Bulu wa Balamu adayankhula

Aizirayeli padakhala mu chipululu pafupifupi kwa magole 40, adagonjesa mathaundi yazinji yamphanvu. Patsogolo pake, adamanga misasa yawo mu chipululu cha Mowabu chakumachibese kwa kamadzi ka Yorodano. Nthawe yakuti angene mu dziko yopolomisiwa yenze idakwana. Pamwapo Mpfumu yaku Mowabu idagopa maninge pakudziwa kuti dziko yake igonjesewe, patsogolo pake, adachemeresa munthu munango dzina yake Balamu kuti adzatemberere Aizirayeli.

Koma Yahova adauza Balamu kuti: ‘Iwepo ayi kuti ukawatembere Aizirayeli.’ Pamwapo Balamu adalamba kuyenda ku Mowabu. Mpfumu ire idamuchemera pomwe kachiwiri nkumupolomisa kuti amupase chirichose chomwe angafune, koma Balamu adalamba pomwe. Patsogolo pake Mulungu adamuuza kuti: ‘Ungayende, koma ukalewe vomwe nikakuuze basi.’

Manje Balamu adanyamuka pa bulu wake nkuyenda ku Mowabu. Mu ntima mwake ambafuna kukatembereradi Aizirayeli olo kuti Yahova adamuuza kuti ayi kuti akachite vimwevo. Patsogolo pake, mngelo wa Yahova adagumana naye katatu mu njira yomwe angapitira. Balamu ambamuonalini mngelo ule, koma bulu wake ambamuwona. Ulendo woyamba bulu ule adapatuka nkupitira m’munda, kachiwiri bule ule adapatuka pomwe nkupitira pafupi na mpanda mwakuti adapanikizira mwendo wa Balamu ku chipupa. Kachitatu bulu ule adandogona pakati pa nsewu, maulendo yose mwaya Balamu ambamenya bulu ule na mpsyimbo.

Manje ulendo wachitatu moyu, Yahova adachitisa kuti bulu ule ayankhule. Bulu ule adabvunza Balamu kuti: ‘Ko iwepo unkunimenyeranyi.’ Balamu adamudawira kuti: ‘Ndawa yakuti unkunipusisa ndipo wachita mwayi kuti niribe chibemba nidakakupha.’ Bulu ule adadawira kuti: ‘Nakhala ninkufamba nawe kwa magole yazinjizinji ko nidayamba nachitako vimwevi?’

Patsogolo pake, Yahova adachitisa Balamu kuti akwanise kuwona mngelo ule. Pamwapo mngelo ule adalewa kuti: ‘Ko Yahova alibe kukuuza kuti ayi kuti ukatemberere Aizirayeli?’ Balamu adadawira kuti: ‘Pepani naphonya nibwerere.’ Koma mngelo ule adalewa kuti: ‘Yenda ku Mowabu koma umbakalewe vokhavokha vomwe Yahova angakuuze.’

Balamu alibe kupfunzirapo kanthu. Iye adayesesa kutemberera Aizirayeli maulendo yatatu, koma Yahova adachitisa kuti awadalise m’malo mowatemberera. Patsogolo pake, Aizirayeli adagonjesa dziko ya Mowabu ndipo Balamu adaphewa. Iye adakabvera Yahova pakuyamba vinthu vidakamufambira bwino.