Ko pemphero ingakuthandizeni tani?

Munthu munango dzina yake Pamela, adadwala maninge ndipo adayenda ku shipitali. Koma adapemphera pomwe kwa Mulungu kuti amupase mphanvu zakuti akwanise kupirira bvuto mweyi. Ko pemphero idamuthandiza?

Pamela adagumanika na khansa ndipo iye adanena kuti: “Nthawe zizinji nimbachita mantha nikambatambira mankwala ya khansa. Koma nikapemphera kwa Yahova Mulungu, ntima wangu umbakhala m’malo ndipo nimbakwanisa kuganiza bwinobwino. Nimbabonera basi na kuwawiwa koma pemphero imbanithandiza kuwona vinthu mu njira ya bwino. Wanthu akanibvunza kuti: Muli tani? Nimbawauza kuti ‘ninkubveralini bwino koma ninkukondwa!’”

Koma tinkudekanalini kudikhira kuti tigumane na bvuto ikulu kuti tipemphere. Tose tichagumana na mabvuto, peno ni yakulu panango yang’ono ndipo tichadekana kuthandiziwa kuti tikwanise kulimbana na mabvuto mwaya. Manje ko kupemphera kungatithandize?

Baibolo inena kuti: ‘Umuuze Yehova nkhawa zako ndipo iye adzakuthandize.’ (Salimo 55:22) Lemba mweyi ni yolimbikisa maninge. Manje ko kupemphera kungakuthandizeni tani? Mukambapemphera kwa Mulungu mu njira yobvumizika, iye adzakupaseni vinthu vomwe vingakuthandizeni kulimbana na mabvuto yanu.—Onani bokosi yakuti “Vomwe mungagumane ndawa ya kupemphera.”

Vomwe mungagumane ndawa ya kupemphera

Mtendere wamuntima

‘Vokumbira vanu vidziwike kwa Mulungu. Mukateno, ntendere wa Mulungu womwe uchaposha kuganiza monoka kulikose, udzateteze mitima yanu na maganizo yanu mwa Khrisitu Yesu.’ (Afilipi 4:6, 7) Mukambamuuza Mulungu nkhawa zanu, iye adzakuthandizeni kuti ntima wanu ubvebwino nakuti mumbakwanise kuchita vinthu mwanzeru mukagumana na mabvuto.

Nzeru yochokera kwa Mulungu

‘Peno munango ankusowa nzeru, ambakumbire kwa Mulungu, ndipo adzamupase ndawa yakuti iye achapereka mosaumira kwa ose ndipo achapereka mosanyoza.’ (Yakobo 1:5) Nthawe zinango tisalulalini vinthu mwanzeru tikakhala kuti tapanikizika. Koma tikambapemphera kuti Mulungu atipase nzeru, angatikumbuse mpfundo zizinji zothandiza zogumanika m’Mawu yake m’Baibolo.

Mphanvu komasoti chilimbikiso

‘Pa vinthu vose nigumana mphanvu kuchokera kwa iye yemwe achanipasa mphanvu.’ (Afilipi 4:13) Ndawa yakuti Yahova ni Mulungu wamphanvuyose, angakupaseni mphanvu zomwe munkudekana kuti mukwanise kulimbana na mabvuto yanu panango kuyapirira. (Yesaya 40:29) Baibolo ichanena pomwe kuti Yahova ni ‘Mulungu yemwe achatinyamalisa mu njira iliyose.’ Iye angatilimbikise pa ‘masautso yathu yose.’—2 Akorinto 1:3, 4.