Wana wanu ni “chuma chochokera kwa Yahova”

Ko nchani chibwera m’maganizo mwanu mukabva mawu yakuti chuma? Panango muganizira va kobiri, nyumba panango vinthu vomwe munavo m’banja mwanu kwa nthawe itali. Ko chuma cha banja ni chani? Ni chinthu chapadera chomwe chifunika kusamaliriwa bwino.

Baibolo inena kuti wana wanu ni ‘chuma chochokera kwa Yahova.’ (Sal. 127:3) Azibereki omwe akonda wana wawo awawona kuti ni chuma chapadera chofunika maninge chomwe adachitambira kwa Ababa wawo wakudzulu. Ndipomwapa, iwo achita vose vangakwanise kuti athandize wana wawo pa vinthu vofunika pa moyo wawo, ninge kusamalira thanzi yawo na kuwathandiza kuti akhale paushamwali wolimba na Yahova.

Koma chobvesa ntsisi ntsiku zino ni chakuti azibereki anango awonalini wana wawo ninge chuma chochokera kwa Mulungu. (Yes. 49:15; 2 Tim. 3:1-3) Azibereki anango afunisisa kusamalira wana wawo koma viwashupa. Ko ni mabvuto yaponi yomwe azibereki agumana nayo? Ko Yahova adikhira chani kwa azibereki? Ko azibereki angasamalire tani wana wawo ali wokondwa?

MABVUTO

Kuchichimiziwa na azibale panango wanthu anango. M’madera yanango panango mu vikhalidwe vinango wanthu alemekezewa akakhala na wana azinji. Ndawa ya vimwivi mabanja yanango yachichimizika kukhala na wana azinji.
Kukhala na nkhawa na vakutsogolo. M’madera yanango wana azinji akufa ndawa yosowa chakudya panango ndawa ya matenda. Ndipomwapa, mabanja yanango yasankhula kukhala na wana azinji kuti anango akadzafa, anango adzapumukeko. Mabanja yanango yakhala na wana azinji kuti iwo akadzakalamba adzawasamalire. Vimwivi vichitika maninge m’madziko yomwe boma iperekalini thandizo iriyose kwa wanthu okalamba.
Njira zomwe ziphatisiriwa basa kwa wale omwe ankufunalini kukhala na wana. M’madera yanango alibe mwayi wokwanisa kugumana njira za momwe angadzitetezerere. Koma anango mudera yomwe akhala zigumanika njira, koma akhala na mantha kuti vingawadwalise. Anango akwanisalini kugula mankhwala ndawa ni yodula maninge.a

KO YAHOVA AFUNA KUTI AZIBEREKI AMBACHITE CHANI?

Azibereki ankukondwa na wana wawo. Baba ankubvesera mwatcheru pomwe mwana wake nkazi ankuyankhula ndipo mayi akusenzeka na mwana wake mwamuna. — Mbagumanani nthawe yocheza na wana wanu

Perekani thandizo yomwe ni yofunikira kwa wana wanu. Yahova adapasa udindo azibereki wosamalira wana. Yahova afuna kuti azibereki ambaphate basa mwakhama kuti wana wawo akhale na chakudya, vovala na malo yokhala. Komasoti Yahova adikhira kuti azibereki ambapfunzise bwino wana wawo ndipo azibereki omwe ni Mboni afunikalini kutumiza wana wawo kuti ayende kukapfunzira shikola m’madera yanango. Ndawa ya vimwivi azibereki afunika kuti ambakhale na wana wawo pamuyi mpakana iwo kukula kuti ambawapfunzise basa zomwe zingadzawathandize pa moyo wawo. Azibereki afunika pomwe kukhala na nthawe yocheza na wana wawo ndipo akambachita vimwivi wana wawo ambadzibve kuti ni wotetezeka komasoti kuti akondewa. Koma imwepo azibereki mufunika kukumbukira kuti Yahova afunalini kuti mukhale wolemera kuti mukwanise kusamalira wana wanu. Azibereki omwe Yahova adawasankhula kuti asamalira mwana wake Yesu enze alibe kobiri zizinji koma ambaphata basa mwakhama kuti akwanise kumusamalira.—Mat. 13:55, 56; Luka 2:24.

Mpfundo za m’Baibolo: “Shuwadi, peno munthu asamaliralini wanthu omwe ni udindo wake kuwasamalira, makamaka wa m’banja yake, walamba chikhulupiriro ndipo ni woipa kuposha munthu yemwe atumikiralini Mulungu.”—1 Tim. 5:8.

Yahova abvesa kuti azibereki afunika kuthandiziwa akadzakalamba ndipo njira ibodzi yomwe wana alemekezera azibereki wawo, nkuyesesa kugumana vati adzawasamalirire akadzakalamba. (Eks. 20:12; 1 Tim. 5:4) Yahova akhala wokondwa maninge akawona azibereki omwe akhala na nkhawa na momwe angasamalirire wana wawo osati momwe wana wawo adzawasamalirire.—2 Akor. 12:14.

Thandizani wana wanu kupfunzira va Yahova. Azibereki anaudindo wothandiza wana wawo kukonda Yahova ndipo Yahova akhala wokondwa akawona azibereki ankupfunzisa wana wawo.—Deut. 6:6, 7.

Mpfundo za m’Baibolo: “Koma pitirizani kuwalera pakuwapasa malangizo na kuwapfunzisa mobverana na vomwe Yahova anena.”—Aef. 6:4.

YAHOVA AFUNA KUKUTHANDIZANI KULERA WANA WANU MULI WOKONDWA

Banja inkucheza nyumba ndipo Baibolo ili fungule pa meza. — Kambiranani kuwanda kwa wana omwe mukufuna kudzakhala nawo

Konzekerani va m’tsogolo. Peno munkufuna kukhala na wana ganizirani momwe vinthu viliri pa moyo wanu. Mwakulinganiza, ko imwepo mukadzakhala na wana azinji mudzakwanise kuwadyesa, kuwavazika na kuwapfunzisa? Peno ni vokwanisika kambiranani ninge banja ndipo ganizirani kuwanda kwa wana omwe mukufuna kudzakhala nawo. Mbakumbukirani kuti Yahova afuna kuti mumbasamalire mwana aliyese ninge momwe Yahova afunira. Yahova abvesa kuti ni nthawelini zose pomwe vinthu vichitika ninge momwe timbaganizirira. (Mla. 9:11) Iye adzadalise khama yanu yomwe muchita kuti mukhale azibereki wabwino.

Mpfundo za m’Baibolo: ‘Mapulani ya munthu wakhama yamuthandiza kuti vinthu vimufambire bwino, koma wose omwe achita vinthu mwagugu asauka’.—Miy. 21:5.

“Ni mbani wa imwepo yemwe akafuna kumanga nyumba ayambalini kukhala pasi nkuwerengera kobiri zomwe adzadzonge, kuti awone kuti peno anazo kobiri zokwanira zomalizira nyumba mwiyo?”—Luka 14:28.

Ikhani kutumikira Yahova pa malo yoyamba. Kutumikira Yahova kufunika kukhala chinthu choyamba pa banja panu. Peno imwepo munawana khalani na nthawe yothandiza wana wanu kukonda Yahova. Athandizeni kukhala tcheru pamisonkhano, mbachitani nawo pfunziro ya banja sondo iriyose ndipo apfunziseni kulalikira. Azibereki afunikalini kutenga udindo wawo wolela wana nkupasa mwana wawo nkulu panango azibale wawo kuti awalelere ndawa ni udindo wanu imwepo azibereki kuchita vimwivi. Pafunika nthawe komasoti khama kuti muthandize wana wanu. Mudzakhale wokondwa maninge kuona wana wanu akutumikira Yahova mokondwa.

Mpfundo za m’Baibolo: “Palibe chomwe chinikondweresa maninge kuposha kubva kuti wana wangu akupitiriza kufamba mu chonadi.”—3 Yoh. 4.b

Thembani Yahova. Peno munkuganiza vodzakhala na wana panango muli kale na wana, khalani wotsimikizira kuti vomwe Yahova afuna kwa imwepo ninge azibereki ni vofunika maninge kuposha kutewedzera vikhalidwe panango miyambo yakudera kwanu.

Mafoto: 1. Azibereki akhala pabodzi na mwana wawo kumisonkhano ndipo mwana muyo waimisa djanja kuti adawire. 2. Banja inkulalikira pabodzi. Baba ankubvesera mwatcheru pomwe mwana wake nkazi ankuyankhula ndipo mayi ali pabodzi na wana wake ang’onoang’ono. — Kupfunzisa wana kuti akhale paushamwali na Yahova kufuna nthawe na khama

Peno mwasankhula kukhala na wana ang’onong’ono dziwani kuti Yahova adzakusamalireni mukadzakalamba. Ayi kumbakhala na maganizo yakuti tifunika kukhala na wana azinji kuti adzatisamalire tikadzakalamba. Mufunikalini kukhala na nkhawa kuti mbani adzakusamalireni mukadzakalamba, Yahova wapolomisa kuti adzakusamalireni imwepo ndipo nthawe zose akwanirisa mapolomisi yake.—Yos. 23:14.

Mpfundo za m’Baibolo: ‘Umbakhulupirire Yahova na ntima wako wose, ndipo ayi kumbathemba buya yako yobvesa vinthu. Umbakumbukire m’njira zako zose, ndipo adzathamule njira zako.’—Miy. 3:5, 6.

‘Nenze mwana ndipo manje nakula, koma nikalibe nawonako munthu aliyese wolungama kusiyiwa, panango wana wake ankukumbira chakudya.’—Sal. 37:25.

“Ndipomwapa, nthawe zose mumbaikhe Ufumu na mpfundo zolungama za mawu ya Mulungu pa malo yakuyamba pa moyo wanu, ndipo iye adzakupaseni vinthu vinango vose vimwivi.”—Mat. 6:33.

Wana ni chuma chofunika maninge chomwe Yahova adapasa azibereki. Yahova akhala wokondwa akawona azibereki ankukwanirisa udindo wawo wosamalira bwino wana wawo. Iwo awathandiza wana wawo mwakuthupi na kuwathandiza kuti akhale paushamwali wolimba na Yahova. Kwa azibereki kutewedza mpfundo za Yahova ni kofunika maninge kuposha kutewedza miyambo yomwe wanthu wa kudera yawo adayazolowera kuchita. Ndawa yake asankhula mwanzeru wana omwe adzakhale nawo ndipo vimwivi viwathandiza kusamalira mwana aliyese. Kuchita vimwivi azibereki awonesa kuti akonda maninge wana wawo komasoti awawona kuti ‘ni chuma chapadera chochokera kwa Yahova.’

Iwo akondwa na vomwe adasankhula

Ko azibereki agumana na mabvuto akasankhula kukhala na wana ang’onong’ono? Azibereki omwe akhala m’madera yosauka adzibvunza mbvunzo muyu. Onani vomwe azibereki anango omwe akhala m’madera ya teneuyu adanena.

Ko anango adakuchichimizani kuti mukhale na wana azinji?

“Inde vichitikadi olo abale na alongo anango mumpingo angatichichimiza kuti tikhale na wana azinji. Banja inango idanena kuti ‘ndawa chani imwepo munamwana m’bodzi yekha? Kuno ku África, kukhala na mwana m’bodzi ukhala ninge ulibe mwana. Peno unawana awiri ukhala ninge unabodzi yekha basi.’ Patsogolo pake, tidakhala na mwana nkazi. Koma olo nteno ambapitiriza kuti mbvunza basi.”—Jeremias

Ko mudagumana na bvuto pa moyo wanu ndawa yosankhula kukhala na wana ang’onong’ono?

“Neye, ndawa yakuti tidasankhula kukhala na wana ang’onong’no ine na nkazi wangu tikwanisa kuwasamalira bwino wana wathu mwakuthupi komasoti kuwathandiza kuti akhale paushamwali wolimba na Yahova. Inepano nidakulira m’banja ya wana azinji ndipo nikukumbukira kuti venze voshupa kwa azibereki wangu kuti atipase vinthu vofunikira pa moyo wathu. Olo kugumana vinthu va kushikola venze voshupa.”—Jeremias

Ko wana wanu ankubva tani na vomwe mudasankhula?

“Azibereki omwe anawana azinji, nthawe zizinji akwanisalini kuwasamalira bwino wana wawo ndipo ndawa ya vimwivi wana mwawo abonera maninge. Koma wana wanthu akhala wokondwa ndawa alibe bvuto mwiyi.”—Filipe

“Wana wanthu ambakhala wokondwa maninge ndawa ambawona kuti enze otetezeka, timbawasamalira bwino komasoti timbawakonda. Nthawe zizinji timbachemera abale na alongo omwe akonda Yahova ndipo iwo ambatiwonesa chitsanzo chabwino komasoti ambatilimbikisa kuchita vizinji pa kutumikira Yahova. Ntsiku zino tikhala wokondwa tikawona wana wathu ankutewedzera chitsanzo chawo chabwino.”—Carlos

Ko ni maphindu yaponi yomwe banja igumana peno yasalula kukhala na wana ang’onong’ono?

“Venze vosashupa kusamalira banja yathu mwakuthupi ndawa yosankhula kukhala na wana ang’onong’ono. Nimbaphata basa yomwe nimbatambira kobiri zizinji. Koma patsogolo pake nidachosewa basa. Koma ndawa yakuti banja yathu yenze ing’ono tilibe kukhala na nkhawa maninge ndawa nimbafunikirarini kobiri zizinji kuti nikwanise kusamalira banja yangu. Vimwivi vidanithandiza kukhala na vomwe ninkufunikira olo pomwe basa yangu idamala.”—Jeremias

“Ndawa yokhala na wana ang’onong’ono tidakwanisa kuwasamalira mwakuthupi na kukhala na volinga votumikira Yahova. Ndawa yakuti tenze na wana ang’onong’ono venze vosashupa kubvesera aliyese payekha. Kuingizira mwapa, tenze na mwayi woyenda kukalalikira kudera komwe kumbafunika ofalisa azinji. Ntsiku zino wana wathu wose atumikira Yahova mokondwa ndipo anavolinga votumikira Yahova.”—Lenadi

Ko mungakonde kuwauza chani azibereki anango?

“Nakwanisa kuona kuti vomwe lemba ya Salimo 34:10b, inena ni chaivo. Lemba mwiyi inena kuti: ‘Koma wanthu omwe afagafaga Yahova adzasowelini vinthu vabwino’, ndawa iye watipasa vose”—Rafael

a Banja iriyose ifunika kukambirana kuti ni wana angasi omwe angafune kukhala nawo na nthawe yomwe adzakhale na wana. Komasoti peno angasankhule kuphatisa basa njira iriyose kuti ayi kuti atenge mimba, tifunikalini kuweruza banja mwiyi ndawa ya vosalula vawo. (Aro. 14:4, 10-13) Koma mwamuna na nkazi akambasankhula njira zimwizi, afunikalini kuphatisira basa njira zomwe zichosa mimba komasoti banja ikachita chosalula mwichi afunika kukumbukira malangizo yogumanika pa 1 Akorinto 7:3-5.

b Mu vesi mwiyi mawu yakuti wana ambanena va Akhrisitu omwe Yohani adawapfunzisa chonadi. Nayombo azibereki abvambo chibodzibodzi akambawona wana wawo akutumikira Yahova.