22-28 JUNHO, 2026
NYIMBO NA. 90 Timbalimbikisane
Pfunzirani na “Mulungu yemwe atinyamalisa pa bvuto iriyose”
“Kuti tikwanise kunyamalisa omwe ankugumana na mayesero ya khaindi iliyose, ndawa nasembo tanyamalisiwa na Mulungu.”—2 AKOR. 1:4.
CHOLINGA
Nkupfunzira momwe tinganyamalisire anango pakutewedzera chitsanzo cha Yahova na wanthu anango omwe adatewedzera chitsanzo chake.
1. Ndawa chani tifunika kumbanyamalisa anango?
TOSE isepano tishupika “ndawa ya mayesero yosiyanasiyana.” Ndipomwapa, nthawe zinango tifunika kulimbikisiwa na kunyamalisiwa. (1 Pet. 1:6) Ninge momwe isepano tifunira kunyamalisiwa, tifunikambo kunyamalisa anango omwe akubonera. (Mat. 7:12) Yahova yemwe “ni Mulungu yemwe atinyamalisa” pa mabvuto yose, iye atiwonesa momwe ‘tinganyamalisire anango omwe akugumana na mayesero.’ Isepano tingatewedzere chitsanzo Yahova tikambalimbikisana. (2 Akor. 1:3, 4; 1 Ates. 4:18) Tichitalini vimwivi ndawa ya kuchichimiziwa, koma ndawa ya chikondi chomwe tinacho kwa abale na alongo wathu. Mu pfunziro mwaino, tiwone vinthu vitatu. Choyamba, ko m’Baibolo mawu yakuti kunyamalisa yatanthauza chani? Chachiwiri, ko tinganyamalise tani anango? Chachitatu, ko tifunika kuchita chani peno tikufuna kunyamalisiwa?
TANTHAUZO YA MAWU YAKUTI KUNYAMALISA M’BAIBOLO
2. Ko m’Baibolo mawu yakuti “kunyamalisa,” yangatanthauze chani?
2 M’Baibolo mawu Yachigiriki yakuti “kunyamalisa,” yakhala na matanthauzo yazinji mobverana na nkhani yake. Iyo yangatanthauze “kulimbikisa,” “kutsuula,” panango “kupereka malangizo.” (Aro. 12:8) Mungaganizire va shamwali yemwe akuthamanga kuti akathandize munzake yemwe akubonera, ndipo akuchita virivose kuti amuthandize. Podiya kuti thandizo mwiyi ingaperekewe munjira zosiyanasiyana, koma mapeto yake yakhala yakuti munthu yemwe akubonera anyamalisiwa na kulimbikisiwa.
3. Ko tingapfunzire chani na Baranaba? (Onani pomwe foto.)
3 Onani chitsanzo cha m’Baibolo. Mkhrisitu munango dzina yake Yosefe, wenze wabwino pankhani yolimbikisa na kunyamalisa anango ndipo atumi adayamba kumuchemera kuti Baranaba, kutanthauza “Mwana wonyamalisa.” (Mac. 4:36) Dzina mwiyi ibverana maninge na iye ndipo kundochokera pamwapo kuyenda kutsogolo Baibolo imuchemeralini pomwe kuti Yosefe koma imuchemera kuti Baranaba. Pa vinthu vizinji vomwe iye adachita, vidachita kuwonekeratu kuti Baranaba ambafunikiradi dzina mwiyi ndawa adathandiza wanthu omwe ambafuna kuthandiziwa. Mwakulinganiza, patsogolo pakuti Saulo wakhala ntumi wa Yesu, iye adayenda ku Yerusalemu kuti akadziwane na wanthu anango. Koma kumuko wanthu azinji ambabva mantha na Saulo ndawa ya mbiri yake yakuti ambadzudza Akhrisitu. Koma Baranaba alibe kukhala na mantha. Iye adakhala na Saulo ndipo adamudziwikisa kwa atumi anango.—Mac. 9:26-28.
Baranaba ambachita vinthu mobverana na tanthauzo ya dzina yake, pakumuwonesa kukoma ntima Saulo na kuyenda kukamuwonesa kwa atumi anango (Onani ndime 3)
KO TIFUNIKA KUCHITA CHANI KUTI TINYAMALISE ANANGO?
4. Ko njira yabwino yolimbikisira anango ni iponi? (Aroma 1:11, 12)
4 Peno ni vokwanisika, kawazungireni. Yahova aphatisa basa atumiki wake kuti anyamalise wanthu anango. Mwakulinganiza, mneneri Eliya pomwe wenze wokwinyirira ambadzibva kuti ali yekhayekha ndipo Yahova adatumiza mngelo kuti akamulimbikise. (1 Maf. 19:4-7) Nayembo ntumi Paulo ambadziwa kuti kuzungira anango kungawalimbikise. (Werengani Aroma 1:11, 12.) Mukayenda kukazungira anango, mumbakhale na nthawe yokwana kuti muwalimbikise. (1 Akor. 16:7) Peno ni vosakwanisika kuwazungira maso na maso, ayi kuyebwa kuwafonera, kuwanembera kalata panango mensaje. Kuchita vimwivi kungawathandize maninge. Bvumani kuti Yahova akuphatisireni basa pakunyamalisa anango.
5. Ko ndawa chani nthawe zinango vingakhale voshupa kulimbikisa anango?
5 Muntsiku zomwe tikukhala zino, moyo ni woshupa maninge. Ndipo tikudziwa kuti tigumane na mabvuto yoshupa yomwe yangatikangise kunyamalisa azinzathu maso na maso. Onani chitsanzo cha Onesiforo yemwe wenze waku Efeso. Panthawe yomwe Paulo wenze kudjeri, Onesiforo ambafuna kumulimbikisa. Onesiforo adafagafaga Paulo podiya kuti ambadziwa kuti angamangiwe panango kuphewa. (2 Tim. 1:16-18) Ntsiku zino Mboni za Yahova ku Rússia, zikuchitambo chibodzibodzi kwa abale na alongo omwe ankudzudziwa ndawa ya chikhulupiriro chawo. Olo panthawe yomwe akuyenda kukatongewa mulandu, abale na alongo wathu awathandiza mwakuyendambo ku tiribunali podiya kuti vimwivi vingaikhe moyo wawo pangozi panango kumangiwa. Ko imwepo mungakonzekere tani kuti mulimbikisembo abale na alongo wathu? Imwepo mungapfunzire vizinji na vitsanzo va atumiki wa Yahova wakalekale na wa manjeuno omwe adalimbikisana podiya kuti ambadzudziwa.
6. Ko tingatewedzere tani Yahova pa nkhani yothandiza anango? (Onani pomwe foto.)
6 Wabvesereni. Pomwe mneneri Eliya ambaganiza kuti amwalire, adamuuza vose Yahova. Podiya kuti Yahova ambadziwa bwinobwino momwe Eliya ambabvera, iye adamubvesera mwatcheru. Yahova adamubvesera modekha mpakana pomwe Eliya ambabwerezerabwerezera mawu! (1 Maf. 19:9, 10, 14) Ndipo Yahova adamusiya pomwe mneneri Habakuku kuti ayankhule vose vomwe ambavibvesalini na vose vomwe vimbamuchitisa nkhawa podiya kuti vimbawoneka ninge ambayankhula mosowa ulemu. (Hab. 1:2, 3) Ntsiku zino Yahova abvesera mapemphero yathu podiya kuti akudziwa vomwe tikufuna. Isepano tingamutewedzere tikambabvesera abale na alongo wathu mwatcheru na mwaulemu. Abale na alongo wathu akambayankhula, ‘timbakhale wokonzeka kuwabvesera.’ Ayi kumbawagwata mawu panango kumbayankhula mawu yowachitisa manyazi podiya kuti ayankhule mawu yophonyeka panango kubwerezera vinthu vibodzi na vibodzi.—Yak. 1:19; Mla. 7:9.
Tewedzerani Yahova pakubvesera mwatcheru abale na alongo wanu (Onani ndime 6)
7. Ko tingakwanise tani kuzindikira vomwe munango akufuna kuti timunyamalise?
7 Dziwani thandizo yomwe munthu ankufunikira. Ni Yahova yekha yemwe akwanisa kuwona vomwe viri muntima. Ndipomwapa, kuti tikwanise kudziwa vomwe munthu ankufunikira, chofunika maninge ni kukhala tcheru pa vomwe iye akunena. Ayi kumbaganiza kuti thandizo muli nayo kale, ndawa nthawe zinango iye angafune thandizo yosiyana na yomwe imwepo mungafune kupereka nthawe mwiyo. Wanthu ise ndise wosiyana. Ndipomwapa, timbakhale na nthawe yobvesera mwatcheru, kukhala wokoma ntima na kuchita mibvunzo kuti yatithandize kudziwa momwe munthu muyo akubvera.—Miy. 20:5.
8. Ko Yesu adanyamalisa tani Marita na Mariya? (Onani pomwe mafoto.)
8 Ganizirani momwe Yesu adanyamalisira Marita na Mariya pomwe Lazaro adamwalira. Wose awiri enze na chisoni ndawa mulongosi wawo wenze adamwalira. Koma Yesu adawanyamalisa munjira zosiyana. Pakunyamalisa Marita, Yesu adayankhula naye va nkhani ya kumukisiwa ndipo adamuthandiza kulimbisa chikhulupiriro na chidikhiro chake. Koma Mariya adanyamalisiwa mwa njira inango. Baibolo ifotokozalini kuti Yesu adamuuza va kumukisiwa, koma Yesu adalira pabodzi na Mariya nkumubvunza kuti: Ko Lazaro waikhiwa kuponi? (Yoh. 11:20-35) Ko tikupfunzira chani na vomwe Yesu adachita? Kuti tikwanise kunyamalisa omwe akugumana na mabvuto, tifunika kudziwa vomwe iwo akufuna m’malo mondoyesesa kunyamalisa aliyese munjira ibodzi na ibodzi.
Mukayenda kukathandiza anango, yesesani kuzindikira thandizo yomwe munthu muyo ankufunikira (Onani ndime 8)a
9. Ko tingaphatisire tani basa Baibolo pakulimbikisa anango? (Aroma 15:4, 5)
9 Phatisirani basa Baibolo. “Malemba mwaya yatithandiza kupirira komasoti yatilimbikisa.” Na mapolomisi ya Yahova imwepo mungalimbise chidikhiro cha munthu. (Werengani Aroma 15:4, 5.) Ndipo chidikhiro mwichi chidzamunyamalise munthu ule na kumuchitisa kukhala wokondwa. (Yes. 40:31) Ko imwepo mungagumane tani lemba m’Baibolo kuti mulimbikise anango? Abale na alongo anango anemberatu malemba yolimbikisa. Imwepo mungagumane vitsanzo pa mbali yakuti “Kunyamalisa” mu bukhu yakuti: Malemba yothandiza pa moyo wathu Wachikhrisitu. Kumbirani Yahova kuti akuthandizeni kuphatisa bwino basa Baibolo pakuthandiza anango. Mzimu uchena wa Yahova udzakuthandizeni kuti mumbakumbukire malemba mwaya mukadzayafuna.—Yoh. 14:26.
10. Ndawa chani tifunika kumbayankhula mokoma ntima pomwe tikulimbikisa anango?
10 Yankhulani mokoma ntima. Ninge momwe tapfunzirira, “kunyamalisa” kungatanthauze “kutsuula” panango kupereka “malangizo.” Ndipomwapa nthawe zinango kuti munyamalise munthu, panango imwepo mungafunike kumuthandiza kuti achinje momwe awonera vinthu pa bvuto inango. Mukafuna kuchita vimwivi, ganizirani mukalibe kuyankhula kuti mawu yanu yakhale ‘yopolesa,’ vomwe vingachitise kuti munthu abve bwino osati kumuyingizira mabvuto. (Miy. 12:18) Tingatewedzere chitsanzo cha Yahova ninge momwe iye adathandizira Eliya. Eliya ambawona kuti aliyekhayekha yemwe ambatumikira Yahova ndipo ambakumbukira kuti basa yake ninge mneneri, yenzelini yabwino. Koma mwachifundo Yahova adamuthandiza kuwona vinthu munjira yabwino ndipo alibe kumuuza sitiriti kuti anamaganizo yophonyeka. (1 Maf. 19:15-18) Imwepo mungachite chibodzibodzi pakukhala wachifundo na kuganiza bwino mukalibe mwayankhula. Mukambadawira pa misonkhano panango kukamba nkhani, nthawe zose mumbayankhule mwachifundo, munjira yabwino na kuyesesa kulimbikisa abale na alongo wanu.
11. Abale na alongo wathu akambabonera, ko kazinjikazinji iwo afunikira thandizo iponi? (1 Yohani 3:18)
11 Perekani thandizo yomwe ankufunikira. Wale omwe akugumana na mabvuto nthawe zizinji afunika kulimbikisiwa, osati na mawu yokha. (Werengani 1 Yohani 3:18.) Baranaba adapereka chitsanzo chabwino pakugulisa munda wake nkutenga kobiri nkupereka kwa abale omwe enze adabatizika chamanjemanje omwe ambafunika thandizo. (Mac. 4:36, 37) Abale na alongo wathu ntsiku zino, atewedzerambo chitsanzo mwichi pakupereka vinthu vawo kwa wale omwe akufunika thandizo. Gabriela waku Polônia, adakwinyirira pomwe madzi yadadzala nkudzonga nyumba yake. Iye adanena kuti: “Inepano na azibereki wangu omwe nimbakhala nawo pabodzi, tidakhala na mantha komasoti wopanikizika. Inepano nimbadziwalini kuti nichite chani. Koma abale wa m’mipingo yapafupi adabwera ndipo pantsiku ibodzibodzi mwiyo adatikonzera vinthu vizinji vomwe venze vidadzongeka mu nyumba mwathu. Chochitika chimwichi, chidalimbisa maninge chikhulupiriro changu pakudziwa kuti Yahova aphatisa basa gulu yake pakunyamalisa wanthu omwe agumana na mabvuto.”
12. Ko chitsanzo chanu pomwe mukugwebana na mabvuto, chingathandize tani abale na alongo wathu?
12 Pitirizani kukhala wokhulupirika kwa Yahova. Paulo adafotokozera abale waku Tesalonika kuti adalimbikisiwa padadziwa kuti abale mwawo adapitiriza kukhala wokhulupirika podiya kuti ambagumana na mabvuto. Vimwivi vidamutsimikizira Paulo kuti vomwe ambachita viribe kupita papezi. (1 Ates. 3:5-8) Ndipo Paulo ambadziwa kuti akapitiriza kukhala wokhulupirika pomwe akugumana na mabvuto, adakalimbikisa abale, olo wale omwe iye ambawadziwalini. (Akol. 2:1, 2) Mwanjira ibodzibodzi mwiyi, abale na alongo akambawona momwe Yahova ankutithandizira pakugwebana na mabvuto, iwo adzakhale wotsimikizira kuti Yahova adzawachitirembo chibodzibodzi.
13. Ko tifunika kuchita pomwe chani kuti tilimbikise anango?
13 Khalani wodekha. Olo kuti tikuyesesa kuthandiza abale na alongo yomwe ankugumana na mabvuto, panango vingatenge nthawe kuti ayambe kubva bwino. Koma Baibolo itiuza kuti tifunika “kupitiriza kulimbikisana.” Vimwivi vikutanthauza kuti “tipitirize kulimbikisana” nthawe zose. (1 Ates. 5:11) Ndipomwapa, tifunika kukhala wodekha pakulimbikisa wale omwe akufuna kunyamalisiwa. (1 Ates. 5:14) Ndipo nthawe zinango isepano tingafunikembo kunyamalisiwa. Ko vimwivi vikatichitika tingachite chani?
KO TINGACHITE CHANI PENO TIKUFUNA KUNYAMALISIWA?
14-15. Ko tifunika kuchita chani tikakhala na nkhawa panango wokwinyirira?
14 Pempherani kwa Yahova. Imwepo mukakhala na nkhawa panango wokwinyirira, muuzeni Yahova kuti mukufuna kulimbikisiwa. (Sal. 94:19) Chitani mapemphero yasitiriti ndipo muuzeni vose va muntima mwanu. (Sal. 62:8) Ni shuwadi kuti Yahova adziwa kale momwe mukubvera, olo imwepo mukalibe kumukumbira. Koma imwepo mukambamuuza Yahova vose va muntima mwanu, mudzawonese kuti munachikhulupiriro chakuti iye akukondani komasoti kuti abvesera mapemphero yanu. Ndipo Yahova nthawe zose adawira mapemphero ya wale omwe amukhulupirira. (Maliko 11:24) Lemba ya Afilipi 4:6, 7 itilimbikisa kuti: “Nthawe zose mumbamukumbire Mulungu, mukateno ntendere wa Mulungu womwe wanthu akwanisalini kuubvesa, udzateteze mitima yanu na maganizo yanu.”
15 Kumbirani thandizo kwa anango. Uzani shamwali wanu yemwe mumuthemba panango nkulu mumpingo momwe mukubvera. Abale na alongo, angakhale wokonzeka kukuthandizani. Koma iwo angakwaniselini kudziwa momwe mukubvera peno imwepo mulibe kuwauza. (Miy. 14:10) Ndipomwapa, mumbawafotokozere abale na alongo momwe munkubvera.
16. Ko chingachitike ni chani peno anango akufuna kukulimbikisani ndipo mufunika kukumbukira chani?
16 Khalani wodekha ndipo mumbakhululukire anango. Vingachitike kuti nthawe zinango abale angakwaniselini kukunyamalisani. Nthawe zinango angayankhule vinthu vomwe vingakuthandizeni imwepo kuti mubveko bwino ndipo nthawe zinango angayankhule vinthu vomwe vingakukwinyiririseni ndipo vingandoingizira mabvuto yanu. Vimwivi vikachitika, mumbakhale wodekha. (1 Akor. 13:4, 7) Kumbukirani mawu yomwe yali pa Yakobo 3:2 yomwe yanena kuti: “Peno munthu aphonyesalini pakuyankhula, ndiye kuti ni wangwiro.” Abale na alongo wathu anavolinga vabwino ndipo akufuna kukuthandizani. Ndipomwapa, mumbakumbukire kuti: “Mzimu ni wofunisisa koma thupi ni yofoka.”—Mat. 26:41.
17. Ko tifunika kuchita chani?
17 Tose isepano tifuna kunyamalisiwa na kulimbikisiwa ndawa yakuti tinkukhala muntsiku zoshupa. Ndipomwapa tinkufuna kuchita vose vomwe tingakwanise kuti tipitirize kulimbikisana.
NYIMBO NA. 130 Mumbakhululukirane
a MAWU YOFOTOKOZERA FOTO PA : Nkulu akubvesera mwatcheru m’bale yemwe nkazi wake wamwalira chamanjemanje. Nkulu m’bodzibodzi muyo akuzungira m’bale yemwe nkazi wake adamwalira kwa magole yazinji. Iwo akuchezerana vinthu vabwino vomwe nkazi muyo ambachita.