Yesu adamangiwa

Yesu na atumi wake, adapita mu chigwa cha Kidironi nkuyenda ku Phiri ya Maolivi. Apa nkuti nthawe yapitirira 00 hora ndipo mwezi wenze wantero. Padafika m’munda wa Getsemane Yesu adauza atumi mwawo kuti: “Khazikikani pasi pano, ine ninkuyenda kukapemphera.” Patsogolo pake, adayenda patali pang’ono ndipo adagwada nkuyamba kupemphera. Iye wenze na nkhawa maninge ndipo adapemphera kwa Yahova kuti: “Vomwe munkufuna vichitike.” Yahova adatumiza mngelo kuti adzalimbikise Yesu. Padayenda pomwe penze atumi wale, adagumana atumi atatu ankugona. Iye adawauza kuti: ‘Mukani! ino ni nthawelini yogona. Nthawe ikufendera kuti niperekewe kwa azondi.’

Nthawe pang’ono Yudasi adafika na gulu ya wanthu yomwe yenze idanyamula vibemba na vimibonga. Yesu na atumi wake ambakonda kuyenda ku munda wa Getsemane. Pamwapo Yudasi ambadziwa kuti Yesu angagumanike kumuko. Iye wenze adauza wanthu mwawo kuti akawapase chizindikiro kuti iwo akwanise kumudziwa Yesu. Ndipo padandofika pomwe penze Yesu adanena kuti: ‘Mulitani Mpfunzisi?’ Patsogolo pake adamubejali. Koma Yesu adati: ‘Ko unkunipereka mwa kunibejali?’

Yesu adaifenderera gulu ile nkuibvunza kuti: “Munkufuna mbani?” Wanthu mwawo adamudawira kuti: ‘Yesu wa ku Nazareti.’ Iye adawadawira kuti: “Ndinepano.” Koma wanthu mwawo adabwerera m’mambuyo nkugwa pasi. Yesu adawabvunza pomwe kuti: ‘Nati munkufuna mbani?’ Iwo adadawira pomwe kuti: ‘Yesu waku Nazareti.’ Yesu adawadawira kuti: ‘Nakuuzani kale kuti, ndinepano. Alekeni awa ayende.’

Nthawe mwiyoletu Petulo adasolola chibemba chake nkugwata dzitu ya Makasi, yemwe wenze nyabasa wankulu wa antsembe. Koma Yesu adatenga dzitu ire nkuyiikha pa malo yake ndipo adamupolesa. Patsogolo pake adauza petulo kuti: ‘ Bwezera chibemba chako pa malo pake. Ukambapha wanthu na chibemba, iwepo udzaphewe na chibemba.’ Masocha mwayo yadaphata Yesu nkumumanga ndipo atumi wale adathawa. Patsogolo pake, masocha yale yadatenga Yesu nkuyenda naye kwa wantsembe nkulu dzina yake Anasi. Pomwe adamubvunza mibvunzo adamutumiza kwa nkulu wa antsembe dzina yake Kayafa. Koma ko atumi wale vidawamalira tani?