Phatisirani basa bukhu yakuti Kondwani na moyo mpaka kalekale! mu umboni

Ndise wokondwa maninge ndawa yotambira bulosha na bukhu inyowani yomwe timbayaphatisire basa pakuchitisa mapfunziro ya Baibolo. Tinkupemphera kwa Yahova kuti adalise khama yathu kuti tipfunzise wanthu azinji. (Mt 28:18-20; 1Ak 3:6-9) Ko tingaphatisire tani basa vipangizo vinyowani mwevi?

Pakuti bukhu yakuti Kondwani na moyo mpaka kalekale!, kosi yokambirana va m’Baibolo inanjira zinyowani zopfunzisira, tewedzani malangizo ya momwe mungakonzekerere na kuchitisa mapfunziro ya Baibolo.a

• Werengani nkhani na kukambirana mibvunzo

• Lewengani malemba yonembewa kuti ‘lewengani’ ndipo thandizani wopfunzira kuwona momwe angayaphatisire basa

• Wonesani mavidiyo na kukambirana naye pophatisa basa mibvunzo yomwe yadaikhiwa

• Yesesani kukambirana naye pfunziro iliyose ya chigawo

Mukakhala mu umboni, poyamba mugawireni bulosha kuti muwone peno anachidwi. (Wonani bokosi yakuti: “Momwe mungagawirire bulosha yakuti Kondwani na moyo mpaka kalekale! pa ulendo woyamba.”) Peno mwamaliza kupfunzira naye bulosha koma nkuwona kuti iye ankufuna basi, mupaseni bukhu ndipo yambani naye pa msolo 04. Peno munthu munkupfunzira naye kale bukhu ya Vomwe Baibolo ichapfunzisa panango yakuti Kodi Mungatani Kuti Mulungu Apitirize Kukukondani?, chinjani ndipo yambani kupfunzira bukhu ya Kondwani na moyo mpaka kalekale! ndipo mungawone pamungayambire naye.

NYANG’ANIRANI VIDIYO YAKUTI MWATAMBIRIWA KU PFUNZIRO YA BAIBOLO, NDIPO IKAPERA DAWIRANI MIBVUNZO AYA:

• Ko mapfunziro yathu yadzapfunzire chani mu bukhu inyowani?

• Ndawa chani imwepo mungafunike kuwonesa vidiyo mwiyi kwa mapfunziro yanyowani?

• Ko ni volinga viponi vomwe mungalimbikise wopfunzira kuti akhale navo na kuvikwanirisa?​—Wonani pakuti: “Pa chigawo chilichose, mulimbikiseni kukhala na volinga”