“Wanfala Simpol Wei for Honest”

Danielle, wanfala Jehovah’s Witness lo South Africa, hem faendem basket blo wanfala kastoma wea hem forgetim lo wanfala coffee shop. Basket hia garem wallet wea selen stap insaed, and olketa credit card. Danielle laek for returnim basket hia lo owner blo hem, so hem lukaotem eni address or phone namba bat hem faendem nomoa wanfala nem. Hem ringim bank wea hem lukim lo credit card for askem contact blo datfala man bat bank no allowim. Danielle no givap, hem ringim phone namba wea stap lo wanfala receipt blo wanfala doctor wea hem faendem insaed datfala basket. Receptionist blo doctor sei dat hem bae givim phone namba blo Danielle lo datfala man.

Datfala man sapraes for kasem phone kol from office blo doctor blo hem. Olketa informim hem dat Danielle faendem basket blo hem and laek for returnim. Taem hem go for pikim basket blo hem, Danielle and dadi blo hem nao kam meetim hem. Tufala iusim datfala chance for talem hem why olketa traem best for faendem hem. Tufala storyim dat tufala Jehovah’s Witness, and tufala laek for followim olketa Bible principle lo laef. Dastawe olketa waka hard for honest lo evri samting.—Hebrews 13:18.

Tu-thri hour bihaen, datfala man sendem message lo Danielle and dadi blo hem for thankiu lo olketa moa for returnim basket and wallet blo hem. Lo message hia hem sei: “Mi appreciatim tumas wat iutufala duim for faendem mi. Mi hapi tumas for meetim iu and famili blo iu and hard for mi forgetim wei wea iufala kaen tumas and friendly. Mi laek for givim iu wanfala smol samting for showim appreciation blo mi. Mi savve iu mekem olketa personal sakrifaes for honorim God blo iu. Wat iu duim hem showim hu nao iu, and hem nao showaot lo wei wea Danielle honest and faithful. So mi laek thankiu moa lo iu, and God bae blessim ministry blo iu.”

Tu-thri month bihaen, dadi blo Danielle story moa witim datfala man, and man hia storyim wat happen no longtaem go nomoa taem hem pikim wanfala smol hand bag. Hem lukim datwan taem hem go shopping. Hem faendem woman wea hand bag blo hem, hem returnim and explainim wat nao motivatim hem for duim datwan. Hem talem dat recently samwan honest and duim sem samting lo hem tu. Hem sei lo dadi blo Danielle: “Simpol wei for honest and kaen wea Danielle showim nao mekem mi for duim diswan lo narawan tu. If evriwan lo community duim diswan, bae laef blo iumi hem impruv.”