Ko Mulungu achabva mapemphero yathu?

MULUNGU ABVESERA.

‘Imwe wakubva pemphero, wanthu wa makhaindi yose adzabwere kwa imwepo.’—Salimo 65:2.

Wanthu anango anena kuti achabva bwino akambapemphera podiya kuti ankukhulupiriralini kuti munthu munango ankubvesera. Koma cholinga cha kupemphera ni chakutilini tindogumane ntendere wa muntima basi pomwe tinkugumana na mabvuto. Baibolo ititsimikizira kuti: ‘Yahovaa ali pafupi na ose ochemerera pa dzina yake. Iye ali pafupi na ose omwe achamuchemera mu chonadi. . . . Adzabve kukuwa kwawo kokumbira thandizo.’—Salimo 145:18, 19.

Ndawa ya vimwevi, tichadekana kukhulupirira kuti Yahova Mulungu achabva mapemphero ya wanthu omwe amutumikira. Iye anena mwachikondi kuti: ‘Mudzachemerere pa ine komasoti mudzabwere kwa ine ndipo ine nidzakubvesereni.’—Yeremiya 29:12.

MULUNGU ANKUFUNA KUTI MUMBAPEMPHERE KWA IYE.

‘Pitirizani kupemphera.’—Aroma 12:12.

Baibolo itilimbikisa kuti “timbapemphere mosalekedza” komasoti ‘timbapemphere pa chilichose.’ Pamwapa vinkuwonekeratu kuti Mulungu ankufuna kuti timbapemphere kwa iye.—Mateyu 26:41; Aefeso 6:18.

Ndawa chani Mulungu afuna kuti timbapemphere kwa iye? Ganizirani ivi: Ko pana baba yemwe angafune kuti mwana wake anene kuti, “ko ababa munganithandizembo?” Ni shuwadi kuti panango baba ankudziwa vomwe mwana wake ankudekana. Koma akabva mwana wake ankukumbira thandizo, viwonesa kuti mwana muyo athemba ababa wake ndipo awakonda. Molingana na vimwevi, tikambapemphera kwa Mulungu tiwonesa kuti timuthemba komasoti tinkufuna kubverana naye.—Miyambo 15:8; Yakobo 4:8.

MULUNGU AKUKONDANI.

‘Mumbamutulire nkhawa zanu zose ndawa akuderani nkhawa.’—1 Petulo 5:7.

Mulungu afuna kuti timbapemphere kwa iye ndawa yakuti atikonda komasoti atidera nkhawa. Iye adziwa nkhawa zathu ndipo afuna kutithandiza.

Nthawe zose Mpfumu Davide ambapemphera kwa Yahova pakufuna kukumbira nthandizo komasoti kumuuza maganizo yake na momwe ambabvera. (Salimo 23:1-6) Manje ko Mulungu ambamuwona tani Davide? Iye ambamukonda ndipo ambabvesera mapemphero yake yose. (Machitidwe 13:22) Mulungu abveserambo mapemphero yathu ndawa atikonda maninge.

‘INEPANO NIKONDA YAHOVA NDAWA IYE ACHABVESERA MAWU YANGU’

Mawu mwaya yadanembewa na munthu munango yemwe adanembambo masalimo ya m’Baibolo. Iye ambakayikiralini kuti Mulungu ambabvesera mapemphero yake. Vimwevi vimbamuthandiza kukhala pa ushamwali wolimba na Mulungu komasoti kupirira mabvuto yomwe ambagumana nayo.—Salimo 116:1-9.

Tikakhala na chitsimikizo chakuti Mulungu achabva mapemphero yathu, isepano tidzapitirize kupemphera. Onani chitsanzo cha Pedro yemwe akhala ku Espanha. Mwana wake wa magole 19 adafa pa ngozi ya pamsewu. Vimwevi vidamuwawa maninge ndipo kwa maulendo yazinji iye adapemphera kuchokera pasi pa moyo kwa Yahova kukumbira kuti amunyamalise na kumuthandiza. Ko chidachitika ni chani? Iye adati: “Yahova adadawira mapemphero yangu pa kuninyamalisa na thandizo yomwe inepano na nkazi wangu tidatambira kuchokera kwa abale na alongo.”

Ni shuwadi kuti mapepmphero yawo yalibe kuchitisa kuti mwana wawo akhalesoti na moyo. Koma mapemphero yadathandiza maninge Pedro na wanthu wa m’banja yake. Nkazi wake dzina yake María Carmen, akumbukira kuti: “Kupemphera kumbanithandiza kupirira chisoni chomwe nenze nacho. Nimbadziwa kuti Yahova ambanibvesa ndawa pomwe nimbapemphera nimbabva ntendere wa muntima.”

Baibolo na vitsanzo va wanthu anango viwonesa kuti Mulungu achabva mapemphero yathu. Koma pana mapemphero yanango yomwe Mulungu ayadawiralini. Ndawa chani Mulungu achadawira mapemphero yanango koma yanango neye?