Pfunzirani kulemekeza Mulungu ninge Obadiya

Obadiya wenze wonyang’anira nyumba ya Mpfumu Ahabu. Mpfumu yankhanza mwiyi ni yomwe idachitisa kuti kutumikira Baala kufalikire mu Izirayeli. Kuyambira ali m’ng’ono Obadiya ambalemekeza maninge Yahova ndipo ambagopa kukwinyirisa Yahova. (1 Maf. 18:1-13) Pomwe Yezebeli adalamula kuti aneneri wose wa Yahova aphewe, Obadiya adadziwa kuti ankufunika kulimba ntima na kuchitapo kanthu kuti awathandize. Obadiya adawonesa kulimba ntima pomwe adabisa aneneri 100 na kuwapasa chakudya olo kuti mudziko mumo mwenze njala ikulu maninge. Ndoganizirani mwevenzere voshupa kuti Obadiya akwanise kunyengerera aneneri wose wabodza wa Yezebeli.—1 Maf. 18:19.

Ko tinkupfunzira chani na munthu muyu yemwe ambagopa Yahova? Nishuwadi kuti Obadiya ambagopa Ahabu, koma iye ambagopa maninge Yahova. Vimwivi vidamuchitisa kulimba ntima nkuikha moyo wake pangozi kuti ateteze atumiki wa Yahova. Peno tikukhala mudera yomwe kutumikira Yahova ni kolambiziwa, tifunika kupitiriza kugopa Yahova. Khalidwe mwiyi idzatipase mphanvu yothandiza abale na alongo omwe ankugumana na mabvuto.