Ko munkukumbukira?

Ko mudawerenga mosamala nkhani za mu Ntsanja za ulonda za gole ino? Onani peno mungakwanise kudawira mibvudzo aya:

Ko ni chitsanzo chiponi chomwe Yahova adatipasa pa nkhani ya momwe tingachitire vinthu na akazi?

Yahova akondalini amuna okha nkumbasalula akazi. Mulungu achakonda kudziwa momwe akazi ankubvera na vomwe vinkuwadesa nkhawa, komasoti iye awakhulupirira kuti angakwanise kukwanirisa utumiki uliwose womwe angatambire.—w24.01, tsa. 15-16.

Ko tingatewedzere tani lemba ya Aefeso 5:7, yomwe inane kuti: “Ayi kumbachita vomwe iwo achita”?

Ntumi Paulo adatichenjeza kuti tisambabverane na wanthu omwe angambatichitise kuona kuti kutewedza mpfundo za Mulungu nkoshupa. Wanthu mwawa angakhale omwe ticheza nawo pamaso na pamaso panango pa malo yochezera pa interneti.—w24.03, tsa. 22-23.

Ko ni nkhani ziponi zomwe tichadekana kusamala nazo?

Tichadekana kusamala na nkhani zomwe zilibe umboni olo zochokera kwa azishamwali wanthu omwe tibverana nawo. Tichadekana kusamala pomwe na mensaje zochokera kwa wanthu omwe tinkuwadziwalini panango wanthu wampatuko omwe achadzibisa nkukhala ninge ankufuna kubvesera ntontholo wabwino.—w24.04, tsa. 12.

Ko nchani chomwe tinkudziwa ndipo nchani chomwe tinkudziwalini pa nkhani ya momwe Yahova adzaweruzire Mpfumu Solomo, wanthu omwe adadzogewa ku Sodomu na Gomora na omwe adadzogewa pa chigumula cha Nowa?

Tinkutsimikiziralini peno Yahova adawapasa chiweruzo chakuti awadzonge mpakana kalekale. Koma tinkudziwa kuti iye ankudziwa vose ndipo ni wachifundo maninge.—w24.05, tsa. 3-4.

Ko kudziwa kuti Yahova ni ‘Dwale’ kutitsimikizira chani? (Deut. 32:4)

Tingagumane malo yothawirapo kwa Yahova. Iye ni wothembeka, nthawe zose akwanirisa mapolomisi yake. Ndipo iye achinjalini, angachinjelini makhalidwe yake na volinga vake.—w24.06, tsa. 26-28.

Ko nchani chomwe chingatithandize kuti tizolowere mpingo unyowani?

Thembani kuti Yahova adzakuthandizeni ninge momwe adathandizira atumiki wake wa kumbuyo. Ayi kumbalinganiza na mpingo womwe mudachoka. Mumbagumanike pa basa iriyose mumpingo unyowani mouyo ndipo yesesani kuti mukhale na azishamwali anyowani.—w24.07, tsa. 26-28.

Ko tinkupfunzira chani pa mafanizo yatatu yogumanika pa lemba ya Mateyu msolo 25?

Fanizo ya nkhosa na mbuzi, irimbikisa mpfundo ya kudekana kwa kukhala okhulupirika. Fanizo ya anamwali opusa na ochenjera, ifotokoza kuti tichadekana kukhala okonzeka komasoti tichadekana kukhala maso. Mu fanizo ya matalente, iwonesa ubwino wa kuphata basa mwakhama na kuchita vomwe tingakwanise.—w24.09, tsa. 20-24.

Ko khonde ya kachisi wa Solomo yenze itali tani?

Pa 2 Mafumu 3:4, mipukutu yanango yakalekale yanena kuti khonde yenze itali makovado “120” koma mipukutu yanango yothembeka yalewa kuti ni “makovado 20.” Vomwe vinkuoneka kuti vinkubverana bwinobwino na kukula kwa vipupa va kachisi.—w24.10, tsa. 31.

Ko mawu yakuti ntumiki wothandiza akhale ‘mwamuna wa nkazi mbodzi’ yatanthauza chani? (1 Tim. 3:12)

Yatanthauza kuti iwo achadekana kulowola nkazi mbodzi ndipo achadekanalini kuchita chigololo. Kuyingizira pamwapa, iwo achadekanalini kutengeka na nkazi munango.—w24.11, tsa. 19.

Ndawa chani tidekanalini kunena kuti lemba ya Yohani 6:53 inena vomwe vichadekana kuchitika pa Chakudya cha Maulo cha Ambuya?

Lemba ya Yohani 6:53 inena va kudekana kwa kudya thupi ya Yesu na kumwa magazi yake. Yesu adanena mawu mwaya mu gole ya 32 ku Galileya kwa Ayuda omwe ambamukhulupirira lini. Koma padapita gole ibodzi kuti anene va Chakudya cha Maulo cha Ambuya, ku Yerusalemu. Pamwapa, Yesu adayankhula na wale omwe akatonge naye pa bodzi kudzulu.—w24.12, tsa. 10-11.