Davide na Goliyati

Yahova adauza Samueli kuti: ‘Yenda ku nyumba ya Jese, mwana wake munango adzakhale mpfumu ya Izirayeli.’ Samueli adayendadi ndipo padaona mwana woyamba wa Jese adaganiza kuti: ‘Yemwe adzakhale mpfumu ire ni moyu.’ Koma Yahova adauza Samueli kuti: ‘Nimoyulini.’ Patsogo pake, adamuuza pomwe kuti: ‘Inepano niwona ntima wa munthu osati momwe munthu awonera

Jese adabweresa wana wake anango 6. Koma Samueli adalewa kuti: ‘Apa palibe aliyese yemwe Yahova wamusankhula. Ko uli na mwana munango? Jese adadawira kuti: ‘Wasala m’bodzi ng’ono maninge ankudyesera nkhosa uko.’ Davide padafika, Yahova adauza Samueli kuti: ‘Nasankhula moyu.’ Samueli adakhuthulira mafuta mu msolo mwa Davide. Vimwevi vinkutanthuza kuti adamudzoza kuti akhale mpfumu ya Izirayeli.

Panthawe inango, Aizirayeli ambamenyana na Afilisiti. Manje kusaidi ya Afilisiti mwawo kwenze chimunthu chitali komasoti cha mphanvu dzina yake Goliyati. Ntsiku iriyose Goliyati ambanyoza Aizirayeli, ambalewa kuti: ‘Tumizani munthu wakuti amenyane na inepano, akawina isepano tidzakhale akapolo wanu koma inepano nikawina imwepo mudzakhale akapolo wathu.’

Davide adafika pa malo pomwe penze masocha ya Aizirayeli na cholinga chakuti akapereke chakudya kwa azibale wake. Ali kumuko adabva vomwe Goliyati ambalewa, pamwapo Davide adalewa kuti: ‘Inepano nikamenyane naye moyu.’ Mpfumu Sauli padabva vimwevi idalewa kuti: ‘Iwepo wachepa navo.’ Davide adadawira kuti: ‘Yahova anithandize.’

Sauli adauza Davide kuti atenge vomenyera nkhondo komasoti vovala vake. Koma iye adalewa kuti: ‘Ningakwaniselini kumenya nkhondo na vinthu mwevi.’ Patsogolo pake, adandotenga chinthu chothusira minyala chochemerewa kuti nyangasikopo nkupolikira chakukamadzi. Manje adalokota minyala yake yalipo 5 yosalala bwino nkuyaikha nkatchola kake, pamwapo adayamba kuthamangira komwe kwenze Goliyati. Goliyati padamuona adalewa kuti: ‘Mwana iwe bwera nikuphe ndipo ukhale chakudya cha mbalani na vinyama.’ Davide alibe kuchita mantha ndipo adamudawira kuti: ‘Iwepo unkubwera kwa ine na chibemba komasoti dipa, koma inepano ninkubwera kwa iwepo mu dzina ya Yahova. Unkumenyanalini na isepano neye, koma na Mulungu. Lero aliyese adziwe kuti Yahova ni wamphanvu kuposha chibemba na dipa, iye atithandize kuti tikugonjeseni mose.’

Patsogolo pake, Davide adaikha mwala ule pa nyangasikopo nkuwuthusa mwamphanvu maninge. Yahova adamuthandiza maninge mwakuti mwala ule, udathamanga nkukabowola mu msolo mwa Goliyati pankuma, nthawe mwiyo Goliyati adagwa nkufa. Afilisiti padaona vimwevi, adayamba kuthawa. Ko iwepo uthemba Yahova ninge momwe Davide adachitira?