1924—Magole 100 kumbuyo

NJIRA INYOWANI YOLALIKIRIRA, KUPHATISA BASA RADIO

Penze padapita kale gole ibodzi pomwe abale wa ku Beteli ankukonza radio ya WBBR ku Staten Island, mu thaundi ya Nova Iorque. Patsogolo pakuti achenesa pa malo, iwo adamanga nyumba itali yakuti wanthu omwe ambaphata basa ambakhale. Adamanga pomwe nyumba inango yoyikhamo vipangizo. Patsogolo pa vimwevi abale adayamba kusonkhanisa vipangizo vodekana kuti “ayambe kuulusa mawu.” Koma pambadekana kupirira mabvuto yazinji.

Bvuto yakuyamba yenze kumanga antena ya radio. Kuchita vimwevi kwenze koshupa maninge ndawa yakuti antena mweyi yenze yotalimpha mametro 91 ndipo imbafuna kudjirikiriwa na maposto yawiri yotalimpha mametro 61. Pakuyamba viribe kukwanisika. Koma abale adathemba maninge thandizo ya Yahova ndipo pakumalizira adakwanisa kuimisa antena mweyi. Calvin Prosser, yemwe adaphata nawo basa mweyi, adanena kuti: “Tidakakwanisa paulendo wakuyamba tidakalewa modzithemba kuti ‘onani vomwe takwanisa kuchita!’” Koma abale adapereka ulemerero wose kwa Yahova. Koma penze padakali mabvuto yanango yomwe yambafuna kukonzewa.

Pa nthawe mweyi kuphatisira basa radio kwenze kudandoyamba. Ndipo vimbagumanikalini vipangizo vinyowani vophatisira basa. Koma abale adakwanisa kugumana ntchini wophatisiwakale basa wa 500-watts. M’malo mwakuti agule microfoni, iwo adaphatisa basa microfoni ya foni. Mwezi wa Fevereiro ntsiku inango usiku, abale adaganiza voyesa radio mweyi kuti aone kuti inkuphata bwino basa. Ndawa yakuti iwo ambafunika nkhani yakuti auluse mu radio mweyo abale mwawa adaganiza voyimba nyimbo za Ufumu. Ernest Lowe ayebwalini kuti pomwe ambayimba, iwo adafonerewa na woweruza Rutherford,b yemwe ambabvesera radio mweyi ali ku Brooklyn, pansenga wa ma kilometro 25.

M’bale Rutherford adalewa moseka kuti: “Munkuchita zungo, imwepo munkubveka ninge tumphaka tomwe tunkumenyana.” Abale mwawa adachita manyazi pang’ono ndipo adathimisa ntchini moyu. Koma iwo adakhala okondwa ndawa yodziwa kuti radio mweyi imbabveka.

Pa 24 Fevereiro 1924, pomwe ambaulusa pologalama yoyamba pa radio mweyi, m’bale Rutherford adalewa kuti radio mweyi idakonzewa kuti “ithandizire pa basa ya Ufumu wa Mesiya.” Iye adalewa kuti cholinga cha radio mweyi “ni kuthandiza wanthu kuti adziwe nthawe yomwe tinkukhala mobverana na vomwe Baibolo ichalewa, viribe basa vomwe iwo achakhulupirira.”

Pologalama yakuyamba mweyi idafamba bwino maninge. Ndipo kuchokera pamwapo radio ya WBBR idaphatisiwa basa kwa magole 33 ndipo pa nthawe yose mweyi idaulusa pologalama zosiyanasiyana za gulu.

IWO MOLIMBA NTIMA ADATSUMULA ATSOGOLERI WA VIPEMBEDZO

Mu Julho 1924, opfunzira Baibolo adasonkhana pa nsonkhano wachigawo ku Columbus, Ohio. Kudabwera abale wa padziko yose yapasi ndipo iwo adabvesera nkhani mu chi árabe, inglês, francês, alemão, grego, húngaro, italiano, lituano, polonês, russo, ucraniano na viyankhulo va ku escandinavos. Mbali zinango za pologalama mweyi zidaulusiwa pa radio. Kuingizira mwapa, abale adakumbira wonemba jornal ya Ohio State Journal kuti ambanembe vomwe vimbachitika ntsiku iriyose pa nsonkhano moyu.

Pa Chinayi 24 Julho, abale oposha 5 000 adayenda kukalalikira mu thaundi momwe mumbachitikira nsonkhano moyu. Iwo adagawira mabukhu pafupifupi 30 000 ndipo adayambisa mapfunziro ya Baibolo yazinji maninge. Ntsanja ya ulonda idanena va ntsiku mweyi kuti “yenze mbali yokomedza maninge ya nsonkhano.”

Mbali inango yofunika maninge idachitika pa Chishanu 25 Julho. M’bale Rutherford adatsumula molimba ntima atsogoleri wavipembedzo, wandale, na wabizi kuti “ankuchitisa wanthu kuleka kupfunzira va Ufumu wa Mulungu womwe Mulungu ambadzauphatisa basa kuti adalise wanthu.” Kuingizira mwapa, iye adalewa kuti “wanthu mwawa ambaona ninge kuti bungwe ya Liga das Nações ndiyo yomwe idakakwanisa kumalisa mabvuto ya wanthu padziko yapasi, koma chaivo nivakuti Ufumu wa Mulungu wokha ndiwo ungakwanise kuchita vimwevi.” Opfunzira Baibolo ambadekana kukhala olimba ntima na opirira kuti akwanise kulalikira ntontholo moyu kwa wanthu anango.

Polewa va nsonkhano moyu, Ntsanja ya ulonda idalewa kuti: “Gulu mweyi yamasocha ya Ambuya yomwe yagumanika pa nsonkhano moyu wachigawo ku Columbus idabwerera iri yolimbikisiwa maninge nchikhulupiriro . . . , iri yokonzeka kulimbana na chida chirichose chomwe azondi adakaphatisa basa.” Leo Claus, yemwe adagumanika pa nsonkhano moyu adanena kuti: “Isepano tidabwerera tiri okondwa kuti tikalalikire va chidzudzulo mwechi ku dera yathu.”

Mu Outubro, opfunzira Baibolo adayamba kugawira tumapepa tuzinji tomwe twenze na msolo wakuti Acusados os Eclesiásticos. Kapepa mwaka kenze na mawu yomwe Rutherford adayafotokoza pa nsonkhano ule. Mu thaundi ing’ono yochemerewa Cleveland, ku Oklahoma, m’bale Frank Johnson adamaliza kugawira mapepa mwaya kwasala 20 minuto kuti ikwane nthawe yomwe wenze adabverana na abale anango kuti agumane. Wanthu anango mu nthaundi mweyi adakalipa na ulaliki wa m’bale Frank ndipo ambamufagafaga. Ndawa ya vimwevi iye ambadekanalini kudikhira abale anango. Ndipomwapa, iye adaganiza vobishala mu tchetchi yomwe yenze pafupi. Ndawa yakuti mutchetchi momu mwenze mulibe wanthu iye adasiya tumapepa motu twakuti Acusados os Eclesiásticos pakati pa Baibolo ya abusa na pampando uliwose mutchetchi moumo ndipo adachita vimwevi mofulumiza maninge. Ndawa yakuti nthawe yake yenze ikanati kumala iye adayenda m’matchetchi yanango yawiri nkukachita chibodzibodzi.

Frank adayenda ankuthamanga kumalo komwe wenze adapangana na anzake kuti agumane. Iye adabishala kuseri kwa bomba yogulisira gazolina ndipo adakhala ankusuzumira kuti aone peno wanthu omwe ambamunyang’ana ankubwera. Wanthu mwawa adagwata kutsogolo kwa bomba mweyo koma alibe kumuona. Patsogolo pake, abale anango omwe ambalalikira adafika ndipo adatengana na Frank nkubwerera.

M’bale munango yemwe adaphatambo basa mweyi, pofotokoza vomwe vindachitika adanena kuti: “Pomwe timbachoka mu thaundi mweyi tidapita na kutsogolo kwa matchetchi yatatu yale. Pa tchetchi iriyose penze wanthu pafupifupi 50. Anango ambawerenga tumapepa tule ndipo anango ambaonesa tumapepa motu abusa wawo. Isepano tidachoka pomwe wanthu omwe ambatinyang’ana akanati kufika ndipo vimwevi vidachitisa kuti tileke kugumana na mabvuto. Ndipo titembeja Yahova ndawa ya kutiteteza na kutithandiza kuti tipulumuke kwa azondi wa Ufumu wa Mulungu mwawa.”

OPFUNZIRA BAIBOLO ADALALIKIRA MOLIMBA NTIMA M’MADZIKO YANANGO

M’madziko yanango, opfunzira Baibolo adalalikira pomwe molimba ntima. Ku norte kwa França, Józef Krett adalalikira wanthu ochokera ku Polônia omwe ambaphata basa mu mgodi. Kuingizira pamwapa, abale adachemera wanthu wa muthaundi mweire kuti adzabvesere nkhani ya m’bale Józef ya msolo wakuti: “Manjemanjepa wakufa adzamukisiwe.” M’busa munango adauza wanthu wa mu tchetchi yake kuti asayende kukabvesera nkhani mweyi. Koma vomwe vidachitika venze vosiyana na vomwe iye adanena. Wanthu oposha 5 000 kuphatanidzapo m’busa ule adayenda kukabvesera nkhani ya Józef. M’bale Józef adachemera m’busa ule kuti adzafotokoze vomwe achakhulupirira koma iye adalamba. M’bale Józef adagawira mabukhu yose yomwe wenze nayo ndipo adazindikira kuti wanthu ose omwe iye adawalalikira enze na chidwi chofuna kupfunzira va chonadi cha Mawu ya Mulungu.—Amosi 8:11.

Ku África, Claude Brown adayamba kulalikira ntontholo wabwino ku Costa de Ouro komwe manjeuno kudziwika na dzina yakuti Gana. Nkhani zomwe iye adakamba na mabukhu yomwe iye adagawira, vidachitisa kuti wanthu azinji adziwe chonadi mu dziko mweire. John Blankson, wenze m’bodzi mwa wanthu omwe adabvesera nkhani za m’bale Brown. Iye ambapfunzira kuti adzaphate basa yogulisa mankhwala. Ndipo mwakankulumize iye adazindikira kuti wagumana chonadi. Iye adanena kuti: “Nidakomedzewa maninge na chonadi ndipo kushikola nthawe zose nimbauzambo anzangu vomwe nidapfunzira m’Baibolo.”

John adapfunzira m’Baibolo kuti chipfunziso cha utatu chichokeralini m’Baibolo. Ndawa ya vimwevi, iye ntsiku inango adayenda ku tchetchi ya Anglicana kuti akabvunze apadre va nkhani mweyi. Padre muyo, adamuthamangisa ndipo mokuwa adamuuza kuti: “Iwepo ndiwelini mkhrisitu, iwepo ndiwe munthu wa Satana. Choka muno!”

Pomwe adafika kumuyi, John adanembera kalata padre ule nkumukumbira kuti adzafotokoze va chikhulupiriro chake cha utatu pa gulu ya wanthu azinji. Padre adamudawira mwa kumukumbira kuti adzagumane naye mu escritório ya aticha wake. Pomwe adagumana, aticha wake adamubvunza kuti peno wenze adamunemberadi kalata padre ule.

John adadawira kuti: “Inde nidanembadi.”

Aticha wake adamuuza kuti anembe kalata inango yopepesa apadre. Pamwapa John adanemba kuti:

“Apadre, aticha wanikumbira kuti nikunembereni kalata yokupepesani ndipo inepano ndine wokonzeka kuchita vimwevi koma pokhapokha imwepo mukabvuma kuti vipfunziso vanu ni vabodza.”

Ndawa yosatsimikiza vomwe John adanemba aticha wake adamubvunza kuti: “John, unkutsimikiza kuti ni vimwevidi vomwe unkufuna kunemba?”

John adadawira kuti: “Inde, palibe vinango vomwe ninganembe.”

Aticha wake adamuuza kuti: “Ukachita vimwevi iwepo uchosewe pashikola pano. Ungapitirizelini kupfunza pa shikola pano ukapitiriza kutsutsana na apadre wa tchetchi yomwe boma ikonda.”

John adadawira kuti: “Manje aticha, . . . imwepo mukambatipfunzisa koma isepano ne kubvesesa bwinobwino, ko tikubvunzanilini?”

Ticha ule adadawira kuti: “Munibvunza.”

Ndipo John adanena kuti: “Ni vimweviretu vomwe inepano nachita. Apadre ambatipfunzisa Baibolo ndipo inepano nawabvunza bvunzo. Peno iwo alibe kukwanisa kunidawira, ko ndawa chani nichadekana kuwapepesa?”

John alibe kuchosewa pa shikola, ndipo alibe pomwe kunemba kalata yopepesa.

OPFUNZIRA BAIBOLO AMBAFUNISISA KUCHITA VIZINJI

Pakufotokoza mwachigwato vomwe vidachitika mu gole mweire, Ntsanja ya ulonda idanena kuti: “Ninge wamasalino, isepanombo tinganene kuti ‘imwepo mudzanipase mphanvu kuti nikwanise kumenya nkhondo.’ (Sal. 18:39) Imweyi yenze gole yolimbikisa maninge ndawa yakuti tidaona Ambuya ankuthandiza. . . . Wanthu wake odzipereka . . . adakondwa kuchitira umboni chonadi chaicho.”

Kumapeto kwa gole mweire, abale adachita pulani yakuti aingizire njira yophatisa basa radio polalikira. Iwo adakonza pomwe radio inango pafupi na ku Chicago. Radio inyowani mweyi, imbachemerewa kuti WORD. Ndipo imweyi yenze dzina yabwino ndawa yakuti mawu yakuti WORD mu chiphimbi yatanthauza kuti “mawu” pakulewa Mawu ya Mulungu. Pa ulendo moyu iwo adaphatisa basa ntchini wabwino maninge wa 5 000-watts. Vimwevi vimbachitisa kuti akwanise kuulusa ntontholo wa Ufumu pa nsenga wa makilometro yazinji maninge mpakana ku Canadá.

Gole ya 1925 idakhala gole yapadera maninge ndawa ya kabvekesedwe kanyowani ka lemba ya Chivumbuluso msolo 12. Kwa anango vimwevi venze vokhumudwisa koma anango adakhala okondwa ndawa yobvesa bwinobwino vinthu vomwe vidachitika kudzulu na momwe vimwevi vidakhudzira wanthu wa Mulungu pano padziko yapasi.