Aizirayeli anango adapandukira Yahova

Nthawe inango Aizirayeli ali mu chipululu, Kora, Datani, Abiramu na wanthu anango okwana 250 adapandukira Mose. Iwo adalewa kuti: ‘Taneta nawe manje! Ndawa chani ukundofuna kumbatilamulira ndipo wasankhula Aroni kuti akhale nkulu wa antsembe? Yahova anatose isepano wosati iwepo na Aroni basi.’ Vimwevi vidamukalipisa maninge Yahova ndipo iye adaona kuti wanthu mwawo ankutsutsana na iye!

Mose adauza Kora na wanthu omwe enze ku saidi ya Kora kuti: ‘Mangwana mubwere ku chitenti ndipo mudzabwerese moto na vinthu vonunkhira vakuti mukapereke ntsembe, Yahova adzationese munthu yemwe wamusankhula.’

Mangwana yake Kora na wanthu 250 wale, adayendadi ku chitenti. Iwo adapereka ntsembe olo kuti enzelini wantsembe. Yahova adauza Mose na Aroni kuti: ‘Chokani, ayi kuti mufenderere Kora na anzake mwawo.’

Olo kuti Kora adayenda ku chitenti komwe kwenze Mose, koma Datani na Abiramu na mabanja yawo adalamba kuyenda. Yahova adauza Aizirayeli kuti ayi kuti afenderere matenti ya Kora Datani na Abiramu, nthawe mwiyo Aizirayeli adayenda kutali na matenti yawo. Datani, Abiramu na mabanja yawo enze adaima panja pa matenti yawo. Patsogolo pake, pasi padayamba kung’ambika nkuwameza ndipo kuchitenti kule kudabwera moto wochokera kwa Yahova ndipo udanyekesa Kora na anzake 250.

Pamwapo Yahova adauza Mose kuti: ‘Tenga mpsyimbo ya ntsogoleri wa dzinza iriyose ndipo unembepo dzina ya ntsogoleri muyo. Koma mpsyimbo ya dzinza ya Levi unembepo dzina ya Aroni. Mpsyimbo mwezi uziikhe mu chitenti ndipo mpsyimbo ya munthu yemwe namusankhula idzachite mafololi.’

Mangwana yake Mose adatenga mpsyimbo zose nkuwaonesa atsogoleri wale. Mpsyimbo ya Aroni yenze idachita mafololi nkubereka vipaso va amondi ndipo venze vakupsa. Vimwevi vidatsimikizira kuti Yahova wenze adasankhula Aroni kuti akhale nkulu wa antsembe.