27 ABRIL–3 MAIO, 2026
NYIMBO NA. 99 Gulu ikulu ya abale
Ko tifunika kuchita chani tikakhala kuti tagumana na mabvuto patsogolo pakuti tabatizika?
‘Nithandizeni kuti mapazi yangu ayi kuti yachoke pa njira yanu’—SAL. 17:5.
CHOLINGA
Kuwona momwe Akhrisitu angachitire vinthu patsogolo pakuti abatizika.
1-2. Ko nchani chidzatithandize kupitiriza kukhala wokhulupirika olo kuti tinkugumana na mabvuto? Perekani chitsanzo.
ISEPANO tikudziwa kuti timbagumane na mabvuto mu dziko ya Satana ino. Yesu adawuza opfunzira wake kuti: “Palibe mochitira, vokalipisa mwivi vifunika kubwera basi.” (Mat. 18:7) Ndipomwapa, tingagumane na mabvuto yomwe yangafokese chikhulupiriro chathu. Mwakulinganiza, tingambakalipisane na abale na alongo wanthu mumpingo. Koma olo nteno, tingakwanise kulimbana na mabvuto mwaya na kukhala paushamwali wolimba na Yahova.
2 Ganizirani chitsanzo ichi. Wanthu wa Yahova nthawe zose alimbikisiwa momwe angakonzekerere matsoka ya nchilengedwe. Ko tifunika kuchita chani kuti tikonzekere? Choyamba, tifunika kudziwa matsoka yomwe yangachitike mudera yathu. Nivofunika maninge kuchita vimwivi makamaka tikakhala kuti ndise alendo mudera mwiyo. Kudziwa matsoka ya nchilengedwe yomwe yangachitike mudera mwiyo, tingakonzekeleretu vomwe tingachite kuti titetezeke. (Miy. 21:5) Mwanjira ibodzibodzi mwiyi ni vabwino kudziwiratu mabvuto yomwe tingagumane nayo patsogolo pakuti tabatizika. Vimwivi vidzatithandize kukhala okonzeka pa mabvuto yomwe tingagumane nayo. Tikachita teno, mabvuto mwaya yadzasokonezelini ushamwali wathu na Yahova. (Sal. 17:5) Mu pfunziro mwaino, tione mabvuto yatatu yomwe tingagumane nayo patsogolo pakuti tabatizika ndipo tipfunzire vomwe tingachite kuti tikhale okonzeka pa mabvuto yomwe tingagumane nayo.a
ABALE NA ALONGO WATHU AKATIKWINYIRIRISA
3. Ko ni mabvuto yaponi yomwe tingagumane nayo mumpingo?
3 Ko munkukumbukira ntsiku yoyambirira yomwe mudafika pamisonkhano ya Mboni za Yahova? Panango chomwe mudawona ni chikondi chomwe abale na alongo awonesana. Ndipo imwepo mudatsimikiza kuti mwagumana chipembedzo chaicho. (Yoh. 13:35; Akol. 3:12) Blancab adabvambo teneuyu. Pomwe iye adabatizika padachitika chinthu chomwe ambachidikhiliralini. Iye adati: “Mulongo munango adanichitira vinthu viribe chilungamo. Ndipo nidazindikira pomwe kuti iye ambayankhula vinthu voipa vonena wanthu anango. Inepano nimbadikhiliralini vimwivi, ndawa nidapfunzira kuti wa Mboni za Yahova ayesesa kuchita vinthu mwachikondi.” Ni shuwadi kuti wa Mboni za Yahova ayesesa kuti ambakhale na makhalidwe yabwino, koma ndawa yakuti ni wochimwa achita vinthu vophonyeka basi. (Aef. 4:23, 24; 1 Yoh. 1:8) Ndipomwapa, nthawe zinango m’bale panango mulongo angakukwinyiririseni imwepo. (Yak. 3:8) Ndawa ya mabvuto mwaya anango asiya kutumikira Yahova.
4. Ko nchani chomwe chingatithandize peno m’bale panango mulongo watikwinyiririsa? (Aefeso 4:32)
4 Ko mufunika kuchita chani peno m’bale panango mulongo wakukwinyilirisani? Khalani na chizolowezi chophatisa basa malangizo yogumanika pa Aefeso 4:32. (Werengani.) Mukambayesesa kukhala wachifundo na wokoma ntima, mudzakwanise kulimbana na mabvuto mwaya. Mumbayesese kukhululukira anango mokoma ntima akakuphonyerani. Ko nchani chomwe chingakuthandizeni kuchita vimwivi? Kumbukirani nthawe zose pomwe mwakhala munkukumbira Yahova kuti akukhululukireni vophonya vanu na momwe Yahova adachitira vinthu na imwepo. (Mat. 6:12) Mukambakumbukira momwe Yahova achitira vinthu na imwepo vidzakuthandizeni kuti mumbakhululukirembo anango.
5. Ko ni mpfundo inango iponi yomwe ingatithandize peno m’bale panango mulongo watikwinyiririsa? (Miyambo 19:11) (Onani pomwe mafoto.)
5 Werengani Miyambo 19:11. Baibolo inena kuti: Tikakhala wanzeru na kukwanisa kuwabvesa anango, c vidzatithandize kukhala odekha anango akatikwinyiririsa. Mpfundo mwiyi idathandiza mulongo munango dzina yake Rima yemwe adabatizika magole yanganani kumbuyo. Iye adati: “Abale na alongo akachita vinthu vonikwinyiririsa, choyamba nikumbukira lemba ya Miyambo 19:11. Niganizira momwe vinthu viliri pa moyo wawo ndipo niyesesa kuganizira kuti ndawa chani iwo achita vimwivi. Niyesesa kuyenda nawo pabodzi mu umboni.” Yamwaya ni malangizo yabwino. Kuchita vimwivi, kungakuthandizeni kuti muwadziwe bwino abale na alongo. Mukakhala kuti muwabvesa, vidzakhale vosashupa kuwakhululukira akakuphonyerani.
Peno m’bale panango mulongo wakukwinyiririsani, chitani makonzedwe kuti mumbayende naye mu umboni (Onani ndime 5)
6. Ko nchani chingatithandize kukhala paushamwali na abale na alongo wathu?
6 Ko ni chinthu chinango chiponi chomwe imwepo mufunika kuchita kuti mumbakhale obvana mumpingo? Mukafuna kuwadziwa bwino abale na alongo, imwepo yesesani kuona makhalidwe yawo yabwino. (Linganizani na Miyambo 10:12; Aro. 12:10; Afil. 2:2, 3) Onani momwe vimwivi vidathandizira m’bale Mark yemwe wandobatizika chamanjemanje. Iye ambakhala nthawe ikulu ali pabodzi na abale na alongo wa mumpingo mwake ndipo iye adayamba kuona makhalidwe yanango yomwe ambakomedzewanayolini. Ko nchani chidamuthandiza kupitiriza kukhala paushamwali wolimba na Yahova komasoti na abale na alongo? Iye adati: “Nidazindikira kuti vophonya va abale na alongo venze ving’onoving’ono pakulinganiza na machimo yakuluyakulu. Nidaona kuti nivabwinolini kuti nimbandowona vophonya va abale na alongo. Ndawa ya vimwivi, nidachinja nkuyamba kuona makhalidwe yawo yabwino.” Peno imwepo mungachitembo vimwivi nkuyamba kuona makhalidwe yabwino ya abale na alongo, vidzakuthandizeni kukhala nawo paushamwali.
KO IMWEPO MUKUMBUKIRA VINTHU VOMWE MUDASIYA KUMBUYO MUKALIBE MWABATIZIKA?
7. Ko nchani chingatichitise kukumbukira vinthu vomwe tidasiya kalekale?
7 Pomwe mudakhala wa Mboni za Yahova, mudakondwa ndawa mudadziwa kuti mulirini kumbali ya dziko. Panango imwepo ‘mungambaganize kuti vingachitikelini munthu kumbaganizira vinthu vomwe ambachita kalekale.’ Koma mukayamba kugumana na mabvuto, mungayambe kukumbukira vinthu vinango vomwe mumbachita mukalibe mwakhala wa Mboni za Yahova. (Linganizani na Numeri 11:4-6.) Mwakulinganiza, abale anango adasalula kusiya basa zomwe zimbawabweresera kobiri zizinji kuti akhale wa Mboni za Yahova. Anango adasalula kusiya azishamwali wawo womwe ambabverana nawo maninge pomwe adayamba kupfunzira Baibolo. Anango adasiya vizolowezi voipa vomwe enze navo vomwe vimbakondweresalini Yahova. Vingakhale vobvesa ntsisi maninge peno Mkhrisitu angayambe pomwe kuchita voipa vomwe ambachita kalekale! Ko nchani chomwe chingakuthandizeni kuleka kuganizira vinthu vakalekale mukakhala kuti munkugumana na mabvuto?
8. Ko tapfunzira chani pa chitsanzo cha Abulahamu na Sara?
8 M’Baibolo tiwerenga vitsanzo va amuna na akazi okhulupirika womwe adakayamba kukumbukira vinthu vomwe adasiya kumbuyo. Mwakulinganiza, Abulahamu na Sara adachoka muthaundi yawo yokhuza ya Uri komwe kwenze mipanda yolimba maninge nkuyenda kukakhala na moyo wosafuna vizinji. (Aheb. 11:8, 9) Vingachitike kuti iwo “sembe kuti ambakumbukira” vinthu vomwe adasiya ku Uri, vidakawachitisa kubwerera. Koma ni vimwivilini vomwe Abulahamu na Sara adachita, iwo ambaganizira maninge vomwe Yahova adawapolomisa kuti adzawapase kutsogolo.—Aheb. 11:15, 16.
9. Ko ntumi Paulo ambaviona tani vinthu vomwe adasiya kumbuyo? (Afilipi 3:7, 8, 13)
9 Ntumi Paulo adasiya vinthu vinango pa moyo wake kuti atumikire Yahova. Mwakulinganiza, akalibe kukhala Mkhrisitu adapfunzira chilamulo chinango cha Ayuda motsogolerewa na ntumiki munango wodziwika maninge dzina yake Gamaliyeli. (Mac. 22:3) Ndawa ya mapfunziro yomwe adapfunzira na Ayuda yadamuchitisa kuti akhale m’tsogoleri wachipembedzo chachiyuda wofunika maninge. (Agal. 1:13, 14) Pomwe iye adabvuma ntontholo wabwino adasiya vose vimwivi. Ko iye padapfunzira chonadi ambagumanalini na mabvuto? Neye. Iye adamenyewa, kuikhiwa mudjeri, komasoti kuzondewa na wanthu. (2 Akor. 11:23-26) Sembe kuti iye ambandoganizira va mabvuto yomwe ambagumana nayo, vidakamuchitisa kulinganiza moyo womwe wenze naye kalekale, nkuyamba kuona kuti moyo wake wakalekale wenze bwino. Paulo ambandoganiziralini vinthu va kumbuyo koma ambaganizira va mwayi womwe wenze naye ndawa yokhala wopfunzira wa Yesu. Paulo wenze wotsimikiza kuti kukhala ntumiki wa Yahova chenze chinthu chofunika maninge!—Werengani Afilipi 3:7, 8, 13.
10. Ko tifunika kumbaganizira chani nthawe zose? (Maliko 10:29, 30) (Onani pomwe mafoto.)
10 Ko tikupfunzira nchani? Mukambakumbukira vinthu vomwe mudasiya kuti mukhale Mkhrisitu, kumbukirani vinthu vomwe vidakuchitisani kuti musiye kuchita vimwivi. (Mla. 7:10) Mbalinganizani vinthu vomwe mudasiya kumbuyo na madaliso yomwe munayo manjeuno ndawa yodziwa chonadi. (Miy. 3:32) Imwepo muli m’banja ya abale na alongo wachikondi. (Werengani Maliko 10:29, 30.) Ndipo munatsogolo yabwino! (Yes. 65:21-23) Mukakhala kuti nthawe zose munkumbukira va madaliso yomwe yabwera ndawa yotumikira Yahova, vidzakuthandizeni kuti osati mumbakumbukire vinthu vomwe mudasiya kumbuyo.
M’malo mondokumbukira vinthu vomwe mundasiya kumbuyo, khalani wokondwa na basa yolalikira yomwe Mulungu adakupasani (Onani ndime 10)e
11. Ko mwapfunzira chani pa chitsanzo cha Rosemary?
11 Mulongo munango dzina yake Rosemary adabatizika pafupifupi anamagole 50. Onani vomwe iye adachita kuti osati ambakukumbukire vinthu vomwe adasiya kalekale. Iye adati: “Kumayambiriro pomwe nidandoti nakhala wa Mboni za Yahova, vimbaniwawa maninge ikafika nthawe ya Khisimisi. Ntsiku mwiyi ikafika, nimbakonda kupereka mphaso kwa wanthu womwe nimbawakonda. Nimbakhala okondwa nikawona momwe wana akukondwera na mphaso zomwe nawapasa.” Manje ko nchani chomwe chidamuthandiza Rosemary? Iye adati: “Nidagumana njira inango yochitira vinthu na banja yangu. Nichemera azibale wangu nkuwapasa mphaso ndipo niwauza kuti niwakonda.” Rosemary adagumana pomwe na bvuto inango. Iye adati: “Inepano pomwe nidapfunzira Baibolo azishamwali wangu adasiya kucheza nane. Ndipo inepano nthawe zinango nimbawasuwa ndipo nimbadzibva kuti nilinekhanekha.”d Ko nchani chomwe chidamuthandiza? Iye ambayenda mu umboni na alongo osiyanasiyana. Iye adati: “Kuchita vimwivi, kwanithandiza kuti nigumane azishamwali anyowani ndipo niwakonda.” Ko imwepo mungapfunzire chani kwa mulongo muyu? Panango imwepo mungambakumbukire vinthu vomwe mumbachita mukalibe kukhala Mkhrisitu, koma kumbukirani kuti pangakhale vinthu vabwino maninge vomwe vingakuchitiseni kukhala wokondwa maninge manjeuno. (Afil. 4:8, 9) Ndipo mumbakumbukire kuti Yahova nthawe zose adzakupaseni vinthu vose kuposha vomwe mwenze navo mukalibe mwayamba kupfunzira chonadi.
ANANGO ASIYA KUTUMIKIRA YAHOVA
12. Ko ni mabvuto yaponi yomwe yangachitike mumpingo yomwe yangakhale yoshupa kuyapirira?
12 Pomwe mudasalula kukhala wa Mboni za Yahova, mudasiya kukhala kumbali ya dziko nkukhala kumbali ya Yahova. (Yes. 65:14) Olo nteno, mungambawone vophonya va anango mumpingo. Mpakana mungambaone anango akuchosewa mumpingo. (1 Akor. 5:13) Onani vomwe vidachitikira mulongo Samar padandoti wabatizika. Iye adati: “Nandobatizika chamanjemanje, nkulu munango adachita chimo ndipo adachosewa mumpingo. Nidakwinyirira maninge ndawa nimbakhulupiriralini kuti nkulu angachite chimo mpakana kuchosewa mumpingo.” Nthawe zose tifunika kukumbukira kuti abale na alongo wanthu akonda Yahova ndipo afuna kukhala naye paushamwali. Olo nteno, tifunika kuti timbawone vinthu moyenerera ndawa yakuti gole iriyose abale na alongo anango achosewa mumpingo. (1 Akor. 13:4, 7) Vikhala vokwinyiririsa peno munthu yemwe timukonda panango shamwali wanthu wasalula kusiya kutumikira Yahova.
13. Ko nchani chingatithandize kukhala wokhulupirika kwa Yahova olo kuti azibale wathu asiya kutumikira Yahova?
13 Ko mufunika kuchita chani peno shamwali wanu panango m’bale wanu wasiya kutumikira Yahova? Pitirizani kukhala paushamwali wolimba na Yahova. (Yak. 4:8) Ayi kubvuma kuti ushamwali wanu udzongeke na Yahova ndawa ya vophonya va wanthu anango. Mwakulinganiza, olo kuti tichitira pabodzi vinthu ninge banja komasoti ninge mpingo, tifunika kukhala na ndandanda yathu yowerenga Baibolo.—Sal. 1:2; 62:8.
14. Ko tapfunzira chani pa chitsanzo cha ntumi Petulo? (Yohani 6:66-68)
14 Tingapfunzire pomwe na vomwe ntumi Petulo adachita pomwe opfunzira azinji padasiya kutewera Yesu. Vingachitike kuti Petulo wenze adasokonezeka maganizo pa nthawe mwiyi. Onani vomwe iye adanena pa Yohani 6:66-68. (Werengani.) M’malo mondoganizira vomwe wanthu anango ambachita, Petulo ambaganizira va mawu yomwe adatambira kuchokera kwa Yesu. Ndawa ya vimwivi, alibe kusiya kutumikira Yahova. Ninge Petulo, olo anango achisiya kutumikira Yahova isepano tifunika kupitiriza kumutumikira. Ndipo ayi kuchoka mugulu ya Yahova! Samar, yemwe tamutomola pakuyambirira ule, adati: “Munthu akachita chimo mumpingo vitanthauzalini kuti wose mumpingo mumo achita vinthu voipa panango kuti gulu yathu ipfunzisa vabodza ndipo tifunika kudziwa kuti Mulungu wathu ni wachikondi.”
15. Ko mwapfunzira chani na chitsanzo cha Emily?
15 Onani chitsanzo cha Emily. Padandoti wabatizika kwa sondo ibodzi, amayi wake adachosewa mumpingo. Iye adati: “Nenze nikalibe naganizirako kuti vimwivi vingachitike. Vimwivi venze voshupa maninge kwa inepano, ndipo nimbawasuwa maninge amayi wangu.” Emily adafotokoza vinthu vomwe vidamuthandiza pa nthawe yoshupa mwiyi. Iye adati: “Ababa wangu anikonda ndipo anisamalira bwino maninge. Komasoti niri na abale na alongo womwe anikonda maninge. Aliyese yemwe atumikira Yahova agumana na mabvuto. Ndipomwapa, ni vofunika maninge kulimbikisana.” (1 Pet. 5:9) Ayi kudikhira kuti mugumane na mabvuto kuti mukhale paushamwali wolimba na abale na alongo mumpingo. Yesesani manjeuno kuwadziwa bwino abale na alongo wanu.
16. Ko tifunika kukumbukira va chani? (Onani pomwe foto.)
16 Kumbukirani kuti Yahova apereka malangizo kwa wanthu womwe amukonda. (Aheb. 12:6) Iye afuna kuti wale womwe adachosewa abwerere pomwe mumpingo. (2 Pet. 3:9) Ndipomwapa, peno m’bale wanu wachosewa mumpingo, dziwani kuti akulu ayesese kumuthandiza kuti abwerere pomwe mugulu ya Yahova. —2 Tim. 2:24, 25.
Peno m’bale wanu wachosewa mumpingo, kumbukirani kuti akulu ankufuna kumuthandiza kuti abwerere pomwe mugulu ya Yahova (Onani ndime 16)f
17. Ko tingakhale wotsimikiza va chani?
17 Tandokambirana va mabvuto yomwe mungagumane nayo patsogolo pakuti mwabatizika. Ni shuwadi kuti mabvuto yanango yangakhale yochitisa mantha, koma olo nteno mufunikalini kuchita mantha. Pali vinthu vizinji vamungachite kuti mudzikonzekerese ndipo ayi kuyebwa kuti munayo thandizo ikulu yemwe ni Yahova Mulungu. Iye akuthandizeni ndipo akufuna kukuthandizani mpakana kalekale! (1 Pet. 5:10) Nthawe zose adzakupaseni mphanvu kuti mukwanise kupirira mabvuto yomwe mungagumane nayo. Mukapitiriza kubvuma kuti Yahova akuthandizeni, mudzakhale paushamwali wolimba na iye mpakana kalekale olo kuti munkugumana na mabvuto!—Sal. 119:165; Aro. 8:38, 39.
NYIMBO NA. 154 Chikondi chosapera
a Olo kuti nkhani mwiyi inkuyenda kwa wale omwe andobatizika chamanjemanje, tose isepano ingatithandize.
b Madzina yanango yachinjiwa.
c Kuzindikira kuphatanidzapo kuona vinthu munjira yoyenerera. Khalidwe mwiyi ingatithandize kukhululukira munthu munango akatikwinyiririsa. Tidzakwanise kuwona kuti ndawa chani munthu muyu wayankhula tene, ndipo khalidwe mwiyi idzatithandize kukhala paushamwali na abale na alongo.
d Tose tifunika kuthandiza wale omwe ankupfunzira Baibolo na wale omwe andobatizika chamanjemanje kuti ambadzibve kuti akondewa. Onani ndime 15 na 16 nkhani yakuti: “Thandizani mapfunziro yanu kupita patsogolo na kubatizika” mu Ntsanja ya Ulonda Março 2021.
e MAWU YOFOTOKOZERA FOTO Pa tsamba: Mulongo ali mu umboni ndipo akuwona gulu ya akazi omwe akuchita masenzeka yomwe iyembo ambayakondambo kalekale. Mulongo m’bodzibodzi muyo ankulalikira munthu yemwe ambatchaya bola ndipo panango vingachitike kuti kalekale wenze shamwali wake.
f MAWU YOFOTOKOZERA FOTO: Akulu awiri azungira m’bale yemwe adasiya kutumikira Yahova ndipo ankumulimbikisa kuti abwerere pomwe mugulu ya Yahova.