July

Ekei sapwellimen Siohwa aramas akan sohte kak wia uwen me re mwahuki pwehki arail mahla de soumwahu. Eri irail kakete medewe me irail sohte kesempwal rehn Siohwa. Re kakete idek, ‘Miehte katepei rehn Siohwa?’ Sounnting en Melkahka 71 kasalehda soangen pepehmohte. E kapakapki: “Komw pil dehr ketin keseiehla ni ei luwetalahr.” (Mel. 71:​9, 18) Mendahki e pehm me e luwetala, sounmelkahkao uhdahn kamehlele me ma e papah Koht ni lelepek, Siohwa pahn uhdahn ketin sewese. Sounmelkahkao sukuhlki me Siohwa kin ketin kupwurperenki irail kan me kin wia uwen arail kak en papah ih mendahki arail soh itar akan. (Mel. 37:​23-25) Me mah kan, medewehla ia duwen Siohwa eh kin ketin kilangwohng uhk. E kak ketin seweseiuk pwe ken papah ih ni lelepek mendahki omw soh itar akan. (Mel. 92:​12-15) Dehr medewe soahng kan me ke solahr kak wia, ahpw medemedewehte soahng kan me ke kak wia. w24.10 28 ¶14-16

Kristian soakoahiek kan kin apwalki wiahda pilipil pwung ni ahnsou me sohte mie kosonned sang nan Paipel me pidada irairo. Ma sohte kosonned sang nan Paipel, ekei ele medewe me re kak wia sohte lipilipil dahme re men wia. Ekei ele men kosonned ehu en wiawihda mehnda ma sohte anahnepe. Karasepe, e mwomwen me Kristian kan nan Korint peki wahnpoaron Pohl en wiahda kosonned ehu me pid ma irail kak tungoale mwenge me meirongalahr ong dikedik. Pohl sohte ndaiong dahme irail en wia, ahpw e kasalehda me emenemen irail ahneki “pwuhng en pilipil” me poahsoanda sang dahme kadeikpen loalarail mweidohng irail en wia. E koasoia duwen ekei ire mehlel kan sang nan Paipel me kak sewese irail en wiahda pilipil ehu me sohte pahn kansensuwedihada kadeikpen loalarail oh sohte pahn kadipekelekelih meteikan. (1 Kor. 8:​7-9) Pohl kin padapadahkihong mehn Korint ko en doadoahngki Nting Sarawi kan pwehn wiahda pein arail pilipil, a ren dehr koapworopworki ahn meteikan, de rapahki kosonned kan. Ni ahl wet, Pohl kin song en sewese irail en koahiekla. w24.04 5 ¶14

Ni mwehin Sona, mehn Ninipe ko ahneki ahnsou mwahu en koluhla. Oh pil tamataman dahme Sises mahsanihki “iasadahng kadeik.” “Irail me wiewia me suwed” pahn iang. (Sohn 5:29) Eri e mwomwen me pil mie koapworopwor ong aramas akan nan Sodom oh Komora. Ekei irail pwukat pahn kakete iasada, oh ele kitail pahn kak padahkihong irail duwen Siohwa oh Sises Krais. Siohwa kin ketin ahnsou koaros “rapahki oh tehk mwahu nan kapehd en aramas akan, oh song loalarail kan.” Ni eh ketin pilada ihs me e pahn kaiasada, e pahn ketin “katingih emenemen nin duwen me konehng mwomwen eh mour.” Siohwa pahn ketin tengedihongete dahme pwung, ahpw e kak ketin kasalehda kadek kalahngan ni ahnsou me konehng. Eri kitail en dehr medewe me aramas emen sohte pahn iasada ihte ma kitail ese ma Paipel mahsanih duwen met! w24.05 6 ¶15-16

Pil mahso, mahsen en Koht kin kakehlakahda sapwellime ladu kan ni arail kin apwalki kapwaiada arail pwukoa kan. Medewehla mehn kahlemeng en soukohp Seremaia. E ekis pweiek ni ahnsou me Siohwa ketikihong ih pwukoa en kalohk. Seremaia koasoia: “I sohte kin ese pato; I me nohn pwulopwul.” (Ser. 1:6) Dahme sewese ih en ahneki eimah nan kalohk? Mahsen en Koht kin kakehlakahda ih. E koasoia: “Sapwellimomwi mahsen kin rasehng kisiniei me lullul nan kapehdi, oh kin ngkengken nan tih kat en paliwereiet. I kin nantihong kolediong loalei ahpw I kin sohla kakohng kolokol loalei.” (Ser. 20:​8, 9) Mendahki ahn Seremaia wasahn kalohko apwal, rohng me e anahne kalohki kin kakehlakahda ih pwehn wia doadoahko. Kristian kan kin ale kehl me re anahne sang sapwellimen Siohwa mahsen me mi nan Paipel. Wahnpoaron Pohl koasoia me arail kalaudehla arail esehla kupwuren Siohwa pahn sewese irail en “kapwarehda wah nan doadoahk mwahu koaros” oh ni ahl wet, “weweid ni ahl me Siohwa ketin kupwurki.”—Kol. 1:​9, 10. w24.04 14-15 ¶2-4

Sadok loalopwoatohngete Siohwa mendahki Samworo Lapalap Apaiadar utung nein Depit pwutak Adonaisa, me koasoanehdi koledi mwoahlo. Depit ese me e kak ahnsou koaros likih Sadok. Ni ahnsou me ahn Adonaisa pilahno sansalda, Depit pilada Sadok, Nadan, oh Penaia en keiehdi Solomon nin duwen nanmwarki. (1 Nan. 1:​32-34) Mehn kahlemeng en sounkaudok teikan en Siohwa, me duwehte Nadan me pil kin loalopwoatohng Siohwa oh utung Nanmwarki Depit, uhdahn kangoange Sadok. Ni ahnsou me Solomon wiahla nanmwarki, e idihada “Sadok [en] uhd wiliandi samworo Apaiadar.” (1 Nan. 2:35) Ia duwen omw kak alasang Sadok? Ma emen me ke poakohng pilada en kohkohsang Siohwa, kasalehiong Siohwa me ke pilada en loalopwoatohngete ih. (Sos. 24:15) Siohwa pahn ketikihong uhk kehl oh eimah me ke anahne. Koapworopworki ih ni omw kin kapakapohng oh karanihete kompoakepahmw kan me kin loalopwoatohng ih. Siohwa kin ketin kesempwalki omw loalopwoat, oh e pahn katingihkin uhk met.—2 Sam. 22:26. w24.07 6-7 ¶16-17

Melkahka 15:2 mahsanih me kompoakepahn Koht men iei “me kin peikiong Koht ni mehkoaros oh kin wia me pwung ahnsou koaros.” Kitail anahne pousehlahte wia met. Ahpw ia duwe, kitail kak uhdahn “peikiong Koht”? Ei. Mendahki sohte aramas emen unsek, Siohwa pahn ketin wiahkin kitail emen me kin “peikiong” ih ma kitail wia uwen atail kak koaros en peikiong. Ni atail inoukihong Koht atail mour oh papidaisla, ih met tepidahn atail papah Koht. Karasepe, nan Paipel mehnda ma emen wia mehn Israel men, met sohte wehwehki me e iang kisehn irail kan me Siohwa ketin lukehdo nan sapwellime impwal. Ekei kin likweriong Koht ahpw re ‘sohte kin mehlel.’ (Ais. 48:1) Mehn Israel kan me ahneki mohngiong mehlel anahne sukuhlki kupwuren Siohwa kan oh idawehn. Duwehte met, pwehn ahneki nanpwungmwahu keren rehn Siohwa rahnwet, kitail anahne wia laudsang en papidaislahte nin duwen emen Sounkadehdehn Siohwa kan. Kitail anahne pousehlahte “wia me pwung ahnsou koaros.” w24.06 9 ¶4; 10 ¶6

Ia ekei ahl kan me Siohwa kin ketin kasalehda kadek sapan? Medewehla ekei karasaras. Siohwa kin ketikihong kitail dahme kitail anahne. Mwein kitail sohte pahn ahnsou koaros ahneki kepwe tohto, ahpw pwehki Siohwa, pali laud en kitail ahneki dahme kitail anahne. Karasepe, e kin ketin kahrehda en mie kanatail mwenge, likou, oh atail wasahn kousoan. (Mel. 4:8; Mad. 6:​31-33; 1 Tim. 6:​6-8) Siohwa sohte ketikihong kitail mepwukat pwehki e ketin anahne wia met. Medewehla sapwellimen Sises mahsen kan nan Madiu 6:​25, 26. Sises ketin doadoahngki karasaras en menpihr kan, oh mahsanih: “Re sohte kin kamwarak werentuhke de dolung de kin kihpene nan imwen nahk.” Ahpw, tehk dahme e mahsanih mwuri: “Samamwail nanleng kin ketin katungoale irail.” Sises eri keinemwe: “Kumwail sou kesempwalsang irail?” Ia mehn kasukuhlo? Ma Siohwa kin ketin apwalih mahn akan, kitail kak kamehlele me e pahn pil ketin apwalih kitail! Duwehte pahpa limpoak men, Siohwa kin ketin apwalih sapwellime peneinei pwehki e ketin poakohng irail.—Mel. 145:16; Mad. 6:32. w24.09 26-27 ¶4-6

Sounsawas men iei brother papidaisla men me sapwellimen Koht manaman idihada pwehn sewese elder kan apwalih soahng kesempwal tohto nan mwomwohdiso. Keieu kesempwal, sounsawas kan wia ohl kei me kin poakohng Siohwa oh kin mour ni ahl ehu me kin kaperenda Ih. Re pil kin uhdahn poakohng riarail Kristian kan. (Mad. 22:​37-39) Ia duwen brother papidaisla men eh kak akadeiong en wiahla sounsawas men? Paipel kasalehda soangen irair kan me brother men anahne ahneki pwehn wiahla sounsawas men. (1 Tim. 3:​8-10, 12) Ke kak akadeiong pwais kaselel wet sang ni omw onopki mwahu duwen irair pwukat oh doadoahk laud pwehn kakairada. Ahpw keieu, ke anahne medewe kanahieng dahme kamwakid uhk en men wiahla sounsawas men. w24.11 15 ¶4-5

Ekei aramas wadekehr Paipel pak tohto. Ahpw ia duwe, irail uhdahn kamehlele Paipel? Irail kin song en mour pahrekiong dahme Paipel padahngki oh wekidala arail mour? Soh. Pali laud en aramas sohte kin idawehn kaweid en Paipel. Ahpw sapwellimen Siohwa aramas akan uhdahn weksang met! Kitail kin wia uwen atail kak koaros en kapwaiada kaweid en Paipel kan nan atail mour. Ahpw e sohte kin ahnsou koaros mengei en wadek oh kapwaiada Mahsen en Koht. Ele e kin apwal kitail en wiahda ahnsou en wadek. De kitail kakete nohn pitipit en wadek Paipel oh sohte doudouloale dahme kitail wadeko. De kitail kakete pwunodki soahng tohto me kitail anahne kamwahwihala. Sohte lipilipil kahpwal dah me ke ahneki, e sohte nohn apwal en powehdi. Sang ni sapwellimen Siohwa sawas, ke kak powehdi. Kitail en koasoanehdi teng en peikiong Mahseno. Ni mehlel, atail kalaudehla atail wadek oh doadoahngki Mahsen en Koht nan atail mour, atail peren pahn laudla.—Seims 1:25. w24.09 7 ¶15-16

Sang ni sapwellime manaman, Siohwa kin ketin kansenamwahwih kitail ni kahpwal laud eh wiawihong kitail. Ma ke kin uhdahn nsensuwedki kahpwal ehu me wiawihong uhk, padahkihong Siohwa omw pepehm. Ke kak pwurupwurehng koasoiong oh sohte lipilipil ia uwen werei me ke mwahuki. (Mel. 86:3; 88:1) Pwurupwurehng peki sapwellime manaman. E pahn ketin ahnsou koaros seweseiuk. Mie pak ke lelohng kahpwal laud ehu oh pehm me sohte omw kehl en wia mehkot? Sapwellimen Siohwa manaman kak kihong uhk kehl me ke anahne pwehn doulahte kaudokiong Siohwa ni lelepek. (Ep. 3:16) Mwurin omw peki Siohwa en ketikihong uhk sapwellime manaman, dahme ke anahne wia? Wia soahng kan me pahn seweseiuk en ale sapwellimen Koht manaman. Mepwukat me iangahki iang towehda mihting kan oh kalohk ong meteikan. Wadek Mahsen en Siohwa ehuehu rahn. Met pahn seweseiuk en doudouloale sapwellime madamadau. (Pil. 4:​8, 9) Ni omw wadek, tehk koasoipen irail kan me lelohng kahpwal oh doudouloale ia duwen Siohwa eh ketin sewese irail en dadaur. w24.10 9 ¶12-14

Duwehte Siohwa oh sapwellime Ohlo, kitail poakohng aramas akan. (Lep. Pad. 8:31) Kitail kin uhdahn poakehla irail kan me “sohte ese Koht” oh “sohte ahneki koapworopwor.” (Ep. 2:12) Pwehki arail kahpwal kan, irail kakete pehm me irail mi nan pwoahr loal ehu. Ahpw mie neitail sahl me kak waikirailda, me iei rongamwahu en Wehin Koht. Pwehki atail poakohng oh poakeirailla, kitail men wia uwen atail kak koaros en padahkihong irail rongamwahwo. Ni arail sukuhlki met, e kak kihong irail koapworopwor, sewese irail en peren pil ni ahnsou wet, oh kihong irail koapworopwor me ehu rahn irail kak ahneki “mour mehlelo,” me iei mour soutuk nan sapwellimen Koht sampah kapwo. (1 Tim. 6:19) Atail poakohng aramas akan pil kin kamwakid kitail en padahkihong irail me imwin koasoandi suwed wet kerendohr. (Esek. 33:​7, 8) Kitail men irail en ese dahme pahn wiawi ni kahn kamakam kowahlapo. Keieu, pelien lamalam likamw pahn kasohrala, mwuri sampah suwed wet nan Armakedon.—Kaud. 16:​14, 16; 17:​16, 17; 19:​11, 19, 20. w24.05 16 ¶8-9

Wahnpoaron Pohl kangoange rie Kristian kan ren “mweidohng engieng en Koht” en doadoahk. Kitail kin mweidohng engieng en Siohwa en doadoahk sang ni atail mweidohng en ketin koasoanehdi iahd oh ia duwen eh pahn ketikihda pwung pahrek. Mwurin brother men me adaneki John lelohng wiewia sapahrek, e koasoia: “I anahne nantihong powehdi ei lingeringer pwe I de wiahda mehkot sapwung, ahpw met sohte mengei. Rom 12:19 sewese ie en kanengamah oh likih Siohwa.” Kitail kin paiekihda ni atail kin awih Siohwa en ketin kapwungala kahpwal ehu. Ni atail wia met, kitail kak soikala pwunod oh nsensuwed laud me kin kalapw lelohng kitail ni atail song pein kapwungala kahpwalo. Siohwa ketin kupwurki sewese kitail. Ni karasaras, e kin mwomwen mahsanih, ‘Mweidohng ie wiewia sapahrek kan, oh I pahn apwalihala.’ Ma kitail kamehlele sapwellimen Siohwa inou en ketin kadeikada irail kan me kin wiakauwe aramas, kitail sohte anahne kadakadaur atail lingeringer pwehki kitail ese me e pahn ketin wia dahme pwung. w24.11 6 ¶14-15

Kitail anahne kanahieng en dehr mweidohng kepwe kan en wiahla me keieu kesempwal nan atail mour. Kitail kak sukuhlki met sang dahme wahnpoaron Pohl ntingkilahng Kristian ko. E koasoia mehn kahlemeng suwed me mehn Israel ko wia ni arail mi nan sapwtehno, iangahki dahme wiawi karanih Nahna Sainai. E katamankihong Kristian ko en ‘dehr inengieng soahng suwed kan duwehte me [mehn Israel ko] kin inengieng.’ (1 Kor. 10:​6, 7, 11) Siohwa ketikihong mehn Israel ko mwenge. Ahpw pwehki arail mehwohn mwenge, met wiahla “soahng suwed kan” de suwed ong irail. (Nemp. 11:​4-6, 31-34) Ni ahnsou me irail kaudokiong kouwolo, mehn Israel ko kasalehda me irail kesempwalki en mwengemwenge, niminim, oh pereperen laudsang en peikiong Siohwa. (Eks. 32:​4-6) Pohl koasoia mehn kahlemeng pwukat pwehn katamankihong Kristian ko me momour kaimwiseklahn mwohn ohlahn Serusalem oh eh tehnpas sarawio kasohrala nan pahr 70. Kitail pil momour kerenlahng imwin koasoandi wet eh pahn kasohrala, eri e uhdahn kesempwal ong kitail en tehk kanahieng ahn Pohl mehn katamano. w24.12 6 ¶13

Siohwa iei “Koht me peren,” oh e ketin kupwurki kitail en pil peren. (1 Tim. 1:11) E ketikihong kitail kisakis tohto pwehn sewese kitail en perenki mour. (Seims 1:17) Ehu rehn kisakis ko iei mouren pwopwoud. Ni ohl oh lih emen ara pwopwoudla, ira kin inoukihda en poakohng oh wauneki emenemen. Ni ara kin kakehlailihte ara limpoak ong emenemen, ira kak uhdahn peren. E kansensuwed me pwopwoud tohto nan sampah rahnwet kin manokehla inou me re wiahda ni rahnen arail kapwopwoudo. Imwilahn met, irail sohte kin peren. Dahme Siohwa ketin kupwurki ohl pwopwoud men en wiahiong eh pwoud? Siohwa ketin kehkehlingkihong ohl pwopwoud kan en wauneki arail pwoud. Ohl pwopwoud men me kin wauneki eh pwoud pahn kasalehda kadek oh limpoak nan eh wiewia kan.—1 Pit. 3:7. w25.01 8 ¶1-2; 9 ¶4-5

Ei mehlel, nein wahnpoaron Pohl kisinlikowo ong mehn Ipru ko sewese tepin Kristian ko en kaunopada ong kahpwal kan me irail pahn lelohng. Pohl kangoange rie Kristian ko en kalaudehla arail esehla oh wehwehkihla Mahsen en Koht. Arail wia met pahn sewese irail en kasawihada oh soikala padahk kan me kakete kaluwetehla arail pwoson. E kangoange irail en kakehlakahla arail pwoson pwe irail en kin mwadang idawehn sapwellimen Sises kaweid kan oh kaweid en irail kan me kin tiengla mwowe nan mwomwohdiso. Oh e sewese Kristian ko en dadaur pahn kahpwal kan sang ni arail kin kilangwohng kahpwal ko nin duwen kaiahn ehu sang rehn Samarail limpoako. Kitail en pil doadoahngki kaweid wet sang nan Paipel. Eri, kitail pahn kak dadaur ni lelepek lao lel ni imwi.—Ipru 3:14. w24.09 13 ¶17, 19

Nin duwen me Paipel mahsanih, Siohwa ketin koasoanehdi pweipwei ehu me anahn pwe en pwainla dipatail kan oh pwe kitail en kak wiahla kompoakepah. Eri pweinen pweipwei sapahl dahieu me anahn pwe aramas akan en ahneki dahme Adam luhssang? Tamataman, Adam oh Ihp luhssang ara mour unsek oh sohla kak mour kohkohlahte. Eri uwen pweinen pweipwei sapahlo anahne pahrekiong dahme ira luhssang. (1 Tim. 2:6) Met kak pweipweilahte sang rehn ohl emen me (1) unsek; (2) kak mour kohkohlahte nin sampah; oh (3) men tounmeteikihla eh mour ong kitail. Medewehla kahrepe siluh me Sises kak ketin pwainla pweinen pweipwei sapahlo. (1) E ketin unsek—“e sohte ketin wiahda dihp.” (1 Pit. 2:22) (2) Pwehki met, e kak mour kohkohlahte nin sampah. (3) E kupwurki pwoula oh tounmeteikihla moure pwehki kitail.—Ipru 10:​9, 10. w25.02 4 ¶11-12

Siohwa ketin poakohng uhk oh kupwurki ken wia kisehn sapwellime peneinei. Met mehlel, sohte lipilipil soangen kahpwal dah kan me ke ahneki me kakete kahrehiong uhk ken pweiek en papidaisla. Sises mahsanihong pwihnen sapwellime tohnpadahk ko: “Ma kumwail ahneki pwoson me uwehte kisin werentuhke tikitik kis, kumwail pahn ndaiong nahna wet, ‘Tohrekweisang met, tohrekla mwo,’ e ahpw pahn wiawi, oh kumwail pahn kak wia mehkoaros.” (Mad. 17:20) Irail ko me ahpwtehn rong met kin iang Sises erein sounpar keite, eri irail anahnehte kakairada arail pwoson. Ahpw Sises ketin kamehlelehiong irail me ma re kakairada pwoson laud, Siohwa pahn ketin sewese irail en powehdi kahpwal kan me rasehng nahna laud. Oh Siohwa pahn ketin seweseiuk ken wia soahngohte! Ma mie kahpwal kan me kin kerempwa omw pahn papidaisla, mwadang wia mehkot pwehn powehdi. Ke en inoukihong Siohwa omw mour oh papidaisla. Met wia pilipil keieu mwahu me ke kak wiahda! w25.03 6-7 ¶18-20

Kitail kak powehdi kahpwal kan ma kitail kin tamataman me Koht ieiaso kin ketin kupwurki sewese kitail. Kitail kak kakehlakahla atail likih met sang ni atail kin medemedewe dahme Siohwa ketin wiadahr mahso. (Ais. 37:​17, 33-37) Pil wadek oh kilang ripoht kan nan neitail website en jw.org me kin karasahda ia duwen Siohwa eh kin ketin sewese riatail Kristian kan nan atail ahnsou. Patehng met, tamanda ahnsou kan me Siohwa ketin seweseiuk. Ele ke medewe me Siohwa sohte ketin seweseiuk ni ahl kapwuriamwei ehu. Ahpw ni mehlel, Siohwa ketin wiahionguhkehr soahng tohto nan omw mour! E ketin lukeiuk en wiahla kompoakepah. (Sohn 6:44) Eri, peki rehn Siohwa en ketin seweseiuk en tamanda ahnsou kan me e ketin sapengala omw kapakap kan, ketikihong uhk dahme ke keieu anahne ni ahnsou me konehng, de apwalihiuk nan kahpwal ehu. Atail kin medemedewe soahng pwukat pahn kakehlakahla atail kamehlele me Siohwa pahn ketin pousehlahte sewese kitail. w24.06 21 ¶8

Kitail kak koasoanehdi en dehr wia mehkot me pahn kansensuwedihala Siohwa. Ahpw, kitail sohte unsek oh kak mengei en loiong kasongosong en wia me sapwung. (Rom 7:​21-23) Ni atail sohte kasik, kitail kak mihla nan irair ehu me pahn kasonge kitail en wia me sapwung. Pwehn loalopwoatohngete Siohwa oh sapwellime Ohlo, kitail anahne idawehn ahn Sises kaweido en mwasamwasahn oh dehr lohdi pahn kasongosong en dihp. Kitail koaros kin lelohng kasongosong en wia dihp. Ahpw atail luwet kan wekpeseng, eri mie soahng kei me pahn keieu kasonge kitail pwehn wia mehkot sapwung. Karasepe, ele emen kin nannanti en dehr wiahda dihp laud, me duwehte tiahk samin me pid wia nsenen pwopwoud. Ele pil emen anahne pelianda kasongosong en wia mehkot me samin, me duwehte tiahk en mwadongki dipwisou en kaparapar de kilang kilel suwed. Oh pil emen ele anahne peiong eh kin keh lingeringer, pohnmwahso, de pweiek en wia dahme pwung pwehki e masak dahme meteikan medewe. w24.07 14 ¶3; 15 ¶5

Medewehla dahme kakete wiawi ma elder ko sohte mweidohng ohl me uhdahn koluhlao en pwurodo nan mwomwohdiso de ma mwurin eh pwurodo, mwomwohdisou sohte kasalehiong me irail poakohng ih. En ohlo “nsensuwed laud” kakete powehdi ih. E kakete medewe me e solahr kak pwurehng papah Siohwa. E pil kakete uhdihsang eh nannanti en kamwahwihala eh nanpwungmwahu rehn Koht. Suwedsang met, ma Kristian ko nan mwomwohdisou sohte mahkohng ohl me koluhlao, met kak kauwehla pein arail nanpwungmwahu rehn Siohwa. Dahme kahrehda? Pwehki irail sohte pahn kahlemengih Siohwa ni eh kin ketin mahkohng me dipan kan me koluhlahr. Ahpw irail pahn alasang Sehdan me kin lemei oh sohte kasalehda mahk kalahngan. Irail pahn mweidohng Tepilo en doadoahngki irail pwehn kauhdi ohlo sang papah Siohwa.—2 Kor. 2:​10, 11; Ep. 4:27. w24.08 17 ¶7, 10-11

Sises pil ketin idihada ekei ohl pwehn sewese mwomwohdiso ni ehu ahl tohrohr. E ketin doadoahngki elder kan nan Serusalem pwehn kadarala Pohl, Parnapas, oh meteikan nin duwen sounapwalih me kin seiloak. (Wiewia 11:22) Dahme kahrehda? Kahrepeohte me sounsawas oh elder kan kin idihda: pwehn kakehlaka mwomwohdiso kan. (Wiewia 15:​40, 41) Sounapwalih me kin seiloak kan kin anahne seiloak pak tohto. Ekei kin seiloakla wasa doh pwehn mwamwaitih mwomwohdiso kan. Ehuehu wihk, sounapwalih me kin seiloak kin wia padahk kan, iang mwamwaitih oh kangoange ekei nan mwomwohdiso, wia mihting en pioneer, mihting en elder kan, oh tuhpenehn kalohk. E kin kaunopada padahk kan oh koasoanehdi mihting tohrohr kan. E kin iang kasukuhlih sukuhl en pioneer kan, koasoanehdi mihting tohrohr rehn pioneer kan nan wasa me e kin mwamwaitih. Patehng soahng pwukat koaros, e pil kin apwalih pwukoa kesempwal teikan oh ekei pak kin uhdahn karuwaru—me e alehdihsang ohpis en Sounkadehdehn Siohwa kan. w24.10 21 ¶12-13

Soukohp Seremaia ntingihedi sapwellimen Siohwa mahsen kan me dierek nan iren rahnen rahnwet. Pohl doadoahngki lepin lokaia pwukat ni eh koasoia: “I solahr pahn tamanda diparail kan.” (Ipru 8:12) Ahpw ia uhdahn wehwehn met? Nan Paipel, lepin lokaiao “tamataman” sohte kin ahnsou koaros dokedoke emen eh medemedewe mehkot me wiawi mahso. Ahpw, e kak wehwehki en emen eh wiewia mehkot. Loallap me langalang nin tuhkeo limwahn Sises peki: “Maing Sises, komw ketin taman ie ni omwi pahn ketilong nan sapwellimomwi Wehi.” (Luk 23:​42, 43) E pekipeki Sises en ketin wiahiong ih mehkot ni ahnsowo. Dahme Sises sapengki kasalehda me e pahn ketin kaiasada loallapo. Eri ni Siohwa eh ketin mahsanih me e solahr taman dipatail kan, met wehwehki me e ketin mahkohng kitail oh e sohte pahn ketin kalokehkin kitail dipatail kan ni ahnsou kohkohdo. w25.02 10-11 ¶14-15

Atail dehdehki mwahu kin kohsang atail esehla sapwellimen Siohwa irair kan, kupwure, oh dahme e ketin poakohng de kalahdeki. Pein idek rehmw, ‘Sang dahme I ese duwen Siohwa, pilipil dah me I kak wiahda me pahn kaperenda ih?’ (Ep. 5:17) Pwehn kaperenda Siohwa, ekei pak kitail anahne wia mehkot me pahn kamedekihala irail me karanih kitail. Karasepe, ekei pahpa nohno kin idingkihong neirail serepein en pwoudikihda ohl emen me kepwehpwe de me kak pwainda kepwe tohto mehnda ma e sohte kin mwohneki mahs eh nanpwungmwahu rehn Siohwa. E sohte sapwung me re men neirail serepeino en ahneki mour nsenamwahu, ahpw e kak pein idek reh: “Ohl menet pahn sewese ien kakairada nanpwungmwahu kehlail rehn Siohwa?” Ia sapwellimen Siohwa pepehm ong irair wet? Pasapengo mi nan Madiu 6:33. Wasao, Sises ketin kangoangehki Kristian kan en pousehlahte “rapahki mahs Wehio.” Mendahki kitail wauneki atail pahpa nohno kan oh aramas akan nan atail wasa, dahme keieu kesempwal ong kitail iei en kaperenda Siohwa. w25.01 17 ¶9-10

Me tohto kin uhwong atail doadoahko rahnwet, eri kitail anahne sapwellimen Siohwa sawas pwehn pousehlahte kalohk ni ngoang. (Kaud. 12:17) Dahme kahrehda ke kak kamehlele me Siohwa pahn ketin seweseiuk? Medewehla sapwellimen Sises kapakapo me kileldi nan Sohn irelaud 17. Sises patohwan peki rehn Siohwa en ketin sinsile wahnpoaron ko, oh Siohwa ketin sapengala pekipek wet. Pwuhken Wiewia kasalehda ia duwen eh ketin sewese wahnpoaron ko ren kalohk ni ngoang mendahki kalokolok. Nan eh kapakapo, Sises pil patohwan peki rehn Siohwa en ketin sinsile irail kan me pahn pwosonla dahme wahnpoaron ko kalohki. Met pil pidada kowe. Siohwa sohte ketin uhdihsang sapeng ahn Sises kapakap; E pil pahn ketin seweseiuk duwehte eh ketin sewese wahnpoaron ko. (Sohn 17:​11, 15, 20) Mehnda ma e pahn apwalla ong kitail en kalohki rongamwahwo ni imwio eh kerendohr, kitail pahn alehdi sawas koaros me kitail anahne.—Luk 21:​12-15. w25.03 18 ¶13-14

Sapwellimen Koht aramas akan kak “wer ni peren” pwehki irail uhdahn kalahngan ong Siohwa. Padahk mehlel kan oh inou kangoang kan nan Paipel oh atail koapworopwor ong ahnsou kohkohdo pwehki sapwellimen Krais meirong en pweipwei sapahlo kin kihong kitail “irair mwahu en mohngiong.” Atail koasoia duwen soahng pwukat kin kahrehiong kitail peren laud. (Mel. 34:8; 133:​1-3) Soangen irair riau me kin keieu pwarada nan paradais wet me kitail koasoia ni karasaras iei limpoak oh minimin me mi nanpwungen sapwellimen Siohwa aramas akan. Irair riau pwukat me kin “kapatapene mehkoaros” pahn sewese kitail en medewehla ia pahn mwomwen mour nan sampah kapwo, wasa me sapwellimen Siohwa ladu kan pahn kin limpoakpene oh miniminpene laudsang ahnsou wet. (Kol. 3:14) Mehmen me men ahneki peren oh nsenamwahu mehlel anahne mi nan paradais wet ni karasaras. Sohte lipilipil dahme sampah wet kin medewehki sapwellimen Siohwa ladu kan, irail ahneki adamwahu rehn Siohwa oh rehn koaros me kin kaudokiong ih.—Ais. 65:15. w24.04 21 ¶7-8

Ia duwen kitail koaros kak sewese Kristian kiripw kan me men pwopwoudida? Ehu me kitail kak wia iei en kanahieng dahme kitail kin nda. (Ep. 4:29) Kitail kak pein idek rehtail: ‘I kin kapailoke irail kan me men pwopwoudida? Ni ei kin kilang brother kiripw men oh sister kiripw men ara koasokoasoipene, I kin medewe me ira mwahuki emenemen?’ (1 Tim. 5:13) Patehng met, kitail en dehr kahrehiong Kristian kiripw kan en pehm me mie mehkot sapwung rehrail de re sohte kesempwal pwehki re sohte pwopwoud. E pahn mwahu en kin rapahki ahnsou en kapinga Kristian kiripw kan! Ia duwen ma kitail medewe me mie brother men oh sister men me pahn kakete wiahla pwopwoud mwahu ehu? Paipel padahkihong kitail en kin medewe mwahu pepehm en meteikan. (Rom 15:2) Me kiripw tohto sohte men emen en pilada ong irail ihs me irail en pwoudiki, eri kitail anahne wauneki dahme irail mwahuki. (2 Des. 3:11) Ekei ele men kitail en sewese irail, ahpw kitail en awih lao re peki atail sawas.—Lep. Pad. 3:27. w24.05 24-25 ¶14-15

Ele ekei pak kitail kin lelohng kahpwal kan me kitail sohte kasik me kak kahrehda atail mour en uhdahn apwal de pil wekidala douluhl atail mour. Kitail uhdahn kalahnganki me kitail kak likih sapwellimen Siohwa Koht sawas! Ni atail kin alehdi sapwellime sawas, met kin kamehlelehong kitail me “Siohwa ketin ieias!” (Mel. 18:​46, NW) Ahpw mwurin eh nda me Koht ketin ieias, Depit kapahrengkihong Koht paip ehu me sohte kin mour. Dahme kahrehda? Paipel kapahrekihong Siohwa “paip” pwehn sewese kitail en wehwehki ekei sapwellime irair kaselel kan. Nan Paipel, ni sapwellimen Siohwa ladu kan kin kapinga Koht pwehki sapwellime irair kaselel kan, pak tohto re kin kahdaneki ih paip ehu. Deuderonomi 32:​4, (NW) iei tepin wasa me ekeriki Siohwa “Paip” ehu. Ni ahnsou me Ana kapakap, e koasoia “sohte paip ehu me duwehte at Koht.” (1 Sam. 2:​2, NW) Apakuk kahdaneki Siohwa “ei Paip.” (Apak. 1:​12, NW) Sounnting en Melkahka 73 kahdaneki Koht “paip en ei mohngiong.” (Mel. 73:​26, NW) Oh pil Siohwa ketin kahdaneki pein ih paip ehu.—Ais. 44:​8, NW. w24.06 26 ¶1, 3

Nanmwarkien Israel ko me kin kaperenda Siohwa kin kaudokiong ih sang arail mohngiong unsek. Paipel mahsanihki Sosaia: “Sohte nanmwarki men mwowe me peikiong KAUN-O duwehte Sosaia, sang ni kupwur unsek.” (2 Nan. 23:25) Ia duwen Solomon, me mwuhr wiahda me suwed? Paipel mahsanih: “E sohte loalopwoatohng KAUN-O eh Koht.” (1 Nan. 11:4) Oh me pid Apaisam, pil emen nanmwarki me sohte lelepek, Paipel mahsanih me e “sohla loalopwoatohng KAUN-O eh Koht.” (1 Nan. 15:3) Paipel kin kalapw doadoahngki lepin lokaiao “mohngiong” pwehn kawehwehda masloalen aramas emen. Met kin pidada eh ineng oh madamadau, wiewia, dahme kin kamwakid ih en wia mehkot, oh mehn akadei kan me e men kapwaiada. Eri, ia wehwehn en papah Siohwa sang nan mohngiong unsek? Emen me ahneki mohngiong unsek sohte kin papahte Koht pwehki e ese me e anahne wia met. Ahpw e kin papah Siohwa pwehki e uhdahn poakohng oh wauneki erein eh mour. w24.07 21 ¶4-5

Mie ehu ahl me Siohwa ketin kawehwehda duwen eh ketin kasohrehla douluhl dipatail kan. E ketin mahsanih: “I pahn irisasang omw sapeik kan duwehte depwek ehu eh pwaindi oh dipomw kan duwehte depwek mosul ehu eh pwaindi.” (Ais. 44:​22, NW) Ni Siohwa eh kin ketin mahk, e mwomwen me e ketin doadoahngki depwek mosul ehu pwehn karirala dipatail kan pwe pein ih oh pil kitail en sohla kilang. Dahme karasaras pwukat padahkihong kitail? Ni Siohwa eh kin ketin mahkohng dipatail kan, kitail en dehr medewe me kitail pahn suwedki dipatail ko erein atail mour. Sapwellimen Sises nta pwainla douluhl dipatail kan. Ni Siohwa eh kin ketin mahkohng kitail, e kin mwomwen me kitail sohte douluhl wiahda dihp. Ih met mwomwen Siohwa eh kin ketin mahkohng kitail ni atail kin koluhkihla dipatail kan. Sapwellimen Siohwa kadek kalahngan pil mweidohng kitail en kak kamehlele me kitail kak pwurehng kompoakepahnki ih, oh kitail sohla anahne suhsuwedkihte atail sapwung kan. w25.02 10 ¶11-14

Siohwa ketin kupwurki elder kan en perehsang mwomwohdiso irail kan me sohte kin peikiong sapwellime kehkehlik kan. (1 Kor. 5:7) Ahpw irail pil kin wia uwen arail kak koaros pwehn sewese emen en koluhla ma kak. Ni arail kin sewese aramaso, irail kin koapworopworki me e pahn wekila. Dahme kahrehda? Pwehki irail men kahlemengih Siohwa me kin ketin “diren limpoak oh kadek kalahngan.” (Seims 5:11) Wahnpoaron Sohn kin kasalehda limpoak ong rie Kristian kan. E ntingihedi: “Nei kisin seri ko, I ntingkiwohng kumwail mepwukat pwe kumwail en dehr wiahda dihp. Ahpw ma emen wiahda dihp, sounsawaspatail mie rehn Sahmo, iei Sises Krais, me pwung men.” (1 Sohn 2:1) E kansensuwed me ekei pak Kristian men sohte men koluhla. Ma met wiawi, mwomwohdiso anahne kihsang ih nanpwungarail. w24.08 25 ¶19-20

Ele ke kin karasahiong dahme ke kin wia ong dahme meteikan kak wia. Dehr wia met! Dahme kahrehda? Pwehki Siohwa sohte kin ketin wia met. (Kal. 6:4) Karasepe, Mery kihong Sises kisakis en lehn wai pweilaud ehu. (Sohn 12:​3-5) Weksang met, liohdi semwehmweo meirongki sent toantoal riau nan tehnpas sarawio. (Luk 21:​1-4) Ahpw, Sises ketin kilengwohng ara kisakis ko nin duwen kasalepen ara pwoson. Semeo, Siohwa, uhdahn ketin kesempwalki soahng koaros me ke kin wia pwehki omw kin poadidiong ih oh poakohng ih, sohte lipilipil ma e mwomwen tikitik ong uhk. Kitail koaros kin ahneki peikasal ekei pak. Ahpw, Paipel kak sewese kitail en powehdi. Eri wia uwen omw kak en diarada pasapengpen omw peidek kan, oh ke pahn nsenamwahu oh sohte pwunod. Siohwa ketin mwahngihiuk. E ketin kalahnganki tounmetei koaros me ke wiahiong oh pahn ketin kapwaiada sapwellime inou en katingihiuk. Siohwa kin ketin poakohng oh nsenohki emenemen sapwellime ladu lelepek kan. w24.10 25 ¶3; 29 ¶17-18