Adapolomisa kuti adzabvere Yahova

Payadapita minyezi yawiri kundochokera pomwe adachoka ku Iguputo, Aizirayeli padafika pa phiri ya Sinai adamanga misasa. Yahova adauza Mose kuti akwire m’phiri, kumuko adamuuza kuti: ‘Niwapulumuse Aizirayeli, peno anganibvere komasoti kusunga malamulo yangu, adzakhale wanthu wangu wapadera.’ Mose adabuluka m’phiri mumo kukauza Aizirayeli vose vomwe Yahova adamuuza ivo. Ko iwo adachita tani padabva vimwevi? Iwo adadawira kuti: ‘Tidzachite chirichose chomwe Yahova wanena.’

Mose adakwira pomwe m’phiri mumo. Manje Yahova adamuuza kuti: ‘Niyankhule namwe pakapita ntsiku zitatu, uchenjeze wanthu kuti ayi kuti apakire mu phiri mweyi.’ Mose adabuluka m’phiri momu nkukauza Aizirayeli kuti akonzekere kubva vomwe Yahova adzawauze.

Pazidapita ntsiku zitatu dedza adayamba kugunda, tumpheni ndipo paphiri yose mwapo penze mtambo upswipa. Kudabveka pomwe kulira kwa mphanvu kwa lupenga komasoti pa phiri mwapo penze pomwe moto woonesa kuti Yahova wenze mwapo. Aizirayeli adachita mantha maninge mwakuti adayamba kunjenjemera. Phiri yose mweyo imbabula utsi ndipo imbagunduzika maninge komasoti zungo ya lupenga ire imbaingizirikaingizirika. Manje Mulungu adalewa kuti: ‘Inepano ndine Yahova, ayi kumbatumikira milungu yanango.’

Mose adapakira pomwe m’phiri mule ndipo Yahova adamupasa pomwe malamulo yakuti wanthu mwawo ambayatewedze pakumutumikira komasoti pakuchita vinthu va ntsiku na ntsiku. Mose adanemba malamulo mwayo nkukayawerenga kwa Aizirayeli. Iwo adamupolomisa kuti: ‘Tidzachite vose vomwe Yahova wanena.’ Aizirayeli mwawo adapolomisa kuti ambabvere Mulungu. Manje ko iwo adachitadi vimwevo?