NKHANI YOPFUNZIRA 18
NYIMBO NA. 65 Pita Patsogolo
Abale wachilumbwana, tewedzerani chitsanzo cha Maliko na Timoteyo
“Ubwere pomwe na Maliko ndawa anithandiza pa utumiki wangu.”—2 TIM. 4:11.
CHOLINGA
Kuona chitsanzo cha Maliko na Timoteyo momwe chingathandizire abale wachilumbwana kuti akulise makhalidwe yomwe yangawathandize kuti ambatumikire anango.
1-2. Ko nchani chomwe chidakakangisa Maliko na Timoteyo kuchita vizinji pa kutumikira Yahova?
WACHILUMBWANA, ko munkufuna kuchita vizinji pakutumikira Yahova, na kumbathandiza anango mumpingo? Tinkutsimikiza kuti inde. Tikomedzewa kuona abale wachilumbwana azinji, ankudzipereka kuti ambatumikire anango. (Sal. 110:3) Panango mungawone ninge kuchita vimwevi ni koshupa. Ko mukhala na nkhawa mukaganizira kuchita vizinji pa kutumikira Yahova ndawa yakuti munkudziwalini momwe vimwevi vingakhudzire moyo wanu? Ko panango mudalamba kale utumiki unango ndawa yoganiza kuti mungakwaniselini? Imwepo ndimwelini woyamba kubva tene.
2 Maliko na Timoteyo, vidawachitikirambo vimwevi. Koma iwo alibe kubvuma kuti mantha na kusadziwa vinthu vizinji kuwakangise kuchita vinthu vizinji pa kutumikira Yahova. Panango vingachitike kuti Maliko ambakhala pabodzi na amayi wake m’nyumba yokhuza maninge, pomwe ntumi Paulo na Baranaba adamukumbira kuti awaperekeze pa ulendo wawo wa umishonale. (Mac. 12:12, 13, 25) Maliko, adasiya banja yake kuti achite vinthu vizinji pa basa yolalikira. Chakuyamba iye adafulukira ku Antiokeya, patsogolo pake adayenda na Paulo pabodzi na Baranaba ku mbuto zinango zakutali. (Mac. 13:1-5) Vinkuoneka pomwe kuti Timoteyo ambakhala pabodzi na azibereki wake, pomwe adakumbiriwa na Paulo kuti amuperekeze pa ulendo wake wa kukalalikira. Ndawa yakuti wenze mulumbwana komasoti wosadziwa vinthu vizinji, Timoteyo adakadzibva kuti wenze wosayenerera pa utumiki moyu. (Onani pomwe 1 Akorinto 16:10, 11 na 1 Timoteyo 4:12.) Olo nteno, iye adabvuma kuyenda na Paulo ndipo adakhala wokondwa ndawa yotumikira Yahova.—Mac. 16:3-5.
3. (a) Ko tinkudziwa tani kuti Paulo ambakonda maninge Maliko na Timoteyo? (2 Timoteyo 4:6, 9, 11) (Onani pomwe mafoto.) (b) Ko ni mibvunzo yaponi yomwe tidawire mu nkhani ino?
3 Maliko na Timoteyo, adapfunzira vinthu vizinji ndipo adapfunzira pomwe momwe angasamalirire maudindo yakuluyakulu akali wachilumbwana. Paulo ambaona kuti alumbwana mwawa ni odekana maninge. Magole yanganani patsogolo pake pomwe wenze adasala pang’ono kufa, adawakumbira kuti akamuone. (Werengani 2 Timoteyo 4:6, 9, 11.) Ko nimakhalidwe yaponi yomwe Paulo adaona kwa Maliko na Timoteyo? Ko wachilumbwana angatewedzere tani chitsanzo chawo? Ko malangizo ya Paulo yomwe yenze ninge ya baba wachikondi, yangathandize tani wachilumbwana?
Paulo ambakonda maninge Maliko na Timoteyo ndawa yakuti adabvuma maudindo yakuluyakulu ali alumbwana (Onani ndime 3)b
KHALANI NINGE MALIKO PAKUPHATA BASA MWAKHAMA PAKUTUMIKIRA YAHOVA NA ANANGO
4-5. Ko Maliko adaonesa tani kuti wenze wokonzeka kutumikira anango?
4 Mobverana na bukhu inango yofufudzira nkhani, kutumikira anango kuphatanidzapo “kutsogolera mwakhama komasoti kulimbikira.” Olo panango kuti kuchita khama pakuthandiza anango, na kupitiriza kuwathandiza olo pa nthawe yoshupa. Maliko wenze chitsanzo chabwino pa nkhani mweyi. Ndipo panango iye adakhumudwa pomwe Paulo alibe kufuna kuyenda naye pa ulendo wake wachiwiri wa umishonale. (Mac. 15:37, 38) Koma vimwevi viribe kuchitisa kuti Maliko asiye kupitiriza kutumikira anango.
5 Maliko adayenda kukatumikira na m’bale wake Baranaba ku malo yanango. Patsogolo pa magole 11 pomwe Paulo wenze mudjeri ku Roma, ndipo ambadekana thandizo, Maliko wenze naye pabodzi kuti amulimbikise. (Filim. 23, 24) Thandizo mweyi yenze yodekana maninge kwa Paulo, mwakuti iye adafika pakunena kuti: “Anilimbikisa maninge.”—Akol. 4:10, 11.
6. Ko ndawa chani venze vabwino kwa Maliko kukhala pabodzi na wanthu odziwa vizinji? (Onani mawu ya m’nyantsi.)
6 Maliko adakhala pomwe nthawe ikulu na Akhrisitu anango okhulupirika. Ndipomwapa, iye adadziwa vinthu vizinji maninge. Mwakulinganiza, patsogolo pakuti wakhala pabodzi na Paulo ku Roma, iye adayenda ku Babulo ndipo adakaphata basa pabodzi na ntumi Petulo. Ushamwali wawo udakhala wolimba maninge mwakuti Petulo adamuchemera kuti “mwana wangu.” (1 Pet. 5:13) Pomwe ambaphata basa pabodzi, ni vosakaikisa kuti Petulo adamufotokozera bwinobwino mulumbwana moyu, vinthu vochitisa chidwi vokhudza moyo wa Yesu na utumiki wake. Patsogolo pake Maliko adanemba vinthu vimwevi mu bukhu yake ya ntontholo wabwino.a
7. Ko m’bale Seung-Woo adatewedzera tani chitsanzo cha Maliko? (Onani pomwe foto.)
7 Maliko ambachita khama maninge pa kutumikira Yahova, ndipo nthawe zose ambakhala pabodzi na abale odziwa vinthu vizinji. Ko imwepo mungatewedzere tani chitsanzo chake? Panango imwepo munkufuna kuchita vinthu vizinji pa kutumikira Yahova. Kukhala ntumiki wothandiza panango nkulu, koma mukalibe mwayenerera maudindo mwaya. Koma peno vimwevi vinkukuchitikirani ayi kufoka. Khalani odekha ndipo fagani njira zinango zotumikirira Yahova komasoti abale na alongo mumpingo. Onani vomwe vidachitikira Seung-Woo, yemwe ankutumikira ninge nkulu. Pomwe wenze mulumbwana ambadzilinganiza na abale anango wachilumbwana. Anango mwaiwo ndiwo adayamba kuyenerera maudindo iye akanati. Iye ambaganiza kuti adayebwewa ndipo ambakhala wokhumudwa. Pakumalizira pake iye adauza akulu momwe angabvera. Nkulu munango adamuuza kuti iye achadekana kuchita vose vomwe angakwanise pa kutumikira anango olo kuti palibe munthu yemwe angaone vomwe iye ankuchita. Iye adatewedzera malangizo mwaya ndipo adayamba kuthandiza abale wachikulire omwe ambadekana kuthandiziwa pa kuyenda ku misonkhano. Pa kukumbukira nthawe mweyo, iye adanena kuti: “Nidabvesa tanthauzo ya kutumikira anango. Nidaona pomwe kuti kuthandiza anango kubweresa chimwemwe chikulu.”
Ko ndawa chani ni vabwino alumbwana kumala nthawe ikulu na abale omwe adziwa vizinji? (Onani ndime 7)
TEWEDZERANI TIMOTEYO PAKUONESA KUTI MUDERA NKHAWA ANANGO
8. Ko ndawa chani Paulo adasalula Timoteyo kuti ayende naye pa ulendo wake? (Afilipi 2:19-22)
8 Paulo ambadekana abale anango olimba ntima kuti amuperekeze m’manthaundi yanango yomwe wenze adalimbana kale na chidzudzo. Pakuyamba, iye adasalula m’bale munango dzina yake Sila. Yemwe ambatumikira kale Yahova kwa magole yazinji. (Mac. 15:22, 40) Patsogolo pake iye adakumbira pomwe Timoteyo kuti ayende naye pabodzi pa ulendo moyu. Ko ndawa chani Paulo adasalula Timoteyo? Chifukwa chibodzi ni chakuti Timoteyo wenze na mbiri yabwino. (Mac. 16:1, 2) Kuingizira mwapa, iye ambadera nkhawa maninge anango.—Werengani Afilipi 2:19-22.
9. Ko nchani chinkuonesa kuti Timoteyo ambadera nkhawa abale?
9 Kundochokera pomwe adayamba kufamba na Paulo, Timoteyo ambaonesa kuti ambadera nkhawa maninge anango kuposha iye yekha. Ndipomwapa, Paulo ambathemba kuti iye adzasamalire bwino opfunzira anyowani pomwe adamusiya ku Bereya. (Mac. 17:13, 14) Sila pomwe adakhala ku Bereya. Ndipo mosakaika Timoteyo adapfunzira vizinji na chitsanzo chake. Patsogolo pake Paulo adatumiza Timoteyo ku Tesalonika kuti akalimbikise abale wa mu thaundi mweyi koma pa nthawe mweyi Timoteyo adayenda yekha. (1 Ates. 3:2) Magole 15 pomwe iye wenze kumoku, adapfunzira kuikha pa malo yoyamba vosowa va abale na alongo omwe ambabonera, pa ‘kulira na wanthu omwe ankulira.’ (Aro. 12:15; 2 Tim. 1:4) Ko Akhrisitu wachilumbwana ntsiku zino angatewedzere tani Timoteyo?
10. Ko m’bale Woo Jae adapfunzira tani kudera nkhawa anango?
10 M’bale munango dzina yake Jae adapfunzira kudera nkhawa anango. Pomwe wenze mulumbwana, iye ambaona kuti ni voshupa kumbacheza na abale wachikulire. Iye ambawapasa moni abale mwawa pa misonkhano, koma ambaimalini kuti acheze nawo vinthu vizinji. Pamwapo nkulu munango adamuthandiza Jae kuti ambawauze abale vomwe vimuchitisa kuti ambawakonde. Vomwe vidakachitisa kuti ambamale nthawe ankucheza nawo. Nkulu moyu adamuuza pomwe kuti akumbukire nkhani zomwe zingapase chidwi wanthu anango. Jae yemwe ni nkulu manjeuno, adatewedza malangizo mwaya. Iye adanena kuti: “Manjeuno, nishupikalini kuyambisa macheza na wanthu wa misinkhu yose. Ni vokomedza kuwadziwa bwino abale wathu na mabvuto yomwe ankugumana nayo. Kudziwa vomwe abale ankudekana pa moyo wawo vichitisa kuti tikwanise kuwathandiza.”
11. Ko alumbwana angachite tani kuti ambachite chidwi na abale mumpingo? (Onani pomwe foto.)
11 Imwepo wachilumbwana, mungapfunzirembo kudera nkhawa anango. Pa misonkhano mbachezani na wanthu wa makhaindi yose na misinkhu yosiyanasiyana. Abvunzeni va umoyo wawo ndipo abvesereni mwatcheru. Mwanjira mweyi mudzadziwe momwe mungawathandizire. Mwakulinganiza, panango imwepo mungazindikire kuti banja inango yachikulire inkudekana thandizo kuti akwanise kuphatisa basa aplikativo ya JW Library, olo panango mwazindikira kuti iwo alibe munthu wowaperekeza pa kuyeda mu umboni. Ko mungachite chinthu chirichose kuti muwathandize pa chochitika mwechi? Mukakhala woyamba kuthandiza abale na alongo wanu, mudzakhale chitsanzo chabwino mumpingo.
Abale wachilumbwana, angathandize mpingo munjira zizinji maninge (Onani ndime 11)
MALANGIZO YA PAULO YANGAKUTHANDIZENI
12. Ko alumbwana angachite tani kuti apfunzire na malangizo yomwe Paulo adapasa Timoteyo?
12 Ninge momwe baba wachikondi achitira na mwana wake, Paulo adapasa malangizo yothandiza Timoteyo, yomwe yadamuthandiza kukhala wokondwa na kuchita vizinji pa kutumikira Yahova. (1 Tim. 1:18; 2 Tim. 4:5) Peno imwepo ndimwe mulumbwana, malangizo ya Paulo yangakuthandizenimbo. Ko mwanjira iponi? Werengani makalata yawiri yomwe Paulo adanembera Timoteyo, nkukhala ninge adanembera imwepo. Ndipo onani vomwe mungaphatise basa pa moyo wanu. Onani vitsanzo vinango.
13. Ko tingakulise tani ushamwali wathu na Yahova?
13 “Umbadzipfunzise na cholinga chakuti upitirize kukhala wodzipereka kwa Mulungu.” (1 Tim. 4:7b) Ko kukhala wodzipereka kwa Mulungu kutanthauza chani? Ni kukhala pa ushamwali wolimba na Yahova na kukhala na chikhumbo chofuna kuchita vinthu vomukondweresa. Isepano, tibadwalini na khalidwe mweyi. Ndipomwapa, tidekana kuchita khama kuti tikhale nayo. Ko tingachite tani vimwevi? Mawu ya Chigiriki yomwe yadatsumbudzuliriwa kuti ‘umbadzipfunzise,’ kawiri kawiri yambaphatisiwa basa pakulewa va wanthu omwe ambachita mpikisano wothamanga. Wanthu mwaya ambadekana kuchita vinthu vomwe vikadawathandiza kuwina mpikisano. Iwo ambafunika kupfunzisiwa komasoti kukhala na chizolowezi chabwino kuti akwanise kuwina mpikisano. Ntsiku zinombo, tidekana kupfunzisiwa kukhala na vizolowezi vabwino vomwe vingalimbise ushamwali wathu na Yahova.
14. Ko cholinga chathu chidekana kukhala chiponi pomwe tinkuwerenga Baibolo? Perekani chitsanzo.
14 Chizolowezi chinango chomwe ni chodekana maninge chomwe tinkudekana kukhala nacho, ni kumbawerenga Baibolo ntsiku zose. Mbakumbukirani kuti cholinga chomwe muwerengera Baibolo, ni kufuna kufenderera maninge Yahova. Mwakulinganiza, mukambawerenga chochitika chinango pomwe Yesu ambacheza na mulumbwana munango wolemera, ko mungapfunzire chani vokhudza Yahova? (Maliko 10:17-22) Mulumbwana moyu, ambatsimikiza kuti Yesu wenze Mesiya, koma wenze alibe chikhulupiriro chokwana kuti akhale wopfunzira wake. Olo nteno Yesu “adamukonda.” Ndipo adayankhula naye mulumbwana moyu mwachikondi. Vinkuchita kuwonekeratu kuti Yesu ambafuna kuti mulumbwana moyu achite chosalula chanzeru. Kuingizira mwapa, Yesu adaonesa chikondi chomwe Yahova wenze nacho kwa mulumbwana moyu. (Yoh. 14:9) Pomwe munkuganizira chochitika mwechi, kumbukirani va moyo wanu ndipo dzibvunzeni kuti: ‘Ko nidekana kuchita chani kuti nilimbise ushamwali wangu na Yahova pa kutumikira anango?’
15. Ko ndawa chani ni vodekana kuti m’bale wachilumbwana akhale na chitsanzo chabwino? Perekani chitsanzo. (1 Timoteyo 4:12, 13)
15 “Ukhale chitsanzo kwa okhulupirika.” (Werengani 1 Timoteyo 4:12, 13.) Nishuwadi kuti Paulo adalimbikisa Timoteyo kuti akhale na makhalidwe yanango, ninge kuwerenga na kupfunzisa bwino. Komasoti adamulimbikisa kuti akhale na khalidwe yachikondi, chikhulupiriro na kukhala wochena. Ko ndawa chani? Ndawa yakuti chitsanzo chabwino, chiposha mawu yabwino. Ganizirani kuti mwapasiwa nkhani pa nsonkhano, yomwe inkunena va kuingizira khama yathu pa kulalikira. Vidzakhale vosashupa kukamba nkhani mweyi peno imwepo muchita vose vomwe mungakwanise pa kulalikira. Abale anango adzalimbikisiwe pakuphatisa basa malangizo yanu peno angadziwe kuti imwepo ndimwe chitsanzo chabwino pa nkhani mweyi.—1 Tim. 3:13.
16. (a) Ko ni pa vinthu 5 viponi pomwe alumbwana angakhale chitsanzo chabwino? (b) Ko mulumbwana angakhale tani chitsanzo chabwino pa ‘kuyankhula’?
16 Pa lemba ya 1 Timoteyo 4:12, Paulo adafotokoza vochitika 5 va momwe m’bale wachilumbwana angakhalire chitsanzo chabwino. Tani kuganizira va kuchita pfunziro ya pamwekha nkufufudza chochitika chirichose. Mwakulinganiza, peno munkufuna kukulisa luso yanu ‘yoyankhula,’ ganizirani momwe mungalimbikisire anango na mawu yanu. Peno mukhala pabodzi na azibereki wanu, ko mungambawatembeje kawirikawiri pa vose vomwe akuchitirani? Misonkhano ikamala, tani kucheza na m’bale yemwe wenze na m’bali na kumuuza chinthu chomwe chakukomedzani? Ko tani kumbapereka ndemanga pa misonkhano na mawu yanuyanu? Mukambalimbikira kuti mukhale chitsanzo chabwino pa kuyankhula, aliyese adzakwanise kuona kukula kwanu mwauzimu.—1 Tim. 4:15.
17. Ko nchani chomwe chingathandize mulumbwana kukwanirisa volinga vake vauzimu? (2 Timoteyo 2:22)
17 “Thawa vilakolako va ulumbwana, koma tewedza chilungamo.” (Werengani 2 Timoteyo 2:22.) Paulo adalimbikisa Timoteyo kuthawa vilakolako vomwe vidakamusokoneza kukula mwauzimu, panango vomwe vidakasokoneza ushamwali wake na Yahova. Panango mungazindikire kuti pana vinthu vinango vomwe olo kuti ni vosaphonyeka vikumalirani nthawe yomwe mudakachita vinthu vauzimu. Mwakulinganiza, ganizirani va nthawe yomwe imwepo mumala pakuchita masenzeka yolimbisa thupi, pa interneti panango pakusenzeka na magemu. Ko mudakaphatisalini basa nthawe mweyi pakuchita vizinji pa kutumikira Yahova na kuthandiza anango? Panango mungathandizire pa kukonza pomwe Nyumba za Ufumu na kuthandiza pa ulaliki wa tumasherufu. Mukambachita basa ninge zimwezi mudzagumane azishamwali anyowani omwe angakuthandizeni kukhala na volinga komasoti momwe mungavikwanirisire.
TUMIKIRANI ANANGO NDIPO KHALANI NA MOYO WOKONDWA
18. Ko ndawa chani tinganene kuti Maliko na Timoteyo adakhala moyo wochitisa chidwi?
18 Maliko na Timoteyo, adasiya vinthu vizinji kuti akwanise kutumikira anango. Ndipomwapa, iwo adakhala na moyo wokondwa ndipo adagumana na vinthu vizinji vochitisa chidwi. (Mac. 20:35) Maliko, adayenda ku mbuto zakutali kuti akathandize abale na alongo. Ndipo adanemba nkhani zochitisa chidwi zonena va moyo wa Yesu na utumiki wake. Timoteyo, adathandiza Paulo kukhazikisa mipingo inyowani na kulimbikisa abale. Shuwadi, Yahova adaona kuti Maliko na Timoteyo enze okonzeka kuchita chirichose pa kumutumikira na kumukondweresa.
19. Ko ndawa chani alumbwana adekana kuphatisa basa malangizo yomwe Paulo adapasa Timoteyo, ndipo phindu idzakhale iponi?
19 Vinkuchita kuonekeratu bwinobwino chikondi chomwe Paulo wenze nacho kwa shamwali wake Timoteyo m’makalata yomwe adamunembera. Makalata youziriwa mwaya, yaonesa chikondi chikulu chomwe Yahova anacho kwa imwepo. Okondewa abale wachilumbwana, Yahova ankufuna kuti mukhale okondwa. Ndipomwapa, chitani vose vomwe mungakwanise kuti mutewedzere malangizo ya Paulo, komasoti kuti mumbatumikire anango. Mukambachita vimwevi, mudzakhale na moyo wokondwa manjeuno komasoti ‘mudzaphate mwamphanvu moyo chaiye.’—1 Tim. 6:18, 19.
NYIMBO NA. 80 “Talawani Ndipo Muona Kuti Yehova Ndi Wabwino”
a Ndawa yakuti Petulo wenze munthu wokulumiza kubvesa vinthu, iye adakwanisa kumufotokozera mwamphanvu Maliko maganizo na vochita va Yesu. Panango ni vimwevi vomwe vichitisa kuti bukhu ya ntontholo wa Maliko ifotokoze bwinobwino va momwe Yesu ambabvera na kuchita pa vochitika vosiyanasiyana.—Maliko 3:5; 7:34; 8:12.
b MAWU YOFOTOKOZERA FOTO: Maliko adathandiza Paulo na Baranaba pa ulendo wawo waumishonale. Timoteyo ni wokondwa pomwe ankuzungira mpingo kuti alimbikise abale.