NKHANI YOPFUNZIRA 36
NYIMBO NA. 89 Khalani Omvera Kuti Mulandire Madalitso
‘Mumbachite vomwe Mawu yachanena’
‘Mumbachite vomwe Mawu yachanena osati kundobva chabe.’ —YAK. 1:22.
CHOLINGA
Nkhani mweyi itithandize kuingizira chifuno chathu osati pakundowerenga Mawu ya Mulungu ntsiku zose koma kumbaganizira vomwe yankunena na kumbayaphatisa basa pa moyo wathu.
1-2. Ko nchani chomwe chichitisa atumiki wa Yahova kukhala okondwa? (Yakobo 1:22-25)
YAHOVA na mwana wake Yesu, afuna kuti isepano timbakhale okondwa. Wonemba Salimo 119:2 adanena kuti: ‘Okondwa ni wale omwe achasunga Malamulo yake na omwe amufagafaga na ntima wose.’ Yesu adanena pomwe kuti: “Wokondwa, ni wanthu womwe akubva mawu ya Mulungu na kuyaphatisa basa!”—Luka 11:28.
2 Ndawa yakuti ndise atumiki wa Yahova, ndise okondwa maninge. Ndawa chani? Ndawa yakuti tinavifukwa vizinji. Koma chifukwa chikulu ni chakuti tiwerenga Mawu ya Mulungu ntsiku iriyose na kuchita vomwe tingakwanise kuti tiphatise basa vomwe tipfunzira.—Werengani Yakobo 1:22-25.
3. Ndawa chani ni vabwino kuphatisa basa Mawu ya Mulungu?
3 Pa na maphindu yazinji maninge ‘tikambachita vomwe Mawu yachanena.’ Chakuyamba, tinkudziwa kuti vimwevi ni vabwino maninge kuti tikondwerese Yahova. Kundoganiza vimwevi, tikhala okondwa maninge. (Mla. 12:13) Tikambachita vinthu mobverana na vomwe tiwerenga m’Mawu ya Mulungu, tikhala na moyo wabwino m’banja komasoti tikhala pa ushamwali wolimba na Akhrisitu anzathu. Panango imwepo mudaonako kale vimwevi vinkuchitika pa moyo wanu. Kuingizira pamwapa tipewa mabvuto yazinji yomwe wanthu omwe atumikiralini Yahova agumana nayo. Kunena shuwa isepano tinkubverananavo vomwe Mpfumu Davide idanena. Patsogolo pakuti waimba va Malamulo na viweruzo va Yahova, iye adamaliza na mawu yakuti: ‘Munthu wosunga malamulo yanu, agumana madaliso yakulu maninge.’—Sal. 19:7-11.
4. Ndawa chani nthawe zinango vikhala voshupa kuwerenga na kupfuzira Baibolo?
4 Koma chaivo nivakuti ni nthawe zoselini pomwe vikhala vosashupa kuti timbawerenge Baibolo na kumbachita vomwe tawerenga. Ndawa yakuti tikhala na vochita vizinji va pa moyo, tichadekana kupatula nthawe ntsiku iriyose kuti timbawerenge na kupfunzira Baibolo. Tikachita vimwevi tidzakwanise kudziwa vomwe Yahova ankufuna kuti timbachite. Ndipomwapa, mu nkhani mweyi tione vinthu vinango vomwe vingatithandize kuti timbawerenge Baibolo ntsiku iriyose. Tione pomwe vinthu vomwe vingatithandize kuti timbaganizire vomwe tawerenga na momwe tingaviphatisire basa pa moyo wathu.
PATULANI NTHAWE KUTI MUMBAWERENGE MAWU YA MULUNGU
5. Ko nchani chomwe chichitisa kuti timbakhale otangwanika maninge pa moyo wathu?
5 Wanthu azinji omwe atumikira Yahova, akhala opanikizika maninge. Tichadekana kupatula nthawe kuti tichite vinthu vodekana maninge vomwe Baibolo inena kuti tifunika kuchita. Mwakulinganiza, azinji wa isepano tichadekana kuphata basa kuti tidzisamalire na kusamalira banja. (1 Tim. 5:8) Abale azinji achadekana kusamalira azibereki wawo omwe ni wachikulire panango odwala. Ndipo tose tichadekana kusamalira thanzi yathu. Ndipo vimwevi vifuna pomwe nthawe. Kuingizira pa maudindo mwaya, isepano tina maudindo yanango mumpingo. Chibodzi mwa chinthu chodekana maninge chomwe tichadekana kuchita, ni kugumanika pa basa yolalikira. Na vose vimwevi vomwe imwepo muchadekana kuchita komasoti maudindo yomwe mungakhale nayo, ko mungapatule tani nthawe kuti mumbawerenge Baibolo ntsiku iriyose, kuganizira vomwe mwawerenga na kuphatisa basa vomwe mwapfunzira?
6. Ko mungachite tani kuti kuwerenga Baibolo chikhale chinthu chofunika maninge pa moyo wanu? (Onani pomwe foto.)
6 Kuwerenga Baibolo ni chibodzi mwa vinthu vodekana maninge kwa Akhrisitu. Ndipomwapa, tichadekana kuona kuti ni chinthu “chofunika maninge.” (Afil. 1:10) Pakulewa va munthu yemwe ni wokondwa, kumayambiriro kwa lemba ya Salimo inena kuti: ‘Koma akondwa maninge na chilamulo cha Yahova. Ndipo awerenga na kuganizira va chilamulo chimwecho usiku na masikati.’ (Sal. 1:1, 2) Vinkuoneseratu kuti yamwaya ni malangizo yakuti tichadekana kumbapatula nthawe kuti timbawerenge Baibolo. Manje ko nthawe yabwino yowerenga Baibolo ni iponi? Vimwevi vithemba munthu aliyese payekha. Ni nthawe yomwe imwepo mungaikhazikise kuti mumbakwanise kuwerenga Baibolo ntsiku iriyose. M’bale munango dzina yake Victor adanena kuti: “Inepano nikonda kuwerenga Baibolo machibese. Ni shuwadi kuti nikondalini kumuka machibesebese koma nthawe mweyi kukhala vinthu vochepa vomwe vinganisokoneze. Nikhala ninkuganizalini vinthu vizinji ndipo vinithandiza kuti nikhale tcheru pa kupfunzira.” Panango ni momwe vilirimbo kwa imwepo. Ndipomwapa, dzibvunzeni kuti: ‘Ko ni nthawe iponi yabwino yomwe ningambawerenge Baibolo?’
Ko kwa imwepo ni nthawe iponi yabwino kuwerenga Baibolo? Ko mukwanisa kuwerenga Baibolo ntsiku iriyose pa nthawe yomwe mudakhazikisa? (Onani ndime 6)
GANIZIRANI VOMWE MWAWERENGA
7-8. Ko chani chomwe chingatichitise kuti tileke kuphindula pomwe tinkuwerenga Baibolo? Fotokozani.
7 Nthawe zinango tingawerenge vinthu vizinji maninge koma ne kukwanisa kuvisunga. Ko imwepo mudawerengakokale chinthu koma nkuyebwa vomwe mwawerenga? Vidachitikakokale kwa tose isepano. Ndipo vobvesa ntsisi ni vakuti vimwevi vingachitikembo pomwe tinkuwerenga Baibolo. Panango mungakhale na cholinga chowerenga misolo inganani ya m’Baibolo ntsiku iriyose. Vimwevi ni vabwino. Shuwadi, tichadekana kukhala na cholinga ndipo nkuchita khama kuti tichikwanirise. (1 Akor. 9:26) Kuwerenga Baibolo ni kwabwino maninge koma ni chiyambi. Tichadekana kuchita vizinji kuti timbaphindule na kuwerenga Baibolo.
8 Ganizirani chitsanzo ichi: Madzi ya mvula ni yodekana kuti pakhale vinthu vamoyo padziko yapasi. Koma peno mvula ingagwe maninge nkanthawe kang’onong’ono, ipitalini pasi. Vimwevi vikachitika ndiye kuti mvula izinji yomwe yagwa iribe phindu. Ndawa yakuti m’nyontho kuti upite pasi, mvula ichadekana kugwa pang’onopang’ono kwa nthawe itali kuti vomera viphindule. Mwanjira ibodzibodzi, tichadekanalini kuwerenga Baibolo mothamanga panango mwakankulumize maninge mwakuti ne kuphata chinthu panango kukumbukira vomwe tawerenga.—Yak. 1:24.
Ninge momwe viliri kuti pasi pachadekana nthawe kuti m’nyontho upite pasi, isembo tichadekana nthawe kuti tiganizire na kukwanisa kuphatisa basa vomwe tawerenga m’Baibolo (Onani ndime 8)
9. Ko nchani chomwe tichadekana kuchita tikazindikira kuti tinkuwerenga Baibolo mothamanga maninge?
9 Ko vidachitikakokale kuti pomwe imwepo mungawerenga Baibolo nkuona kuti munkuwerenga mothamanga maninge? Peno nteno ko mungachite tani? Werengani pang’onopang’ono kuti mukhale na nthawe yoganizira vomwe munkuwerenga. Ndipo vimwevi vichadekanalini kukhala voshupa. Onani kuti muchadekana kundoima na kuganizira vomwe mwawerenga. Panango mungawerenge mavesi yang’onong’ono nkukhala na nthawe yakuti muganizire vomwe mwawerenga. Victor adanena kuti: “Pakuwerenga kwangu Baibolo, kazinjikazinji nindowerenga msolo m’bodzi basi. Ndawa yakuti niwerenga Baibolo machibese, nikwanisa kuganizira ntsiku yose vomwe nawerenga.” Viribe basa nthawe yomwe mungasalule kuti mumbawerenge Baibolo. Koma chodekana maninge nikuchita vimwevi munjira yakuti imwepo mumbaphindule.—Sal. 119:97; na bokosi yakuti: “Ganizirani mibvunzo aya.”
10. Perekani chitsanzo cha momwe imwepo mungaphatisire basa vomwe munkuwerenga. (1 Atesalonika 5:17, 18)
10 Viribe basa nthawe yomwe imwepo mungasalule kuti mumbawerenge Baibolo na kutalika kwa nthawe yomwe imwepo mungambawerenge. Koma ganizirani momwe mungaphatisire basa vomwe mwawerenga. Mukakhala kuti munkuwerenga vesi inango ya m’Baibolo, dzibvunzeni kuti: ‘Ko ningaphatise tani basa malangizo mwaya manjeuno panango kutsogolo?’ Mwakulinganiza, linganizani kuti pomwe munkuwerenga Baibolo munkuwerenga lemba ya 1 Atesalonika 5:17, 18. (Werengani.) Patsogolo pakuti mwawerenga mavesi yawiri mwaya, mungaime nkuona kuwanda kwa mapemphero yanu na kuona peno muchapemphera kuchokera pasi pa ntima. Mungaganizire pomwe vinthu vomwe imwepo mutembeja panango mungasalule vinthu vitatu nkumutembeja Yahova mwasitiriti. Mukambapatula nthawe kuganizira vinthu vomwe munkupfunzira m’Baibolo, vidzakuthandizeni kubvesa Mawu ya Mulungu na kuchita vomwe iye ankunena. Ganizirani vamaphindu yomwe mudzakhale nayo mukambachita vimwevi ntsiku iriyose na mavesi yanango ya m’Baibolo yomwe mwawerenga. Shuwadi, imwepo mudzakhale wochita vomwe Mawu ya Mulungu yachanena. Manje ko mungachite tani peno mwagumana kuti pa na vinthu vizinji vomwe muchadekana kuchinja?
KHALANI NA VOLINGA VABWINO
11. Ko nthawe zinango nchani chomwe chingakukhumudwiseni pomwe munkuwerenga Baibolo? Perekani chitsanzo.
11 Vingachitike kuti imwepo mungakhale okhumudwa pakuyamba kuwerenga Baibolo, ndawa yakuti mwaona kuti pa na vinthu vizinji vomwe muchadekana kuchinja. Ganizirani chochitika ichi: Linganizani kuti munkuwerenga lemba ya Yakobo msolo ubodzi pa ntsiku ndipo munkuwerenga va kupewa tsankho. (Yak. 2:1-8) Munkuona kuti muchadekana kuchinja njira zinango momwe muchachitira vinthu na anango. Ndipo mwatsimikiza kuchinja vinthu vinango. Mwevi ni vabwino. Mangwana yake munkuwerenga pomwe va msolo munango womwe unkulewa va ubwino wakusamala na vomwe tichayankhula. (Yak. 3:1-12) Ndipo munkukumbukira kuti nthawe zinango mudayankhula vinthu vomwe ni vabwinolini. Ndipo mwatsimikiza kuti manje muyesese kumbayankhula vinthu volimbikisa, komasoti vabwino. Koma ntsiku inango pomwe munkuwerenga Baibolo, munkuwerenga va chenjezo ya kuipa kwa kukhala shamwali wadziko. (Yak. 4:4-12) Pamwapa pomwe munkuona kuti muchadekana kusalula bwino vosangalasa. Mwandowerengako ntsiku zing’onong’ono koma mwagumana vinthu vizinji maninge vomwe muchadekana kuchinja.
12. Ndawa chani muchadekanalini kufoka mukawerenga Baibolo nkuona kuti muchadekana kuchinja vinthu vizinji? (Onani pomwe mawu ya m’nyantsi.)
12 Peno mwaona kuti muchadekana kuchinja vinthu vizinji, ayi kufoka. Chimwechi ni chitsimikizo chakuti imwepo ndimwe odzichepesa, ndipo munachifuno chofuna kuchinja. Munthu yemwe ni wodzichepesa na woona ntima pa iye yekha, awerenga Baibolo na cholinga chakuti aone vomwe achadekana kuchinja.a Ndipo ayi kuyebwa kuti “kuvala umunthu unyowani,” ni chinthu chomwe chimalalini. Nthawe zose pa na vinthu vomwe tichadekana kuchinja. (Akol. 3:10) Ko nchani chomwe chingakuthandizeni kuti mupitirize kukhala ochita vomwe Mawu ya Mulungu yachanena?
13. Ko mungachite tani kuti mukhale na cholinga chophatisa basa vomwe mwawerenga m’Baibolo? (Onani pomwe foto.)
13 M’malo mwakuti muyese kuchinja vinthu vose kabodzi na kabodzi, tani kuyamba na kuchinja chinthu chibodzi panango viwiri vomwe imwepo mwapfunzira. (Miy. 11:2) Imwepo mungayese pomwe kuchita ivi: Nembani ndandanda ya vinthu vomwe munkufuna kuchinja ndipo onani chinthu chibodzi panango viwiri vomwe imwepo mungafune kuyamba kuchinja. Ndipo siyani vinthu vinango vomwe mwavinemba pa ndandanda mweyo, kuti mudzavichinje kutsogolo. Koma peno ndandanda mweyo ni itali maninge, ko mungayambe na chani?
Pakuwerenga Baibolo, m’malo mwakuti musalule kuchinja vinthu vizinji pa nthawe ibodzi, tani kuyamba na chinthu chibodzi. Panango mungakonde kuyamba na kuchinja chinthu chibodzi panango viwiri (Onani ndime 13-14)
14. Ko ni volinga viponi vomwe mungayambe kukwanirisa?
14 Mungasalule kuyamba na cholinga chomwe ni chosashupa kuchikwanirisa. Panango mungafunike kuyamba kuchinja vinthu vire vomwe munkufunika kuvichinja mwakankulumize. Patsogolo podziwa cholinga chanu, fufudzani mu mabukhu yathu. Imwepo mungaphatise basa Índice das publicações da torre de vigia na Buku la Mboni za Yehova Lofufuzira Nkhani. Pempherani kwa Yahova va cholinga chanu kuti akupaseni “chifuno na mphanvu yochitira vinthu vimwevo.” (Afil. 2:13) Patsogolo pake, yambani kuphatisa basa vomwe mwapfunzira. Mukayamba kukwanirisa cholinga chanu choyamba, imwepo mudzalimbikisike maninge kuti mupitirize kukwanirisa volinga vinango. Mukaona kuti mwakwanisa kuchinja nkukhala na makhalidwe yanango ya Chikhrisitu, mudzakhale okondwa maninge kupitiriza kuchinja vinthu vinango. Ndipo vidzakhale vosashupa kukwanirisa volinga vinango.
BVUMANI KUTI MAWU YA MULUNGU “YAKUCHINJENI”
15. Ndawa chani atumiki wa Yahova ni osiyana maninge na wanthu anango omwe awerenga Baibolo? (1 Atesalonika 2:13)
15 Wanthu anango anena kuti adawerenga Baibolo maulendo yazinjizinji. Koma ko iwo akhulupirira Baibolo? Ko achita vomwe apfunzira? Ndipo ko achita vinthu mobverana na vomwe Baibolo ichapfunzisa? Chobvesa ntsisi ni chakuti pa vinthu vizinji neye. Koma kwa atumiki wa Yahova virilini tene. Ninge momwe venzere kwa Akhrisitu oyambirira, isepano tiona Baibolo “ninge momwe yalilidi,” mawu ya Mulungu. Koma chodekana maninge ni chakuti tichita vose vomwe tingakwanise kuti tiphatise basa malangizo ya m’Baibolo pa moyo wathu.—Werengani 1 Atesalonika 2:13.
16. Ko nchani chomwe chidzatithandize kukhala ochita vomwe Mawu ya Mulungu yachanena?
16 Ni nthawelini zose pomwe vikhala vosashupa kuwerenga na kuphatisa basa Mawu ya Mulungu. Vingachitike kuti bvuto yathu ni kugumana nthawe yakuti tiwerenge. Panango tinabvuto yowerenga mothamanga nkuganizira pang’ono vomwe tawerenga. Panango tingabve pomwe kuti ndise opanikizika maninge pakuona kuti pa na vinthu vizinji maninge vomwe tichadekana kuchinja. Viribe basa bvuto yomwe munayo, imwepo mudzakwanise kupirira na thandizo ya Yahova. Khalani otsimikiza kubvuma thandizo yake ndipo ayi kukhala munthu wakubva nkufulumiza kuyebwa koma wochita vomwe Mawu ya Mulungu yachanena. Mosakaika, tikambawerenga Mawu ya Mulungu na kuyaphatisa basa pa moyo wathu, tidzakhale okondwa maninge.—Yak. 1:25.
NYIMBO NA. 94 Timayamikira Mulungu Potipatsa Mawu Ake
a Onani vidiyo yakuti Vomwe alumbwana anzanu adalewa—Kulewenga Baibolo pa jw.org.