Mwadang Kamwahwihala Nanpwungamwa!
IA DUWE, mie riomw Kristian men me uhdahn kamedekeiukala oh kauwehla amwa nanpwungmwahu? Pwehn kamwahwihala nanpwungamwa oh kompoakepahnkihte emenemen, ke anahne mwadang wia mehkot oh pil wia met ong kahrepe pwung kan.a
Pwehn karasahda met, tihn aramas emen me ohla pahn kak mwahula oh kedekedeo sohla medek ma toahkte men kamwahwihala. Ahpw e pahn medemedekte ma aramaso sohte mwadang kohla tuhwong toahkte. Suwedsang met, tiho pahn kak pirekla douluhl oh sohla kak kadoadoahk mwahu.
Duwehte tihn aramas men me ohla, ke anahne mwadang kamwahwihala nanpwungsuwed rehn riomw Kristian men. Pwe ma soh, ke pahn pousehlahte medengki amwa nanpwungsuwedo. Ke kakete kolokol omw lingeringer oh ele luhssang kompoakepahmwo. Sises mahsanih: “Mwadang kapwungala nanpwungen kowe oh emen.” (Mad. 5:25) Eri koasoiong kompoakepahmwo ni kadek oh ni saledek duwen dahme ke pwunupwunodkio. Dahme kahrehda met kakete apwal? Medewehla kahrepe riau.
Keieu, mwein ke pahn kahng song en kamwahwihala nanpwungamwa pwehki ke kin soansuwedki koasoia duwen kahpwalo.b Medewehla duwen Iuodia oh Sindiki, lih Kristian riemen me sohte kak kapwungala sawehwe ehu nanpwungara. E mwomwen me ahnsou werei ira ahneki sawehwe wet pwehki wahnpoaron Pohl pil rong duwen met mendahki eh mi nan Rom, me dohsang ira. E kangoange ira en wia dahme anahn pwehn kamwahwihala nanpwungara. (Pil. 4:2) Ma ira aktikitik, koasoipene ni mehlel, oh mahkpene ni mehlel, ira pahn kak kamwahwihala nanpwungara.
Keriau, mwein ke pahn kasik aramaso en pohnese eh sapwung kan. Ahpw ke men kamwahwihala nanpwungamwa, a kaidehn en kasalehda ihs me pwung de sapwung. Toahkte men kin song en kamwahwihala tihn aramas emen me ohla, a kaidehn en song en esehda oaritik koaros me pid duwen dahme kauwehla tiho. Ni omw koasoiong kompoakepahmwo, dehr medemedewehte ihs me kahrehda kahpwalo. Ahpw tamataman ia uwen omw kesempwalki amwa nanpwungmwahu oh medemedewehte dahme ke anahne wia pwehn kamwahwihala nanpwungamwa.
Ke sou koasoiong riomw Kristiano rahnwet oh song en kamwahwihala nanpwungamwa? “Dehr wie lingeringer lao ketipino kihrla.” (Ep. 4:26) Ma ke mwadang kamwahwihala nanpwungamwa, ke pahn sewese pere atail “popohl.”—Ep. 4:1-3.
a Kisin sawehwe kan anahne epwella nanpwungen meh riemen oh ira pil anahne mahkohng emenemen. (Mad. 5:23, 24) Ahpw ma kahpwalo uhdahn laud, ele ira pahn anahne peki sawas rehn elder kan. (Mad. 18:17) Kristian men pahn rapahki soangen sawas wet ihte mwurin eh kapwaiadahr kaweid kan me kileldi nan Madiu 18:15, 16.
b Ma riomw Kristian men kansensuwedihiukala ahpw sohte kauwehla amwa nanpwungmwahu, e mwahu ken pohnsehsehla dahme e wiao.—Lep. Pad. 26:20.