Yosiya ambakonda Chilamulo cha Mulungu

Yosiya adayamba kutonga ku Yuda anamagole 8. Pa nthawe mwiyo wanthu azinji ambakonda vamantsenga ndipo ambatumikira mafano. Yosiya padakwanisa magole 16 adayesesa kupfunzira va Yahova na kumbamutumikira mu njira yobvumizika. Padakwanisa magole 20, adayamba kugwesa mafano na kuphwanya malo yose yomwe wanthu ambaperekerapo ntsembe za mafano. Ndipo padakwanisa magole 26 adakonza vakuti kachisi akonzewe.

Pakukonza kachisi muyo, nkulu wa antsembe dzina yake Hilikiya, adagumana mpukutu wachilamulo cha Yahova. Vingachitike kuti moyu wenze mpukutu chaiye yemwe Mose adanemba. Manje nkulu wa antsembe dzina yake Safani adatenga mpukutu muyo nkuyenda naye kwa Yosiya, nkuyamba kumuwerenga mokuwa. Yosiya padabva vomwe vidanembewa mu mpukutu mumo adazindikira kuti aleka kubvera Yahova kwa magole yazinji. Patsogolo pake adauza Hilikiya kuti: ‘Yahova wakalipa nase maninge, yenda ukayankhule naye kuti atiuze vofunika kuchita.’ Yahova adadawira pakuphatisira basa mneneri nkazi dzina yake Hulida ndipo adalewa kuti: ‘Ayuda asiya kutewedza malamulo yangu, niwalange shuwa. Koma nichitelini vimwevi pa nthawe ya Yosiya ndawa wadzichepesa.’

Mpfumu Yosiya padabva vimwevi adayenda kukachisi kukachemeresa Ayuda wose ndipo adawawerengera Chilamulo cha Yahova. Wose adapolomisa kuti ayambe kubvera Yahova na ntima wose.

Ayuda mwawo enze adasiya kuchita Pasika kwa magole yazinji, koma Yosiya adabva Chilamulo mwicho kuti iwo angadekana kuchita Pasika gole iriyose. Patsogolo pake adauza Ayuda mwawo kuti: ‘Naboni tichitire Yahova Pasika.’ Yosiya moyu adakonza vakuti paperekewe ntsembe zizinji komasoti kuti pakhale wanthu woimba pakachisi. Ayuda mwawo adachita Pasika ndipo patsogolo pake adachita chikondwerero cha mikate yalibe chofufumisa kwa ntsiku 7. Penze pakalibe pachitikako Pasika ninge moyu kundoyambira pomwe Samueli adamwalira, mwevi vinkuonesa kuti Yosiya ambakonda maninge Chilamulo cha Yahova. Ko iwepo ukhala wokondwa ukambapfunzira va Yahova?