6-12 ABRIL, 2026
NYIMBO NA. 82 “Mumbawonese kugaka kwanu”
Ko tingathandize tani azibale wathu womwe ni Mbonilini kuti ayambembo kutumikira Yahova?
“Ayi kuti tisiye kuchita vabwino.”—AGAL. 6:9.
CHOLINGA
Tipfunzire momwe tingakhalire paushamwali wabwino na wachibale womwe ni Mbonilini na momwe tingawathandizire kukhala paushamwali na Yahova.
1-2. Ko nchani chomwe chidasokoneza ushamwali na azibale wanu?
YESU adauza mwamuna munango yemwe ambafuna kukhala wopfunzira wake kuti: “Yenda kumuyi kwa azibale wako ndipo ukawauze vose vomwe Yahova wakuchitira na chifundo chomwe wakuwonesa.” (Maliko 5:19) Yesu adafotokoza vimwivi ndawa ambadziwa kuti wanthu azinji akonda kuuza azibale wawo na azishamwali wawo va ntontholo wabwino.
2 Ko munkukumbukira momwe mudabvera pomwe mudayamba kupfunzira Baibolo? Panango mudakondwa maninge na kufuna kuuzambo wachibale wanu vose vomwe mwapfunzira. Panango wachibale wanu adakalipa maninge ndawa yakuti mwayamba kupfunzira Baibolo na wa Mboni za Yahova. Panango momwe mudayankhulira va chonadi cha m’Baibolo vidachitisa kuti muleke kubvana. Peno vimwivi vidakuchitikirani, nkhani mwaino ikuthandizeni kudziwa vomwe mungachite kuti mupitirize kukhala wokhulupirika kwa Yahova na kukhala paushamwali na wachibale wanu womwe ni Mbonilini.
3. Ko tipfunzire chani mu nkhani mwaino?
3 Mu nkhani mwaino tipfunzire vinthu vinayi vomwe vingatithandize kukhala paushamwali wabwino na wachibale wathu womwe ni Mbonilini. Choyamba tifunika kuwaonesa chifundo olo kuti aankufunalini kupfunzira va Yahova. Chachiwiri ni vomwe tingachite peno wachibale wathu watichitira vinthu vokwinyiririsa. Chachitatu ni kuwathandiza kukhala wodekha komasoti kukhala na chidikhiro chakuti adzatumikire Yahova kutsogolo. Ndipo chachinayi ni kuwaonesa chikondi.
KHALANI WACHIFUNDO
4. Ko Yesu ambachita chani na wanthu womwe ambawonesalini chidwi na ntontholo wake?
4 Yesu alibe kuleka kuthandiza wanthu womwe ambachitalini chidwi na ntontholo wabwino. Pa chitsanzo chinango, iye adadzilinganiza na mulimi yemwe aphatisa basa njira zosiyanasiyana kuti muti ubale vipaso. (Luka 13:6-9) Pomwe Yesu adafotokoza mawu mwaya, wenze adayesesa kale kuwathandiza Ayuda kuti ambamukhulupirire komasoti kuti akhale wopfunzira wake. Ndawa chani Yesu adapitiriza kuwathandiza? Ndawa yakuti iye ambawabvera chifundo wanthu mwawa ndipo vimwivi vimbamuthandiza kukhala wodekha pakuthandiza.
5. Ndawa chani Yesu ambawabvera ntsisi Ayuda?
5 Yesu ambabvera chifundo Ayuda ndawa yakuti ambadziwa kuti atsogoleri wachipembedzo alibe kuwathandiza kudziwa va Yahova. Kwa iye Ayuda mwawale enze ninge “nkhosa zomwe ziribe nyakabusa.” (Maliko 6:34) Yesu padasala pang’ono kufa, adalira padaona thaundi ya Yerusalemu ndawa yakuti iye ambadziwa kuti wanthu azinji womwe ambakhala thaundi mwaire adzafe ndawa yakuti ambakhulupiriralini Yahova. (Luka 19:41-44) Molingana na vimwivi, peno tibvera ntsisi azibale wathu ndawa ya mabvuto yomwe ankugumana nayo, tidzafunisise kuwathandiza.
6. Ndawa chani tifunika kukhala wodekha na azibale wathu womwe ni Mbonilini? (Agalatiya 6:9)
6 Werengani Agalatiya 6:9. Olo kuti wachibale wathu akalibe awonesa chidwi na vomwe tikhulupirira, tifunika kupitiriza kukhala wodekha ‘na kuwathandiza.’ Tose isepano tidziwa kuti vitenga nthawe kuti munthu achinje. Panango imwepombo kalekale “mumbakhulupiriralini Yahova.” (Aef. 2:12) Munthu munango adakuthandizani kuti muyambe kupfunzira va Yahova. Kuganizira vimwivi, kungakulimbikiseni imwepo kuthandiza wachibale wanu kupfunzira va Yahova.
VOMWE MUFUNIKA KUCHITA PENO WACHIBALE WANU WAKUYANKHULIRANI MAWU YOKWINYIRIRISA
7. Ko nchani chomwe chimbakangisa azibale wale wa Yesu kukhala wopfunzira wake?
7 Ni vochita kuonekeratu kuti azibale wake wa Yesu adabva vodabwisa vomwe Yesu adachita ku Galileya. (Luka 4:14, 22-24) Koma kumayambiriro iwo ambamukhulupiriralini. (Yoh. 7:5) Ndawa chani? Baibolo inenalini. Koma Baibolo ifotokoza ndawa yake Ayuda anango alibe kumukhulupirira Yesu. Anango enze na mantha kuti angadzudziwe na wachibale wawo peno angamukhulupirire Yesu. (Yoh. 9:18-22) Anango adaona Yesu pomwe ambakula. Ndipomwapa, venze voshupa kuti akhulupirire kuti Yesu ni mwana wa Mulungu. (Maliko 6:1-4) Panango azibale wake wa Yesu ambaganizambo teneuyu. Vingachitikembo kuti wachibale wanu ankufunalini kubvesera ntontholo wabwino ndawa yakuti anamantha kuti angatsutsiwe panango ndawa yakuti imwepo adakuwonani pamumbakula.
8. Ko nchani chomwe chingachitise azibale wathu kuyankhula na kuchita vinthu voipa?
8 Ganizirani ndawa yake wachibale wanu ayankhula vinthu vokwinyiririsa na kuchita vinthu voipa. Azibale wake wa Yesu enze mugulu ya wanthu womwe ambanena Yesu kuti “wafuntha.” (Maliko 3:21) Ndawa chani iwo ambaganiza teneuyu? Panango azibale wa Yesu ambaganiza kuti iye ambachita vinthu monyanyira ndawa yakuti ambamala nthawe ikulu ankulalikira ndipo ambachita kusowa mpata kuti adye. (Maliko 3:20) Wachibale wathu angambaganizembo kuti tichita vinthu monyanyira ndawa yakuti tikhala wotangwanika maninge pakutumikira Yahova. Peno ationa teno, tifunika kumbawaonesa kuti tichitalini vinthu monyanyira na vomwe tiyankhula komasoti na vomwe tichita.
9. Ko nchani chingathandize azibale wathu kuchinja maganizo yawo pa nkhani ya momwe awonera wa Mboni za Yahova? (1 Petulo 3:1, 2) (Onani pomwe mafoto.)
9 Pitirizani kukhala wachifundo. Tikambachita vinthu mokoma ntima na wachibale wathu, iwo angachinje maganizo yawo na momwe awonera Mboni za Yahova. (Werengani 1 Petulo 3:1, 2.) Kazinjikazinji mwamuna yemwe ni Mbonilini akhala wokwinyirira maninge akaona kuti nkazi wake akuyenda kumisonkhano na kulalikira. Nkazi yemwe akonda Yahova, angafunelini kuti mwamuna wake ambabve teneuyu. Ndipomwapa, iye angachinje ndandanda yake kuti ambakhale na nthawe ikulu ankucheza na mwamuna wake. Mwakulinganiza, iye angayende kukalalikira nthawe yomwe mwamuna wake ni wopanikizika panango pa nthawe yomwe mwamuna wake alilini pamuyi. Peno mulongo angasaine kuchinja ndandanda yake kuti akondwerese mwamuna wake, iye angathandize pomwe mwamuna wake kuchinja maganizo yake na momwe awonera Mboni za Yahova.
Makhalidwe yathu yangachitise kuchinja mwamuna panango nkazi yemwe ni wosakhulupirira momwe awonera wa Mboni za Yahova (Onani ndime 9)g
10. Ko tingatewedzere tani Yesu peno tinkutsutsiwa?
10 Pomwe wachibale wanu ankukutsutsani, mufunikalini kuwadawira nthawe mwiyoletu. Pomwe wanthu anganena kuti Yesu akudya maninge komasoti kumwa maninge vinyu, iye alibe kukwinyirira navo. M’malo mwa vimwivi, iye ambafuna kuti wanthu awone okha kuti vomwe adabva pakunena va iye venzedi chaivo panango neye. (Mat. 11:19) Iye adaonesa mu vochita vake kuti ambachitalini vinthu monyanyira. (Onani pomwe Yohani 2:2, 6-10.) Ninge Yesu, peno wanthu ankutinenera vinthu voipa, ni nthawelini zose pomwe tifunika kuwadawira. M’malo mwa vimwivi tingawonese mu vochita vathu kuti tichitalini vinthu monyanyira komasoti kuti ndise okondwa. Chitsanzo chanu chingawathandize kuzindikira kuti vinthu voipa vomwe adabva vonena Mboni za Yahova ni chaivolini.
KHALANI WODEKHA
11. Ko Yesu adachita tani vinthu na azibale wake?
11 Baibolo iwonesa kuti Yesu ambakhala wodekha na wachibale wake. Mwakulinganiza, vinkuonesa kuti iwo enzepo pa nthawe yomwe Yesu adachita chodabwisa choyambirira ku Kana. (Yoh. 2:11, 12) Olo nteno, azibale wake wa Yesu alibe kumukhulupirira. Koma Yesu adapitiriza kuwasamalira olo kuti ambamukhulupiriralini. Ndipo Baibolo iwonesa kuti payadapita magole yatatu kuchokera pomwe Yesu adachita chodabwisa ku Kana, iye adapitiriza kuchitira chifundo azibale wake.—Yoh. 7:5-8.
12. Ko nchani chomwe chingatithandize kukhala na chidikhiro chakuti ntsiku inango azibale wathu adzakhale wa Mboni za Yahova?
12 Isepano tidziwa kuti Yahova ni wachifundo. Kukumbukira vimwivi kudzatithandize kuti tikhale na chidikhiro chakuti wachibale wathu womwe ni Mbonilini angadzakhale paushamwali na Yahova. Chipembedzo chabodza chikadzadzongewa panango azibale wathu angadzakumbukire kuti tidawauzako vimwivi kuti vidzachitike. b (Chiv. 17:16) Vingachitike kuti iwo adzasalule kutumikira Yahova pabodzi na isepano chisautso chikulu chikadzayamba. Koma olo kuti nthawe mwiyo ikalibe yafika, tingawathandize azibale wathu womwe atumikilalini Yahova pomwe ankugumana na mabvuto. Wachibale wathu akazindikira kuti tiwakonda, angayambe kupfunzira Baibolo.
WONESANI CHIKONDI
13. Ko tifunika kuwaonesa chani azibale wathu?
13 Ni shuwadi kuti titangwanika na basa ya Yahova. Koma tinkufunalini kuti wachibale wathu ambawone kuti tilibe nthawe yocheza nawo komasoti kuti tiwakondalini. (Mat. 7:12) Ko tingawonese tani kuti tiwaganizira? Naboni tione njira zinango.
14-15. Ko tingaonese tani kuti tiwakonda azibale wathu womwe ni Mbonilini? Perekani chitsanzo.
14 Mbayankhulani nawo nthawe zose na kuwaonesa chikondi. Njira ibodzi yomwe tingawonesere kuti tiwakonda wachibale wathu womwe ni Mbonilini, nkumbayankhula nawo pafupipafupi. Mwakulinganiza, tingawatumizire mesaje, mafoto yomwe tidachoka na azishamwali wathu, kuwanembera kakalata na kuwapasa ka mphaso. Tikambachita vose vimwivi, wachibale wathu womwe ni Mbonilini adzawone kuti tiwakonda.
15 Onani chitsanzo cha mulongo munango waku Armênia dzina yake Anna. Azibale wake amala nthawe ikulu alipabodzi, makamaka pa ntsiku ya maphwando. Pomwe Anna adakhala wa Mboni za Yahova azibale wake enze na nkhawa kuti ushamwali wawo uchinje. Iwo ambakhala pomwe na nkhawa kuti akakhala wa Mboni za Yahova moyo wake udzakhale woshupa maninge. Ko Anna achita tani kuti azibale wake ambakhale wokondwa? Iye adati: “Nikambazungira azibale wangu niwafotokozera va moyo wangu komasoti na vose vomwe nikuchita. Niwachemerera pomwe kumuyi kwangu, ndipo niwaonesa pomwe azishamwali wangu. Ndawa ya vimwivi, azibale wangu akhala obverana na azishamwali wangu womwe nicheza nawo. Wachibale wangu aniona kuti nikhala wokondwa maninge ndipo iwo akhalalini pomwe na nkhawa na inepano.”
16. Ko Yesu adaonesa tani kuti ambamuganizira m’bale wake Yakobo? (Onani pomwe mawu ya m’nyantsi.)
16 Wonesani kuti muwaganizira. Pomwe Yesu adamukisiwa, adawonesa kuti ambamukonda Yakobo ndipo adayamba kucheza naye. (1 Akor. 15:7) Vinkuchita kuonekeratu kuti Yakobo adakondwa maninge pomwe adazindikira kuti Yesu alibe kusiya kumukonda. Ni panthawe mwiyiretu pomwe Yakobo adatsimikizira kuti Yesu ni Mesiya. Pomwe Yakobo adamaliza kucheza na Yesu, adayenda kwa azibale wake kukawathandiza kuti atsimikizire kuti Yesu ni Mesiya. c—Mac. 1:14.
17. Ko tingaphatise tani basa lemba ya Aroma 12:15? (Onani pomwe foto.)
17 Werengani Aroma 12:15. Nthawe zose tikambakhala na wachibale wathu olo pa nthawe ya mabvuto, tingawathandize kuchinja kaganizidwe kawo mobverana na momwe awonera wa Mboni za Yahova.d Mwakulinganiza wachibale wathu akakhala na kacheche, tingamutembeje na kumupasa mphaso kuonesa kuti tinkukondwa naye. Peno m’bale wathu waferewa, tingamunembere kakalata kolimbikisa na kumupasa thandizo yomwe ankufunikira. Ndipo ayi kuti timbayebwe kuwafonera, kuwanembera mesaje, kuwazungira nthawe zose makamaka pa nthawe yomwe ankugumana na mabvuto.
Mukambakhala pabodzi na azibale wanu pa nthawe yomwe ankufunikira thandizo, angachinje momwe iwo awonera wa Mboni za Yahova na momwe awonera vinthu vomwe tikhulupirira (Onani ndime 17)h
18. Ko tingatewedzere tani Andireya?
18 Adziwikiseni wachibale wanu kwa abale na alongo wa mumpingo. Pomwe Andireya adazindikira kuti Yesu ni Mesiya, adayenda kwa m’bale wake Petulo nkumuuza kuti akagumane na Yesu. (Yoh. 1:40-42) Ko imwepo mungachitembo chibodzibodzi na wachibale wanu? Mwakulinganiza mungawachemerere kumisonkhano yathu na kudya nawo pabodzi. Wachibale wathu akawadziwa bwino wa Mboni za Yahova, adzazindikire kuti ni wanthu wabwino maninge.
19. Olo kuti azibale wathu abvesalini vomwe tikhulupirira, ko tifunika timbachite nayo tani vinthu? (1 Petulo 3:15)
19 Werengani 1 Petulo 3:15. Nthawe zinango azibale wathu angabveselini kuti ndawa chani tichitalini vinthu vinango. Koma tikufuna kuti nthawe zose azibale wathu ambadziwe kuti tiwachitira vinthu mwachifundo na mwaulemu. Olo kuti tichitanawolini maphwando panango miyambo, iwo angambakodwe tikakhala kuti tinkuyesesa kucheza nawo. Mwakulinganiza, tingambawazungire, kudya nawo pabodzi na kuwapasa mphaso nthawe zinango.
PITIRIZANI KUKHALA NA CHIDIKHIRO CHAKUTI NTSIKU INANGO WACHIBALE WANU ADZAYAMBE KUTUMIKIRA
20. Ndawa chani chitsanzo cha Yakobo chitilimbikisa?
20 Pomwe Yesu wenze padziko yapasi Yakobo alibe kukhala nteweri wa Yesu. Patsogolo pake adakhala opfunzira ndipo adayamba kuona kuti vomwe Yesu ambapfunzisa ni vofunika maninge. (Agal. 1:18, 19; 2:9) Mwakulinganiza, iye adanemba kalata yoyenda kwa Akhrisitu ndipo adatomola mpfundo zolingana na zomwe Yesu ambapfunzisa.e
21. Ndawa chani tifunika kuwaonesa chikondi azibale wathu womwe ni Mbonilini?
21 Olo kuti tayesesa kukhala wokoma ntima kwa azibale wathu na kuwaonesa kuti tiwaganizira, panango angapitirize basi kutichitira vinthu voipa nkuleka kufuna kupfunzira va Yahova. Koma ko ndawa chani tifunika kupitiriza kuwachitira chifundo? Ni ndawa yakuti tikakhala kuti tinkuwawonesa chifundo, tikhala kuti tinkutewedzera Mulungu wathu wachifundo na mwana wake Yesu. (Luka 6:33, 36) Peno tingapitirize kuwaonesa chikondi, kuyenda kwa nthawe angachinje momwe awonera wa Mboni za Yahova. Ndipo iwo angambakumbukire vinthu va Yahova vomwe tidawapfunzisa. Peno tingapitirize kuthandiza azibale wathu na kupitiriza kuwachitira chifundo, angasalule kutumikira nase pabodzi Yahova ndipo vimwivi vingatichitise kukhala wokondwa.
NYIMBO NA. 60 Akabvera adzapulumuke
a DZIWANI IVI: Mu Baibolo mawu yakuti: “wosakhulupirira” yangatanthauze munthu yemwe alibe chipembedzo panango yemwe akhulupiriralini Mulungu. (1 Akor. 7:12) Mupfunziro mwiyi mawu yakuti wosakhulupirira yatanthauza munthu yemwe ni Mbonilini.
b Onani nkhani yakuti: “Ko nchani chomwe tinkudziwa pa chiweruzo chomwe Yahova adzapereke kutsogolo?” mu Ntsanja ya Ulonda ya Maio 2024, tsa. 11, ndi. 11-13.
c Yakobo na Yuda adakhala Akhrisitu patsogolo pakuti Yesu wafa na kumukisiwa.
d Onani bokosi yakuti: “Ko nifunika kuyenda ku ukwati panango kumaliro kwa azibale womwe ni Mbonilini?”
f Kuti muone mpfundo zinango pakunena va nkhani mwiyi, onani “mibvunzo yochokera kwa owerenga mu Ntsanja ya Ulonda ya Maio 15, 2002, na Novembro 15, 2007.
g MAWU YOFOTOKOZERA FOTO: Mulongo ankukondwa pomwe ankukonzera chakudya mwamuna wake akalibe wayenda mu umboni.
h MAWU YOFOTOKOZERA FOTO: Mulongo m’bodzibodzi muyu wapatula nthawe kuti ayende akazungire apongozi wake womwe ni Mbonilini.