Yahova achakukondani imwepo!

1. Ko Yahova achawona chani mwa wanthu wake?

YAHOVA MULUNGU ‘achakondwa na wanthu wake.’ (Sal. 149:4) Vimwevi ni volimbikisa kwa ise. Yahova achawona makhalidwe yathu yabwino, achawona vomwe tingakwanise kuchita, ndipo achatithandiza kuti tikhale naye pa ushamwali. Tikapitiriza kukhala wokhulupirika kwa iye, adzatisiyelini mpaka kale-kale!—Yoh. 6:44.

2. Ndawa chani anango viwashupa kutsimikiza kuti Yahova achawakonda?

² Anango achati, ‘nichadziwa kuti Yahova achakonda wanthu wake ninge gulu, koma ko ningatsimikize tani kuti Yahova achanikonda panekha?’ Ko ni chani chomwe chichachitisa munthu kudzibvunza bvunzo moyu? Oksanab, yemwe adabonera maninge pewenze mwana adati: ‘Nidakondwa maninge pomwe nidayenda kukabatizika na kuyamba upainiya. Koma magole 15 patsogolo pake nidayamba kuganizira vinthu voipa vinganichitikira penenze mwana. Nidafika pakuganiza kuti Yahova ankunikondalini ndipo alibe nane basa.’ Mulongo Yua yemwe ni mpainiya wokhazikika yemwe adabonerambo ali mwana adati: ‘Nidapereka moyo wangu kwa Yahova ndawa yakuti ningada kumukondweresa. Koma nidayamba kutsimikizira kuti iye achanikondalini.’

3. Ko tikambirane chani mu nkhani ino?

³ Ninge Akhrisitu wokhulupirika mwawa watafotokoza, mungambakonde Yahova koma panango mungambawone kuti iye akukondanilini. Ndawa chani muchadikana kutsimikizira kuti iye achakuwerengerani imwepo? Ndipo ni chani chingakuthandizeni mukakhala na maganizo yakudziwona kuti mulibe na basa? Naboni tikambirane midawiro ya mibvunzo mwaya.

KUKAIKIRA KUTI YAHOVA ACHATIKONDA NI NGOZI

4. Ni Ngozi yanyi ilipo tikambakaikira vakuti Yahova achatikonda?

⁴ Chikondi ni mphanvu yotilimbikisa. Tikambakhulupirira kuti Yahova achatikonda na kutithandiza, tingakwanise kumutumikira podiya kuti tigumane na mabvuto yoshupa pamoyo wathu. Koma tikambawona kuti Yahova alibe nase basa, ‘mphanvu zathu zidzachepe.’ (Miy. 24:10) Ndipo tikakhala wokwinyirira mpakana kufika pakuwona kuti Mulungu ankutikondalini, tidzagwere mumisampha ya Satana.—Aef. 6:16.

5. Ni chani chomwe chidachitikira abale na alongo anango omwe angakaikira kuti Mulungu achawakonda?

⁵ Akhiristu anango wokhulupirika mu nthawe yathu ino afoka mwauzimu ndawa ya kukaikira. Nkulu munango dzina yake James adati: ‘Olo kuti ningatumikira pa Beteli ndipo ningakondwa na utumiki wangu mu mpingu wachiseweredwe chakunja, ningakaikira kuti peno Yahova ankukondwa na vomwe ninkumuchitira. Panthawe inango ningadzibvunza kuti peno Yahova ankubveseradi mapemphero yangu.’ Eva, yemwe ankuchitambo utumiki wa nthawe zose adati: ‘Nidazindikira kuti kukaikira kuti Yahova achakukonda ni ngozi ndawa vichachitisa kudziwona kuti ulibe na basa. Vimwevi vichadzonga shungu yako pa vinthu vauzimu nkumbatumikira Yahova uli wokwinyirira.’ Michael, yemwe ni mpainiya wokhazikika komasoti nkulu adati: ‘Peno uchakhulupiriralini kuti Yahova achakusamalira, undoganiza vakundomusiya.’

6. Tichadekana kuchita chani mumsolo mwathu mukabwera maganizo yakuti Yahova achatikondalini?

⁶ Vitsanzo mwevi vinkuwonesa kuipa kodziwona kuti tilibe na basa. Ko tingachite chani peno tayamba kuganiza kuti Yahova achatikondalini? Tichadikana mwakankulumize kuleka kuganizira vimwevi! Kumbirani Yahova kuti akuthandizeni ‘kupfudza maganizo’ mwaya mumsolo mwanu ndipo ‘ntendere wa Mulungu omwe uchaposha kuganiza mwamphanvu kulikose udzateteze mtima wanu.’ (Sal. 139:23; Afil. 4:6, 7) Ndipo dziwani kuti ndimwelini mwekha. Abale na alongo muchikhulupiriro ankugumanambo na vibodzibodzi. Olo atumiki anango wa Yahova wa kale-kale adagumanambo na mabvuto ninge mwaya. Onani vomwe tinkupfunzira pa chitsanzo cha mtumi Paulo.

VOMWE TINKUPFUNZIRAPO PA CHITSANZO CHA PAULO

7. Ko ni mabvuto yaponi yomwe Paulo adagumana nayo?

⁷ Ko imwepo nthawe zinango muchadzibva kukhala woneta na maudindo yazinji yamunayo, ndipo yankushupa kuti muyakwanirise? Peno ni teno, bvesesani chitsanzo cha Paulo. Iye angakhala na nkhawa osati na mpingu ubodzi, koma ‘ndawa ya mipingu yose.’ (2 Akor. 11:23-28) Ko matenda yosamala yankukuchoserani chimwemwe? Paulo angashupiwa na ‘minga mthupi’ yomwe panango yenze matenda, ndipo ambafuna kuti apole. (2 Akor. 12:7-10) Ko imwepo muchakalipa ndawa ya vinthu vomwe muchaphonya ndawa yakuti mulibe ungwiro? Nayembo Paulo angabva tene nthawe zinango. Iye adadzichemera kuti ‘munthu wobonera ine’ ndawa nthawe zose ambayesesa kuti achite vabwino, koma ambakanga ndawa ya uchimo wake.—Aro. 7:21-24.

8. Ko nchani chidathandiza Paulo kupirira mabvuto yake?

⁸ Podiya kuti adagumana na mabvuto yosiyanasiyana, Paulo adapitiriza kutumikira Yahova. Ko nchani chomwe chidamulimbikisa kuchita vimwevi? Olo kuti iye ambadziwa bwino-bwino va kusowa ungwiro wake, iye wenze na chikhulupiriro chosagunduzika pa nkhani ya dipo. Iye ambadziwa bwino-bwino pa vomwe Yesu adapolomisa kuti ‘aliyese wokhulupirira [Yesu] . . . akhale na moyo wosapera.’ (Yoh. 3:16; Aro. 6:23) Mosakaika Paulo angakhulupirira dipo. Iye wenze na chitsimikiziro chakuti Yahova niwokonzeka kukhululukira munthu yemwe wachita chimo ikulu koma walapa.—Sal. 86:5.

9. Ko tinkupfunzira chani na mawu ya Paulo yali pa Agalatiya 2:20?

⁹ Paulo angatsimikiza kuti Yahova angamukonda ndawa yakuti adatumiza Yesu kuti adzamufere. (Lewengani Agalatiya 2:20.) Onani mawu yotsimikizira kumapeto kwa vesi. Paulo adati: ‘Mwana wa Mulungu . . . adanikonda na kudzipereka yekha ndawa ya ine.’ Paulo alibe kudziwona kuti niwoyipa mwakuti Mulungu angamukondelini, ndipo alibe kulewa kuti: ‘Ninkukwanisa kuona kuti Yahova angakonde abale wangu, koma ine anganikondelini.’ Paulo adalimbikisa Akhrisitu wa ku Roma kuti: ‘Pomwe tose tenze wochimwa, Khrisitu adatifera.’ (Aro. 5:8) Palibe chomwe chingakangise Yahova kutikonda!

10. Ko tinkupfunzira chani pa Aroma 8:38, 39?

¹⁰ Lewengani Aroma 8:38, 39. Paulo wenze na chitsimikizo chose cha mphanvu ya chikondi cha Mulungu. Iye adanemba kuti: ‘Palibe chingatisiyanise na chikondi cha Mulungu.’ Paulo angadziwa momwe Yahova angachitira vinthu na ntundu wa Aizirayeli. Iye angadziwa pomwe momwe Yahova adawonesera chifundo kwa iye. Tingalewe kuti Paulo angaganiza kuti: ‘Pakuti Yahova adatumiza mwana wake kuti adzafere ine, ko pali chifukwa chilichose chokaikirira kuti achanikonda?’—Aro. 8:32.

11. Podiya kuti Paulo adachita machimo yazinji ninge mwaviri nemberewe pa 1 Timoteyo 1:12-15, ni chani chomwe chingamutsimikizira kuti Mulungu angamukonda?

¹¹ Lewengani 1 Timoteyo 1:12-15. Paulo angabvalini bwino akaganizira vinthu voipa vomwe angachita kale-kale akanati wakhala Mkhrisitu. Ni vosadabwisa kuti iye adadzilewa kuti ni wochimwa ‘maninge.’ Paulo angadzudza Akhrisitu m’malo yazinji, anango angawaikha mu djeri ndipo anango iye angalimbikisa kuti aphewe. (Mac. 26:10, 11) Ko mungakwanise kuganizira momwe Paulo angabvera akagumana na mwana yemwe azibereki wake adaphewa ndawa yakuti iye adalimbikisa kuti aphewe? Paulo ambadzilinga, koma angadziwa kuti angakwaniselini kuchinja vinthu vakale. Iye adabvuma vakuti Yesu adamufera, ndipo na chidaliro chose adanemba kuti: ‘Ndawa ya kukoma moyo kukulu kwa Mulungu, nili momwe nililimu.’ (1 Akor. 15:3, 10) Ko tinkupfunzira chani? Bvumani kuti Khrisitu adafera imwepo nakuti vimwevi vidachitisa kuti vikhale vokwanisika kukhala paushamwali wakulimba na Yahova. (Mac. 3:19) Vomwe Mulungu achalewengera ni vomwe tichachita manjeuno na kutsogolo, osati pa vomwe tidachita kale-kale, ndipo viribe basa peno tidakhala kale-kale wa Mboni panango neye.—Yes. 1:18.

12. Ko mawu ya pa 1 Yohane 3:19, 20 yangatithandize tani peno tinkudzibva kuti tinkukondewalini?

¹² Mukambaganizira kuti Yesu adafa ndawa ya machimo yanu, panango mungalewe kuti, ‘ndinelini wodikana kuchitiriwa vabwino tene.’ Ndawa chani imwepo mungabve teneuyu? Mtima wathu ulibe ungwiro ungatinamize, nkutichitisa kudziwona kuti tilibe na basa na osakondewa. (Lewengani 1 Yohane 3:19, 20.) Pa nthawe ninge mweyi, tichadikalini kuyebwa kuti ‘Mulungu ni nkulu kuposha mitima yathu.’ Podiya kuti timbabve ninge Yahova ankutikondalini panango kuti angatikhululukirelini, Ababa wathu wakudzulu adzapitirize kutikonda na kutikhululukira. Tichadikana kukhulupirira kuti Yahova achatikonda. Vimwevi vingakwanisike tikambapfunzira mawu yake, kupemphera kwa iye nthawe zose na kusonkhana pabodzi na wanthu wake wokhulupirika. Ndawa chani kuchita vimwevi ni kodikana?

MOMWE TINGATHANDIZIRIWE NA PFUNZIRO YA BAIBOLO, PEMPHERO NA AZISHAMWALI WOKHULUPIRIKA

13. Ko kupfunzira mawu ya Mulungu kungatithandize tani? (Onani bokosi yakuti: “Momwe mawu ya Mulungu yadawathandizira.”)

¹³ Pfunzirani Mawu ya Mulungu ntsiku iliyose, ndipo mudzawone kuti Yahova ni chaiye kwa imwepo. Ndipo mudzabvese momwe iye achakukonderani. Mbaganizirani Malemba ntsiku iliyose kuti yakuthandizeni, ‘kuthamula vinthu’ pamoyo wanu. (2 Tim. 3:16) Kelvin yemwe ni nkulu yemwe achadziona kuti ni wachabechabe adati: ‘Nichalewenga Salimo 103 na kuganizira momwe lemba mweyi idanithandizira kubvesa chikondi cha Yahova kwa ine.’ Eva, yemwe tamutomola pakuyamba pale adati: ‘Kumapeto kwa ntsiku nichaganizira momwe Yahova achabvera na ine. Vimwevi vichanipasa ntendere wa mumtima ndipo vichalimbisa chikhulupiriro changu.’

14. Ko pemphero ingatithandize tani?

¹⁴ Mbapempherani mosalekedza. (1 Ates. 5:17) Kuti wanthu akhale paushamwali wolimba achadikana kumbacheza pafupi-pafupi, nchibodzi-bodzimbo na ushamwali wathu na Yahova. Tikambamuwuza momwe tinkubvera, vomwe tinkuganiza na nkhawa zathu m’pemphero, tichawonesa kuti tichamuthemba nakuti tichadziwa kuti achatikonda. (Sal. 94:17-19; 1 Yoh. 5:14, 15) Yua yemwe tamutomola kumayambiriro adati: ‘Pomwe ninkupemphera, nichandolewa vomwe vanichitikira ntsiku mweire yokha, koma nichamasuka nkumuwuza Yahova momwe ninkubvera. Pang’ono na pang’ono, nichayamba kuona Yahova osati ninge bwana wa mu ofesi panango wa pa impereza, koma ninge Baba yemwe achakonda wana wake.’—Onani bokosi yakuti: “Ko mudalewengako kale?”

15. Ko Yahova achawonesa tani chidwi kwa ise?

¹⁵ Khalani pabodzi na azishamwali wokhulupirika ndawa iwo ni mphaso yochokera kwa Yahova. (Yak. 1:17) Ababa wathu wakudzulu adawonesa chidwi kwa ise pakutipasa banja yauzimu ya abale na alongo omwe achawonesa ‘chikondi nthawe zose.’ (Miy. 17:17) Mu kalata yake kwa Akolose, Paulo adafotokoza va Akhrisitu anango omwe adamusamalira, ndipo adati iwo ‘adanithandiza na kunilimbikisa.’ (Akol. 4:10, 11) Olo Yesu Khrisitu angatembeja chithandizo chomwe angatambira kwa azishamwali wake, kwa angelo na kwa wanthu.—Luka 22:28, 43.

16. Ko kukhala na azishamwali wokhulupirika kungatithandize tani kukhala paushamwali na Yahova?

¹⁶ Ko imwepo muchatambira thandizo ya azishamwali wanu mu mpingu? Tikambafotokozera azishamwali nkhawa zathu, sikuti tilibe chikhulupiriro, koma vingatiteteze. Onani vomwe James yemwe tamutomola pakuyamba pale adanena: ‘Kukhala na azishamwali wabwino na wolimba mwauzimu kwanithandiza. Maganizo yofokesa yakanibwerera, azishamwali mwawa achanibvesera ndipo achapitiriza kuniwonesa chikondi. Akambanithandiza tene, nichayamba kutsimikiza kuti Yahova achanikondadi.’ Ni vabwino maninge kukulisa ushamwali wolimba na abale na alongo wathu wauzimu!

PITIRIZANI KUKHALA M’CHIKONDI CHA YAHOVA

17-18. Ko ni mbani yemwe tichadekana kumubvera ndipo ndawa chani?

¹⁷ Satana achada kuti tileke kuchita vomwe ni vabwino. Iye achada kuti timbakhulupirire kuti Yahova achatikondalini ndipo utumiki wathu ulibe na basa. Koma ninge mwatawonera, imweyi ni bodza.

¹⁸ Yahova achakukondani. Imwepo ndimwe wodekana m’maso mwake. Mukambamubvera, ‘mudzapitirize kukhala muchikondi chake’ mpakana kale-kale, ninge momwe Yesu adachitira. (Yoh. 15:10) Ndipomwapa osabvera Satana, panango maganizo yanu yodziona kuti mulibe na basa. Koma bverani Yahova, yemwe achawona vabwino mwa munthu aliyese. Khalani wotsimikiza kuti iye ‘achakondwa na wanthu wake,’ kuphatanidzapo imwepo!