Iwo adalamba kutumikira chifano

Payidapita nthawe kuchokera pomwe Mpfumu Nebukadinezara adalota, adakonza chifano chikulu cha golide. Chifano mwechi adachiyimisa mu chigwa cha Dura ndipo adachemera wanthu ose wa maudindo yakuluyakulu m’boma kuphatanidzapo Shadireki, Misheki na Abedinego. Wanthu mwawo padasokhana mfumu idalamula Kuti: ‘Mukabva kulira kwa lipenga, chinonje, zeze na vipangizo vosiyana siyana voimbira mugwade na kutumikira fano mweyi. Aliyese yemwe agwadirelini fano mweyi, athusiwe mu uvuni wa moto.’ Ko alumbwana atatu wachiheberi mwawo adachita tani? Ko adabvuma kugwadira fano mweyo panango adatsimikiza kutumikira Yahova yekha?

Patsogolo pake, Mpfumu idalamula kuti nyimbo iyambe. Aliyese adagwada na kutumikira fano ire, koma Shadireki, Misheki na Abedinego alibe kugwada. Wanthu anango padawaona adauza mfumu kuti: ‘Alumbwana atatu wa chiheberi mwawa ankulamba kutumikira fano mweyi.’ Nebukadinezara adachemeresa alumbwana mwawo nkuwauza kuti: ‘Nikupaseni mwayi unango kuti mutumikire fano mweyi. Peno mutumikilerini nikuthuseni mu uvuni wa moto ndipo palibe mulungu yemwe angakupulumuseni m’manja mwangu.’ Iwo adadawira kuti: ‘Ayi kushupika kutipasa mwayi unango. Mulungu wathu atipulumuse, koma peno atipulumuselini dziwani mfumu kuti isepano tingatumikilerini fano yanu iyi.’

Nebukadinezara padabva vimwevi adakalipa maninge. Iye adauza wanthu wake kuti: ‘Sonkhezerani uvuni maulendo 7 kuti ukhale wotentha maninge kuposha nthawe zose!’ Manje adalamula masocha yake kuti: ‘Amangeni ndipo muwathuse mu uvuni wa moto mwiyo’. Uvuni muyo wenze wotentha maninge mwakuti masocha mwayo payadandofendera pafupi yadafa nthawe mweyoletu. Aheberi atatu wale adathusiwadi mu uvuni mule. Nebukadinezara padasuzira adaona kuti mu uvuni mule mwenze wanthu 4 osati atatu. Padawona vimwevi adachita mantha maninge ndipo adabvunza wanthu wa udindo wa m’nyumba mwake kuti: ‘Tathusa wanthu atatu mu uvuni momu, Inepano ninkuona wanthu 4 ndipo munango ankuoneka ninge mngelo!’

Patsogolo pake Nebukadinezara adafika pafupi na uvuni ule nkulewa kuti: ‘Bulani imwe atumiki wa Mulungu wa m’dzulum’dzulu.’ Wanthu wose adadabwa kuona Shadireki, Misheki na Abedinego ankubula wosapsa palipose. Tsitsi, thupi komasoti vovala vawo viribe kupsa komasoti ambabvekalini ne kapfungo kamoto.

Manje Nebukadinezara adanena kuti: ‘Atamandike Mulungu wa Shadireki, Misheki na Abedinego yemwe watumiza mngelo wake kudzawapulumusa. Palibe Mulungu munango wolingana naye.’

Ko iwepo ungakhale wokhulupirika ukagumana na mabvuto ninge momwe adachitira alumbwana wachiheberi atatu mwawa?