‘Hem No Kaikaim or Drinkim Eni Samting wea Bae Mekem Hem No Klin’

DANIEL hem stap farawe from hom blo hem. Olketa blo Babylon tekem famili blo hem and staka nara famili from hom blo olketa lo Judah for go prisoner lo Babylon wea farawe. Datfala journey hem maet tekem samting olsem fofala month. Then insaed datfala grup blo olketa prisoner, olketa tekem Daniel and olketa nara young wan from famili blo olketa for go lo kapitol city. Lo there, Daniel meetim thrifala nara young Hebrew, Hananiah, Mishael, and Azariah and olketa kamap fren. No longtaem bihaen, olketa faendaot dat olketa lo Babylon laekem olketa for kasem training for kamap olsem olketa.

Taem olketa arrive, Nebuchadnezzar, king blo Babylon, givim order lo Ashpenaz wea hem boss blo olketa hae official blo hem, for changem nem blo olketa. Staka Hebrew nem hem garem mining for praisem tru God. Olsem example, “Daniel,” hem minim “God Hem Judge blo Mi.” Bat olketa nem lo Babylon hem garem olketa mining for praisem olketa god lo there. So olketa nemim Daniel lo Belteshazzar, wanfala nem lo Babylon, wea luk olsem hem part blo wanfala prea for askem false god Bel for protectim king. Lo semtaem, king laekem olketa for garem sem tingting and duim samting olsem olketa blo Babylon. So hem givim order for olketa young wan hia kasem training for story and raet lo Chaldean languis, mekem olketa savve waka for hem lo royal palace. Wat moa king laekem Daniel and olketa fren blo hem for duim?

King appointim Ashpenaz for supervisem training wea olketa young prisoner hia bae kasem. Olketa bae kaikaim olketa spesol kaikai blo king and drinkim best wine blo hem. Maet samfala young wan feel spesol taem olketa treatim olketa olsem. Bat Daniel luksavve kaen privilege olsem hem danger for hem and thrifala Hebrew fren blo hem. Why nao olsem?

Daniel maet ting raonem diswan: ‘Olketa blo Babylon savve dat mifala no savve kaikaim samfala kaikai wea Law blo Jehovah stopem. Hao, bae olketa trae mekem mifala for disobeyim Jehovah taem olketa givim mifala for kaikaim kaikai wea no klin lo eye blo God? And if olketa givim mifala meat, hao, olketa aotem gud blood blo hem or olketa bae trae for trikim mifala for brekem Law blo Jehovah wea againstim wei for kaikaim blood? Or hao, wei for kaikaim samfala kaikai wea olketa givim bae hem olsem mifala part lo wei for worshipim false god? And tu, if olketa givim mifala staka wine for drinkim, hao, datwan bae mekem mifala for no mekem wise disison?’a

Daniel prea staka taem lo Jehovah and story witim thrifala fren blo hem. Daniel “disaed strong lo heart blo hem” for duim samting wea mekem Jehovah hapi. Then hem go story lo Ashpenaz. Lo wei wea showimaot respect, Daniel ask for hem and olketa fren blo hem for no kaikaim eni kaikai wea bae mekem olketa no klin lo eye blo God. Jehovah hem stap witim Daniel, and Hem mekem datfala boss blo olketa hae official for kaen and sorre lo Daniel. Bat datfala man hem warim tu health blo olketa sapos olketa no kaikaim kaikai wea olketa givim. Hem savve sapos olketa hia no healthy bae Nebuchadnezzar no hapi lo hem. Daniel no laek for argue. Bihaen, Daniel garem courage for askem gard wea Ashpenaz appointim for lukaftarem olketa, sapos olketa savve kaikaim nomoa vegetable and drinkim wata for ten days, and then comparem olketa witim olketa nara young wan. Datfala gard agree witim datwan!

Bihaen ten days, result hem klia, fofala young wan hia luk healthy winim evri nara young wan. From olketa hia barava healthy, olketa letem olketa for gohed followim datfala sem diet. Hem klia, Jehovah blessim faith and courage blo Daniel and olketa fren blo hem. Hem wanfala leson wea olketa bae no savve forgetim.

Olsem next chapter bae storyim, thrifala fren blo Daniel feisim wanfala barava hard situation wea testim courage blo olketa. And Daniel laef for 100 years, and courage blo hem kasem test tu. Hem mas talem mining blo olketa dream wea Jehovah mekem Nebuchadnezzar for lukim, nomata olketa dream hia hem nogud nius for datfala praod king and kingdom blo hem. Staka year bihaen, Daniel storyim mining blo wanfala hand raeting lo wall, nomata datwan hem judgment message againstim Belshazzar, king wea rul lo datfala taem. And taem Daniel hem barava olo, olketa torowem hem insaed wanfala hol wea full lo olketa lion wea hangere. Lo evri situation hia, Daniel showim sem courage wea hem garem taem hem young. Dastawe, wanfala angel blo Jehovah sei, Daniel hem wanfala “man wea barava spesol”!

Readim story hia lo Bible:

• Daniel 1:​1-21; 5:12; 10:11

For discussim:

Lo olketa wanem wei nao Daniel showim hem no fraet?

Dig Go Moa

1. 1. Hao nao iumi savve explainim difference between Daniel 1:1 and Jeremiah 25:1? (dp 18-19 ¶14-15)

   Ansa blo iu

2. 2. Wat nao wanfala old raeting lo Babylon talem wea pruvim “treasury blo god blo [Nebuchadnezzar]” hem really stap? (Dan. 1:2; it “Treasury” ¶3-wcgr) A

   Ansa blo iu

   

   © The Trustees of the British Museum. Licensed under CC BY-NC-SA 4.0. Source. Modifications: Box added.

3. 3. Wat nao waka blo olketa “priest wea duim magic”? (Dan. 1:20; it “Magic and Wei for Iusim Demon for Spoelem Man” ¶2-6-wcgr) B

   Ansa blo iu

   

4. 4. Wat nao samfala lo olketa vegetable wea olketa givim lo Daniel and thrifala fren blo hem for kaikaim? (Dan. 1:12; dp 40 ¶25)

   Ansa blo iu

Ting Raonem Hao Leson Hia Helpem Iu

• Wat nao olketa young wan savve lanem from Daniel abaotem wei for faithful lo Jehovah, nomata taem olketa no stap witim famili blo olketa?

  Ansa blo iu

• Hao nao wei wea Daniel “disaed strong lo heart blo hem” firstaem, helpem hem for garem courage? (Dan. 1:8) Hao nao iumi savve followim example blo hem? C

  Ansa blo iu

  

• Wanem nao olketa nara wei wea iu savve followim example blo Daniel for garem courage lo laef blo iu?

  Ansa blo iu

Ting Raonem Wei blo Jehovah and Purpose blo Hem

• Wat nao disfala story teachim mi abaotem Jehovah?

  Ansa blo iu

• Hao nao disfala story hem join witim olketa purpose blo Jehovah?

  Ansa blo iu

• Wat nao mi laek for askem lo Daniel taem hem resurrect?

  Ansa blo iu

Lanem Moa Samting

Watchim disfala video abaotem story lo Bible.

Daniel: Faithful for Full Laef—Part 1—Excerpt (13:07)

Hao nao olketa young wan distaem savve followim example blo Daniel for loyal and garem courage?

“Lane From Example blo Daniel” (w23.08 2-7)