Alumbwana, ko munkufuna kuti moyo wanu udzakhale tani?

1. Ko ni mabvuto yaponi yakulu yomwe Yehoasi, Uziya na Yosiya adagumananayo?

KO MUDAYAMBA mwaganizirako kale momwe vidakakhalira mudakasaluliwa kuti mukhale mpfumu ya wanthu wa Mulungu muli mwana panango wachilumbwana? Ko mudakaphatisa tani basa mphanvu zanu na ulamuliro wanu? Baibolo ifotokoza va wachilumbwana azinji omwe adakhala mafumu ya Ayuda. Mwakuliganiza, Yehoasi adakhala mpfumu anamagole 7, Uziya adakhala mpfumu anamagole 16 ndipo Yosiya adakhala mpfumu anamagole 8 basi. Vimwevi venze voshupa kwa iwo. Podiya venze teno, Yahova na wanthu anango adawathandiza kuti alimbane na mabvuto komasoti kuwathandiza kuti ambachite vinthu vabwino.

2. Ndawa chani ni vodekana kupfunzira chitsanzo cha Yehoasi, Uziya na Yosiya?

² Ni shuwadi kuti ndiselini mpfumu panango mpfumukazi. Koma tingapfunzirepomwe chinthu chodekana maninge pa chitsanzo cha Yehoasi, Uziya na Yosiya. Iwo adasalula vinthu mwanzeru komasoti adasalulapomwe vinthu vinango vomwe venze voipa. Pakukambirana vitsanzo vawo naboni tione kuti ndawa chani tichadekana kusalula kukhala na azishamwali wabwino, kupitiriza kukhala wodzichepesa na kuchita khama pa kutumikira Yahova.

SALULANI AZISHAMWALI WABWINO

3. Ko Yehoyada adathandiza tani Mpfumu Yehoasi kusalula bwino vochita?

³ Tewedzerani vosalula vanzeru va Yehoasi. Pomwe wenze mulumbwana mpfumu Yehoasi adasalula vinthu mwanzeru. Iye wenze alibe ababa, koma adapitiriza kutewedza malangizo yanzeru ya nkulu wantsembe Yehoyada. Yehoyada adamulela Yehoasi ninge mwana wake chaiye. Ndawa ya chitsanzo chabwino cha Yehoyada, Yehoasi adatsimikiza kutumikira Yahova ndipo adathandiza wanthu kuchitambo chibodzibodzi. Ndipo Yehoasi adakonzapomwe kachisi wa Yahova.—2 Mbiri 24:1, 2, 4, 13, 14.

4. Ko ni maphindu yaponi yomwe tingagumane tikambakonda Yahova na kubvera malamulo yake? (Miyambo 2:1, 10-12)

⁴ Peno azibereki wanu panango wanthu anango ankukupfunzisani va Yahova na malangizo yake, tsimikizani kuti imweyi ni mphaso ikulu maninge kwa imwepo. (Werengani Miyambo 2:1, 10-12.) Azibereki wanu angakupfunziseni imwepo njira zizinji maninge. Onani momwe ababa wa mulongo munango dzina yake Katya adamuthandizira kuti asalule bwino vochita. Nthawe zose akakhala kuti ankuyenda kukamusiya kushikola ambakambirana naye va lemba ya ntsiku mweyo. Katya adanena kuti: “Macheza mwaya yambanithandiza kulimbana na mabvuto ya ntsiku mweyo.” Koma panango azibereki wanu akupasani malangizo ya m’Baibolo yomwe imwepo muyaona kuti niyoshupa maninge. Vikakhala tene nchani chomwe chingakuthandizeni kuti mumbawabvere? Mulongo munango dzina yake Anastasia adafotokoza vifukwa vomwe azibereki wake ambamupasira malamulo mwaya. Iye adanena kuti: “Vimwevi vidanithandiza kudziwa kuti iwo ambanipasalini malamulo mwaya pakundofuna kunilamulira koma ndawa yakuti ambanikonda komasoti ambafuna kuniteteza.”

5. Ko vochita vanu vichakhudza tani azibereki wanu na Yahova? (Miyambo 22:6; 23:15, 24, 25)

⁵ Azibereki wanu adzakhale okondwa maninge mukambaphatisa basa mpfundo za m’Baibolo zomwe iwo ankukupasani. Koma chodekana maninge nchakuti Yahova adzakhale wokondwa komasoti ushamwali wanu na iye udzakhale wolimba maninge. (Werengani Miyambo 22:6; 23:15, 24, 25.) Vimwevi ni vifukwa vabwino vomwe imwepo mungatewedzerere chitsanzo cha Yehoasi pomwe iye wenze mulumbwana.

6. Ko ni malangizo yaponi yomwe Yehoasi adayamba kutetekera pomwe Yehoyada adamwalira? Ndipo nchani chomwe chidachitika patsogolo pake? (2 Mbiri 24:17, 18)

⁶ Vamungapfunzire pa vosalula voipa va Yehoasi. Pambuyo pakuti Yehoyada wamwalira, Yehoasi adayamba kukhala na azishamwali oipa. (Werengani 2 Mbiri 24:17, 18.) Iye adasalula kubvera malangizo ya alangizi Wachiyuda womwe ambakondalini Yahova. Panango imwepo mungatsimikizirembo kuti Yehoasi ambadekana kukhala kutali na azishamwali wa khaindi mweyi. (Miy. 1:10) M’malo mwakuti achite vimwevi iye adakhala chitsiru ndipo adabvesera malangizo yawo yoipa. Ndipo kuti viipiretu, Zakariya m’bale wake chaiye padayesesa kumutsumula iye adalamula kuti aphewe. (2 Mbiri 24:20, 21; Mat. 23:35) Chenze chinthu choipa maninge, Yehoasi wenze adayamba bwino koma chobvesa ntsisi ni chakuti iye adakhala wampatuko komasoti wakupha ndipo pakumalizira iye adaphewa na azinyabasa wake chaiwo. (2 Mbiri 24:22-25) Vinthu vidakakhala bwino maninge sembe iye adapitiriza kubvera Yahova na wanthu omwe amukonda. Ko mwapfunzira chani pa chitsanzo cha Yehoasi?

7. Ko nimbani omwe imwepo mungasalule kuti akhale azishamwali wanu? (Onani pomwe foto.)

⁷ Chinthu chibodzi chomwe tingapfunzire pa voipa vomwe Yehoasi adachita, ni kusalula azishamwali womwe angatithandize kuchita vinthu vabwino. Azishamwali omwe akonda Yahova na kumukondweresa. Azishamwali wathu angakhale wamisinkhu yosiyanasiyana. Kumbukirani kuti Yehoasi wenze mulumbwana maninge pakumulinganiza na shamwali wake Yehoyada. Pakulewa va azishamwali wanu dzibvunzeni kuti: ‘Ko iwo anithandiza kulimbisa chikhulupiriro changu kwa Yahova? Ko iwo anilimbikisa kuti nimbachite vinthu mobverana na mpfundo za Mulungu? Ko iwo achachita vinthu pa kundofuna kunikondweresa basi? Panango ni olimba ntima kuti anganipase malangizo na thandizo?’ (Miy. 27:5, 6, 17) Koma chaivo ni vakuti peno azishamwali wanu akondalini Yahova imwepo mungadekanelini kukhala shamwali wawo. Koma peno imwepo mu na azishamwali omwe akonda Yahova pitirizani kubverananawo, ni amwawaletu omwe adzakuthandizeni nthawe zose!—Miy. 13:20.

8. Peno imwepo muphatisira basa intaneti, ko ni chani chomwe muchadekana kuganizira?

⁸ Malo yochezera ya pa intaneti ni njira yabwino yomwe tingachezere na azishamwali wathu na azibale wathu. Koma azinji aphatisa basa malo yochezera ya pa intaneti pakundofuna kudabwisa anzawo, mafoto yachaikha, mavidiyo, vomwe achagula na vinthu vomwe iwo achachita. Peno imwepo muphatisa basa malo yochezera ya pa intaneti dzibvunzeni kuti: ‘Ko cholinga changu ni kudabwisa anango? Ko nimbafuna kulimbikisana na anzangu panango nindofuna kudzilemekeza? Ko vinthu vomwe wanthu achaikha pa intaneti vinkuchitisa kuti nichinje momwe nichaganizira, kayankhulidwe kangu, vomwe nichachita na kuyamba kuchita vinthu voipa?’ M’bale Nathan Knorr, yemwe wenze M’bungwe yotonga adapereka malagizo aya: “Lekani kubonera kukondweresa wanthu, ndawa yakuti mudzakwaniselini kukondweresa wose. Koma mbayesesani kukondweresa Yahova, mukachita teno mudzakondwerese wose omwe amukonda.”

TICHADEKANA KUPITIRIZA KUKHALA ODZICHEPESA

9. Ko ni chani chomwe Yahova adamuthandiza Uziya kuti achite? (2 Mbiri 26:1-5)

⁹ Tewedzerani vosalula vabwino vomwe Uziya adachita. Pomwe Mpfumu Uziya wenze mulumbwana, iye wenze wodzichepesa. Iye adapfunzira ‘kugopa Mulungu chaiye’. Uziya adamwalira anamagole 68 ndipo mbali ikulu ya moyo wake Yahova adamudalisa. (Werengani 2 Mbiri 26:1-5.) Uziya adagonjesa makhaindi yazinji ya azondi wake ndipo adachitisa kuti Yerusalemu akhale wotetezeka. (2 Mbiri 26:6-15) Shuwadi, Uziya adakhala wokondwa maninge ndawa ya vomwe adakwanisa kuchita na thandizo ya Yahova.—Mla. 3:12, 13.

10. Nchani chomwe chidamuchitikira Uziya?

¹⁰ Pfunzirani pa vosalula voipa vomwe Uziya adachita. Mpfumu Uziya wenze adazolowera kuuza wanthu vomwe achadekana kuchita. Ko vimwevi vidamuchitisa kuti ambaganize kuti angachite chilichose chomwe ankufuna? Ntsiku inango Uziya adangena mu kachisi wa Yahova ndipo adalimba ntima kufukiza ntsembe chinthu chomwe mafumu enze adalambiziwa kuchita. (2 Mbiri 26:16-18) Nkulu wantsembe Azariya adamutsumula koma Uziya adakalipa maninge. Vobvesa ntsisi ni vakuti Uziya alibe kupitiriza kukhala wokhulupirika kwa Yahova ndipo adamulanga pakumuchitisa khate. (2 Mbiri 26:19-21) Vose vidakapitiriza kufamba bwino sembe iye adapitiriza kukhala wodzichepesa.

11. Ko nchani chomwe chingatithandize kuti tipitirize kukhala odzichepesa? (Onani pomwe foto.)

¹¹ Pomwe Uziya adakhala mwamuna wamphanvu iye adayebwa vinthu vose vabwino vomwe Yahova adamuchitira. Ko tinkupfunzira chani? Tichadekana kukumbukira kuti madaliso yathu na maudindo yathu nthawe zose vichachokera kwa Yahova. M’malo mwakuti tidzionese ndawa ya vinthu vomwe takwanisa kuchita, tichadekana kupereka ulemerero wose kwa Yahova.b (1 Akor. 4:7) Nthawe zose tichadekana kukhala odzichepesa na kuzindikira kuti ndise ochimwa ndipo tichadekana kulangiziwa. M’bale munango wamagole 60, adanena kuti: “Inepano nidapfunzira kuti nichadekanalini kukhala wokhumudwa panango wokwinyirira wanthu anango akadziwa va chimo yangu. Nthawe zinango niphonyesa vinthu ndipo nitambira malagizo ndawa ya vimwevi, olo vili teno inepano niyesesa kuchinja na kupitiriza kuchita vomwe ningakwanise kwa Yahova.” Tikakhala odzichepesa kwa Yahova tidzakhale okondwa chaivo.—Miy. 22:4.

PITIRIZANI KUMUFENDERERA YAHOVA

12. Ko Yosiya adamufenderera tani Yahova pomwe iye wenze wachilumbwana? (2 Mbiri 34:1-3)

¹² Tewedzerani vosalula vabwino vomwe mpfumu Yosiya adachita. Yosiya wenze mulumbwana pomwe adayamba kufenderera Yahova. Iye ambafuna kupfunzira vinzinji va Yahova na kuchita chifuniro chake. Koma vinthu venze voshupa kwa mpfumu yachilumbwana mweyi. Pa nthawe mweire wanthu azinji ambatumikira milungu yabodza ndipo Yosiya ambafunika kukhala wolimba ntima kuti akwanise kuteteza kupemphera chaiko. Ni vimweviretu vomwe iye adachita. Ndipo wenze akalibe wakwanisa magole 20 pomwe adayamba kuchosa kupemphera kwa bodza mu dziko yake.—Werengani 2 Mbiri 34:1-3.

13. Ko kudzipereka kwa Yahova kuchatanthauza chani kwa imwepo?

¹³ Podiya kuti imwepo ndimwe wachilumbwana maninge, mungatewedzere Yosiya pakupfunzira vinthu vizinji va Yahova na makhalidwe yake yodabwisa. Ni vimweviletu vomwe vidzakuchitiseni kufunisisa kudzipereka kwa Yahova. Koma ko chosalula mwechi chingakhudze tani moyo wanu? Luke yemwe adabatiziwa anamagole 14, adanena kuti: “Kuyambira manjeuno mpakana kutsogolo inepano nidzaikhe basa za Yahova pa malo yakuyamba pa moyo wangu ndipo nidzayesese kuchita vose vomwe ningakwanise kuti nikondwerese ntima wake.” (Maliko 12:30) Imwepo mudzadalisiwe maninge mukatsimikiza kuchitambo vibodzibodzi.

14. Perekani vitsanzo va momwe wachilumbwana ankutewedzerera chitsanzo cha Mpfumu Yosiya.

¹⁴ Ko ni mabvuto yaponi yomwe munkugumana nayo pa moyo wanu ninge mulumbwana yemwe ankutumikira Yahova? Johan, yemwe adabatiziwa anamagole 12, adafotokoza momwe anzake ambamuchichimizira kuti ambabeme ndudu za chizungu. Kuti akwanise kugumana mphanvu zokwanisa kupiririra bvuto mweyi Johan ambakumbukira kuti ndudu za chizungu zingadzoge moyo wake komasoti ushamwali wake na Yahova. Rachel, yemwe adabatiziwa anamagole 14, adafotokoza vomwe vidamuthandiza kuti akwanise kupirira mabvuto yomwe iye angagumananayo ku shikola. Iye adati: “Inepano nimbayesa kulinganiza vose vomwe nimbaona na nkhani za m’Baibolo. Mwakulinganiza, tikambapfunzira va Historia ninganizira nkhani inango ya m’Baibolo panango maulosi. Ndipo nthawe zinango nikambacheza na anzangu ku shikola nikumbukira vesi inango ya m’Baibolo na kuwaonesa.” Mabvuto yomwe imwepo munkugumana nayo yangakhale yosiyana na yomwe Yosiya adagumana nayo, olo viri teno, imwepo mungakhale wanzeru na wokhulupirika ninge momwe iye adachitira. Kulimbana na mabvuto pomwe imwepo mukali wachilumbwana, vidzakuthandizeni kukonzekera kuti mudzakwanise kulimbana na mabvuto ya kutsogolo.

15. Ko nchani chidathandiza Yosiya kutumikira Yahova mokhulupirika? (2 Mbiri 34:14, 18-21)

¹⁵ Pomwe Mpfumu Yosiya wenze na magole 26, iye adayamba kukonzapomwe kachisi. Ni pamwapa pomwe adagumana ‘bukhu yamalamulo ya Yahova yomwe yenze idaperekewa na Mose.’ Pomwe mpfumu idabva vomwe bukhu mweyi imbalewa iye adachita vinthu mwakankulumize kuti atewedze va bukhu mweire. (Werengani 2 Mbiri 34:14, 18-21.) Ko imwepo mudayesakokale kuwerenga Baibolo ntsiku iliyose? Peno munkuchita teno vinkufamba bwino? Ko imwepo munemba mavesi yanango yomwe yangakuthandizeni? Luke, yemwe tamutomola kumayambiliro kule iye anemba mu kaderno vinthu vabwino vomwe wagumana pa kuwerenga kwake Baibolo. Kuchitambo vimwevi kungakuthandizeni kuti mumbakumbukire mavesi ya m’Baibolo na phindu yomwe mwagumana. Imwepo mukambaidziwa bwino Baibolo na kuyamba kuikonda mudzafunisise kutumikira Yahova. Nteneletu momwe Mawu ya Mulungu yadathandizira Yosiya kuchita vinthu vabwino ndipo yadzakuthandizenimbo.

16. Ndawa chani Yosiya adaphonyesa chinthu chikulu ndipo tinkupfunzira chani?

¹⁶ Pfunzirani pa vosalula voipa vomwe Yosiya adachita. Pomwe Yosiya wenze na magole 39 iye adachita chimo yomwe idamuphesa. M’malo mwakuti athembe Yahova kuti amutsogolere iye adadzithemba. (2 Mbiri 35:20-25) Mweyi ni pfunziro kwa isepano. Viribe basa nsinkhu wathu panango nthawe yomwe takhala tinkutumikira Yahova, tichadeka kupitiriza kumufenderera. Kuti vimwevi vikwanisike tichadekana nthawe zose kupemphera kwa Yahova, kumukumbira kuti atitsogolere, kupfunzira Baibolo na kubvera malangizo ya Akhrisitu wachikulire. Kuchita vimwevi vidzakuthandizeni imwepo kuti muleke kumbaphonyesa vinthu kawirikawiri ndipo mudzakhale okondwa nthawe zose.—Yak. 1:25.

ALUMBWANA, IMWEPO MUNGAKHALEDI OKONDWA NTHAWE ZOSE

17. Ko ni vinthu viponi vodekana maninge vomwe tapfunzira pa mafumu yatatu ya Ayuda?

¹⁷ Pali vinthu vizinji vabwino vomwe imwepo mungachite muli wachilumbwana. Nkhani ya Yehoasi, Uziya na Yosiya iwonesa kuti imwepo mungasalulembo vinthu mwanzeru na kukondweresa Yahova olo ndimwe wachilumbwana. Ni shuwadi kuti iwo adachita vinthu vophonyeka vomwe vidawabweresera mabvuto yakulu. Koma mukatewedzera vinthu vabwino vomwe iwo adachita na kupewa vinthu voipa vomwe iwo adachita mudzakhale okondwa maninge pamoyo wanu.

18. Ko ni vitsanzo viponi va m’Baibolo vomwe vinkuonesa kuti mungakhale okondwa maninge? (Onani pomwe foto.)

¹⁸ Baibolo ifotokozapomwe va wachilumbwana anango omwe adamufenderera Yahova, adadalisiwa ndipo adakhala okondwa. Davide ni m’bodzi mwa achilumbwana mwawa. Pomwe wenze wachilumbwana Davide adasalula kukhala shamwali wa Yahova ndipo kuyenda kwa nthawe iye adakhala mpfumu yokhulupirika maninge. Ni shuwadi kuti Davide adaphonyesambo vinthu vinango koma nthawe zose Yahova ambalewa Davide kuti ni ntumiki wokhulupirika. (1 Maf. 3:6; 9:4, 5; 14:8) Tani imwepo kupfunzira vizinji va moyo wa Davide? Nishuwadi kuti vimwevi vidakulimbikisani kupfunzira va Yahova molimba ntima. Imwepo mungapfunzirepomwe chitsanzo cha Maliko na Timoteyo. Iwo adayamba kutumikira Yahova ali wachilumbwana ndipo adapitiriza kuchita vimwevi pa moyo wawo wose. Adakhala obvumizika pa maso pa Yahova ndipo adakhala okondwa ndawa ya vimwevi.

19. Ko munkufuna kuti moyo wanu ukhale tani?

¹⁹ Momwe muchachitira vinthu pa moyo wanu manjeuno vingaonese momwe mudzachitire vinthu kutsogolo. Mukamuthemba Yahova m’malo mwakudzithemba mwekha vidzakuthandizeni nthawe zose kusalula vinthu vabwino. (Miy. 20:24) Imwepo mungakhale na moyo wokondwa na wodzaza na vinthu vabwino. Koma kumbukirani kuti Yahova alemekeza maninge vinthu vabwino vomwe imwepo muchamuchitira. Kuphatisa basa moyo wathu kutumikira Ababa wathu wachikondi Yahova ni chinthu chabwino maninge chomwe imwepo mungasalule kuchita pamoyo wanu. Palibepomwe chinango choposha chimwechi.