Aizirayeli alibe kutewedza vomwe adapolomisa

Yahova adauza Mose kuti: ‘Pakira m’phiri muno kuti nidzanembe malamulo yangu paminyala nkukupasa.’ Mose adakwira m’phiri mumo ndipo adakhala mumo kwa ntsiku 40. Ali kumuko Yahova adanemba malamulo 10 pa minyala yawiri nkumupasa.

Paidapita nthawe, Aizirayeli ambaganiza kuti Mose wawathawa. Patsogolo pake adauza Aroni kuti: ‘Tinkufuna ntsogoleri munango kuti atikonzere mulungu.’ Aroni adawauza kuti: ‘Munipase golide wanu.’ Pamwapo adasungunula golide moyu nkukonza chifano cha mwana wa ng’ombe. Patsogolo pake Aizirayeli mwawo adalewa kuti: ‘Moyu ndiye mulungu yemwe adatipulumusa ku Iguputo.’ Ndipo iwo adayamba kutumikira fano ya mwana wa ng’ombe ndipo adachita mwambo woonesa kukondwa. Pamwapa adaphonya maninge ndawa yakuti iwo adapolomisa kuti adzatumikire Yahova yekha, koma ndivolini vomwe adachita.

Yahova ambaona vomwe vimbachitika ivi ndipo adauza Mose kuti: ‘Yenda ukaone vomwe wanthu wale ankuchita. Iwo asiya kunibvera ndipo ankutumikira mulungu wabodza.’ Mose adanyamuka ali takule minyala yawiri yale.

Padafendera, adabva wanthu ankuimba komasoti ambawaona ankuvina na kugwadira mwana wa ng’ombe. Pamwapa Mose adakalipa maninge ndipo adathusira pasi minyala yawiri yale nkuphwanyika. Nthawe mwiyo adashoka fano mwiyo na kuipeyapeya. Patsogolo pake, adamubvunza Aroni kuti: ‘Ko shuwadi iwepo wabvera wanthu mwawa nkukonza chinthu choipa tene?’ Pamwapo Aroni adadawira kuti: ‘Pepani ayi kunikalipira, munkudziwa bwino momwe wanthu mwawa aliri. Iwo ambafuna mulungu ndipomwapa nandoikha golide pamoto nkukonza kang’ombe mwaka.’ Koma Aroni ambafunikalini kuchita vimwevi. Mose adayenda pomwe m’phiri mule nkukakumbira Yahova kuti awakhululukire wanthu mwawa.

Yahova adakhululukira wanthu wose womwe adalapa nkuyamba pomwe kumubvera. Pamwapa Aizirayeli ambafunika kubvera vinthu vose vomwe Mose ambawauza