Kukhululukiriwa machimo tikanati tawombolewa na dipo

Njira ibodzi yomwe tikhululukiriwa machimo yathu ni kuphatisira basa dipo yomwe Yesu adapereka na magazi yake. (Aef. 1:7) Podiya viri teno, Baibolo inena kuti: ‘Mulungu, adawonesa kuti ni wosakalipa mwakankulumize pa kukhululuka machimo yomwe yadachitika kale.’ (Aro. 3:25.) Manje vingakwanisike tani kuti Yahova akhululuke machimo pomwe akanati kupereka dipo nkumbatewedza mpfundo zake zachilungamo?

Yahova wenze adapolomisa kale kuti padzakhale ‘mbewu’ kuti ipulumuse wale omwe akhulupirira Mulungu na mapolomisi yake. Kwa Yahova, pomwe iye adachita polomisi mweyi venze ninge kuti dipo yaperekewa kale. (Gen. 3:15; 22:18) Mulungu wenze na chitsimikizo chakuti pa nthawe yoikhiwiratu, mwana wake adzadzipereke kuti abwere pano padziko yapasi kudzapereka dipo. (Agal. 4:4; Aheb. 10:7-10) Pomwe Yesu wenze pano pa dziko yapasi, Yahova adamupasa mphanvu zakuti akwanise kukhululukira machimo olo pomwe dipo ikanati yaperekewa. Yesu ambachita vimwevi ndawa yakuti ambadziwa kuti dipo yomwe iperekewe ikwanise kukhululukira machimo yose ya wanthu omwe ana chikhulupiriro.—Mat. 9:2-6.