Momwe mpingo ungatewenzerere Yahova pa kuchita vinthu na wanthu omwe achita chimo ikulu

1. Ko Yahova afuna kuti wanthu wose achite chani?

YAHOVA adalenga wanthu na ufulu wosalula vochita. Imwepo muphatisa basa ufulu moyu nthawe zose mukambasalula vochita. Chosalula chikulu chomwe munthu angachite ni kudzipereka kwa Yahova na kukhala mgulu ya wanthu wake omwe amutumikira. Yahova ankufuna kuti wose achite vimwevi. Ko ndawa chani? Ndawa yakuti iye akonda wanthu ndipo awafunira vabwino. Iye ankufuna kuti iwo akhale naye pa ushamwali ndipo akhale na moyo mpakana kalekale.—Deut. 30:19, 20; Agal. 6:7, 8.

2. Ko Yahova abvatani na munthu yemwe ankuchita machimo koma ankulapalini? (1 Yohani 2:1)

² Koma Yahova achichimizalini munthu kuti amutumikire. Iye abvuma kuti munthu aliyese payekha asalule vochita. Manje ko tani Mkhrisitu wobatizika akanyalanyaza malamulo ya Mulungu nkuchita chimo ikulu? Peno iye angalapelini achadeka kuchosewa mumpingo. (1 Akor. 5:13) Olo viriteno, Yahova adikhira mwachidwi kuti munthu wophonya abwerere kwa iye. Shuwadi chimwechi ndicho chifukwa chikulu chomwe adaperekera dipo kuti vikhale vokwanisika kukhululukira machimo ya wanthu omwe alapa. (Werengani 1 Yohani 2:1.) Yahova Mulungu wathu wachifundo, alimbikisa wanthu omwe achita chimo kuti alape.—Zek. 1:3; Aro. 2:4; Yak. 4:8.

3. Ko tipfunzere chani mu nkhani mweino?

³ Yahova ankufuna kuti tikhale na maganizo yake pa nkhani ya momwe achaonela machimo na wale omwe achita machimo. Nkhani mweyi ifotokoze momwe tingachitire vimwevi. Pomwe tinkupfunzira nkhani mweyi onani vinthu ivi: (1) Momwe mpingo wa ku Korinto udasamalirira nkhani ya munthu yemwe adachita chimo ikulu, (2) malangizo yomwe Paulo adapereka pomwe munthu yemwe adachita chimo ikulu adalapa na (3) momwe nkhani mweyi inkuonesera maganizo ya Yahova, Mkhrisitu akachita chimo ikulu.

VOMWE VIDACHITIKA POMWE MKHRISITU MUNANGO ADACHITA CHIMO IKULU

4. Ko chani chidachitika mumpingo wa ku Korinto? (1 Akorinto 5:1, 2)

⁴ Werengani 1 Akorinto 5:1, 2. Pa ulendo wake wachitatu wa umishonali, Paulo adabva nkhani yoipa maninge yomwe idachitika ku mpingo unyowani wa ku Korinto. Mkhrisitu munango ambachita chigololo na nkazi wa ababa wake. Vimwevi venze voipa maninge mwakuti “chigololo chake nichakuti olo wanthu wa makhaindi yanango achitalini.” Sikuti mpingo umbandolekerera vimwevi koma umbabverana navo. Panango anango ambaganiza kuti vimwevi vinkuonesa momwe Mulungu aliri wachifundo na wodekha kwa wanthu omwe ni ochimwa. Koma Yahova alekereralini machimo ya atumiki wake. Na khalidwe yoipa mweyi mwamuna moyu ambaipisa mbiri yabwino ya mpingo. Adakachitisa pomwe kuti Akhrisitu anango omwe ambabverana naye ambachitembo vimwevi. Manje ko Paulo adauza mpingo kuti uchite chani?

5. Ko Paulo adauza mpingo kuti uchite chani ndipo ambatanthauza chani? (1 Akorinto 5:13) (Onani pomwe foto.)

⁵ Werengani 1 Akorinto 5:13. Mouziriwa na mzimu uchena, Paulo adanemba kalata yopereka malangizo kuti munthu wochimwa yemwe ankulapalini achosewe mumpingo. Ko Akhrisitu anango okhulupirika adakachita tani vinthu na munthu muyo? Paulo adanena kuti “muleke kubverana” naye. Ko vimwevi vimbatanthauza chani? Paulo adawauza pomwe kuti: “Olo kudya naye munthu watene mufunikalini”. (1 Akor. 5:11) Kudya pabodzi na munthu kungayambise kuti tiyambe kucheza naye maninge. Mwapa manje vinkubveka kuti Paulo ambafuna kuti mpingo uleke kumbachita vinthu pabodzi na munthu moule. Vimwevi vidakateteza mpingo kuti uleke kuchitambo makhalidwe yake yoipa. (1 Akor. 5:5-7) Kuingizira pamwapa, kuleka kubverana na munthu moule, kudakathandiza kuti akwanise kuzindikira vophonya vake ndipo adakachita manyazi nkulapa.

6. Ko kalata ya Paulo idathandiza tani mpingo na munthu wochimwa ule?

⁶ Patsogolo pakuti watumiza kalata yake ku mpingo wa ku Korinto, Paulo ambadzibvunza kuti, ko mpingo uchite tani na malangizo ya mukalata mweire? Patsogolo pake Tito adabweresa ntontholo womwe udamukodweresa maninge. Mpingo wa ku Korinto udaphatisa bwino basa malangizo ya mukalata ya Paulo. (2 Akor. 7:6, 7) Iwo adatewedza malangizo yake. Kuingizira pamwapa, pomwe padapita minyezi yanganani kundochokera pomwe Paulo adatumiza kalata yake, mwamuna wochimwa ule adalapa ndipo adasiya vophonya vake. Iye adachinja makhalidwe yake na vochita vake ndipo adayamba kutewedza mpfundo zolungama za Yahova. (2 Akor. 7:8-11) Ko Paulo adakauza mpingo kuti uchite chani?

MOMWE MPINGO UDACHITIRA VINTHU NA MUNTHU YEMWE ADALAPA

7. Kuchosa munthu wochimwa mumpingo, ko kudabweresa maphindu yaponi ku mpingo wa ku Korinto? (2 Akorinto 2:5-8)

⁷ Werengani 2 Akorinto 2:5-8. Paulo adaona kuti “kutsuuliwa na wanthu azinji teno nikokwanira kwa munthu muyo.” Mwa mawu yanango tinganene kuti chilango chidakwanirisa cholinga chake. Ko cholinga chiponi? Chomuthandiza kuti alape.—Aheb. 12:11.

8. Ko patsogolo pake Paulo adauza mpingo kuti uchite tani?

⁸ Paulo adakumbira mpingo wa ku Korinto kuti: “Manje mukhululukireni na ntima wose komasoti kumunyamalisa” m’bale yemwe waphonya, komasoti “mumutsimikizire kuti mumukonda.” Onani kuti Paulo ambafuna kuti mpingo uchite vizinji kuingizira pakundobvuma kuti munthu moule abwerere mumpingo. Paulo ambafuna kuti mpingo umutsimikizire munthu moule na vochita vawo na voyankhula vawo kuti wamukhululukira ndipo amukonda. Mwanjira mweyi vidakaonesa kuti iwo ankukondwa ndawa ya kubwerera kwake mumpingo.

9. Ko ndawa chani anango adakanyalanyaza kukhululukira munthu wachita chimo koma walapa?

⁹ Ko anango mumpingo nthawe mweire adakanyalanyaza kutambira munthu yemwe wachita chimo koma walapa nkubwerera mumpingo? Nkhani mweyi ifotokozalini vimwevi, koma vingachitike. Shuwadi, vochita vake vidabweresa mabvuto mumpingo wose. Komasoti panango vidachitisa manyazi wanthu anango. Anango adakaganiza kuti ni chilungamolini kutambira pomwe munthu moyu mumpingo, pomwe iwo enze adachita nkhama maninge kuti apitirize kukhala ochena. (Onani Luka 15:28-30.) Manje, ko ndawa chani venze vodekana kuti mpingo uwonese chikondi chaicho kwa m’bale yemwe wabwerera mumpingo?

10-11. Ko chingachitike ni chani akulu achireka kukhululukira munthu yemwe wachita chimo koma walapa?

¹⁰ Ganizirani vomwe vidakachitika peno akulu adakanyalanyaza kuti munthu yemwe walapa chaivo abwerere mumpingo panango patsogolo pakuti wabwezeresewa nkuleka kumuonesa chikondi. Iye “angakhale wokwinyirira maninge mpakana kutaya ntima.” Vidakakhara vosashupa kuti iye awone kuti angakhululukiriwelini pomwe ndipo adakasiya kuchita khama kuti akonze pomwe ushamwali wake na Mulungu.

¹¹ Ndipo chinthu choipa maninge peno abale na alongo adakanyalanyaza kukhululukira munthu yemwe walapa chaivo, adakaikha pangozi ushamwali wawo na Yahova. Ndawa chani? Ndawa kuti iwo adakaonesalini khalidwe yokhululuka ya Yahova kwa munthu yemwe wachita chimo koma walapa, koma adakaonesa khalidwe ya nkhanza ya Satana. Shuwadi, iwo adakakhala chitsulo chomwe Satana adakachiphatisa basa kuti adzonge mwamuna moule.—2 Akor. 2:10, 11; Aef. 4:27.

12. Ko mpingo udakatewedzera tani Yahova?

¹² Ko mpingo wa ku Korinto udakatewedzera tani Yahova osati Satana? Pakutewedzera momwe Yahova achachitira vinthu na wanthu olapa, onani vomwe onemba Baibolo anango adalewa pakulewa va Yahova. Davide adanena kuti: ‘Iye niwabwino ndipo ni wokonzeka kukhululuka.’ (Sal. 86:5) Mika adanena kuti: ‘Ko palipomwe Mulungu wolingana na imwepo yemwe akhululuka vophonya na machimo?’ (Mika 7:18) Ndipo Yesaya adanena kuti: ‘Munthu woipa asiye njira zake, ndipo wochitira vinthu voipa adzake asiye maganizo yake, abwerere kwa Yahova iye adzamuchitire chifundo. Abwerere kwa Mulungu wathu ndawa adzamukhululukire na ntima wose.’—Yes. 55:7.

13. Ko ndawa chani kwenze kodekana kubwezeresa munthu yemwe wachita chimo koma walapa? (Onani bokosi yakuti “Ko nilini pomwe munthu wa ku Korinto adabwezeresewa?”)

¹³ Kuti utewedzere Yahova, mpingo wa ku Korinto umbadekana kutambira mwamuna yemwe wenze adalapa na kumuonesa pomwe kuti amukonda. Pakutewedza malangizo ya Paulo ya kutambira pomwe munthu yemwe walapa, Akhrisitu mwawa adaonesa kuti ni “wobvera pa vinthu vose.” (2 Akor. 2:9) Ni shuwadi kuti padandopita minyezi yanganani kundochokera pomwe iye adachosewa koma chilango chidamuthandiza kuti iye alape. Ndipomwapa, penze palibe chifukwa chochebwera kumubwezeresa pomwe munthu moyu mumpingo.

MOMWE TINGATEWENZERERE YAHOVA PA NKHANI YA CHILUNGAMO NA CHIFUNDO

14-15. Ko tapfunzira chani na momwe nkhani ya ku Korinto idasamaliriwira? (2 Petulo 3:9) (Onani pomwe foto.)

¹⁴ Vomwe vidachitika ku Korinto “vidanembewa kuti vitilangize.” (Aro. 15:4) Nkhani mweyi itipfunzisa kuti Yahova alekeleralini machimo yakuluyakulu ya atumiki wake. Iye abvumalini kuonesa chifundo kwa munthu yemwe wachita chimo ikulu koma ankulapalini kuti apitirize kukhala pobozi na atumiki wake okhulupirika. Yahova ni ‘wachifundo’ koma alekeleralini vophonya komasoti anyalanyazalini mpfundo zake. (Yuda 4) Shuwadi, kuchita vimwevi kudakakhalalini kuonesa chifundo ndawa vidakaikha mpingo wose pangozi.—Miy. 13:20; 1 Akor. 15:33.

¹⁵ Olo nteno, tinkupfunzira kuti Yahova afunalini kuti aliyese adzongewe iye ayesesa kupulumusa wanthu. Iye awonesa pomwe chifundo kwa wanthu omwe achinja maganizo yawo ndipo ankufuna pomwe kukonza ushamwali wawo na Iye. (Ezek. 33:11; werengani 2 Petulo 3:9.) Ndipomwapa, pomwe mwamuna ule adalapa nkusiya vochita vake voipa, Yahova adaphatisa basa Paulo pakuuza mpingo kuti mwamuna moyu achadekana kukhululukiriwa na kumutambira pomwe mumpingo.

16. Ko mudzibva tani mukaganizira momwe nkhani ya ku Korinto idasamaliriwira?

¹⁶ Tikambaona momwe nkhani ya ku Korinto idasamaliriwira, vitithandiza kuona chikondi na chilungamo cha Yahova. (Sal. 33:5) Ko vimwevi vinkuingiziralini chifuno chanu chotembeja Yahova? Shuwadi, aliyese wa isepano ni wochimwa ndipo adekana kukhululukiriwa. Tose tina chifukwa chotembejera Yahova ndawa ya dipo yomwe ichitisa kuti machimo yathu yakhululukiriwe. Ni volimbikisa maninge kudziwa kuti Yahova akonda wanthu wake ndipo awafunira vabwino!

17. Ko tidzakambirane chani mu nkhani zinkubwera?

¹⁷ Manje peno munthu wachita chimo manjeuno, ko akulu angatewedzere tani chikondi cha Yahova pa kumuthandiza kuti alape? Ko mpingo ungachite tani peno akulu asalula kuchosa panango kubwezeresa munthu? Tidzakambirane mibvunzo mwaya mu nkhani zinkubwera.