اَمثال 7 باب چ سلیمان نے جیہڑا واقعہ دَسیا، اوہدے توں پتہ چلدا اے کہ یہوواہ دا کوئی وی بندہ گُناہ کرن دے خطرے چ پے سکدا اے۔ ہو سکدا اے کہ جدوں اِک بندے کولوں کوئی وڈا گُناہ ہو جائے تے اوہ کہوے کہ ”‏ایہہ سب کجھ اچانک ہویا اے“‏ یاں شاید ”‏پتہ ای نئیں چلیا کہ ایہہ کیویں ہویا۔“‏ پر جے اوہ غور کرے کہ اِنج کیوں ہویا اے تے فیر اوہنوں سمجھ آئے گا کہ اوہنے کجھ ایہو جہیاں غلطیاں کیتیاں سن جنہاں دی وجہ توں اوہدے کولوں اِک وڈا گُناہ ہو گیا۔ ہو سکدا اے کہ اوہدی بھیڑے لوکاں نال دوستی سی یاں شاید اوہ انٹرنیٹ تے غلط قسم دِیاں تصویراں تے ویب سائٹس ویکھدا سی یاں ایہو جہیاں تھانواں تے جاندا سی جتھے اِک مسیحی نُوں نئیں جانا چاہی دا۔ ہو سکدا اے کہ اوہنے دُعا کرنا، بائبل پڑھنا، عبادتاں تے مُنادی چ جانا چھڈ دِتا سی۔ اَمثال چ دَسے گئے نوجوان وانگوں ایس بندے کولوں وی وڈا گُناہ اچانک نئیں ہویا سی۔ اَسی کیہہ سکھیا اے؟ اَسی سکھیا اے کہ سانوں صرف گُناہ توں ای نئیں سگوں اوہناں کماں توں وی دُور رہن دی لوڑ اے جیہڑے سانوں گُناہ وَل لے جاندے نیں۔ ایہی گل سلیمان نے اوس نوجوان تے بدچلن عورت دا واقعہ دَسن دے بعد سمجھائی۔—‏متی 5:‏29، 30۔ م24.‏07 ص.‏ 16 پ.‏ 10، 11

ایہہ خزانہ کیہہ اے؟ ایہہ خزانہ بادشاہی دی مُنادی دا کم اے جدے ذریعے لوکاں دِیاں جاناں بچ سکدیاں نیں۔ ‎(‏2-‏کُرنتھیوں 4:‏1)‎‏ نالے مٹی دے بھانڈے کیہہ نیں؟ ایہناں دا اشارہ خدا دے خادماں وَل اے جیہڑے لوکاں نُوں خدا دی بادشاہی دی خوش‌خبری سُناندے نیں۔ پولُس دے زمانے چ کاروبار کرن والے لوک اپنیاں قیمتی شیواں جیویں کہ کھانا، مے تے پیسہ اِک جگہ توں دُوجی جگہ کھڑن لئی مٹی دے بھانڈے استمال کردے سن۔ ایسے طرحاں یہوواہ نے سانوں خوش‌خبری دا قیمتی پیغام سُنان دی ذمے‌داری دِتی اے۔ نالے یہوواہ سانوں طاقت وی دیندا اے تاکہ اَسی اوہدا پیغام لوکاں تک پونچا سکئے۔ جے کدی کدار سانوں ایس گلوں ڈر لگدا اے کہ لوک ساڈا پیغام نئیں سُنن گے یاں ساڈی مخالفت کرن گے تے اَسی ایس ڈر تے کیویں قابو پا سکنے آں؟ ذرا غور کرو کہ جدوں رسولاں نُوں مُنادی کرن توں سختی نال منع کیتا گیا تے اوہناں نے کیہڑی چیز لئی دُعا کیتی۔ انساناں دے ڈر تے قابو پان لئی اوہناں نے یہوواہ کولوں مدد منگی تاکہ اوہ دلیری نال پیغام سُناندے رہن۔ یہوواہ نے فوراً اوہناں دی دُعا دا جواب دِتا۔ ‎(‏اعمال 4:‏18، 29، 31)‎‏ جے کدی کدار توانوں وی انساناں دے ڈر دی وجہ توں مُنادی کرنا مشکل لگدا اے تے یہوواہ توں مدد منگو کہ لوکاں لئی تواڈا پیار تواڈے دل چوں انساناں دا ڈر مٹا دَوے۔ م24.‏04 ص.‏ 16 پ.‏ 8، 9

یہوواہ نال محبت دی وجہ توں ساڈا دل کردا اے کہ اَسی اوہدا ناں پاک ٹھہرائیے۔ شیطان نے یہوواہ تے اِلزام لا کے اوہنوں بدنام کیتا اے تے اَسی ایہہ ثابت کرنا چاہنے آں کہ شیطان جھوٹھا اے۔ ‎(‏پیدائش 3:‏1-‏5؛ ایوب 2:‏4؛ یوحنا 8:‏44)‎‏ مُنادی کردے ویلے ساڈی ایہہ دلی خواہش ہوندی اے کہ اَسی اوہدے ناں نُوں پاک ٹھہرائیے تے اوہناں لوکاں نُوں یہوواہ بارے دَسیئے جیہڑے سُنن لئی تیار نیں۔ اَسی چاہنے آں کہ سارے ایہہ گل سمجھ جان کہ اوہ اِک محبت کرن والا خدا اے، اوہدا حکمرانی کرن دا طریقہ سب توں ودھیا اے تے اوہ ہمیشاں اِنصاف کردا اے۔ اوہدی بادشاہی بوہت چھیتی سارے دُکھاں تکلیفاں نُوں ختم کردے گی تے زمین تے امن تے خوشی لیائے گی۔ ‎(‏زبور 37:‏10، 11، 29؛ 1-‏یوحنا 4:‏8)‎‏ جدوں اَسی لوکاں نُوں یہوواہ بارے ایہہ ساریاں گلاں دَسنے آں تے اِنج اَسی ثابت کرنے آں کہ اوہدا ناں پاک اے۔ سانوں ایس گل توں وی بڑی خوشی ہوندی اے کہ اَسی اپنے ناں تے پورا اُتر رہے آں۔ م24.‏05 ص.‏ 18 پ.‏ 12