Esitere adapulumusa wanthu wa ntundu wake

Esitere wenze mtsikana wa Chiyuda yemwe ambakhala mu thaundi ya Susani ku Perisiya. Banja yawo idatengewa na Nebukadinezara kuchoka ku Yerusalemu. Manje ku Perisiya moku ambakhala na amalume wake dzina yawo a Moredekai womwe ambaphata basa kwa Mpfumu Ahasiwero.

Nthawe inango Mpfumu Ahasiwero imbafuna mpfumukazi inyowani. Manje anyabasa wake adamubweresera akazi wose wokhuza wa mudziko mumo. Esitere wenzembo pagulu mwapo, mpfumu mwiyo idasankhula Esitere kuti akhale mpfumukazi. Koma Moredekai adauza Esitere kuti osati awulule kuti ni mu Yuda.

Mu dziko mumo mwenze munthu munango dzina yake Hamani. Iye ambanyang’anira wanthu waudindo wa mpfumu koma wenze womeka maninge. Iye ambafuna kuti wanthu ambamugwadire, koma Moredekai ambalamba kumugwadira. Patsogolo pake, Hamani adakalipa maninge mwakuti ambafuna kupha Moredekai. Ndipo padabva kuti Moredekai ni mu Yuda, adakonza vakuti aphe Ayuda wose. Iye adauza mpfumu kuti: ‘Ayuda ni wanthu wogopsya mwakuti afunika kuphewa wose.’ Pamwapo Mpfumu idamupasa mphanvu yoikha lamulo ndipo idamuuza kuti: ‘Chita chirichose chomwe unkuona kuti chingathandize.’ Hamani adapereka lamulo youza wanthu wose kuti aphe Ayuda wose pa ntsiku ya 13 ya mwezi wa Adara. Koma Yahova ambaona vose mwevi.

Esitere ambadziwalini va lamulo mweyi. Pamwapo Moredekai adamutumizira kalata yolewa va lamulo mweyi komasoti ntontholo wakuti: ‘Yenda ukayankhula na mpfumu va nkhani mweyi.’ Esitere adalewa kuti: ‘ Aliyese woyenda kwa mpfumu akanati wachemerewa aphewa, pamala ntsiku 30 mpfumu ikalibe yanichemera, koma niyende. Ndipo ikakanilata na mpsyimbo yake yachifumu ndiye kuti nikaphewelini, koma akakaleka kuchita teno ndiye kuti nikaphewe.’

Esitere adayendadi kwa mpfumu ndipo idamulata na mpsyimbo. Patsogolo pake idamubvunza kuti: ‘Esitere unkufuna kuti nikuchitire chani?’ Esitere adadawira kuti: ‘Ninkukumbira kuti imwepo na Hamani mubwere ku phwando yomwe nakukonzerani.’ Padayenda ku phwando mweyi adakumbira kuti abwere pomwe mangwana yake. Paulendo wachiwiri moyu mpfumu idabvunza pomwe Esitere kuti: ‘Unkufuna nikuchitire chani?’ Iye adadawira kuti: ‘Pali munthu munango yemwe ankufuna kupha inepano komasoti wanthu wa ntundu wangu, pulizi tipulumuseni.’ Mpfumu mweyo idamubvunza kuti: ‘Mbani ankufuna kukuphani?’ iye adadawira kuti: ‘Ni Hamani yemwe ali pano uyu munthu woipa.’ Ahasiwero adakalipa maninge mwakuti adalamula kuti Hamani aphewe nthawe mweyoletu.

Koma palibe munthu aliyese yemwe adakakangisa lamulo ire. Patsogolo pake mpfumu idasankhula Moredekai kuti akhale nkulu wa wanthu waundindo anzake. Ndipo adamupasa mphanvu yopereka lamulo yamanjemanje. Manje Moredekai adapereka lamulo yomwe idapasa mphanvu Ayuda kuti adziteteze. Ntsiku ya 13 ya mwezi wa Adara paidafika, Ayuda adadziteteza kwa azondi wawo ndipo adawagonjesa. Kundochokera ntsiku mweyi, Ayuda adayamba kukondwerera ntsiku mweyi gole iriyose.