Rahabi adabisa amuna omwe enze adayenda kukaona dziko

Aizirayeli awiri omwe enze adatumiwa kukaona thaundi ya Yeriko, Adafikira mu nyumba ya nkazi munango dzina yake Rahabi. Mpfumu yakumuko paidazindikira idatumiza masocha kumuko. Koma Rahabi adabisa amuna awiri mwawo pantsodzi, nkuyawuza masocha yale kuti apitire njira inango. Patsogolo pake adauza Aizirayeli mwawo kuti: ‘Ninkukuthandizani ndawa ninkudziwa kuti Yahova ankukumenyerani nkhondo ndipo mugonjese thaundi mweyi. Pulizi, polomisani kuti mudzaniphelini inepano na wa m’banja yangu.’

Aizirayeli mwawo adauza Rahabi kuti: ‘Tinkupolomisa kuti aliyese yemwe adzakhale mu nyumba yako iyi adzaphewelini.’ Manje adamulangiza pomwe kuti: ‘Umangirire chingwe chifuira pajanera kuti iwepo na wa m’baja yako mudzatetezeke.’

Rahabi adaphatisa basa chingwe pakubulisa amuna awiri wale pajanela, iwo adabishala ku mapiri kwa ntsiku zitatu akanati abwerera pomwe komwe kwenze Yoswa. Patsogolo pake Aizirayeli adayambuka kamadzi ka Yorodano kuti ayambe kutenga dziko mwiyo. Thaundi yoyamba kugonjesewa yenze ya Yeriko, Yahova adawauza kuti ambazungulire thaundi mwiyo kabodzi pantsiku kwa ntsiku 6. Koma pantsiku ya 7 adawauza kuti azungulire maulendo 7. Patsogolo pake wantsembe ambaimba malupenga komasoti masocha yambakuwa maninge. Pamwapo vipupa va thaundi mwiyo vidagwa, koma nyumba ya Rahabi yomwe yenze idalumikidzana na chipupa iribe kugwa. Rahabi na wa m’baja yake adapulumuka ndawa yakuti ambakhulupirira maninge Yahova.