Yoswa na Agibiyoni

Wanthu anango wa ku Kanani, adabva vomwe vidachitika ku Yeriko. Pamwapo mafumu yanganani, yadapangana vakuti amenyane na Aizirayeli. Koma wanthu wa ku Gibiyoni adaganiza njira inango. Iwo adayenda kwa Yoswa ndipo adavala vovala vong’ambikang’ambika, nkulewa kuti: ‘Tachokera ku dziko yakutali maninge ndipo tabva va Yahova komasoti vomwe adakuchitirani ku Iguputo na ku Mowabu. Polomisani kuti mudzamenyane naselini ndipo isepano tidzakhale akapolo wanu.’

Yoswa adakhulupirira vomwe adalewa ivi ndipo adapolomisa kuti adzamenyane nawolini. Pazidapita ntsiku zitatu, adazindikira kuti wanthu mwawo enzelini wakutali enze wa mu dziko ya Kanani. Manje Yoswa adabvunza wanthu mwawo kuti: ‘Ndawa chani mwatinamiza?’ Iwo adadawira kuti: ‘Timbagopa ndawa tinkudziwa kuti Yahova Mulungu wanu ni yemwe ankukumenyerani nkhondo, pulizi ayi kutipha.’ Yoswa adasunga polomisi yake ndipo alibe kuwapha.

Pakalibe kupita nthawe, mafumu 5 ya ku Kanani yadakonza vakuti amenyane na wanthu wa ku Gibiyoni. Manje Yoswa na masocha yake, adafamba usiku wose nkuyenda kukawathandiza. Nkhondo idayamba ku machibese ndipo Akanani mwawo adayamba kuthawa nkumwazikana mbali zose. Manje kulikose komwe ambathawira, Yahova ambawagwesera vimatalala vikuluvikulu. Patsogolo pake, Yoswa adakumbira Yahova kuti ayimise dzuwa. Manje ndawa chani iye adakumbira vimwevi koma kundoyambira kalekale dzuwa ikanati yaimako? Ndawa yakuti, ambakhulupirira maninge Yahova. Yahova adadawira ndipo dzuwa iribe kuchoma kwa ntsiku yantero mpakana pomwe Aizirayeli adagonjesa mafumu yose na masocha yawo.