Hao Nao Bae Iu Winim Olketa Samting wea Distractim Iu?

1-2. Hao nao samting wea important savve kamap samting wea distractim iu?

WAT taem nao last taem wea iu winim wanfala samting wea distractim iu? Maet samting pullim attention blo iu from wat iu duim and iu need for disaed wat nao moa important. For example, imaginim phone blo iu ring taem iu draev. Maet datfala kol hem important, bat iu luksavve lo dat taem hem kamap wanfala samting wea distractim iu. For concentrate lo draeving blo iu nao hem moa important.

² Iumi garem staka activity for duim wea important. Bat iumi savve wei for concentrate lo olketa spiritual activitya and routine blo iumi hem barava important. (Matt. 6:33) Pipol blo Jehovah olketa olsem draeva wea careful, olketa trae for luksavve wat nao savve distractim olketa from wei for concentrate lo road wea olketa followim.—Prov. 4:25; Matt. 6:22.

3. Hao nao disfala article bae helpem iumi for winim olketa samting wea distractim iumi?

³ No eniwan lo iumi laekem eni samting for distractim iumi from olketa spiritual activity blo iumi. Nomata olsem, iumi evriwan feisim olketa situation wea isi tumas for distractim iumi. (Luke 21:​34-36) So for helpem iumi concentrate lo service blo iumi for Jehovah, iumi bae storyim (1) olketa samting wea savve distractim iumi, (2) wat Jesus duim for no letem eni samting distractim hem, and (3) hao iumi savve winim olketa samting wea savve distractim iumi distaem.

WAT NAO OLKETA SAMTING WEA SAVVE DISTRACTIM IUMI?

4-6. Wat nao olketa samting wea savve isi for distractim iumi?

⁴ Iumi evriwan garem staka important samting wea iumi mas duim. For example, maet iumi garem health problem or iumi mas duim samfala samting for famili or for iumiseleva. Really, olketa samting hia hem important and iumi need for duim. Bat hao, olketa samting hia savve distractim iumi? Yes, olketa savve distractim iumi if iumi evritaem tingting abaotem and spendem staka taem lo olketa gogo iumi no garem nao taem or strong for duim olketa nara samting.

⁵ And tu, staka lo iumi stap lo olketa ples wea raeot kamap, problem saed lo economy, disease outbreak, and olketa faet wea no stop wea showim iumi stap lo olketa last day. (2 Tim. 3:1) Taem iumi experiencem olketa samting olsem, iumi savve wari and evritaem tingting tumas abaotem.

⁶ Maet iumi savve lo olketa pipol wea olketa samting hia barava affectim laef blo olketa. So hem mek sense nomoa for olketa barava wari lo taem olsem. Jehovah no creatim iumi olketa man for gohed safa or wari olsem. Dastawe samfala feel dat olketa no savve garem normal laef bikos lo olketa hard taem hia. From datwan, samfala busy lo entertainment or recreation for trae for katem daon stress blo olketa. Wat nao bae iumi duim if iumi insaed lo kaen situation olsem? Bae iumi storyim wat iumi savve lanem from example blo Jesus wea savve helpem iumi for winim olketa samting wea savve distractim iumi from worship blo iumi.

WAT NAO JESUS DUIM FOR NO LETEM ENITING DISTRACTIM HEM?

7. Wat nao olketa samting wea fit for distractim Jesus?

⁷ Staka samting stap wea fit for distractim Jesus olsem social and politikol issue. Lo taem blo Jesus, staka pipol poor and sik. (Matt. 14:14; Mark 14:7) And olketa Roman and olketa nara Jew mekem laef blo olketa hard tumas. Taem pipol lukim dat Jesus garem paoa and ability for duim olketa mirakol, olketa laek mekem hem king. (John 6:​14, 15) And tu, Satan temptim Jesus for mekem Jesus tingse hem shud rulim world lo datfala taem. (Matt. 4:​8, 9) And wantaem aposol Peter, wanfala lo olketa klos fren blo Jesus talem hem for no mekem laef blo hemseleva hard taem hem sei lo Jesus: “Iu no tok olsem Lord.”—Matt. 16:​21, 22.

8. Wat nao Jesus duim for no letem eni samting distractim hem?

⁸ Wat nao Jesus duim for no letem eni samting distractim hem? Hem duim thrifala samting. First samting, hem garem tingting blo Jehovah. (John 8:28; 14:9) Mek-tu, hem gohed busy lo olketa spiritual activity. (Matt. 9:35) And mek-thri, hem luksavve lo wat nao really important. (John 4:34) Hem strong for rejectim temptation blo Satan and hem luksavve Peter trae for helpem hem, bat wat Peter talem hem no followim tingting blo Jehovah. (Matt. 4:10; 16:23) Jesus no allowim wat pipol tingim, talem, or duim for distractim hem from wei for accomplishim purpose blo God. Hem tru, olketa samting wea savve distractim iumi hem difren from wat Jesus experiencem. Bat wei for studyim gud example blo Jesus savve helpem iumi for winim olketa samting wea distractim iumi.

HAO NAO IUMI SAVVE WINIM OLKETA SAMTING WEA DISTRACTIM IUMI?

9. Wat nao hem minim for “gohed for luksavve lo wanem Jehovah laekem”? (Ephesians 5:17)

⁹ Lane for garem sem tingting olsem Jehovah. Wei for duim datwan savve helpem iumi for “gohed for luksavve lo wanem Jehovah laekem.” (Readim Ephesians 5:17.) Iumi savve lane abaotem wat Jehovah hapi lo hem taem iumi readim Word blo hem and ting raonem. Iumi savve duim datwan nomata Bible no storyim eniting abaotem specific situation wea iumi insaed. Hao nao iumi savve duim datwan? Hem nao taem iumi savve gud lo tingting blo Jehovah and willing for letem datwan gaedem iumi.

10. Hao nao iumi savve lane abaotem hao Jehovah ting lo samting?

¹⁰ Iumi savve lane abaotem hao Jehovah ting lo samting taem iumi studyim Bible and ting raonem hao hem deal witim iumi olketa man. (Jer. 45:5) Taem iumi readim olketa story lo Bible, hem gud for ting raonem olketa kwestin olsem: ‘Wat nao diswan teachim mi abaotem Jehovah? Hao nao mi savve iusim diswan for sheipim tingting blo mi?’ Hem tru, tingting blo Jehovah hem barava hae winim tingting blo iumi. (Isa. 55:9) So iumi savve askem Hem for teachim iumi hao for duim will blo hem. (Ps. 143:10) And iumi savve prea tu for hem helpem iumi minim tingting blo hem and for garem sem tingting olsem hem.—1 John 5:14.

11. Wat nao Jehovah laekem iumi for kasem?

¹¹ Taem iumi lane for garem sem tingting olsem Jehovah, iumi understandim dat hem laekem iumi for no letem eni samting for distractim iumi, mekem iumi barava redi gud for end blo disfala system. (Matt. 24:44) Hem no laekem iumi for ova tumas for wari abaotem staka samting. (Matt. 6:​31, 32) Dastawe Jehovah givim iumi gud advaes mekem iumi savve wat for duim taem iumi start for wari abaotem health, waka, haos, or olketa nara personal or famili issue. Hem invaetem iumi for depend lo hem for wisdom and strong for deal witim olketa challenge wea iumi feisim.—Ps. 55:22; Prov. 3:​5-7.

12. Wat nao wanfala wei wea iumi savve deal witim wei for wari abaotem olketa event wea happen lo world? (Matthew 5:3)

¹² Gohed busy lo olketa spiritual activity. Iumi evriwan savve wari abaotem olketa event wea happen raonem world, wea iumi no fit for kontrolem. So, for no letem datwan distractim iumi, iumi mas focus lo olketa spiritual activity blo iumi. If iumi duim wat iumi fit for duim for gohed fren klos witim Jehovah, then iumi bae hapi bikos hem nao wat Jehovah creatim iumi for duim. (Readim Matthew 5:3.) Iumi savve duim datwan taem iumi studyim Bible and duim best blo iumi lo service blo iumi for Jehovah. Wei for duim olsem bae mekem Jehovah hapi bikos iumi iusim gud taem blo iumi.—Prov. 23:15.

13. Hao nao iumi savve “iusim gud taem wea [iumi] garem”?

¹³ Iumi olketa Christian disaed strong for “iusim gud taem wea [iumi] garem.” (Eph. 5:​15, 16; lukim “making the best use of your time” lo English study note.) Olketa verse hia no just storyim nomoa hao iumi iusim taem blo iumi evriday for duim samting, bat hem encouragem iumi for iusim gud taem blo iumi bifor Jehovah finisim disfala wicked system. Hao nao iumi savve iusim gud taem blo iumi? If iumi spendem staka taem for gohed up-to-date witim olketa nogud nius wea kamap, hem bae isi for datwan distractim iumi, mekem iumi discourage, and no strong lo worship blo iumi. Hem gud sapos iumi markem limit lo haomas nius iumi watchim or readim! Sapos iumi duim datwan, iumi bae garem moa taem and strong for gohed busy lo olketa spiritual activity wea bae strongim iumi. And tu, hem important for ting raonem hao iumi savve expandim ministry blo iumi if hem fitim, olsem wei for garem staka return visit. Iumi luksavve dat hem barava important for iusim evri chance wea iumi garem for helpem pipol for “sev and kasem stretfala knowledge abaotem truth.”—1 Tim. 2:4.

14. Hao nao wei for gohed busy lo olketa spiritual activity helpem iumi? (Lukim tu piksa.)

¹⁴ Taem iumi gohed busy lo olketa spiritual activity, datwan helpem iumi for garem balance tingting abaotem taem wea iumi stap lo hem distaem. Taem iumi lukim raeot, problem saed lo economy, and disease wea spred evriwea, iumi no fraet nomoa bikos iumi savve evriting hia wea happen hem olketa saen wea showim Bible profesi hem fulfill. Winim wei for letem wei for fraet distractim iumi, iumi barava trustim purpose blo Jehovah abaotem future blo iumi. Iumi no need for wari bat iumi gohed trustim Jehovah for helpem iumi deal witim olketa samting wea happen.—Ps. 16:8; 112:​1, 6-8.

15. Hao nao wei for “garem gudfala tingting” bae helpem iumi? (1 Peter 4:7)

¹⁵ Garem klia tingting abaotem wat nao really important. Staka pipol lo world distaem olketa busy lo recreation and no focus lo end blo disfala system wea klosap. Hem no rong for garem recreation, bat for avoidim tingting blo pipol lo world, iumi need for “garem gudfala tingting.” (Readim 1 Peter 4:7.) Wat nao datwan minim? Hem minim iumi need for mekem grow wei for luksavve lo stret samting mekem iumi garem balance tingting abaotem recreation and mekem olketa wise disison. Olketa disison olsem bae reflectim tingting blo Jehovah and bae showim dat iumi luksavve wat nao really important.—2 Tim. 1:7.

16. Wat nao Jesus focus lo hem taem hem klosap for dae?

¹⁶ Jesus evritaem tingim wat nao really important. Even during olketa last hour blo hem bifor hem dae, hem barava focus lo wei for gohed loyal and for duim will blo God. Dastawe hem barava prea strong lo Jehovah. Olketa disaepol blo hem no olsem hem, olketa no gohed wekap bat olketa sleep. Olketa “taed from olketa sorre tumas.”—Luke 22:​39-46; John 19:30.

17. Why nao staka iusim social media, bat hao nao datwan savve kamap samting wea distractim iumi? (Lukim tu piksa.)

¹⁷ Olsem olketa disaepol blo Jesus, samfala taem iumi tu savve feel sorre and stress. Olketa event wea happen lo olketa last day savve mekem iumi for stress. Staka pipol distaem iusim social media for daonem stress blo olketa. Olketa iusim social media for connect witim olketa frens and famili raonem world, for sharem nius, photo, and olketa nara samting. And olketa iusim for enjoyim staka difren kaen entertainment. Bat from staka niu samting nao stap for readim and watchim, olketa pipol hia spendem staka taem and energy blo olketa for keep ap witim olketa latest samting hia. For helpem iumi garem balance tingting abaotem social media, iumi need for ting raonem disfala kwestin, ‘Hao, wei wea mi iusim social media hem strongim mi, or hem just distractim mi from wat hem really important?’

18. Why nao iumi needim wei for luksavve taem iumi chusim entertainment?

¹⁸ Iumi needim tu wei for luksavve taem iumi watchim olketa movie or TV series lo olketa difren streaming service, watchim olketa short video lo olketa Internet platform or pleim olketa video game. Iumi savve enjoyim olketa activity olsem and hem savve helpem iumi for relax. Bat iumi need for garem wei for luksavve taem iumi mas chusim wat type entertainment and haomas taem iumi bae spendem for datwan. For example, afta iumi watchim wanfala video online, wanfala niu video moa savve appear lo screen and datwan savve mekem iumi laek for watchim wanfala then narawan moa. Samfala lo olketa video hia maet showim violence and wei for durong. Diswan nao samting wea happen lo wanfala brata lo Asia. Firstaem hem start for watchim olketa haelaet blo olketa movie lo wanfala online platform. Then hem gohed watchim olketa video clip wea pop ap, gogo hem start for watchim olketa dirty scene. Then isisi hem start for watchim pornography. Bat witim help blo olketa elder and sapot blo olketa klos fren blo hem, hem kwiktaem duim samting, hem deletem olketa streaming app and hem markem limit lo haomas taem hem spendem lo phone blo hem. Disfala experience showim why iumi need for garem wei for luksavve taem iumi chusim entertainment.

19. Wat nao savve happen if iumi spendem tumas taem lo recreation?

¹⁹ Iumi need tu for garem wei for luksavve saed lo recreation and holiday. Iumi evriwan need for relax and rest from waka samfala taem, bikos datwan hem gud and savve helpem iumi for healthy. Bat if iumi spendem tumas taem lo recreation, datwan bae mekem iumi no balance and iusim nao taem wea iumi shud duim lo olketa samting wea moa important. (Phil. 1:10) Each wan lo iumi mas disaedem wat iumi duim and haomas taem iumi spendem lo datwan. Taem iumi mekem kaen disison olsem, ting raonem olketa kwestin hia: ‘Hao, taem wea mi spendem for recreation and holiday showim mi garem wei for luksavve? Hao, mi luksavve lo wat hem really important and redyim miseleva for “taem wea evri samting bae finis”?’

20. Wat nao gud samting wea iumi kasem taem iumi traem best for winim olketa samting wea distractim iumi?

²⁰ Iumi benefit taem iumi winim olketa samting wea distractim iumi from olketa spiritual activity and routine blo iumi. (Isa. 48:17) Witim help blo Jehovah, iumi bae fit for winim olketa challenge iumi feisim lo laef. Iumi bae no wari tumas abaotem olketa event wea happen lo world. And iumi bae avoidim wei for busy tumas lo recreation. So iumi laek for gohed garem sem tingting olsem Jehovah, gohed busy lo olketa spiritual activity, and garem klia tingting abaotem wat nao really important. Wei for duim olsem bae no just helpem iumi nomoa for winim olketa samting wea distractim iumi, bat hem bae helpem iumi tu for “hol strong lo datfala tru laef.”—1 Tim. 6:19.