Mngelo wa Yahova adateteza Hezekiya

Senakeribu yemwe wenze mpfumu ya Asuri, adagonjesa ufumu wa Izirayeli wa madzinza 10. Manje ambafuna pomwe kugonjesa ufumu wa Yuda wa madzinza yawiri. Iye adayamba kugonjesa mathaundi ya Ayuda, thaundi yomwe ambafunisisa yenze ya Yerusalemu. Koma Senakeribu ambadziwalini kuti Yahova ambateteza thaundi mwiyo.

Hezekiya yemwe wenze mpfumu ya Ayuda, adapasa Senakeribu kobiri zizinji kuti aleke kutenga thaundi ya Yerusalemu. Senakeribu adatambira kobiri zire koma adatumiza gulu ya masocha yake ku Yerusalemu. Wanthu wakumuko padabva kuti masocha ya Asuri yasala pang’ono kufika, adachita mantha maninge. Koma Hezekiya adawauza kuti: ‘Ayi kugopa nishuwadi kuti Asuri ni wamphanvu, koma Yahova atithandize.’

Senakeribu adatumiza Rabisake kuti ayende ku Yerusalemu kukayankhula na Ayuda. Rabisake adaima pamsuwo wa thaundi mwiyo nkukuwa kuti: ‘Wanthu imwe, Hezekiya ayi kuti akupusiseni, Yahova angakuthandizenilini. Palibe mulungu yemwe angatikangise kukuwinani.’

Hezekiya adakumbira Yahova kuti awathandize kudziwa vodekana kuchita. Yahova adadawira kuti: ‘Ayi kugopa vomwe Rabisake ankunena, Senakeribu agonjeselini Yerusalemu.’ Patsogolo pake, Hezekiya adatambira makalata yochokera kwa Senakeribu. Mukalata mwiyo mwenze mawu yakuti: ‘Ndolewani kuti mwagonja, Yahova akupulumusenilini.’ Pamwapo Hezekiya adapemphera kuti: ‘Pulizi Yahova, tipulumuseni kuti aliyese adziwe kuti imwepo ndimwe Mulungu chaiye.’ Yahova adamuuza kuti: ‘Mpfumu ya Asuri ifikelini ku Yerusalemu. Inepano niteteze thaundi yangu mweyi.’

Senakeribu ambaona kuti agonjese Yerusalemu basi. Koma usiku unango Yahova adatumiza mngelo kumalo yomwe masocha ya Asuri yambagona. Mngelo muyo adapha masocha 185,000 ndipo masocha yose yamphanvu ya Senakeribu yadamalira mwapo. Patsogolo pake Senakeribu adadziwa kuti wagonjesewa. Ndipo adandoyamba ulendo wobwerera kwawo. Pamwapa ndiye kuti Yahova adakwanirisa polomisi yake yakuti adzateteze Hezekiya komasoti thaundi yake ya Yerusalemu. Ko iwepo udakakhala ku Yerusalemu udakathemba Yahova?