:9) Eri ma mwomwohdiso kihsang nanpwungarail emen me ke karanih, ke kak kamehlele me elder kan pahn wia uwen arail kak koaros en sewese pwehn pwurodo rehn Siohwa.—2 Tim. 2:​24, 25.

17. Dahme kitail kak kamehlele?

¹⁷ Kitail koasoiapenehr ekeite kahpwal kan me ke kakete lelohng mwurin omw papidaisla. Mehlel, ke pahn kakete perki ekei kahpwal pwukat, ahpw sohte kahrepen omw pahn masak. Pwe mie soahng tohto me ke kak wia pwehn kaunopada. Oh ahnsou koaros tamataman me Siohwa pahn ketin seweseiuk ken lelepekohngete. E ketin seweseiukehr oh kupwurki seweseiuk kohkohlahte! (1 Pit. 5:10) E pahn ahnsou koaros ketikihong uhk kehl me ke anahne pwe ken dadaur pahn kahpwal sohte lipilipil. Ma ke pousehlahte mweidohng Siohwa en ketin seweseiuk, sohte kahpwal ehu me pahn kak kadohwaneweisang uhk reh!—Mel. 119:165; Rom 8:​38, 39.