NKHANI YOPFUNZIRA 52
Mbathandizani anzanu kuti akwanise kupirira mabvuto
‘Ayi kukangira kuchitira vabwino wanthu omwe ankufunikira vabwino ivo peno djanja yako ingakwanise kuchita vimwevo.’—MIY. 3:27.
NYIMBO NA. 103 Abusa Ndi Mphatso za Amuna
VOMWE TIPFUNZIREa
1. Ko nthawe zizinji Yahova adawira tani mapemphero ya atumiki wake?
KO IMWEPO munkudziwa kuti Yahova angakuphatisireni basa kuti adawire pemphero ya munthu munango? Peno ndimwe nkulu, mtumiki wothandiza, mpainiya panango wofalisa basi, dziwani kuti iye angakuphatisireni basa. Angachite vimwevi podiya kuti ndimwe wokalamba, mulumbwana, m’bale panango mulongo. Peno munthu yemwe akonda Yahova wapemphera kuti athandiziwe, Mulungu wathu angaphatise basa akulu na atumiki anango okhulupirika kuti ‘amulimbikise maninge.’ (Akol. 4:11) Ni mwayi ukulu maninge kutumikira Yahova na kuthandiza abale wathu mwanjira mweyi. Tingawathandize peno kwabwera matenda yofalikira mwakankulumize, matsoka yachilengedwe panango kudzudziwa.
MBATHANDIZANI ANZANU KUKABWERA MATENDA YOFALIKIRA MWAKANKULUMIZE
2. Ndawa chani vingakhale voshupa kuthandizana kukabwera matenda yofalikira mwakankulumize?
2 Kukabwera matenda yofalikira mwakankulumize, vingakhale voshupa kuti timbathandizane. Mwakulinganiza, tingakhale na shungu yozungira anzathu, koma tikachita vimwevi tingatenge matenda. Nthawe zinango tingafune pomwe kuchemera wanthu womwe akubonera kuti tidzadyere nawo pabodzi, koma kuchita vimwevi ni ngozi basi. Tingafunisise kuthandiza anango, koma chingakhalelini chikondi peno tingasiye wanthu wa m’banja mwathu ankubonera. Koma olo nteno, Yahova afuna kuti timbathandize abale na alongo wathu ndipo iye akondwa maninge tikambachita vimwevo. (Miy. 3:27; 19:17) Ko tingawathandize tani?
3. Ko tinkupfunzira chani pa chitsanzo cha akulu wa mumpingu wa Desi? (Yeremiya 23:4)
3 Vomwe akulu angachite. Peno imwepo ndimwe nkulu, yesesani kuzidziwa bwino nkhosa. (Lewengani Yeremiya 23:4.) Desi watidafotokoza mu nkhani yapita, adati: “Akulu wa nkagulu kathu ka utumiki, ambanithandiza kuti nimbalalikire mosashotashota nakuti nimbagumanike pa basa zinango.”b Pakuti akulu mwawa ambamuthandiza kale Desi, vidakhala vosashupa kuti amuthandize pomwe panthawe yomwe munthu wa m’banja mwake adafa na koronaviru.
4. Nchani chidathandiza akulu kuti ambathandize Desi momasuka, ndipo tinkupfunzira chani?
4 Desi adati: “Pakuti akulu nimbawaona kale kuti ni azishamwali wangu, venze vosashupa kuwauza momwe ninkubvera na vomwe vikunipasa nkhawa.” Ko akulu munkupfunzira chani pamwapa? Pfunziro ni yakuti mumbakhale na chizolowezi chothandiza abale na alongo akanati kugwerewa na bvuto. Khalani nawo pa ushamwali. Ndipo peno kwabwera matenda yofalikira mwakankulumize yomwe yankukugangisani kucheza nawo maso na maso, onani njira zinango zoyankhulirana nawo. Desi adati: “Nthawe zinango, pa ntsiku ibodzi nimbafonerewa na akulu osiyanasiyana panango kutumiziriwa mensaje. Iwo ambanitumizira mavesi yomwe nimbayadziwa kale, koma panthawe mweyi yambanifika pamoyo maninge.”
5. Ko akulu angadziwe tani vosowa va abale na alongo wawo, ndipo angachite tani kuti awathandize?
5 Kuti mudziwe vosowa va abale na alongo wanu, mungachite bwino kuwabvunza mibvunzo mwaluso. (Miy. 20:5) Yambani mwadzibvunza kuti, ko iwo anacho chakudya chokwana, mankhwala na vinthu vinango? Ko vinkuoneka kuti iwo angaluze basa yawo nthawe iliyose nkusowa pomwe pokhala? Ko pangafunike kuwathandiza kugumana chithandizo chochokera ku boma? Desi adapasiwa vinthu na abale na alongo wake. Koma mawu yolimbikisa yochokera kwa akulu ndiyo yadamuthandiza maninge kupirira. Iye adati: “Akulu ambapemphera nane pabodzi. Podiya kuti nikumbukiralini mawu yomwe angafotokoza mpemphero, nikundokumbukira kuti mtima wangu umbakhala m’malo. Venze ninge Yahova ankuniuza kuti, ‘ulilini wekha.’”—Yes. 41:10, 13.
M’bale yemwe ankuchitisa misonkhano ankukondwa kuona kuti azinji ankupereka ndemanga kuphatanidzapo m’bale wodwala yemwe ankuchitira pa vidiyokonferensiya (Onani ndime 6)
6. Ko azinji mu mpingu angathandize tani anango? (Onani foto.)
6 Vomwe anango angachite. Ni shuwadi kuti tifuna kuti akulu ambakhale patsogolo pochita vinthu. Koma Yahova afuna kuti tose timbayesese kulimbikisa anzathu na kuwathandiza. (Agal. 6:10) Peno munthu ankudwala, angalimbikisike maninge olo tichimuchitira vinthu vochepa powonesa kuti timukonda. Mwana anganembe kadezenyo nkupasa m’bale yemwe ankudwala. Mulumbwana panango mtsikana angathandize mulongo basa za pamuyi panango kumugulira vinthu. Ndipo anango mu mpingu angaphike chakudya nkukapasa munthu yemwe ankudwala. Koma peno ni matenda yofalikira, aliyese mu mpingu angafunike kulimbikisiwa. Misonkhano ikamala tingachite bwino kuchezako na abale na alongo kuti tiwalimbikise, peno maso na maso panango pafoni. Ndipo akulu angafunikembo kulimbikisiwa. Abale na alongo anango atumiza mamensaje yotembeja akulu ndawa yowathandiza pa nthawe ya matenda yofalikira. Vikhala bwino maninge ‘tikambayesesa kupitiriza kulimbikisana.’—1 Ates. 5:11.
MBATHANDIZANI ANANGO AKAGWEREWA NA MATSOKA YACHILENGEDWE
7. Ko matsoka yachilengedwe yabweresa mabvuto yaponi?
7 Matsoka yachilengedwe yangachinje vinthu pa moyo wa munthu mu kanthawe kang’ono chabe. Angaluze vinthu, manyumba panango kuferewa wachibale. Mabvuto mwaya yangachitikirembo abale na alongo wanthu. Ko manje tingawathandize tani?
8. Ko akulu na misolo ya banja achadekana kuchita chani chivomezi chikanati kuchitika?
8 Vomwe akulu angachite. Akulu, mbathandizani abale na alongo kuti ambakhaliretu okonzeka matsoka yachilengedwe yakanati kuchitika. Wonesesani kuti wose ankudziwa vangachite kuti apulumuke na momwe angayankhulirane na akulu. Margaret watidafotokoza mu nkhani yapita adati: “Akulu adatichenjeza kuti moto wa mthengo ufike mu dera yathu ndipo adatiuza momwe tingadzitetezere. Adatiuza pomwe kuti wa boma akadzalewa kuti thawani ndawa vinthu vaipa, tidzathawiretu mwakankulumize.” Yamwaya yenze malangizo ya panthawe yake ndawa yakuti payadandopita masondo yashanu, moto udafikiratu mu dera mweyi. Papfunziro yabanja, msolo wabanja afunika kufotokoza vomwe aliyese angadzachite. Peno imwepo na wana wanu ndimwe wokonzeka, mudzatangwanikelini maninge chikadzafika chivomezi.
9. Ko akulu angachite chani chivomezi chikanati kuchitika na pomwe chapita?
9 Peno imwepo ndimwe wonyang’anira kagulu ka utumiki, perekerantuni malangizo yose chivomezi chikanati kuchitika. Khalani na ndandanda ya madzina yawo ndipo mumbaiwone nthawe na nthawe. Ndipo chivomezi chikadzachitika mudzakwanise kuthandiza ofalisa aliyese. Mukazindikira vosowa va ofalisa, dziwisani mwakankulumize wogwirizanisa bungwe ya akulu kuti adziwisembo wonyang’anira dera. Kuchita vinthu mobverana tene, ni vothandiza maninge. Moto paudapita, wonyang’anira dera wa Margaret adakhala bize kwa maola 36 uku ankucheza na akulu kuti athandize abale na alongo wokwana 450 womwe enze alibe pokhala. (2 Akor. 11:27) Koma mu nthawe yochepa chabe, wose adapasiwa malo yokhala.
10. Ndawa chani akulu achadekana kuona kuti kulimbikisa abale ni kofunika maninge? (Yohane 21:15)
10 Akulu anaudindo wolimbikisa abale na Malemba na kuthandiza womwe anankhawa. (1 Pet. 5:2) Pakachitika chivomezi, iwo ambawonesese kuti anachakudya chokwana, vovala na pokhala. Olo papite minyezi yazinji chivomezi chachitika kale, abale na alongo mwawa angafunike kuthandiziwa basi. (Lewengani Yohane 21:15.) Harold wa mu Komiti ya Nthambi yemwe wathandizako abale na alongo azinji wogwerewa na matsoka yachilengedwe adati: “Papita nthawe kuti vinthu vikhale bwino. Iwo angayambe kuganizira maninge vinthu vadaluza na azibale wawo womwe adafa. Iwo angambakhale okwinyirira maninge ndawa yoganizira vimwevi. Vikakhala tene sikuti chikhulupiriro chawo chachepa, koma kwandokhala kuwawiwa mtima basi.”
11. Ko mabanja yangafunike kuthandiziwa mwakampitiriza pa vinthu viponi?
11 Akulu yesesani ‘kumbalira na wanthu womwe ankulira.’ (Aro. 12:15) Wanthu womwe apulumuka pa matsoka yachilengedwe afunika kutsimikiziriwa kuti Yahova alibe kuleka kuwakonda ndipo abale na alongo ankuwakondambo. Akulu ambalimbikise mabanja kuti yapitirize kupemphera, kupfunzira, kugumanika pa misonkhano na kulalikira. Akulu ambalimbikise pomwe azibereki kuti ambathandize wana wawo kuganizira vinthu vomwe chivomezi chingakwaniselini kudzonga. Azibereki, mbakumbusani wana wanu kuti nthawe zose Yahova adzakhale Shamwali wawo ndipo angawasiyelini. Ndipo mbawatsikimikizirani pomwe kuti abale na alongo padziko yose yapasi awaganizira ndipo ni wokonzeka kuwathandiza.—1 Pet. 2:17.
Ko mungadzipereke kuthandiza peno mu dera yanu mwachitika chivomezi? (Onani ndime 12)e
12. Ko anango angachite tani kuti athandize kukachitika chivomezi? (Onani foto.)
12 Vomwe anango angachite. Kukachitika chivomezi, mbabvunzani akulu vamungachite kuti muthandize. Panango mungasamalire kwakanthawe wanthu womwe ankusowa pokhala panango kudzipereka kukathandizira ku chimango. Mungathandizire pomwe kugawira vakudya abale na alongo womwe alibe. Peno chivomezi chachitikira kutali maninge na kwanu, mungakwanise kuthandiza basi. Ko mungathandize tani? Mumbapempherere wanthu womwe agwerewa na matsoka. (2 Akor. 1:8-11) Mungapereke pomwe kobiri zanu kuti zithandizire womwe agwerewa na matsoka padziko yose. (2 Akor. 8:2-5) Peno mungakwanise kuyenda kathandiza ku malo komwe kwachitika ngozi, abvunzeni akulu vamungachite kuti mudzipereke. Mukachemerewa kuti muyende, mudzapfunzisiwe momwe mungathandizire wanthu.
MBATHANDIZANI ABALE NA ALONGOKUPIRIRA AKAMBADZUDZIWA
13. Ko abale wathu agumana na mabvuto yaponi m’madziko yomwe basa yathu ni yolambiziwa?
13 M’madziko yomwe basa yathu ni yolambiziwa, abale na alongo wathu ankubonera ndawa yodzudziwa. Iwo asowa kobiri, adwala ndipo aferewa wanthu wapamoyo. Koma ndawa ya kushupa kwa vinthu, nthawe zinango akulu angakwaniselini kuzungira abale panango kuyankhula nawo kawikawiri kuti awalimbikise. Vimwevi ndivo vidachitikira Andrei watidatomola mu nkhani yapita. Mulongo wa mkagulu kake ka utumiki wenze alibe kobiri. Patsogolo pake mulongo moyu adachita ngozi na karo. Iye ambafunika kuchitiwa operasau ikulu ndipo adakakwanisalini pomwe kuphata basa. Podiya kuti venze voshupa kumuthandiza bwinobwino ndawa ya koronaviru, abale adamuthandiza momwe angakwanisire ndipo Yahova ambawona.
14. Ko akulu angakhale tani chitsanzo chabwino pa nkhani yothemba Yahova?
14 Vomwe akulu angachite. Andrei adapemphera ndipo adachita vomwe angakwanise. Manje ko Yahova adadawira tani? Iye adaphatisira basa abale womwe enze na ufulu wochita ulendo. Anango adathandiza mulongo moyu kugumana chithandizo chabwino cha mankhwala ndipo anango adamupasa kobiri kuti athandizike. Yahova adawapasa mtima wothandiza ndipo adawadalisa ndawa ya kuyesesa kwawo. (Aheb. 13:16) Akulu, peno basa yathu ni yolambiziwa mu dziko yanu, mbagawanani vochita na anango. (Yer. 36:5, 6) Koma chofunika maninge, mumbathembe Yahova. Iye angakuthandizeni kugumanira vosowa abale na alongo wanu.
15. Ko tingachite tani kuti timbakhale obvana peno tinkudzudziwa?
15 Vomwe anango angachite. Boma ikatilambiza kuchita vinthu vinango, tingambagumane ntumagulu tung’onotung’ono. Vimwevi ni vofunika maninge kuti tipitirize kukhala obvana. Timbalimbane na Satana, osati kulimbana tekhatekha. Yesesani kumbandowona makhalidwe yabwino ya abale na alongo wanu ndipo mukayambana nawo mumbakambirane mwakankulumize. (Miy. 19:11; Aef. 4:26) Mumbakhale woyamba kuthandiza anzanu. (Tito 3:14) Mulongo ule padathandiziwa, anzake wa mkagulu ka utumiki adalimbikisiwa maninge ndipo adayamba kubvana ninge wanthu wa m’banja ibodzi.—Sal. 133:1.
16. Mobverana na Akolose 4:3, 18, ko tingathandize tani abale na alongo wathu womwe ankudzudziwa?
16 Abale na alongo wathu wokwana 10 000, ankutumikira Yahova mokhulupirika podiya kuti boma inkuwalambiza kuchita vinthu vinango. Anango ankumangiwa ndawa ya chikhulupiriro chawo. Tingawapempherere, kupempherera wanthu wa m’banja mwawo na anango womwe ankuikha moyo wawo pangozi kuti athandize abale na alongo wawo kukhala pa ushamwali wolimba na Yahova, kuwagumanira vakudya na kuwathandiza kuti mulandu wawo utongewe mobverana na malamulo.c (Lewengani Akolose 4:3, 18.) Dziwani kuti mapemphero yanu yangachitise kuti Yahova athandize maninge.—2 Ates. 3:1, 2; 1 Tim. 2:1, 2.
Ko mungawakonzekerese tani wanthu wa m’banja mwanu kuti adzakhale olimba tikambadzadzudziwa? (Onani ndime 17)
17. Ko mungadzikonzekerese tani manjeuno mukanati kuyamba kudzudziwa?
17 Imwepo na wanthu wa m’banja mwanu mungakwanise kukhaliratu wokonzeka boma ikanati kuyamba kukudzudzani. (Mac. 14:22) Ayi kudzishupa na kumbandokhalira kuganizira voipa vose vomwe vingadzachitike. Koma yesesani kuti imwepo na wana wanu mukhale pa ushamwali wolimba na Yahova. Ndipo nthawe zinango mukakhala na nkhawa, muuzeni vose Mulungu. (Sal. 62:7, 8) Pabanja panu mumbakambirane vifukwa vobveka votichitisa kuthemba Yahova.d Ndipo mukambakonzekereratu matsoka yachilengedwe yakanati kuchitika, mudzathandize wana wanu kumbathembambo maninge Yahova, kukhala wolimba mtima na wantendere.
18. Ko Yahova adzatipase chani kutsogolo?
18 Ntendere wa Mulungu utichitisa kudzibva kuti ndise otetezeka. (Afil. 4:6, 7) Yahova aphatisira basa ntendere moyu potikhazika mtima pasi tikadwala, tikagwerewa na matsoka yachilengedwe na pomwe tinkudzudziwa. Iye aphatisira basa akulu wakhama kuti atilimbikise. Iye wapereka pomwe mwayi wakuti tose timbathandizane. Ntendere watingakhale naye manjeuno ungatithandize kupirira mabvuto yakulu kuphatanidzapo ‘chisautso chikulu’ chomwe chinkubwera. (Mat. 24:21) Panthawe mweyi tidzafunikire pomwe kukhala na ntendere kuti tidzakwanise kuthandizana. Koma chisautso chimwichi chikadzapita, tidzagumanelini pomwe na mabvuto yotichitisa kukhala na nkhawa. Viri teno ndawa yakuti panthawe mweyo tidzakhale na ntendere wosapera womwe Yahova adzatipase.—Yes. 26:3, 4.
NYIMBO NA. 109 Tizikondana Kwambiri Kuchokera Mumtima
a Nthawe zose Yahova aphatisira basa atumiki wake okhulupirika kuti athandize wanthu womwe ankugumana na mabvuto. Iye angaphatisire basa imwepo kuti mulimbikise abale na alongo wanu. Naboni manje tikambirane momwe tingathandizire wanthu omwe ali pabvuto.
b Madzina yanango yachinjiwa.
c Ni vosakwanisika kuti abale wa ku ofesi ya nthambi panango ku likulu yathu atumize makalata yose yomwe wanthu anembera abale panango alongo womwe ali mudjeri.
d Onani nkhani yakuti “Tizikonzekera Kuti Tidzathe Kupirira Pozunzidwa” mu Nsanja ya Olonda ya Julho 2019.
e MAWU YOFOTOKOZERA MAFOTO: Mwamuna na nkazi wake abweresera chakudya banja yomwe inkukhala kwakanthawe pa malo yanango ndawa yakuti kwachitika matsoka yachilengedwe.