NKHANI YOPFUNZIRA 19
NYIMBO NA. 6 Kumwamba Kumalengeza Ulemelero wa Mulungu
Tewedzerani chitsanzo cha angelo okhulupirika
‘Tamandani Yahova imwe angelo wake ose.’—SAL. 103:20.
CHOLINGA
Kuona vitsanzo vomwe tingapfunzire kwa angelo okhulupirika.
1-2. (a) Ko tisiyana na angelo pa vinthu viponi? (b) Ko tilingana na angelo pa vinthu viponi?
NINGE atumiki wa Yahova, isepano tiri m’banja yokondana maninge yomwe imutumikira. Banja mweyi inkuphatanidzapo abale na alongo padziko yose komasoti mamidyau yazinji ya angelo. (Dan. 7:9, 10) Tikambaganizira va angelo, kazinjikazinji tindoganizira kuti iwo ni osiyana na isepano. Mwakulinganiza, angelo akhala magole mamidyau yazinji kuposha isepano. (Yobu 38:4, 7) Iwo ni wamphanvu, ochena komasoti wachilungamo kuposha isepano ndawa yakuti ndise ochimwa.—Luka 9:26.
2 Olo kuti viri teno, pa na vinthu vomwe isepano tilingana maninge na angelo. Mwakulinganiza, tingatewedzere makhalidwe yabwino ya Mulungu ndipo tinaufulu ninge angelo. Ninge isepano, mngelo aliyese ana dzina yake komasoti makhalidwe. Ndipo iwombo ana mautumiki yosiyanasiyana pa kutumikira Yahova. Tose tinavifukwa vobveka votumikirira Yahova.—1 Pet. 1:12.
3. Ko tingapfunzire chani kwa angelo?
3 Ndawa yakuti tilingana na angelo pa vinthu vizinji, chitsanzo chawo chabwino chingatilimbikise na kutipfunzisa vinthu vizinji maninge. Munkhani mweyino, tione vomwe tingachite kuti titewedzere kudzichepesa kwa angelo okhulupirika. Nakuona momwe tingatewedzerere makhalidwe yawo ninge kukonda wanthu, kupirira kwawo komasoti khama yomwe achita kuti mpingo umbakhale wochena.
ANGELO OKHULUPIRIKA NI ODZICHEPESA
4. (a) Ko angelo aonesa tani kudzichepesa? (b) Ndawa chani angelo ni odzichepesa? (Salimo 89:7)
4 Podiya kuti iwo adziwa vizinji, anamphanvu komasoti nzeru, abvera malangizo ya Yahova. (Sal. 103:20) Pakukwanirisa mautumiki yawo, iwo adzioneseralini panango kudzikuza ndawa ya mphanvu zawo, koma achita vose vomwe Yahova wawakumbira mokondwa olo kuti anango atomolewalini madzina.a (Gen. 32:24, 29; 2 Maf. 19:35) Ndipo iwo alamba kutambira ulemerero wose womwe ungadekane kupasiwa Yahova. Ko ndawa chani angelo ni odzichepesa? Ni ndawa yakuti akonda Yahova ndipo amulemekeza kuchokera pasi pa ntima.—Werengani Salimo 89:7.
5. Ko mngelo munango adaonesa tani kudzichepesa pomwe ambatsumula ntumi Yohani ? (Onani pomwe foto.)
5 Naboni tione chitsanzo chibodzi chowonesa kudzichepesa kwa angelo. Cha m’ma 96 Yesu wayenda kale kudzulu, mngelo munango yemwe timudziwalini dzina yake, adawonesa ntumi Yohani masomphenya ya vinthu chaivo koma vopasa mantha. (Chiv. 1:1) Ko Yohani adachita tani pomwe adaona masomphenya mwaya? Iye ambafuna kumugwadira ngelo moule. Koma cholengewa chokhulupirika chauzimu mwechi, mwakankulumize chidamulambiza nkumuuza kuti: “Samala! Ayi kuchita vimwevo! Ine nandokhala kapolo munzako na wa abale wako . . . tumikira Mulungu.” (Chiv. 19:10) Umoyu ni m’dawiro wodzichepesa maninge. Mngelo moyu ambafunalini kupasiwa ulemu panango kutumikiriwa. Iye mwakankulumize adauza Yohani kuti alemekeze Mulungu. Pa nthawe ibodzibodzi mweyo, iye ambadzionalini kuti niwodekana maninge kuposha Yohani. Olo kuti mngelo moyu wenze adamala magole yazinji ankutumikira Yahova komasoti kuti ni wamphanvu maninge kuposha Yohani, modzichepesa iye adadzilinganiza na ntumi moyu kuti ni kapolo munzake. Olo kuti mngelo moyu adamutsumula Yohani, iye alibe kumutsumula mwaukali panango monyoza. Koma iye adayankhula mokoma ntima. Mosakaika iye adabvesa kuti Yohani ambafuna kuchita vimwevi ndawa yakuti ambachita chidwi komasoti wenze na mantha na masomphenya mwaya.
Mngelo modzichepesa ankuyankhula na Yohani na kumutsumula (Onani ndime 5)
6. Ko tingatewedzere tani kudzichepesa kwa angelo?
6 Ko tingatewedzere tani kudzichepesa kwa angelo? Tingachite vimwevi pakukwanirisa mautumiki yathu mosadzikuza panango kufuna kutambira ulemu na vomwe takwanisa kuchita. (1 Akor. 4:7) Kuingizira pamwapa, tichadekanalini kumbadziona kuti ndise wapadzulu maninge kuposha anango ndawa yakuti takhala tinkutumikira Yahova kwa magole yazinji panango ndawa yakuti tinaudindo unango. Ndipomwapa, tikambatambira mautumiki yazinji tichadekana pomwe kumbadzichepesa maninge. (Luka 9:48) Tinkufuna kutumikira anango ninge angelo. Koma tichadekanalini kuchita vinthu vakuti anango ambatione kuti ndise odekana maninge kuposha iwo.
7. Ko tingaonese tani kudzichepesa peno tinkufuna kutsumula panango kupereka malangizo kwa munthu?
7 Tichadekana pomwe kuonesa kudzichepesa peno tinkufuna kutsumula panango kupereka malangizo kwa munthu munango, olo akhale m’bale wa mumpingo panango wana. Nthawe zinango tingafunike kupereka malangizo molimba ntima. Koma ninge mngelo yemwe adatsumula Yohani mokoma ntima, tingaonese kukoma ntima pakusachitisa munthu yemwe tinkumupasa malangizo kudziona kuti ni wosafunika. Tikambadziona kuti ndiselini wapadzulu maninge kuposha anango, tidzakwanise kupereka malangizo yochokera m’Baibolo, mwaulemu komasoti mwachikondi.—Akol. 4:6.
ANGELO AKONDA MANINGE WANTHU
8. (a) Mobverana na lemba ya Luka 15:10, ko angelo aonesa tani kuti akonda wanthu? (b) Ni udindo uponi womwe angelo anawo pa basa yolalikira? (Onani pomwe foto )
8 Angelo alilini kutali na wanthu. Iwo akonda maninge wanthu. Ndipo akondwa maninge peno munthu yemwe wachita chimo ikulu maninge walapa. Panango munthu yemwe wenze adasiya kutumikira Yahova wayamba pomwe kumutumikira. Ndipo akondwa munthu akapfunzira mawu ya Yahova na kuchinja vinthu vinango pa moyo wake kuti amutumikire. (Werengani Luka 15:10.) Angelo athandiza pomwe pa basa yolalikira. (Chiv. 14:6) Podiya kuti alalikiralini sitiriti kwa wanthu, iwo angatsogolere wofalisa kuti akayankhule na munthu yemwe ankufuna kupfunzira va Yahova. Nishuwadi kuti tinganenelini motsimikiza pa vinthu vomwe angelo athandiza. Inde, ndawa yakuti Yahova angaphatise basa njira zinango panango mzimu uchena pakuthandiza wanthu na kutsogolera atumiki wake. (Mac. 16:6, 7) Olo viri teno, Yahova aphatisa basa angelo kuti atithandize tikambalalikira. Ndipomwapa, tikambalalikira va ntontholo wabwino, tidekana kutsimikizira kuti angelo akhalambo pamwapo kuti atithandize.—Onani bokosi yakuti: “Mapemphero yawo yadadawiriwa.”b
Banja inango inkuyenda kumuyi pomwe inkuchokera kukalalikira pa kuphatisa basa kasherufu. Mulongo ankunyang’ana ntsikana munango yemwe ankuoneka kuti ni wokhumudwa maninge. Pamwapo ankukumbuka kuti angelo atitsogolera kwa wanthu omwe ankufunika thandizo yauzimu. Iye ankufenderera ntsikana moyu ndipo ankuyankhula naye mokoma ntima (Onani ndime 8)
9. Ko tingatewedzere tani angelo pa kuonesa chikondi kwa wanthu?
9 Ko tingatewedzere tani angelo nkumbakonda wanthu? Tikabva chilengezo chakuti m’bale munango wabwezeresewa, isepano tingakhale okondwa ninge momwe angelo akhalira okondwa. Tidekana kuchita vomwe tingakwanise kuti timuonese kuti timukonda. (Luka 15:4-7; 2 Akor. 2:6-8) Tingatewedzere pomwe angelo pakuchita vomwe tingakwanise mu umboni. (Mla. 11:6) Ninge momwe angelo athandizirira basa yathu, tidekana kunyang’ana njira zomwe tingathandizirire abale na alongo wathu mu umboni. Mwakulinganiza, ko tingapangane na wofalisa yemwe alibe luso kuti tiyende naye mu umboni? Panango ko tingathandize abale na alongo wachikulire na odwala kuti iwo ambagumanikembo mu umboni?
10. Ko tinkupfunzira chani pa chitsanzo cha Sara?
10 Nthawe zinango vingachitike kuti isepano tinkuchitalini vose vomwe tinkufuna pakutumikira Yahova ndawa ya momwe vinthu viliri pa moyo wathu. Olo viri teno, tingagumane njira zinango zomwe zingatithandize kuti timbaphate basa pabodzi na angelo mu umboni. Onani chitsanzo cha mulongo munango wa ku India dzina yake Sarac. Patsogolo pakuti watumikira ninge mpainiya kwa magole 20, Sara adayamba kudwala. Iye ambakwanisalini kufamba ndipo adakhumudwa maninge. Koma ndawa yathandizo ya abale wake wauzimu na kuwerenga Baibolo, pang’onopang’ono Sara adayamba kuchinja momwe angawonera vinthu. Nivobveka kuti iye ambadekana kuchinja njira zolalikirira nkumbaphatisa basa njira zinango zinyowani. Ndawa yakuti ambakwanisalini kukhala pasi kuti anembe kalata, iye ambandolalikira pakuphatisa basa foni. Adayamba kufonera maulendo yake yobwereza, ndipo maulendo yake yobwereza mwaya, yambamupasa pomwe namba zinango za wanthu omwe angakhalembo na chidwi nkufuna kuyankhula naye. Ko phindu yenze iponi? Kwa minyezi yang’onong’ono Sara wenze na mapfunziro ya Baibolo yokwana 70. Mapfunziro mwaya yenze yazinji maninge yomwe iye adakakwanisalini kumbapfunzira nawo ose. Ndipo iye adatenga mapfunziro yanango nkupasa abale mumpingo. Yazinji mwamapfunziro mwaya manjeuno yankugumanika pa misonkhano. Angelo akhala okondwa maninge kuphata basa pabodzi na abale na alongo ninge Sara yemwe ankuchita vose vomwe angakwanise mu umboni.
ANGELO APIRIRA
11. Ko ni pa vochitika viponi pomwe angelo adaonesa kupirira?
11 Angelo okhulupirika ni chitsanzo chabwino maninge pa nkhani yopirira. Iwo ambadekana kupirira vinthu vosowa chilungamo na vinthu voipa kwa magole yazinji. Adaona Satana na angelo azinji omwe pakuyamba ambatumikira nawo pabodzi ankupandukira Yahova. (Gen. 3:1; 6:1, 2; Yuda 6) Baibolo, inena va mngelo munango wokhulupirika yemwe adatsutsiwa mwasitiriti na chiwanda chinango champhanvu. (Dan. 10:13) Kuingizira pamwapa, kwa magole yazinji angelo waona mamidyau yazinji ya wanthu ankulamba kutumikira Yahova. Na vose vimwevi angelo okhulupirika mwawa ankupitiriza kutumikira Yahova mokondwa komasoti mwakhama. Iwo ankudziwa kuti pa nthawe chaiyo Yahova adzamalise kusowa chilungamo.
12. Ko nchani chomwe chidzatithandize kupirira?
12 Ko tingatewedzere tani kupirira kwa angelo? Ninge angelo isepano tiona vinthu vizinji vosowa chilungamo komasoti titsutsiwa. Koma ninge iwo titsimikiza kuti pa nthawe chaiyo Yahova adzachose vinthu voipa. Ndipomwapa, tichadekana kutewedzera angelo okhulupirika ndipo “ayi kuti tisiye kuchita vabwino.” (Agal. 6:9) Mulungu ankutipolomisa kuti adzatithandize kupirira. (1 Akor. 10:13) Tingapemphere pomwe kwa Yahova kukumbira mzimu uchena. Vimwevi vidzatithandize kuti tikhale odekha na okondwa. (Agal. 5:22; Akol. 1:11) Manje tani peno wanthu anango ankukutsutsani? Thembani Yahova ndipo ayi kuchita mantha. Nthawe zose Yahova adzakulimbiseni na kukuthandizani.—Aheb. 13:6.
ANGELO ATHANDIZA KUTI MPINGO UKHALE WOCHENA
13. Ko ni utumiki uponi wapadera womwe angelo anawo ntsiku zomalizira zino? (Mateyu 13:47-49)
13 Yahova wapereka udindo wapadera kwa angelo ntsiku zomalizira zino. (Werengani Mateyu 13:47-49.) Basa yolalikira ithandiza wanthu mamidyau yazinji maninge padziko yapasi. Anango mwa wanthu mwawa achinja vinthu pa moyo wawo kuti ayambe kutumikira Yahova koma anango achitalini vimwevi. Angelo adapasiwa udindo “wosiyanisa wanthu wabwino na oipa.” M’mawu yanango, tinganene kuti iwo adapasiwa udindo wothandiza mpingo kukhala wochena. Koma vimwevi vinkutanthauzalini kuti munthu aliyese yemwe angachoke mumpingo ndawa ya vifukwa vinango angabwererelini pomwe. Ndipo vinkutanthauzalini pomwe kuti mipingo ingakhaliretu iribe mabvuto. Olo viri teno isepano tingatsimikizire kuti angelo ankuphata basa mwakhama kuti athandize mipingo kukhala yochena.
14-15. Ko tingatewedzere tani angelo pa nkhani ya kudera nkhawa kuti mpingo ukhale wochena? (Onani pomwe foto.)
14 Ko tingatewedzere tani chitsanzo cha angelo pa nkhani ya kuchenesa mpingo? Tingachite vimwevi mwa kuyesesa kuchita vomwe tingakwanise pa kuthandiza mpingo kuti ukhale wochena mwauzimu. Pakuchita vimwevi isepano tiyesesa mwakhama kuteteza ntima wathu. Tingachite vimwevi pa kusalula azishamwali omwe akonda Yahova na kukhala kutali maninge na vinthu voipa vomwe vingatichitise kusiya kutumikira Yahova. (Sal. 101:3) Tingathandize pomwe abale wathu kuti apitirize kukhala okhulupirika kwa Yahova. Mwakulinganiza, ko mudekana kuchita chani peno mwazindikira kuti m’bale munango wachita chimo ikulu? Ndawa ya chikondi chomwe tinacho kwa munthu muyo, chinthu chodekana maninge chomwe tingachite ni kumulimbikisa kuti akaulule kwa akulu. Koma peno alibe kuchita vimwevi, tichadekana kuuza akulu vomwe vachitika. Tinkufuna kuti munthu aliyese yemwe ankufuna thandizo yauzimu, athandiziwe mwakankulumize maninge.—Yak. 5:14, 15.
15 Chobvesa ntsisi ni chakuti anango achita machimo yakuluyakulu ndipo nthawe zinango achosewa mumpingo. Vimwevi vikachitika isepano “tisiya kuchita naye vinthu pabodzi” munthu moyu.d (1 Akor. 5:9-13) Vimwevi vithandiza kuti mpingo ukhale wochena. Kuingizira pamwapa, tikaleka kuchita naye vinthu pabodzi munthu moyu tionesa kukoma ntima kwa iye. Ndawa chani? Ndawa yakuti vimwevi vingathandize munthu muyo kuwona kuti adekana kubwerera pomwe kwa Yahova. Iye akachita vimwevi, isepano, Yahova pabodzi na angelo tikhala okondwa maninge.—Luka 15:7.
Ko tichadekana kuchita chani tikadziwa kuti m’bale panango mulongo wachita chimo ikulu? (Onani ndime 14)e
16. Ko ni mwanjira iponi momwe tinkufunika kutewedzerera angelo?
16 Nimwayi ukulu maninge kudziwako vokhudza angelo komasoti kuphata nawo basa pabodzi. Ndipomwapa, tichadekana kutewedzera maninge chitsanzo chawo na makhalidwe yawo ninge kudzichepesa, kukonda wanthu, kupirira komasoti kudera nkhawa mpingo kuti ukhale wochena. Tikatewedzera angelo okhulupirika, isembo tidzachite mbali ya banja ya wanthu omwe atumikira Yahova mpakana kalekale.
NYIMBO NA. 123 Tizigonjera Mulungu Mokhulupirika
a Pa na mamidyau yazinji ya angelo, koma Baibolo indonenako madzina yawiri basi Mikayeli na Gabrieli.—Dan. 12:1; Luka 1:19.
b Imwepo mungagumane vitsanzo vizinji va angelo mu Índice das Publicações da Torre de Vigia pa mawu yakuti “Anjo” na paka msolo kakuti “direção angélica (exemplos).”
c Madzina yanango yachinjiwa.
d Ninge momwe idanenera lipoti ya Bungwe Yotonga ya 2024 namba 2, abale na alongo angaphatise basa chikumbuntima chawo chopfunzisiwa bwino Baibolo kuti aone peno angamupase moni wachigwato munthu wochosewa na kutambira bwino wanthu omwe adachosewa mumpingo akakhala kuti wabwera ku misonkhano.
e MAWU YOFOTOKOZERA MAFOTO: Mulongo munango ankucheza na shamwali wake ndipo ankumulimbikisa kuti akayankhule na akulu. Koma patsogolo pake iye ankuzindikira kuti shamwali wake moyu akalibe kuyankhula na akulu. Ndipo iye ankuuza akulu vomwe vachitika.