Olketa Tingse Hem Nao Pastor

Osman and waef witim dota blo tufala, olketa duim trolley witnessing aotsaed lo wanfala cemetery lo Chile. Seke nomoa wanfala big grup arrive for wanfala funeral and music blo olketa barava laod. Samfala tingse Osman nao evangelical pastor blo olketa, so olketa go lo hem, huggim hem and sei, “Thankiu tumas Pastor for arrive on taem, mifala expectim dat bae iu lo hia!”

Nomata Osman trae for kliarem datfala misunderstanding, datfala crowd no herem wat hem talem bikos noes hem big tumas. Afta tu-thri minute datfala grup go insaed cemetery, samfala lo olketa kam bak lo Osman and sei, “Pastor, mifala weitim iu lo grev yard.”

Taem datfala noes hem katdaon, Osman fit for explainim lo olketa hu nao hem and why hem lo there. Bihaen olketa talemaot feel nogud blo olketa dat pastor blo olketa no kam, olketa askem Osman, “Hao iu laek kam and storyim lelebet toktok from Bible lo grup blo mifala?” Osman hem agree for duim datwan.

Taem olketa wakabaot go for grev, Osman askem olketa for talem samfala information abaotem woman wea dae, and hem ting raonem samfala scripture wea hem laek for sharem witim olketa. Taem olketa arrive lo ples blo burial, hem introducem hemseleva lo datfala grup, and talem dat hem wanfala Jehovah’s Witness, and hem participate lo waka for talemaot gud nius lo pipol.

Then, hem iusim Revelation 21:3, 4 and John 5:28, 29 for explainim dat hem no purpose blo God for olketa human for dae. Hem sei klosap nao God bae resurrectim olketa wea dae, and olketa bae garem hope for laef forever lo earth. Taem Osman finis for story, staka kam huggim hem and thankiu lo hem for “datfala naes message from Jehovah.” Then hem go bak lo trolley blo hem.

Bihaen lo funeral, samfala lo datfala grup go lo trolley and askem olketa Bible kwestin lo Osman and famili. Olketa story for longtaem, and bihaen datwan, olketa tekem klosap evri pablikeson lo datfala trolley.