9 SHIPHRAH, PUAH, AMRAM, JOCHEBED, AND MIRIAM
Olketa Haedem Moses From Olketa Garem Faith
JOSEPH hem dae winim 60 years finis. Nomata Jehovah iusim hem for sevem nation blo olketa Egyptian from bigfala hangere, olketa forgetim nao disfala faithful man. Then wanfala niu Pharaoh hem start for rul lo datfala land, and hem heitim olketa Israelite and hem fraet bikos Jehovah blessim olketa and olketa kamap staka. So olketa Egyptian mekem olketa Hebrew for kamap slave and treatim olketa nogud. Nomata olsem, olketa slave hia gohed for staka go moa.
Next plan blo Pharaoh hem for duim wanfala nogud samting. Hem givim order for olketa leadim kam lo hem, tufala Hebrew midwaef hia, Shiphrah and Puah. Imaginim feeling blo tufala taem disfala maeti ruler orderim tufala for killim dae eni baby boy wea tufala helpem mami blo hem for bornem! Bat tufala woman hia wea garem courage “fraet lo datfala tru God.” Tufala savve dat no eni man, nomata wanfala paoaful ruler, hem garem raet for mekem tufala disobeyim Jehovah, datfala Sovereign blo universe. Wei wea tufala fraet lo God helpem tufala for duim samting wea showim tufala barava brave. “Tufala no duim samting wea king lo Egypt talem lo tufala.” Instead, tufala duim difren samting: Tufala duim best blo tufala for protectim and sevem staka baby. Pharaoh barava kros, bat tufala wise and no talem wat nao tufala duim. Jehovah lukim wat tufala duim. From datwan, “God blessim tufala midwaef hia.” And gogo bihaen, hem mekem tufala for garem own famili blo tufala.
Wat nao maet bae happen lo baby Moses if tufala midwaef, parents, and sista blo hem olketa fraet?
Taem Pharaoh luksavve dat plan blo hem no waka, hem givim nara order wea worse go moa, wea hem nao for olketa mas draonem evri baby boy blo olketa Israelite lo Nile River! Lo datfala nogud taem, Amram and Jochebed, wanfala Hebrew couple mas mekem wanfala hard disison. Tufala garem finis tufala pikinini, Miriam and Aaron. Bat taem Jochebed babule witim mek-thri pikinini, hem and Amram savve if tufala garem wanfala boy, laef blo boy hia bae barava stap lo danger. Taem datfala baby hem born, tufala traem best for haedem hem. Bat for haedem wanfala baby hem no isi. Taem baby hia thri months old, Jochebed tekem wanfala basket, coatim witim tar, then putim datfala baby insaed. Hem go haedem datfala smol basket midol lo olketa tol grass wea grow saed lo Nile River. Smol gele blo hem, Miriam, haed farawe lelebet and watchim kam smol brata blo hem.
No longtaem bihaen, dota blo Pharaoh kam daon lo Nile River for swim. Hem lukim datfala basket and sendem wanfala slave gele for tekem go lo hem. Taem princess hia openem datfala basket, hem lukim wanfala baby boy wea luk naes hem gohed krae, and hem barava sorre lo baby hia. Hem disaed for adoptim hem, bat hem luksavve disfala baby needim wanfala mami for susum. So Miriam kwiktaem and no fraet for ran go lo hem and talem dat hem bae go faendem samwan for susum datfala pikinini, and dota blo Pharaoh agree. Then Miriam ran go and kam bak witim mami blo hem. Imaginim hapi wea Jochebed garem taem hem herem dat hem bae susum and lukaftarem own pikinini blo hem wea hem lovem, and lo semtaem kasem pei for datwan tu! For sure, hem and Amram duim evriting wea tufala fit for duim for teachim datfala smol boy abaotem Jehovah. Bat then, hem kasem nao taem wea tufala mas givim datfala pikinini lo dota blo Pharaoh. Datfala princess nemim hem lo Moses.
Waswe, Jehovah rewardim Amram, Jochebed, and Miriam for faith and wei wea olketa no fraet? For sure hem duim datwan! Amram and Jochebed teachim Miriam and Aaron for kamap faithful servant blo Jehovah. And tufala lukim dat Jehovah hem protectim Moses. Bible no storyim if parents blo Moses laef and lukim wanem kaen man nao Moses taem hem grow ap. (Ex. 6:20) Bat Miriam and Aaron tufala lukim taem Moses grow ap. Tufala lukim hao Jehovah iusim Moses for duim olketa spesol samting. And thrifala hia barava showimaot strong faith and no fraet taem olketa servem Jehovah tugeta. Lo next chapter, bae iumi lanem olketa challenge wea Moses feisim taem hem growap and disison blo hem for servem Jehovah.
Readim story hia lo Bible:
For discussim:
Lo olketa wanem wei nao tufala midwaef and famili blo Moses showim olketa no fraet?
Dig Go Moa
1. Wat nao olketa archaeology talem wea showim disfala story hem accurate? (g04 4/8 4 ¶4–5 ¶1-wcgr)
2. Wat nao pruvim story lo Bible abaotem wanfala papyrus basket and order blo Pharaoh for killim dae olketa Hebrew baby hem tru? (g04 4/8 6 ¶1-2-wcgr) A
Christine Osborne Pictures/Alamy Stock Photo
Piksa A: Nomata distaem, pipol still iusim papyrus for wakem boat
3. Wat nao iumi savve abaotem tufala Hebrew midwaef, and hao nao Jehovah blessim tufala? (w03 11/1 8 ¶3-4; it “Midwaef”-wcgr) B
Piksa B
4. Hao nao Miriam showimaot strong faith go kasem taem hem olo? (ijwia article 7 ¶14-18)
Ting Raonem Hao Leson Hia Helpem Iu
Wat nao olketa parents savve lanem from Amram and Jochebed?
Wat nao olketa pikinini wea garem brata or sista savve lanem from young Miriam? C
Piksa C
Hao nao iu savve followim example blo Shiphrah and Puah for no fraet lo laef blo iu?
Ting Raonem Wei blo Jehovah and Purpose blo Hem
Wat nao disfala story teachim mi abaotem Jehovah?
Hao nao disfala story hem join witim olketa purpose blo Jehovah?
Wat nao mi laek for askem lo olketa wea insaed disfala story taem olketa resurrect?
Lanem Moa Samting
Lukim gud samting wea iumi savve kasem from example blo tufala woman wea no obeyim komand blo Pharaoh.
“Olketa Woman wea Mekem Heart Bilong Jehovah Hapi” (w03 11/1 8-9 ¶3-5)
Hao, Jehovah evritaem lukaftarem olketa wea no fraet for obeyim hem olsem wanfala ruler winim olketa man?