November

Elder kan kin kahlemengih Siohwa me kin ketin poakehla irail kan me mwomwohdiso kihsang nanpwungarail. Karasepe, mahso Siohwa sohte ketin awih sapwellime aramas akan nan Israel en koluhla mwohn eh ketin song en sewese irail. Ahpw, e ketin kadarala sapwellime soukohp ko rehrail, pil mwohn arail koluhla. Siohwa ketin mahsanihong Oseia en mahkohng eh pwoudo oh kapwurehla mendahki e kin wiewiahte dihp laud. Ni ahl wet, Siohwa ketin padahkihong sapwellime aramas akan me e kin uhdahn ketin poakepoake irail. (Os. 3:1; Mal. 3:7) Elder kan kin kahlemengih Siohwa ni arail kin uhdahn men me wiahda dihp laudo en koluhla oh pwurodo nan mwomwohdiso, oh re sohte kin kahrehiong en apwal ong ih en wia met. Nan sapwellimen Sises karasaras duwen pwutak salongalao, pahpao “tangalahte pwoalehdi [nah pwutak] oh metik.” (Luk 15:20) Tehk me pahpao sohte awih nah pwutako en peki mahk. Ahpw, pahpao tangala rehn nah pwutako pwehki e poakepoake ih. w24.08 28 ¶7-8

Duwehte iren rahn en rahnwet eh kasalehda, Siohwa sohte kin ketin kelehpwki sapwellime erpit. Ni kadek, e kin ketin ehukihong meteikan. Seims pil koasoia me ni Siohwa eh kin ketikihda erpit, e kin ketin wia met ni eh “sohte kin ketin rapahki sapwung.” E sohte ketin kupwurki kitail en suwedki ni atail kin peki reh kaweid. Ni mehlel, e ketin kupwurki kitail en peki reh. (Lep. Pad. 2:​1-6) Ia duwen kitail? Kitail kak kahlemengih Siohwa sang ni atail ehukihong meteikan atail erpit? (Mel. 32:8) Sapwellimen Siohwa aramas akan ahneki ahnsou mwahu tohto en ehukihong meteikan dahme re sukuhlki. Karasepe, kitail kalapw kasukuhlih me kapw kan nan kalohk. Ni kanengamah, elder kan kin sewese sounsawas kan oh brother papidaisla kan ren sukuhlki ia duwen arail kak apwalih arail pwukoa kan nan mwomwohdiso. Oh riatail Kristian kan me koahiek en kauwada oh apwalih Wasahn Kaudok kan kin kaiahne meteikan ren wia doadoahk kan me kin wiawi nan sapwellimen Siohwa pwihn. w24.09 28-29 ¶11-12

Brother kan, pwehn wiahla elder men, ke pahn ‘sohte karaunpomw,’ me iei en ahneki adamwahu nan mwomwohdiso pwehki omw wiewia mwahu. (1 Tim. 3:2) Patehng met, ke anahne ahneki “mehn kadehde mwahu sang irail kan me kaidehn kisehn mwomwohdiso.” Ei mehlel, aramas akan me sohte kin papah Siohwa kakete kauwe dahme ke kin kamehlele. Ahpw irail en dehr peikasalki me ke wia aramas mwahu oh mehlel. (Dan. 6:​4, 5) Pein idek rehmw, ‘I kin ahneki adamwahu rehn riei Kristian kan oh pil rehn irail kan me sohte kin papah Siohwa?’ Ma ke kin “poakohng me mwahu,” ke pahn kilang irair mwahu rehn meteikan oh kapingahkin irail. (Taitus 1:8) Ke pahn pil perenki wiahiong irail soahng mwahu kan, iangahki soahng kan me sohte me kasik ke pahn wia. Dahme kahrehda irair wet uhdahn kesempwal ong elder kan? Pwehki irail kin doadoahngki arail ahnsou laud en sewese mwomwohdiso oh apwalih arail pwukoa kan. (1 Pit. 5:​1-3) Mendahki e pahn doadoahk laud pwehn wia met, e pahn alehdi peren laud sang ni eh sewese meteikan.—Wiewia 20:35. w24.11 20-21 ¶3-5

Sounsawas kan kin wia doadoahk kesempwal nan mwomwohdiso. Wahnpoaron Pohl kin kesempwalki ohl lelepek pwukat. Karasepe, ni eh ntinglahng Kristian kan nan Pilipai, e rahnmwahwih sounsawas kan oh pil elder kan. (Pil. 1:1) Sohte lipilipil ma re pwulopwul de mah, brother papidaisla tohto kin diar peren ni arail kin sewese mwomwohdiso nin duwen sounsawas kan. Karasepe, Devan sounpar 18 ni ahnsou me e idihdida nin duwen sounsawas men. Ahpw emen brother me adaneki Luis idihdida ni ahnsou me e sounpar 50 samwa. Luis kasalehda pepehm en brother tohto ni eh koasoia, “E uhdahn wia pwais kaselel ehu en wia doadoahk en sounsawas men, ahpw mehlel ni ei kin medewehla uwen limpoak laud me mwomwohdiso kin kasalehiong ie!” Ma kowe brother papidaisla men oh saikinte wiahla sounsawas men, ke seu wiahki met omw mehn akadei? w24.11 14 ¶1-3

Ni eh sounpar 39, Nanmwarki Esekaia en Suda esehda me e ahnekihda soumwahu laud ehu. Siohwa ketin mahsanihong soukohp Aiseia en padahkihong Esekaia, me e pahn mehkihla eh soumwahwo. (2 Nan. 20:1) Ni Esekaia eh rongada met, e uhdahn nsensuwedla me kahrehda en sengiseng kowahlap. E peki sawas sang rehn Siohwa. Ni Siohwa eh ketin karonge en Esekaia kapakapo oh mwahngih eh nsensuwed, e ketin poakehla Esekaia oh mahsanihong: I “rongehr omwi kapakap oh kilangehr pilen mesomw. I pahn kamwahwihkomwihla.” Siohwa ketin doadoahngki Aiseia pwehn padahkihong Esekaia sapwellime inou en kareireila eh mour oh doarehla Serusalem sang mehn Asiria ko. (2 Nan. 20:​4-6) Dahme ke kak wia ma ke ahneki soumwahu ehu me mwomwen sohte kak mwahula? Padahkihong Siohwa omw pepehm. E pahn ketin karongeiuk ma ke pil sengiseng ni omw kapakapohng. Paipel kamehlelehiong kitail me “Semen kupwurkalahngan oh Koht en kansenamwahu koaros” pahn ketin kansenamwahwih kitail nan atail kahpwal koaros.—2 Kor. 1:​3, 4. w24.12 24 ¶15-17

Ia uwen eh pahn kaperen en kasamwo irail kan me iasada! Pil medewehla ia uwen omw pahn perenki kalaudehla omw sukuhlki duwen Siohwa sang omw sukuhlki sapwellime kepikipik kan. (Mel. 104:24; Ais. 11:9) Oh mwahusang mepwukat koaros, ke solahr pahn wiahda sapwung, eri ke pahn kak papah Siohwa oh sohte anahne peki sapwellime mahk! Ke pahn kesehla soangen kapai pwukat pwehn “perenki dihp ahnsou mwotomwot”? (Ipru 11:25) Uhdahn soh! Mour kaselel me kitail pahn ahneki ahnsowo pahn uhdahn mwahusang soahng koaros me kitail kak alehdihsang sampah ahnsou wet. Tamataman me kitail sohte pahn ahnsou koaros kasikasik Paradais. Ehu rahn, e uhdahn pahn wiawi. Oh soahng pwukat kak wiawi pwehki Siohwa uhdahn ketin poakohng kitail me kahrehda e ketikihda pweinen pweipwei sapahlo! w25.01 29 ¶12

Pwuhken Ipru koasoia duwen aramas tohto me kin pwoson Siohwa. Emen irail iei Moses, me uhdahn ahneki pwoson laud. (Ipru 3:​2-5; 11:​23-25) E konehng Moses en wia met, pwehki Siohwa ketikihong mehn Israel ko kanarail mwenge oh nimarail pihl pwe irail en kak pitsang sapwtehno, wasa me sohte wahnsahpw kak keirda ie. (Eks. 15:​22-25; Mel. 78:​23-25) Ahpw mendahki Moses ahneki pwoson laud, mpen sounpar ehu mwurin Siohwa ketin kapitala mehn Israel ko sang Isip, e tepida peidengki ma Siohwa pahn ketikihong kenen mehn Israel ko uduk. Mehn Israel rar rar kei me mi nan sapwtehno, wasa me sohte mwenge. Ia duwen Siohwa eh pahn kak ketikihda uduk me itar ong irail koaros? Siohwa eri keinemwe rehn Moses: “Ia duwe, mie irepen ei manaman?” (Nemp. 11:​21-23) Eri e mwomwen me Siohwa ketin keinemwe rehn Moses, ‘Ke uhdahn medewe me I sohte kak wia dahme I nda I pahn wia?’ w25.03 26 ¶1-2

Ia duwe, e pwung en nda me ehuehu mwekid me wiawi ni ahnsoun Nohliko pahn pahrekiong dahme pahn wiawi ni ahnsou kohkohdo? Soh. Dahme kahrehda? Pwehki Paipel sohte mahsanih met. Mehlel me Sises ketin kapahrekiong “ni mwehin Nohao” ahnsou me e ketier. Ahpw e sohte mahsanih me soahng koaros me wiawi ni mwehin Nohao pahn pahrekiong dahme pahn wiawi ni ahnsou kohkohdo, duwehte ahnsou me Siohwa ketin ritingdi wenihmw en warihmwo. (Mad. 24:​37-39) Dahme Noha mwekidki ni eh rong sapwellimen Siohwa kehkehliko? E kasalehda eh pwoson sang ni eh kauwada warihmwo. (Ipru 11:7; 1 Pit. 3:20) Duwehte met, aramas akan me rong duwen rongamwahu en Wehin Koht anahne kapwaiada dahme re rong. (Wiewia 3:​17-20) Piter kahdaneki Noha “sounkalohki pwung.” Rahnwet, kitail kin song en kalohk ong aramas koaros nin sampah, oh kin ngoangki wia met. Ahpw sohte lipilipil ia uwen laud en atail nanti, kitail sohte kak lella rehn aramas koaros mwohn imwio leledo. w24.05 9-10 ¶3-5

Kitail anahne rapahki ahl akan en kasalehda kadek oh wauneki kompoakepahn Siohwa kan. (Rom 12:10) Ia duwen? Nin duwen me Melkahka 15:4 mahsanih, ehu ahl iei me emen me lukodohng nan sapwellimen Siohwa impwal “kin kapwaiada dahme e inouki ahnsou koaros, mehnda ma e apwal.” Ma kitail kauwehla atail inou kitail pahn kamedekihala meteikan. (Mad. 5:37) Karasepe, Siohwa ketin kasik pwopwoud kan en kapwaiada arail inou en pwopwoud. E pil ketin kupwurperenki ni pahpa nohno kan ar kin kapwaiada inou kan me irail wiahiong neirail seri kan. Pwehki kitail poakohng Koht oh meteikan, kitail pahn wia uwen atail kak en kapwaiada atail inou. Ehu elen wauneki kompoakepahn Koht kan iei sang atail kasamwo meteikan oh kasalehda kadek. (Rom 12:13) Ni atail kin patehng riatail Kristian kan kaidehn ahnsoun mihtingte de kalohk, kitail kin karanihala irail oh Siohwa. Pil ehu, ni atail kin kasamwo meteikan, kitail kin alasang Siohwa. w24.06 12 ¶15-16

Siohwa kin ketin kasalehiong irail me aktikitik kan me mehlelo. (Mad. 11:25) Ni aktikitik kitail kin men ale sawas pwehn sukuhlki me mehlelo. (Wiewia 8:​30, 31) Ahpw kitail anahne kanahieng en dehr aklapalapala. Ma kitail aklapalap, kitail kakete tepida medewe me pein atail madamadau pil pwung duwehte kaweid oh ire mehlel kan en Paipel oh kaweid kan me kohsang sapwellimen Siohwa pwihn. Pwe kitail en aktikitikte, kitail anahne tamataman uwen Siohwa eh ketin lapalap sang kitail. (Mel. 8:​3, 4) Kitail pil kak peki rehn Siohwa en ketin sewese kitail en aktikitikla oh men ale kasukuhl sang reh. Siohwa pahn ketin sewese kitail en kesempwalki sapwellime madamadau, me kitail kin sukuhlki sang nan Paipel oh sapwellime pwihn, laudsang pein atail. Nan omw wadawad en Paipel, rapahki mehn kadehde kan duwen Siohwa eh kin ketin poakohng aktikitik oh kalahdeki pohnmwahso, madamadau ile, oh aklapalap. Oh nanti laud pwehn aktikitikte ni omw alehdi pwukoa ehu me kihong uhk ekis manaman de me kahrehda meteikan en kin tehk uhk. w24.07 10 ¶8-9

Sangete pahr 1919, Sises kin ketin doadoahngki kisin pwihn tikitik en ohl keidi kan pwe ren koasoanehdi doadoahk en kalohk oh kihong sapwellime tohnpadahk kan kaweid sang Mahsen en Koht ni ahnsou me konehng. (Luk 12:42) E sansal me Siohwa kin ketin kapaia ahn pwihn wet doadoahk. (Ais. 65:​13, 14) Ma kitail sohte soandi mwahu, kitail sohte pahn kak wia doadoahk me Sises ketikihong kitail. (Mad. 28:​19, 20) Karasepe, ma brother kan sohte koasoanehdi wasahn atail kalohk kan koaros, eri emenemen pahn kak kalohk wasa me e mwahuki. Kitail kakete pwurupwurehng kalohk ekei wasa, a ekei wasahn kalohk soh. Ke kak medewehla ahl teikan me kitail kak paiekihda atail kin soandi mwahu? Duwehte Sises eh kin ketin koasoanehdi sapwellime tohnpadahk kan erein eh ketiket nin sampah, e kin pousehlahte koasoanehdi sapwellimen Koht aramas akan rahnwet. w24.04 8-9 ¶2-4

Kain iei nein Adam oh Ihp tepin pwutak. E sohsohki dihp sang eh pahpa nohno. Ahpw Kain sohte powehdi eh ineng ko. Paipel mahsanih: “Eh wiewia kan me sapwung.” (1 Sohn 3:12) Ele met kawehwehda dahme kahrehda Siohwa “sohte ketin kupwure Kain oh eh meirongo” ni eh wiahda meirong ehu. Kain sohte wekidala eh mwekid, ahpw e “lingeringerkihda kowahlap oh pohtoutoukihla.” Dahme Siohwa ketin wia mwuri? E ketin mahseniong Kain. (Sen. 4:​3-7) Tehk me Siohwa ketin mahseniong Kain ni kadek oh padahkihong me e pahn ketin kapaia ih ma e pahn wia dahme pwung. Siohwa pil ketin padahkihong Kain me eh lingeringero pahn kakete kahrehiong en wia mehkot sapwung. E kansensuwed me Kain sohte rong. E sohte mweidohng Siohwa en ketin sewese ih en koluhla. Mendahki Kain sohte rong Koht, Siohwa sohte ketin pilada me e sohla pahn ketin sewese emen en koluhla! w24.08 10 ¶8

Wehin Israel kak kasikasik ahnsou kaselel ehu mwuhr. Pwehki Siohwa pahn ketin kapaiairailda, mehn Israel ko kak mour werei nan sahpw me e ketin inoukihong irail. Oh sahpwo inenen kaselel oh direki wahnsahpw! Moses kawehwehiong irail: “Sahpw ehu me kahnimw lapala oh kepwehpwe kei mi loale, me kaidehn kumwail me kauwada. Nan ihmw akan pahn diren dipwisou mwahu, me kaidehn kumwail me kihong loale. E pahn mie pwarer en pihl kei, me kaidehn kumwail me weirada; oh pil mwetuwel en wain oh tuhkehn olip, me kaidehn kumwail me padokedi.” (Deud. 6:​10, 11) Moses pil kihong mehn Israel ko mehn kataman ehu. Pwe ren mihmihte nan sahpw kaselelo, re anahne peikiong sapwellimen Siohwa kehkehlik kan. Moses kangoangehkin irail en “pilada mour” sang ni arail peikiong Siohwa oh “loalopwoatohng.” (Deud. 30:20) Ahpw mehn Israel ko sohte peikiong Siohwa. Kedekedeo Koht ketin mweidohng mehn Asiria ko oh mwuhr mehn Papilon ko en kaloweiraildi oh wairailsang nan sapwarailo.—2 Nan. 17:​6-8, 13, 14; 2 Kron. 36:​15-17, 20. w24.11 9 ¶5-6

Aramas tohto rahnwet kin nda me re pwoson Sises oh iei ih me arail sounkomour. (Sohn 6:29) Ahpw ekei nan pokon ehu me kin pwoson Sises nin tapio sohla idawehn ih. Dahme kahrehda? Pali laud en aramas akan nan pokono kin idawehnte Sises pwehki e kin ketikihda dahme irail men ale. Irail men en ketin kamwahwihala arail soumwahu kan, ketikihda mwenge ni soh isepe, oh padahngki dahme re men rong. Ahpw Sises ketin kasalehda me e sohte ketido sampah pwehn ketikihong irail dahme irail men ale. E ketido pwehn padahkihong irail dahme re anahne wia pwehn wiahla sapwellime tohnpadahk mehlel. Irail anahne ‘kohla reh,’ me wehwehki ren rong oh peikiong soahng koaros me e ketin padahngki.—Sohn 5:40. w24.12 12 ¶12-13

Dahme kak sewese ohl pwopwoud men en powehdi eh mwamwahliki oh wiakauwe eh pwoud? E kak song en kahlemengih Sises. Mwomwen eh wiewia ong sapwellime tohnpadahk ko wia mehn kahlemeng mwahu ong ia pahn en ohl pwopwoud men wiewia ong eh pwoud. Tehk dahme ohl pwopwoud kan kak sukuhlkihsang mwomwen sapwellimen Sises wiewia oh eh mahseniong sapwellime wahnpoaron ko. Sises kin ketin ahnsou koaros kadek oh wauneki sapwellime wahnpoaron ko. E sohte kin ketin lemei. E sohte kin ketin doadoahngki sapwellime manaman pwehn kahrehiong irail en pehm me re luwet de masak ih. Ahpw, e ketin ni aktikitik papah irail. (Sohn 13:​12-17) E mahsanihong sapwellime tohnpadahk ko: “Padahngki sang ie, pwe I me opampap oh mohngiong karakarahk, kumwail ahpw pahn diar nsenamwahu.” (Mad. 11:​28-30) Tehk me Sises ketin opampap. Aramas emen me opampap sohte kin luwet. Ahpw, e kin ahneki kehl pwehn kak kaunda pein ih. Ni emen eh kansensuwedihada, e kin meleileite oh kaunda eh pepehm kan. w25.01 10 ¶10-11

Ni imwin koasoandi wet eh kereniong imwisekla, kitail kak kasik me kahpwal en mwohni pahn laudla. Pingiping en palien politik kan, mahwen, rerrer en sahpw de melimel ape, soumwahu lusulus kapw kan kakete kahrehda kahpwal en mwohni, sohla atail doadoahk, kepwe kan, de pil imwatail. Dahme kak sewese kitail en wiahda pilipil kan me kasalehda atail likih Siohwa? E uhdahn kesempwal en padahkihong Siohwa dahme ke kin pwunodki. Met pahn uhdahn seweseiuk. Peki reh en ketikihong uhk erpit me ke anahne pwehn wiahda pilipil mwahu kan oh ken meleilei oh dehr ‘pwunodki laud’ omw irairo. (Luk 12:​29-31) Pousehlahte peki en ketin seweseiuk en kin itarki dahme ke uhdahn anahne pwehn momour. (1 Tim. 6:​7, 8) Wia roporop nan neitail sawasepen Paipel kan pwehn ese dahme ke pahn wia ni omw ahneki kahpwal en mwohni. Me tohto koasoia me kisin kasdo oh artikel kan nan jw.org me pid kahpwal en mwohni kin sewese irail. w25.03 28-29 ¶10-11

E lelehr ahnsowo ong mehn liki kan ren wiahla kisehn sapwellimen Koht aramas. Koht ketin mahsanihong wahnpoaron Piter en kohla kalohk ong Kornilius, tepin mehn liki me pahn wiahla emen Kristian. Mehn Suhs kan sohte kin men ehuiong mehn liki, eri Piter anahne wekidala eh madamadau pwehn kak kalohk ong mehn liki kan. Ni Piter eh esehda sapwellimen Koht madamadau ong mehn liki kan, e wekidala eh madamadau. Eri ni Kornilius eh peki Piter en mwemweitla reh, Piter kohla ni “soh peikasal.” (Wiewia 10:​28, 29) E kohla kalohk ong Kornilius oh tohn imweo, oh irail papidaisla. (Wiewia 10:​21-23, 34, 35, 44-48) Sounpar kei mwuhr, Piter kangoangehki ienge Kristian kan ren “ahneki madamadau teieu.” (1 Pit. 3:8) Kitail kak ahneki madamadau teieu rehn riatail Kristian kan ma kitail kahlemengih sapwellimen Siohwa elen madamadau me kitail sukuhlki nan Paipel. w25.03 9-10 ¶7-8

Mwomwen ahn aramas akan uhwong sapwellimen Siohwa madamadau kin wie lalaudla. (Lep. Pad. 17:15) Eri, kitail anahne kakehlailihala atail kak kasawihada oh soikala madamadau sapwung kan me sounuhwong kan kin doadoahngki pwehn kahrehiong kitail en sohla eimah de pil uhdihsang papah Siohwa. Wahnpoaron Pohl ndaiong mehn Ipru ko ren nantihongete koahiekla nin duwen Kristian kei, oh kitail pil anahne wia duwehte. Met wehwehki me kitail anahne onopki kanahieng Paipel pwe kitail en esehla mwahu Siohwa oh sapwellime madamadau. Kitail anahne pousehlahte wia met pil mwurin atail papidaisla. Sohte lipilipil ia uwen werei me kitail mi nan padahk mehlel, kitail koaros anahne kaukaule wadek oh onopki Mahsen en Koht. (Mel. 1:2) En kaukaule onopki Paipel pahn sewese kitail en kakehlakahla atail pwoson, irair ehu me Pohl ndaiong Kristian en Ipru ko me re anahne ahneki.—Ipru 11:​1, 6. w24.09 10 ¶7-8

Ma kitail kin ahneki nanpwungmwahu keren rehn Siohwa, e pahn mengei ong kitail en kin lelepekiongete. Ih met me wiawihong Sosep. E koasoanehdi teng en dehr wia tiahk samin. Ong ih, Koht uhdahn ieias oh e sohte men kansensuwedihala. (Sen. 39:9) Pwehn ahneki nanpwungmwahu keren rehn Siohwa, kitail anahne wiahda ahnsou pwehn kapakapohng oh onopki sapwellime Mahsen. Eri atail nanpwungmwahu reh pahn kekeirda. Duwehte Sosep, ni atail kin ahneki nanpwungmwahu keren rehn Siohwa, kitail sohte pahn men wia mehkot me pahn kansensuwedihada. Irail kan me sohla kin likih Siohwa kak mwadang en sohla loalopwoat. Tehk dahme wiawihong mehn Israel ko ni ahnsou me re mi nan sapwtehn. Irail ese me Siohwa ketin ieias, ahpw re tepida peikasalki ma e uhdahn pahn ketin apwalih irail. (Eks. 17:​2, 7) Pwehki met, irail uhwongada Koht. Uhdahn kitail sohte men alasang arail mehn kahlemeng suwed.—Ipru 3:12. w24.06 24 ¶14-15

Imwin koasoandien mwehi wet kerendohr, oh kitail kasik me pahn mie kahpwal kan me pahn kahrehda medek oh sengiseng laud. Kitail kilang me Siohwa kin ketin mwahngih pilen masatail kan oh kin kupwurtoutoukihla. Pilen masatail kan uhdahn kesempwal ong ih. Eri ni atail kin lelohng irair kapwunod kan, kitail uhdahn men kapakapkihong Siohwa dahme mi nan mohngiongitail. Eri kitail anahne mi karanih riatail Kristian kan nan mwomwohdiso. Oh kitail en pousehlahte rapahki mahsen kansenamwahu kan nan Paipel. Kitail kak kamehlele me ma kitail pousehlahte dadaurete ni lelepek, Siohwa pahn ketin katingih kitail. Met pil pidada inou kaselel en ahnsowo, me e pahn ketin ‘limwihasang pilen masatail kan koaros’ me kin keredi pwehki lokolok. (Kaud. 21:4) Eri kitail pahn sengiseng pwehki kitail peren. w24.12 20 ¶3; 25 ¶19

Siohwa ketin idihada kitail en wia sapwellime Sounkadehde, oh ketin inoukihda me e pahn sewese kitail en eimah. (Ais. 43:​10, 11) Medewehla ahl pahieu me e kin ketin wia met. Keieu, Sises kin ketin ieiang kitail ahnsou koaros me kitail kalohki rongamwahwo. (Mad. 28:​18-20) Keriau, Siohwa ketin idihada tohnleng kan pwehn sewese kitail. (Kaud. 14:6) Kesiluh, Siohwa ketikihong kitail sapwellime manaman pwehn sewese kitail en tamataman dahme kitail sukuhlki. (Sohn 14:​25, 26) Kapahieu, Siohwa ketikihda riatail Kristian kan en sewese kitail. Pwehki sapwellimen Siohwa sawas oh utuht sang riatail Kristian kan sampah pwon, kitail ahneki soahng koaros me anahn pwehn eimah oh pousehlahte kalokalohk. Ahpw ma ke kin mworusala ni omw kin tuhwong aramas keite ni imwarail kan, pein idek rehmw: ‘Ia wasa aramas akan kohla ie?’ (Wiewia 16:13) ‘Irail kohla doadoahk de netinet?’ Ma ih met me wiawi, ia duwen omw kak diar aramas tohto ni omw wia doadoahk en kalohk nanial? w24.04 17 ¶10-11

Ma ke wia ohl pwopwoud men oh men wiahla elder men, omw peneineio pil anahne wia mehn kahlemeng mwahu ong meteikan. Eri, ke anahne en kin “apwalih mwahu pein [omw] peneinei.” Met wehwehki ke anahne apwalih omw peneinei ni elen limpoak oh wiahda pilipil mwahu kan ong irail. Ke kin wia kaudok en peneinei, tehk mwahu me omw peneineio kin iang towehda mihting kan, oh sewese irail en wia uwen arail kak koaros nan doadoahk en kalohk. Ma kowe pahpa men, oh noumw seri ko pahnangin sounpar 18 oh mi pahn epwelpomwi, irail anahne kin “peik oh tiahk mwahu.” (1 Tim. 3:4) Ke anahne kaiahne oh padahkih irail ni limpoak. Ei mehlel, ke men irail en nsenamwahu oh pereperen, duwehte seri teikan koaros. Ahpw ke pil anahne padahkihong irail en kin peikiong uhk, wauneki meteikan, oh kin tiahk mwahu. Patehng met, ke anahne wia uwen omw kak koaros en sewese noumw seri kan en kakairada nanpwungmwahu rehn Siohwa, oh mour pahrekiong kaweid en Paipel kan, oh kekeirda pwehn papidaisla. w24.11 22 ¶10-11

Uwen laud en atail iang kalohk, ih uwen laud en atail pahn kilang Siohwa eh ketin sewese kitail oh atail likih ih pahn laudla. (1 Kor. 3:9) Ahpw, tamataman me Siohwa sohte kin ketin kapahrekihong uwen laud me ke wia ong dahme meteikan kin wia, e ketin mwahngih dahme mi nan omw mohngiong. E kin kupwurperenkihda ni eh mwahngih uwen omw kalahnganki sapwellime kisakis kesempwalo me iei pweinen pweipwei sapahlo. (1 Sam. 16:7; Mark 12:​41-44) Pwehki pweinen pweipwei sapahlo me kahrehda kitail kak ale mahkpen dipatail kan, ahneki nanpwungmwahu rehn Siohwa, oh koapworopwor en mour soutuk. Kitail en kin ahnsou koaros kasalehda atail kalahnganki sapwellimen Siohwa limpoak, me kamwakid ih en ketikihong kitail kapai pwukat. (1 Sohn 4:19) Kitail pil men kasalehda atail kalahngan ong Sises, me uhdahn ketin poakohng kitail oh pwoukinkitailla. w25.01 31 ¶16-18

Ma ke kin ahneki soangen peidek pwukat, medewehla ia ahn sounnting en Melkahka 73 pepehm. E kilang aramas akan me sohte kin papah Siohwa ar roson mwahu, kepwehpwe, oh mwomwen sohte kin pwunod. (Mel. 73:​3-5, 12) Ni eh kilang me arail mour mwomwen nsenamwahu, met kahrehiong en pehm me eh nannanti en papah Siohwa sohte katepe. E kin “pwunod rahn ehu pwon” ni eh kin medewe met. (Mel. 73:​13, 14) Ia duwen eh powehdi eh madamadau sapwungo? Sounmelkahkao kohla nan sapwellimen Siohwa tehnpas sarawio. (Mel. 73:​16-18) Wasao, e kak medemedewe mwahu soahng kan. E wehwehkihda me mendahki mour nsenamwahu me ekei ahneki, sohte arail koapworopwor ong ahnsou kohkohdo. Eri e sohla mworus oh kamehlele me en mwohneki mahs Siohwa nan eh mour wia pilipil me keieu mwahu. Oh e koasoanehdi teng en pousehlahte papah Siohwa.—Mel. 73:​23-28. w24.10 27 ¶11-12

Siohwa ketin pilada kitail en wia sapwellime “sounkadehde.” (Ais. 43:​10-12) Sounpar kei samwalahro, kisinlikou ehu sang Pwihn me Kin Apwalih Mwomwohdiso nan Sampah Pwon koasoia: “Pwais keieu kaselel me kitail kak ahneki iei en adaneki Sounkadehdehn Siohwa kan.” Dahme kahrehda? Medewehla ehu karasaras. Medewehla me emen kapwukoahkin uhk mehkot sapwung. Eri ke anahne emen en padahkihong meteikan me likamw pwoat mwo oh me kowe aramas mwahu men me sohte douluhl pahn wia soahng wet. Ihs me ke pahn pilada? Ke pahn pilada emen me ke ese, kin likih, oh me kin tiahk mwahu pwe meteikan en kamehlele. Sang ni Siohwa eh ketin pilada kitail en wia sapwellime Sounkadehde, e ketin kasalehda me e uhdahn mwahngih kitail oh likih me kitail pahn padahkihong meteikan me ihete me Koht mehlel. Kitail uhdahn pohlki atail wia sapwellime Sounkadehde, ihme kahrehda kitail kin doadoahngki ahnsou mwahu koaros pwehn kalohki duwen mwareo oh kadehdehda me soangen likamw tohto me pid ih sohte mehlel. Ni ahl wet, kitail kin kadehdehda wehwehn adatailo, Sounkadehdehn Siohwa kan!—Rom 10:​13-15. w24.05 18 ¶13

En papah meteikan kin kahrehiong Sises peren laud. Ehu ahnsou ni Sises eh ketin papah pokon ehu, e sohte ketin padahkihte irail ahpw e ketin wia laudsang. E ketin apwalihala arail anahn en war. Ni ahl kapwuriamwei ehu, e ketikihda kanarail mwenge oh mahsanihong sapwellime tohnpadahk ko en kihpeseng mwenge ko. (Mark 6:41) Sang ni eh ketin wia met, e ketin padahkihong sapwellime tohnpadahk ko ia duwen arail en papah meteikan. E pil ketin kasalehiong irail me soangen doadoahk wet me kesempwal. Medewehla uwen peren me wahnpoaron ko ahneki ni arail iang Sises ketikipeseng mwenge ko lao “koaros eri mwenge oh medla”! (Mark 6:42) Met wiahte ehu karasepen Sises eh ketin nsenohki anahn en meteikan laudsang pein ah. E kin ketin wia met erein eh ketiket sampah. (Mad. 4:23) Sises uhdahn kupwurperenki padahki meteikan oh ni aktikitik apwalihala arail anahn kan. w24.11 16 ¶10-11

Ni irair en “imwin rahn akan” eh susuwedla, e uhdahn pahn mie ahnsou mwahu en sewesehki riatail Kristian kan dahme re anahne. Kitail pil kak kasalehda limpoak oh kansenamwahwih irail ni ahnsou me re anahne. Ehu ahl en wia met iei sang ni atail koasoiong irail nan atail Wasahn Kaudok. Eri ni riatail Kristian kan arail iang towehda mihting kan, kitail men tehk mwahu me kitail kin kangoange irail oh kasalehiong irail limpoak. Elder kan kak sewese riarail Kristian kan erein ahnsou apwal. Ni ahnsou me melimel de rerrer en sahpw wiawi de riarail kan anahne sawas en wini ni ahnsou karuwaru, elder kan kin mwadang koasoanehdi sawas ong riarail ko. Elder kan kin kihda kaweid oh mehn kangoang sang nan Paipel. E pahn mengei ong Kristian kan en peki sawas rehn elder men ma irail ese me e kin kadek, rong irail, oh song en wehwehki arail pepehm. Soangen irair pwukat kin sewese irail en pehm me mie me poakohng irail; kahrehda, e mengei ong irail en kapwaiada kaweid kan en Paipel me elder men ele kihda.—1 Des. 2:​7, 8, 11. w24.06 29 ¶12-13

Kitail en dehr medewe me pwehki Koht me keieu manaman, met wehwehki me sohte eh pepehm. Kitail kapikipikda rasehng ih me kak pehm soahng kan. Eri e pil kak ketin pehm soahng kan. Paipel mahsanih me kupwure kin ‘nsensuwedla’ oh ‘toutoula.’ (Mel. 78:​40, 41) Siohwa ketin nsensuwedki ni eh mahsanih aramas ako ar kaloke oh kemehla sapwellime Ohlo! Pweinen pweipwei sapahlo padahkihong kitail me sohte emen me kin poakepoake kitail duwehte Siohwa kin ketin wia—pil kaidehn kisehtail de kompoakepatail keren kan. (Rom 8:​32, 38, 39) Kitail kak uhdahn kamehlele me Siohwa ketin poakohng kitail laudsang atail poakohng pein kitail. Ke men mour kohkohlahte? Siohwa ketin kupwurki met en wiawi laudsang uhk. Ke men ale mahkpen dipomw kan? Siohwa ketin kupwurki mahkohng laudsang uhk. Ihte me e ketin kasik sang uhk iei en kasalehda omw kalahnganki kisakis en pweinen pweipwei sapahlo, pwoson ih, oh peikiong. Pweinen pweipwei sapahlo uhdahn wia kisakis kesempwal ehu me kasalehda sapwellimen Siohwa limpoak laud ong kitail.—Ekl. 3:11. w25.01 22 ¶8-9

Kitail koaros anahne likih dahme kitail kilang, rong, oh pehm ni atail wiahda pilipil kan. Ahpw, dahme kitail kilang oh rong sohte kin pwung ahnsou koaros. Pil ni ar sohte sapwung, ma kitail weweidkihte dahme kitail kilang, kitail kakete pohnsehsehla kupwuren Koht de sapwellime kaweid. (Ekl. 11:9; Mad. 24:​37-39) Ahpw ni atail weweidki pwoson, kitail pahn kak wiahda pilipil kan me “Kauno kin ketin kupwurperenki.” En idawehn sapwellimen Koht kaweid pahn kihong kitail popohl oh kahrehiong kitail en uhdahn peren. (Mel. 16:​8, 9; Ais. 48:​17, 18) Oh ma kitail pousehlahte weweidki pwoson, kitail pahn ahneki mour soutuk ni ahnsou kohkohdo. (2 Kor. 4:18) Kitail koaros anahne pein idek rehtail: “Dahme I kin likih ni ei wiahda pilipil kan? I kin likihte soahng kan me I kak kilang, de I kin idawehn sapwellimen Siohwa kaweid?” w25.03 20-21 ¶3-4

Emenemen kitail ahneki pwukoa kesempwal en sewese meteikan en men iang kitail mi nan paradais ni karasaras. Pwehn wia met, kitail anahne kahlemengih Siohwa. E sohte kin ketin idingkihong aramas akan en wiahla kisehn sapwellime pwihn. Ahpw ni kadek, e kin ketin ‘kakerenihedo’ reh aramas akan. (Sohn 6:44; Os. 11:4) Aramas mwahu kan me sukuhlki duwen sapwellimen Siohwa limpoak oh irair kaselel teikan kin men karanihala ih. Sang atail tiahk mwahu kan, ia duwen atail kak sewese aramas akan en men iang mi nan paradais ni karasaras? Ehu ahl iei sang ni atail kin poakohng oh kadekohng riatail Kristian kan. Ni ahnsou me me kapw kan kin towehda atail mihting kan, kitail men irail en pil ahneki soangen madamadauohte me irail kan me kaidehn Kristian ahneki ni arail towehda mihting kan en mwomwohdisohn Korint mahso. Irail kin nda: “Koht uhdahn ketiket nanpwungamwail.” (1 Kor. 14:​24, 25; Sek. 8:23) Eri, kitail anahne doulahte peikiong kaweido en iren rahn en rahnwet. w24.04 24 ¶16-17