Mibvunzo yochokera kwa owerenga
Ko ni “angelo aponi ochita kusankhuliwa” omwe atomolewa pa lemba ya 1 Timoteyo 5:21?
Ntumi Paulo adanembera nkulu mwanzake Timoteyo kuti: “Ninkukulamula mwamphanvu, pamaso pa Mulungu na Yesu Khrisitu komasoti angelo ochita kusankhuliwa, kuti umbatewedze malangizo mwaya mosakondera panango kuchita tsankho.”—1 Tim. 5:21.
Chakuyamba, naboni tione kuti angelo mwawa ni gululini ya wa 144 000. Ndawa yakuti pomwe Paulo adanembera vimwevi Timoteyo, kumukisiwa kwa Akhrisitu odzodzewa kuti akakhale na moyo kudzulu kwenze kukalimbe kuyamba. Atumi na odzodzewa anango wenze akanati kuyamba kukhala volengewa vauzimu. Ndipomwapa, ni mwawalini “angelo ochita kusankhuliwa” omwe Paulo adanena.—1 Akor. 15:50-54; 1 Ates. 4:13-17; 1 Yoh. 3:2.
Kuingizira pamwapa, “angelo ochita kusankhuliwa” ni walelini omwe adapandukira Yahova pa nthawe ya chigumula cha Nowa. Ndawa yakuti angelo mwawale adakhala ku saidi ya Satana ndipo iwo ni azondi wa Yesu. (Gen. 6:2; Luka 8:30, 31; 2 Pet. 2:4) Kutsogolo uku iwo adzayikhiwe mudjeri mudima kwa magole 1000. Ndipo patsogolo pake adzadzogewe pabodzi na Satana.—Yuda 6; Chiv. 20:1-3, 10.
Pamwapa, “angelo ochita kusankhuliwa” omwe Paulo adanena angakhale angelo omwe aphata basa pabodzi na “Yahova na Yesu Khrisitu” omwe adatomolewa pa lemba mweyi.
Pa na angelo mamidyau yazinji okhulupirika. (Aheb. 12:22, 23) Pamwapa, vinkuonesa kuti Yahova apasalini angelo ose basa yolingana. (Chiv. 14:17, 18) Mwakulinganiza, pa chochitika chinango Yahova adatuma mngelo m’bodzi kukapha masocha 185 000 ya Asuri. (2 Maf. 19:35) Vingachitike kuti angelo anango angatambire utumiki wounganidza “mu Ufumu [wa Yesu] vinthu vose vosokoneza na wanthu wosabvera malamulo.” (Mat. 13:39-41) Anango angakhale na utumiki wakuti “adzaunganidze wosaluliwa wake” kuti akatambire moyo wosapera kudzulu. (Mat. 24:31) Pomwe anango angatambire utumiki wakuti ‘atiteteze mu njira zathu zose.’—Sal. 91:11; Mat. 18:10; linganizani na Mateyu 4:11; Luka 22:43.
“Angelo ochita kusankhuliwa” omwe atomolewa pa 1 Timoteyo 5:21, angakhale angelo omwe adapasiwa utumiki wothandiza wonyang’anira mipingo. Na momwe nkhani mweyi inkunenera, Paulo adapereka malangizo ya momwe akulu angasamalirire mpingo na kuti mpingo umbawalemekeze. Akulu, iwombo achadekana kusamalira udindo wawo, “mosakondera panango kuchita tsankho.” Ndipo achadekanalini kusalula vochita mosaganiza bwino. Chifukwa chabwino chakuti akulu aphatise basa malangizo ya Paulo, ni ndawa yakuti iwo ankuchita vinthu “pamaso pa Mulungu na Yesu Khrisitu komasoti angelo ochita kusankhuliwa.” Pamwapa, vinkuonekeratu kuti angelo anango adapasiwa utumiki wosamalira mipingo. Pa nthawe zinango iwo ateteza atumiki wa Mulungu, anyang’anira basa yolalikira ndipo awuza Yahova vomwe aona.—Mat. 18:10; Chiv. 14:6.