2-8 MARÇO, 2026
NYIMBO NA. 97 Mawu ya Mulungu yachatithandiza kukhala na moyo
Pitirizani kulimbisa ushamwali wanu na Yahova
LEMBA YA GOLE YA 2026: “Wokondwa ni wanthu womwe azindikira kuti afunika kutsogolerewa na Mulungu.”—MAT. 5:3.
CHOLINGA
Tione vomwe tifunika kuchita kuti tipitirize kubvuma kuti Yahova atitsogolere kuti tikhale wokondwa.
1. Ko ni vinthu viponi vomwe wanthu afunikira? (Mateyu 5:3)
YAHOVA adziwa vomwe wanthu afunikira. Mwakulinganiza, tifunikira chakudya, vovala na malo yabwino yokhala. Peno tilibe vinthu ninge mwivi, moyo ungakhale woshupa maninge. Yahova adziwa kuti pali vinthu vinango vomwe wanthu afunikira. Iye adatilenga m’njira yakuti timbakwanise kumuthemba na kutsimikizira kuti atitsogolere. (Werengani Mateyu 5:3.) Kuti tikhale wokondwa tifunika kukhala paushamwali na iye na kumukhulupirira.
2. Ko mungafotokoze tani tanthauzo ya munthu yemwe “arilini pa ushamwali wolimba na Yahova”?
2 Ko kuzindikira kuti tifunika “kutsogolerewa na Mulungu” kutanthauza chani? Mawu mwaya nthawe zinango ayamasulira kuti ni munthu yemwe azindikira kuti alirini paushamwali na Yahova. Ganizirani va munthu wosauka maninge yemwe ni ofoka ndawa yakuti alibe chakudya. Ndipo wanthu amulambalara ndawa ya momwe ankuwonekera. Iye masikati abonera na dzuwa komasoti usiku abonera na mphepo. Iye adziwa kuti vinthu kuti vichinje pa moyo wake afunika thandizo ya anango. Mwanjira ibodzibodzi mwiyi, munthu yemwe wazindikira kuti alilini paushamwali na Yahova, afunika thandizo kuti akonze vinthu pa moyo wake. Ndipomwapa, iye afunisisa kugumanirapo mwayi pa vose vomwe Yahova apereka kwa wanthu omwe amukonda.
3. Ko tipfunzire chani mu nkhani mweino?
3 Mu pfunziro mwaino, choyamba tiwone vomwe tingapfunzire kwa nkazi waku Foinike yemwe adakumbira thandizo kwa Yesu. Nkhani mwiyi inkuwonesa makhalidwe yatatu yomwe tifunika kukhala nayo peno tazindikira kuti ushamwali wathu na Yahova ulilini bwino. Patsogolo pake tikambirane va Petulo, Paulo na Davide omwe enze paushamwali olimba na Yahova.
CHITSANZO CHA KUDZICHEPETSA, KHAMA NA CHIKHULUPIRIRO
4. Ko ndawa chani nkazi waku Foinike adayenda kwa Yesu?
4 Ntsiku inango nkazi waku Foinike adayenda kwa Yesu, ndawa yakuti mwana wake nkazi wenze na “chiwanda ndipo chimbamuboneresa maninge.” (Mat. 15:21-28) Nkazi muyo adagwada nkukumbira thandizo kwa Yesu. Naboni tione makhalidwe yatatu yomwe nkazi muyo adayawonesa na momwe tingamutewedzerere.
5. Ko Yesu adamuchitira chani nkazi waku Foinike? (Onani pomwe foto.)
5 Nkazi waku Foinike adawonesa kudzichepesa. Ndawa chani tinkunena tene? Ndawa yakuti iye alibe kukwinyirira na vomwe Yesu adayankhula. Yesu adamulinganiza na kambwaya, chomwe chenze chipfuwo chodziwika maninge kwa wanthu omwe enzelini Ayuda. Ko mudakakhala kuti ni imwepo mudakachita chani? Ko mudakakwinyirira nkusiya kukumbira thandizo kwa Yesu? Ni vimwivi lini vomwe nkazi waku Foinike adachita. Iye alibe kundowonesa kudzichepesa koma adawonesa pomwe khama. Ndipo adapitiriza kukumbira Yesu kuti amuthandize. Ndawa chani? Ndawa ya chikhulupiriro chomwe wenze nacho kwa Yesu. Ndipo Yesu adachita chidwi na chikhulupiriro chomwe nkazi muyo wenze nacho. Ndipomwapa, adamuchitira chinthu chodabwisa maninge. Iye wenze wandonena chamanjemanje kuti: “Ine niribe kutumiziwa kwa wanthu anango koma kwa nkhosa zosokera za m’nyumba ya Izirayeli.” Olo nteno, Yesu adasankhula kuchita vomwe nkazi ule adamukumbira. Iye adachosa chiwanda chomwe chimbaboneresa mwana wake.
Nkazi yemwe ambafuna kuti Yesu amuthandizire mwana wake wenze wodzichepesa, iye adalimbikira kukumbira thandizo ndipo wenze na chikhulupiriro chakuti Yesu amuthandize (Onani ndime 5)
6. Ko tinkupfunzira chani na chitsanzo cha nkazi waku Foinike?
6 Kuti tilimbise ushamwali wathu na Yahova tinkufunikambo kukhala na makhalidwe ninge mwaya. Tifunika kukhala wodzichepesa, wakhama na chikhulupiriro cholimba. Ni munthu wodzichepesa yekha yemwe akhala na khama yokumbira thandizo kwa Mulungu. Tifunika pomwe kukhala na chikhulupiriro cholimba kwa Yesu na kuthemba wanthu omwe ankuwaphatisa basa kutsogolera gulu yake. (Mat. 24:45-47) Tikambawonesa makhalidwe mwaya, Yahova na Yesu adzakhale wokondwa. Ndipo adzatithandize kuti tikhale paushamwali wolimba na iwo. (Onani pomwe Yakobo 1:5-7.) Manje naboni tione vomwe Yahova watipasa kuti tikhale paushamwali wolimba na iye. Tione pomwe vomwe tingapfunzire kwa Petulo, Paulo na Mpfumu Davide.
NINGE PETULO PITIRIZANI KULIMBISA USHAMWALI WANU NA YAHOVA
7. Ko Yesu adamuuza chani Petulo ndipo ko Petulo ambafunika kuchita chani? (Aheberi 5:14–6:1)
7 Onani chitsanzo cha ntumi Petulo, iye wenze mu Yuda woyambirira kudziwa kuti Yesu wenze Mesiya yemwe Yahova adamuphatisa basa kuti apfunzise wanthu wake kuti “adzagumane moyo wosapera.” (Yoh. 6:66-68) Yesu akalibe kuyenda kudzulu, adauza Petulo kuti: “Dyesa wana wangu wankhosa.” (Yoh. 21:17) Petulo adaphata basa mwiyi mokhulupirika maninge ndipo Yahova adamuphatisa basa kunemba makalata yawiri yomwe patsogolo pake yadadzakhala mbali ya m’Baibolo. Olo teno, Petulo ambafunika kulimbisa ushamwali wake na Yahova. Mwakulinganiza, iye ambapfunzira makalata yomwe ntumi Paulo adanemba ndipo Petulo adazindikira kuti vinthu vinango vomwe Paulo adanemba “venze voshupa kuvibvesa.” (2 Pet. 3:15, 16) Koma olo teno, iye adapitiriza kupfunzira. Iye wenze na chikhulupiriro chakuti Yahova amuthandize kubvesa na kuphatisa basa “chakudya chotampfuna” chomwe Paulo adauziriwa kuti anembe makalata yake.—Werengani Aheberi 5:14–6:1.
8. Ko Petulo adachita chani pomwe adatambira malangizo yanyowani kuchokera kwa mngelo wa Yahova?
8 Petulo adawonesa kuti ambakhulupirira Yahova ndawa yakuti ambabvera malangizo yomwe ambapasiwa. Mwakulinganiza, pomwe wenze mu thaundi ya Yopa, adawona masomphenya. Ndipo m’masomphenya mwayo, Petulo adawona mngelo. Pamwapo mngelo muyo adauza Petulo kuti aphe na kudya nyama zopsyipiziwa mobverana na Chilamulo cha Mose. Kwa Ayuda malangizo ninge mwaya yenze wodabwisa. Ndipomwapa, pakuyamba Petulo adadawira kuti: “Neye Ambuya inepano nikanati nadyako chinthu chilichose chopsyipiziwa na chonyantsa.” Mngelo adati: “Vinthu vomwe Mulungu wavichenesa ulekeretu kunena kuti ni vopsyipiziwa”. (Mac. 10:9-15) Petulo adabvesa vomwe Yahova ambafuna ndipo adachinja kaganizidwe kake. Ko tikudziwa tani vimwivi? Pomwe Petulo adandowona masomphenya mwaya, amuna atatu omwe enze adatumiziwa na munthu yemwe wenzelini mu Yuda dzina yake Koneliyo, adamuchemera Petulo kuti ayende kumuyi kwa Koneliyo. Ayuda ambawona kuti wanthu wamakhaindi yanango yenze wopsyipiziwa. Sembe kuti alibe kuwona masomphenya mwaya, Petulo adakabvumalini kuti ayende kunyumba kwa mwamuna muyu. (Mac. 10:28, 29) Koma nthawe mwiyoletu Petulo adatewedza malangizo yomwe Yahova adamupasa. (Miy. 4:18) Iye adalalikira Koneliyo na wanthu wose omwe enze munyumba mwake ndipo Petulo adakondwa kuona kuti wanthu wose adziwa chonadi na kubatizika.—Mac. 10:44-48.
9. Ko ni maphindu yawiri yaponi yomwe tingakhale nayo tikambapfunzira vinthu vomwe vingakhale voshupa kuvibvesa?
9 Ninge Petulo, tinkufunika kuwerenga Baibolo ntsiku zose kuti tikhale paushamwali wolimba na Yahova. Tifunika pomwe kukhala na chifuno chopfunzira nkhani zomwe zingakhale zoshupa kuzibvesa. Tifunika kukhala na nthawe yopfunzira mawu ya Mulungu na kuyabvesa bwinobwino. Ndawa chani? ndawa ya vifukwa viwiri ivi: Choyamba, tidzapfunzire vinthu vomwe vingatithandize kupitiriza kukonda Yahova na kumulemekeza ndipo chachiwiri tidzakhale na chifuno chopfunzisa wanthu anango va Yahova. (Aro. 11:33; Chiv. 4:11) Chitsanzo cha Petulo chikutipfunzisa pomwe chinthu chinango. Kabvekesedwe ka mpfundo za m’Baibolo zikachinja, tifunikambo kuchinja mwakankulumize kaganizidwe kathu. Tikachita nteno, tidzapitirize kukhala paushamwali wolimba na Yahova ndipo adzapitirize kutiphatisira basa.
NINGE PAULO PITIRIZANI KUONESA MAKHALIDWE YOMWE YAKONDWERESA MULUNGU
10. Mobverana na Akolose 3:8-10 ko tifunika kuchita chani kuti tikondwerese Yahova?
10 Kuti tipitirize kukondweresa Yahova, tifunika kuvala umunthu unyowani. Mwanjira yanyi? Ntumi Paulo adanemba kuti: “Vulani umunthu wakalekale” ndipo “muvale umunthu unyowani.” (Werengani Akolose 3:8-10.) Kuchita vimwivi kufunika nthawe na khama. Ganizirani chitsanzo cha Paulo. Iye pomwe wenze mulumbwana ambachita khama kuti ambakondwerese Yahova. (Agal. 1:14; Afil. 3:4, 5) Iye ambabvesalini vomwe Mulungu ambafuna. Kuingizira mwapa, Paulo wenze wodzikuza ndipo vimwivi vidamuchitisa kukhala munthu wa makhalidwe yoipa.—1 Tim. 1:13.
11. Ko Paulo ambafunika kuchinja vinthu viponi? Fotokozani.
11 Akalibe kukhala Khrisitu, Paulo ambakalipa mwankakulumize. Nkhani inango ya mu bukhu ya Machitidwe iwonesa kuti Paulo ambawazonda maninge opfunzira wa Yesu. Ndipo “ambawagopsya na kufunisisa kuwapha”. (Mac. 9:1) Patsogolo pakuti wakhala Khrisitu, Paulo adayesesa kusiya umunthu wakale na kuvala umunthu unyowani. (Aef. 4:22, 31) Olo teno, pomwe adasiyana maganizo na Baranaba adagegedzana maninge. (Mac. 15:37-39) Vimwivi vidakamuchitisa Paulo kuti afoke, koma iye adapitiriza kukhala wokhulupirika. Paulo adapitiriza kuchita vinthu vabwino kuti apitiriza kukhala paushamwali wolimba na Yahova.—1 Akor. 9:27.
12. Ko nchani chidathandiza Paulo kupitiriza kuchinja makhalidwe yake?
12 Paulo adakwanisa kuchinja makhalidwe yomwe wenze nayo kalekale, ndawa yakuti wenze wodzichepesa komasoti ambadzidaliralini. (Afil. 4:13) Ninge Petulo, Paulo ambathemba “mphanvu zomwe Mulungu apereka.” (1 Pet. 4:11) Olo nteno, nthawe zinango ambadziona kuti alibe na basa. Akakhala kuti ni wokwinyirira, Paulo ambakumbukira vinthu vabwino vomwe Yahova ambamuchitira. Vimwevi vidamuthandiza kuti apitirize kuchinja kuti akondwerese Yahova.—Aro. 7:21-25.
13. Ko tingamutewedzere tani Paulo?
13 Isembo tingatewedzere Paulo, pakuzindikira kuti vilibe basa nthawe itali yomwe takhala tikutumikira Yahova. Tifunika kupitiriza kukhala na makhalidwe yomwe yakondweresa Yahova. Vimwevi vinkuphatanidzapo kuvula umunthu wakale na kuvala umunthu unyowani. Peno taonesa khalidwe yoipa ninge kukalipa panango kuyankhulira munthu vinthu voipa, tifunikanalini kudziona kuti tilibe na basa. M’malo mwa vimwevi, tifunika kupitiriza kuyesesa kuchinja maganizo yathu na vochita vathu. (Aro. 12:1, 2; Aef. 4:24) Koma tifunika kukumbukira mpfundo yofunika maninge iyi: Kuti tipitirize kukhala na makhalidwe yabwino, tifunika kupitiriza kubvuma kuti Yahova atipfunzise na kumudziwa bwino.
TEWEDZERANI DAVIDE NDIPO BVUMANI KUTI YAHOVA AKUTETEZENI
14-15. Ko ni njira ziponi zomwe Yahova atetezera atumiki wake? (Salimo 27:5) (Onani pomwe ya pakhava.)
14 Kuti tikhale wokondwa tifunikira pomwe kuti Yahova atiteteze. Ni mwanjira yanyi momwe Yahova atitetezera? Ko tingaonese tani kuti tibvuma kuti Yahova atiteteze?
15 Mpfumu Davide ambakhulupirira kuti Yahova adzamuteteze pa nthawe yoshupa (Werengani Salimo 27:5.) Yahova ateteza atumiki wake ku chinthu chilichose chomwe chingadzonge chikhulupiriro chawo. Iye watipolomisa kuti olo wanthu atilambize kumutumikira, iye adzatiteteze. (Sal. 34:7; Yes. 54:17) Olo kuti Satana na viwanda vake anamphanvu, koma Yahova anamphanvu koposha iwo. Olo kuti iwo anamphanvu yakutipha, koma Yahova anamphanvu yotimusa pomwe. (1 Akor. 15:55-57; Chiv. 21:3, 4) Yahova atithandiza pomwe kulimbana na nkhawa zomwe zidakatichitisa kusiya kutumikira iye. (Miy. 12:25; Mat. 6:27-29) Ndipo Yahova atipasa abale na alongo wathu kuti atithandize na akulu kuti atitsogolere. (Yes. 32:1, 2) Tikambagumanika pamisonkhano, tipfunzira njira zinango zomwe zingatithandize kuti Yahova apitirize kutiteteza.—Aheb. 10:24, 25.
Mulongo ankufuna kuteteza ushamwali wake na Yahova ndipo ankugumanika pamisonkhano pabodzi na abale na alongo. (Onani ndime 14-15)
16. Ko Yahova adamuteteza tani Davide?
16 Vikakhala kuti Davide ankubvera, Yahova ambamuteteza na kumuthandiza kusalula vinthu mwanzeru. Ndipo vimwevi vimbamuchitisa Davide kukhala wokondwa. (Onani pomwe Miyambo 5:1, 2.) Davide akakhala kuti ankubveralini Yahova, vinthu vimbamufambiralini bwino ndipo Yahova ambamutetezalini. (2 Sam. 12:9, 10) Pa nthawe inango Davide adabonera ndawa ya vophonya va anango. Pomwe vimwevi vidachitika, iye adapemphera kwa Yahova kuti amuthandize. Ndipo Yahova ambamuthandiza na kumutsimikizira kuti amukonda maninge.—Sal. 23:1-6.
17. Ko tingatewedzere tani Davide?
17 Tingatewedzere chitsanzo cha Davide, tikambakumbira Yahova tikalibe kuchita chosalula. Nthawe zinango tigumana na mabvuto osati ndawa Yahova wasiya kutiteteza koma ndawa ya vosalula vathu. (Agal. 6:7, 8) Ndipo tikambabonera ndawa ya vochitika va anango, tifunika kupemphera kwa Yahova na kutsimikizira kuti Yahova atithandize.—Afil. 4:6, 7.
PITIRIZANI KUTHEMBA YAHOVA YEMWE AKUTSOGOLERANI
18. Ko wanthu azinji aona tani malangizo yochokera kwa Mulungu, ndipo tifunika kuchita chani kuti Yahova apitirize kutitsogolera? (Onani pomwe mafoto.)
18 Lemba ya gole ya 2026 ni yakuti: “Wokondwa ni wanthu womwe azindikira kuti afunika kutsogolerewa na Mulungu.” Ni vabwino maninge ntsiku zino kuchita vomwe Yesu adanena na kuthemba Yahova kuti atitsogolere. Ndawa chani? Ndawa yakuti wanthu azinji abvumalini kuti Mulungu awatsogolere. Anango amudziwa Mulungu koma amutumikira munjira yophonyeka. Ndipo anango athemba malangizo ya wanthu. Vimwivi viwachitisa kuti aleke kukhala okondwa. Ndipo isepano tifunikanalini kuwatewedzera wanthu mwawa. Manje tifunikana kuchita chani kuti tipitirize kuthemba Yahova? Tifunika kupitiriza kupfunzira mawu ya Yahova, nkupitiriza kuonesa makhalidwe yomwe Yahova akomedzewa nawo na kubvuma kuti Yahova atiteteze.
Tifunika kupitiriza kupfunzira va Yahova, kuonesa makhalidwe yomwe yamukodweresa na kubvuma kuti iye atiteteze (Onani ndime 18)a
NYIMBO NA. 162 Tifunika kutsogolerewa na Mulungu
a MAWU YOFOTOKOZERA FOTO YA: Mulongo wa pafoto yoyamba ile, ankupfunzira Ntsanja ya ulonda kuti alimbise ushamwali wake na Yahova, ankuwonesa chifundo kwa wanthu anango ndipo ankubvuma kulimbikisiwa na akulu.