Pomwe Mulungu angatonga, chilengedwe chose chenze chobverana ndipo chenze pantendere

Ndawa chani tichadekana Ufumu wa Mulungu?

Pomwe wanthu woyambirira adasikiwa, Mulengi wathu yemwe dzina yake ni Yahova, ndiye yekha wenze Ntongi. Ndipo iye angawatonga mwachikondi. Iye adawakonzera muyi wabwino m’munda wa Edeni kuti ambakhalemo. Adawapasa soti chakudya chizinji. Kuyingizira pamwapa, adawapasa basa yabwino maninge. (Genesis 1:28, 29; 2:8, 15) Ndawa yakuti Mulungu ambawatonga mwachikondi, iwo enze pantendere.

Adamu waphata chipaso cholambiziwa chawapasiwa na Hava. — Wanthu woyambirira adalamba kubvera Mulungu ninge Ntongi wawo

Baibolo ichafotokoza va kupanduka kwa mngelo, yemwe adadzachemerewa kuti Satana na Ndyerekezi. Mngelo moyu adalewa kuti Mulungu achatongalini bwino. Iye adati wanthu vingawafambire bwino akambadzitonga wokha mosatsogolerewa na Mulungu. Ni vobvesa ntsisi kuti azibereki wathu woyambirira, Adamu na Hava, adapandukirambo Mulungu ninga Satana.—Genesis 3:1-6; Chivumbulutso 12:9.

Ndawa yakuti Adamu na Hava adalamba kutongewa na Mulungu, adaluza mwayi wokhala m’paradaiso na moyo wangwiro mpakana kale-kale. (Genesis 3:17-19) Vomwe adasalula vidachitisa kuti wana wawo akhale pabvuto. Baibolo ichafotokoza kuti, ndawa yakuti Adamu adachimwa, ‘uchimo udangena m’dziko ndipo impfa kudzera mwa uchimo.’ (Aroma 5:12) Uchimo udabweresa soti bvuto iyi: ‘Munthu ankupweteka munzake pakumutonga.’ (Mlaliki 8:9) M’mawu yanango tingalewe kuti, wanthu akambadzitonga wokha, mabvuto yandobwerera-bwerera.

MOMWE UTONGI WA WANTHU UDAYAMBIRA

Nimurodi adadzikuza. Wanthu wa ku Babele ankumanga ntsanja. — Nimurodi adapandukira Yahova

Munthu woyamba kutonga anzake wofotokozewa m’Baibolo, ni Nimurodi. Iye adapandukira ulamuliro wa Yahova. Munthawe yake, wanthu wamphanvu adaphatisa basa mphanvu zawo pakudzudza anzawo. Magole 3.000 patsogolo pake, Mpfumu Solomo idati: ‘Nidawona misozi ya wanthu womwe angaponderezewa, koma penze palibe angawanyamalisa. M’manja mwa wopondereza mwenze mphanvu, mwakuti woponderezewa mwawo enze alibe wowanyamalisa.’—Mlaliki 4:1.

Mwevi vinkuligana na ntsiku zino. Mu 2009, bukhu inango ya Nações Unidas idati, ‘kutonga koipa ndiko kunkuchitisa kuti wanthu ambabonere padziko.’

NTHAWE YOCHITAPO KANTHU!

Wanthu achada wolamulira wabwino na boma yabwino ndipo vimwevi ndivo vomwe Mulengi wathu watipolomisa!

Mafoto: Mabvuto yomwe yabwera ndawa ya utongi wa wanthu. 1. Mayi wa ku Ásia ali m’mphepete mwa nsewu ndipo mwana wake ankulira m’manja. 2. Mwamuna wokalamba ali basha kushipitali. 3. Masocha yankumenya nkhondo. 4. Wanthu wokalipa aphata vikwangwani m’manja ndipo ankuchita chipiringu. 5. Mayi na mwana wake m’ntsikana aima kunja kwa nyumba yawo, ndipo agumana kuti janera yaphwanyiwa. 6. Utsi ku fakitale unkudzonga chilengedwe. — Podiya achitonga ni munthu wabwino moyo tani, angakwaniselini kumalisa mabvuto ya wanthu

Mulungu wakhazikisa Ufumu panango kuti boma, yomwe idzangene m’malo mwa maufumu yose ya padziko yapasi, ndipo ‘udzakhalepo mpakana kale-kale.’ (Danieli 2:44) Moyu ni Ufumu womwe mamidyawu yazinji ya wanthu akhala ankuwupempherera. (Mateyu 6:9, 10) Koma Mulungu adzatongelini yekha. M’malo mwake, iye adasalula Ntongi yemwe adakhalako padziko yapasi ninge munthu. Ko Mulungu adasalula mbani?