Wat Nao Bible Talem Abaotem Pornography? Hao, Cybersex Hem Rong?
Ansa from Bible
Bible no story direct abaotem pornography, cybersex, or olketa activity wea klosap semsem. Nomata olsem, Bible talem klia hao God feel abaotem olketa akson wea promotim sex aotsaed lo marit or tingting wea no stret abaotem sex. Lukim olketa Bible verse hia:
“So killim dae olketa part lo body blo iufala wea laek for durong, for duim samting wea no klin, for ova tumas for laekem sex.” (Colossians 3:5) Instead for killim dae feeling for laek duim olketa rong samting, for watchim pornography hem mekem man for laekem tumas for duim rong samting. Hem mekem man for no klin, or dirty lo eye blo God.
“Eniwan wea gohed for lukluk lo wanfala woman for laek durong witim hem, hem duim adultery finis witim hem lo heart blo hem.” (Matthew 5:28) Taem samwan lukluk lo piksa blo olketa man and woman wea duim sex, datwan savve mekem hem for garem rong tingting and leadim hem for duim rong samting.
“Iufala mas no storyim wei for durong, and no storyim tu evri difren kaen wei for no klin, or wei for greedy.” (Ephesians 5:3) Iumi shud no even mekfani abaotem wei for durong, no watchim or read abaotem.
“Olketa samting wea body wea sin hem laekem hem showaot klia. Olketa samting hia nao, wei for durong, no klin, . . . and olketa kaen samting olsem. Olsem mi warnim iufala finis, mi warnim iufala moa distaem, olketa wea duim kaen samting olsem bae no inheritim Kingdom blo God.” (Galatians 5:19-21) God ting lo olketa wea watchim pornography or duim cybersex, phone sex, or sexting dat olketa no klin, and wei blo olketa no klin. If hem wei blo iumi for duim kaen samting olsem, God bae no hapi lo iumi.